Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

Wafundishe Watoto Wako

 SOMO LA 12

Mpwa wa Paulo Alikuwa Jasiri

Mpwa wa Paulo Alikuwa Jasiri

Sasa ngoja tujifunze kuhusu kijana fulani ambaye aliokoa maisha ya mjomba wake. Mjomba wa kijana huyo alikuwa mtume Paulo. Hatujui jina la kijana huyo, lakini tunajua kwamba alitenda tendo fulani la ujasiri sana. Je, ungependa kujua tendo hilo?—

Paulo alikuwa amefungwa gerezani katika jiji la Yerusalemu. Alikuwa amekamatwa kwa sababu ya kuhubiri kuhusu Yesu. Watu fulani wabaya walimchukia Paulo, kwa hiyo wakapanga njama mbaya sana. Wakaambiana hivi: ‘Ngoja tumwombe kamanda wa jeshi awaagize askari wake wampeleke Paulo mahakamani. Halafu tutajificha pembeni mwa barabara, kisha wakati Paulo anapita, tutamuua!’

Mpwa wa Paulo alimwambia Paulo na kamanda wa jeshi kuhusu njama fulani mbaya sana

Mpwa wa Paulo alisikia kuhusu njama hiyo. Angefanya nini? Alienda gerezani na kumwambia Paulo kuhusu njama hiyo. Mara moja, Paulo akamwambia aende kwa kamanda wa jeshi ili amwambie kuhusu njama hiyo mbaya sana. Je, unafikiri ilikuwa rahisi kwa mpwa wa Paulo kumfikia kamanda ili amwambie kuhusu njama hiyo?— Hapana, kwa sababu kamanda huyo alikuwa mtu mwenye cheo. Lakini mpwa wa Paulo alikuwa jasiri, hivyo akaenda kwa kamanda na kumwambia kuhusu njama hiyo.

Kamanda huyo alijua jambo alilohitaji kufanya. Aliandaa wanajeshi 500 ili wamlinde Paulo! Akawaambia wampeleke Paulo katika jiji la Kaisaria usiku huohuo. Je, Paulo alifika akiwa salama?— Bila shaka, watu hao wabaya hawakuweza kumshambulia! Njama yao mbaya iligonga mwamba.

Unajifunza jambo gani katika hadithi hii?— Wewe pia, unaweza kuwa jasiri kama mpwa wa Paulo. Tunahitaji kuwa jasiri tunapoongea na watu wengine kuhusu Yehova. Je, utakuwa jasiri na kuendelea kuongea na watu kuhusu Yehova?— Ukifanya hivyo, huenda ukaokoa maisha ya mtu mwingine.