Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

“Jitunzeni Katika Upendo wa Mungu”

 NYONGEZA

Kutatua Mizozo ya Kibiashara

Kutatua Mizozo ya Kibiashara

Kama ilivyorekodiwa kwenye 1 Wakorintho 6:1-8, mtume Paulo alizungumzia mashtaka ya kisheria kati ya waamini. Alihangaishwa na jinsi ambavyo Wakristo fulani katika Korintho ‘walithubutu kwenda mahakamani mbele ya watu wasio waadilifu.’ (Mstari wa 1) Paulo alitoa sababu muhimu zinazoonyesha kwa nini Mkristo hapaswi kumshtaki mwingine katika mahakama za kilimwengu bali kutatua mizozo ndani ya kutaniko. Acheni tuchunguze sababu fulani zilizomchochea kutoa shauri hilo lililoongozwa na roho kisha tuzungumzie hali fulani ambazo hazitajwi moja kwa moja katika shauri hilo.

Mzozo wa kibiashara ukitokea kati yetu na mwamini mwenzetu, kwanza tutajitahidi kushughulikia mambo kwa njia ya Yehova, bali si kwa njia yetu. (Methali 14:12) Kama Yesu alivyosema, ni afadhali kutatua haraka hali ya kutoelewana kabla haijawa mbaya zaidi. (Mathayo 5:23-26) Hata hivyo, inasikitisha kwamba Wakristo fulani wamezozana sana na hata kupeleka mizozo hiyo kwenye mahakama za kilimwengu. Paulo alisema: “Inamaanisha kushindwa kwenu kabisa kwamba mnakuwa na mashtaka ya kisheria mtu na mwenzake.” Kwa nini? Sababu moja kuu ni kwamba kesi kama hizo zinaweza kuharibu jina zuri la kutaniko na jina la Mungu tunayemwabudu. Hivyo tunachukua kwa uzito swali hili la Paulo: “Kwa nini msiache mkosewe?”—Mstari wa 7.

Pia, Paulo alisema kwamba Mungu ameandaa mpango mzuri katika kutaniko wa kutatua mizozo mingi. Wazee ni wanaume Wakristo ambao wanapata hekima kupitia ujuzi wa kweli za Maandiko, na Paulo anasema kwamba ‘wanaweza kuhukumu kati ya ndugu’ kuhusu “mambo ya maisha haya.” (Mstari wa 3-5) Yesu alionyesha kwamba mizozo inayohusu makosa mazito, kama vile uchongezi na upunjaji, inapaswa kusuluhishwa kwa kutumia hatua tatu: kwanza, wale wanaohusika wanapaswa kujitahidi kutatua jambo hilo kati yao  wakiwa faraghani; pili, hatua ya kwanza isipofaulu, shahidi mmoja au wawili wanaweza kuletwa; na tatu, ikiwa hatua hiyo iliyotangulia haifaulu, jambo hilo lipelekwe katika kutaniko, ambalo linawakilishwa na wazee.—Mathayo 18:15-17.

Si lazima wazee Wakristo wawe wanasheria au wafanyabiashara, na hilo si daraka lao. Hawaweki masharti ya kutatua mizozo ya kibiashara kati ya akina ndugu. Badala yake, wanajitahidi kusaidia wanaohusika kutumia Maandiko na kufikia makubaliano ya amani. Katika visa vigumu, wanaweza kuwasiliana na mwangalizi wa mzunguko au ofisi ya tawi ya Mashahidi wa Yehova. Hata hivyo, kuna hali fulani ambazo hazitajwi moja kwa moja katika shauri la Paulo. Ni hali gani hizo?

Katika visa fulani, kesi ya mahakamani inaweza kufanywa kidesturi tu au kwa sababu sheria inadai hivyo ili kufikia mapatano ya amani na yasiyo na ubinafsi. Kwa mfano, kesi ya mahakamani inaweza kuwa njia pekee ya kupata cheti cha talaka, kupewa ruhusa ya kuwatunza watoto, kuamua malipo ya talaka, kupata malipo ya bima, kuorodheshwa kati ya watu wanaostahili kulipwa katika kesi ya kufilisika, na kuidhinisha wasia. Katika visa vingine pia, ndugu anaweza kuhisi kwamba ni lazima awasilishe kesi ya kupinga mashtaka ili kujilinda kisheria. *

Kesi hizo zikiendeshwa bila roho ya mashindano, huenda zisiwe kinyume cha shauri la Paulo. * Hata hivyo, Mkristo anapaswa kuhangaikia hasa kutakaswa kwa jina la Yehova na amani na umoja wa kutaniko. Wafuasi wa Kristo wanajulikana hasa kwa sababu ya upendo wao, na “upendo . . . hautafuti faida zake wenyewe.”—1 Wakorintho 13:4, 5; Yohana 13:34, 35..

^ fu. 2 Katika visa visivyo vya kawaida, huenda Mkristo akamtendea Mkristo mwenzake tendo baya sana la uhalifu, kama vile, kubaka, kushambulia, kuua, au wizi mkubwa. Katika hali kama hizo, hakuna ubaya Mkristo akiripoti jambo hilo kwa wenye mamlaka, hata ingawa kufanya hivyo kunaweza kuongoza kwenye kesi mahakamani.

^ fu. 3 Unaweza kupata habari zaidi katika Mnara wa Mlinzi la Machi 15, 1997, ukurasa wa 17-22, na Oktoba 15, 1991, ukurasa wa 25-28.