Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

“Jitunzeni Katika Upendo wa Mungu”

 NYONGEZA

Kufunika Kichwa—Wakati Gani na kwa Nini?

Kufunika Kichwa—Wakati Gani na kwa Nini?

Ni wakati gani na kwa nini mwanamke Mkristo anapaswa kufunika kichwa katika ibada? Acheni tuchunguze mambo ambayo mtume Paulo aliandika kuhusu habari hiyo akiongozwa na roho ya Mungu. Anatupa mwongozo tunaohitaji ili kufanya maamuzi mazuri ambayo yanaonyesha tunamheshimu Mungu. (1 Wakorintho 11:3-16) Paulo anataja mambo matatu yanayopaswa kufikiriwa: (1) utendaji unaomlazimu mwanamke kufunika kichwa, (2) hali zinazomlazimu kufanya hivyo, na (3) kusudi la kutumia kanuni hiyo.

Utendaji. Paulo anataja mambo mawili: sala na kutoa unabii. (Mstari wa 4, 5) Bila shaka, sala ni njia ya kuzungumza na Yehova katika ibada. Leo, kutoa unabii kungerejelea ufundishaji wowote unaotegemea Biblia, ambao unafanywa na mhudumu Mkristo. Hata hivyo, je, Paulo anadokeza kwamba mwanamke anapaswa kufunika kichwa chake wakati wowote anaposali au kufundisha kweli ya Biblia? Hapana. Inategemea ni katika hali gani mwanamke anasali au kufundisha.

Hali. Maneno ya Paulo yanadokeza hali mbili—katika familia na katika kutaniko. Anasema: “Kichwa cha mwanamke ni mwanamume . . . Kila mwanamke ambaye husali au kutoa unabii kichwa chake kikiwa hakijafunikwa hukiaibisha kichwa chake.” (Mstari wa 3,5) Katika mpango wa familia, Yehova amemweka mume kuwa kichwa cha mwanamke. Mke asipotambua  mamlaka ya mume wake, atakuwa anamwaibisha mume wake ikiwa anatekeleza majukumu ambayo Yehova amempa mume. Kwa mfano, akilazimika kuongoza funzo la Biblia mume wake akiwapo, atatambua mamlaka ya mume wake kwa kufunika kichwa chake. Atafanya hivyo, iwe mume wake amebatizwa au hajabatizwa, kwa kuwa mume ndiye kichwa cha familia. * Ikiwa anahitaji kufundisha au kusali mtoto wake wa kiume aliyebatizwa akiwapo, atafunika kichwa pia, si kwa sababu mwana huyo ni kichwa cha familia, bali kwa sababu ya mamlaka ambayo wanaume waliobatizwa wamepewa katika kutaniko la Kikristo.

Paulo anazungumzia hali katika kutaniko, anaposema: “Mtu yeyote akiwa na mwelekeo wa kubishania desturi fulani nyingine, sisi hatuna nyingine, wala makutaniko ya Mungu.” (Mstari wa 16) Katika kutaniko la Kikristo, wanaume waliobatizwa wamepewa daraka la ukichwa. (1 Timotheo 2:11-14; Waebrania 13:17) Wanaume tu ndio huwekwa rasmi kuwa wazee na watumishi wa huduma, na Mungu amewapa jukumu la kulitunza kundi la Mungu. (Matendo 20:28) Hata hivyo, mara kwa mara, katika hali fulani mwanamke Mkristo anaweza kulazimika kushughulikia jambo ambalo kwa kawaida hushughulikiwa na mwanamume aliyebatizwa ambaye anastahili. Kwa mfano, huenda akahitaji kuongoza mkutano wa utumishi wa shambani kwa sababu hakuna mwanamume aliyebatizwa ambaye anastahili. Au anaweza kuongoza funzo la Biblia lililopangwa mapema, akiwa ameandamana na mwanamume aliyebatizwa. Kwa kuwa shughuli hizo ni sehemu ya utendaji wa kutaniko la Kikristo, anapaswa kufunika kichwa ili kuonyesha kwamba anashughulikia jukumu ambalo kwa kawaida hushughulikiwa na mwanamume.

Kwa upande mwingine, katika mambo mengi yanayohusu ibada, si lazima dada afunike kichwa. Kwa mfano, si lazima afunike kichwa anapotoa maelezo katika mikutano ya Kikristo, anapohubiri nyumba kwa nyumba akiwa na mume wake au mwanamume mwingine aliyebatizwa, au anapojifunza au kusali pamoja na watoto wake ambao hawajabatizwa ikiwa mume wake  hayupo. Bila shaka, huenda maswali mengine yakatokea, na ikiwa dada hana uhakika kuhusu jambo fulani, anaweza kufanya utafiti zaidi. * Ikiwa bado hana uhakika, na dhamiri yake inamchochea kufunika kichwa, si vibaya akifanya hivyo, kama picha iliyo kando inavyoonyesha.

Kusudi. Mstari wa 10 unataja sababu mbili zinazomlazimu mwanamke Mkristo kutimiza takwa hilo: “Mwanamke anapaswa kuwa na ishara ya mamlaka juu ya kichwa chake kwa sababu ya malaika.” Kwanza, fikiria maneno “ishara ya mamlaka.” Mwanamke anapofunika kichwa anaonyesha kwamba anatambua mamlaka ambayo Yehova amewapa wanaume waliobatizwa kutanikoni. Kwa hiyo, anaonyesha kwamba anampenda Yehova Mungu na kwamba ni mshikamanifu kwake. Sababu ya pili inaonyeshwa na maneno haya, “kwa sababu ya malaika.” Mwanamke anapofunika kichwa, hilo linawahusuje viumbe hao wa roho wenye nguvu?

Malaika hupendezwa wanapoona kwamba mamlaka ya Mungu inatambuliwa katika tengenezo lote la Yehova, mbinguni na duniani. Pia, wanafaidika kutokana na mifano ambayo wanadamu wasio wakamilifu wanaweka katika jambo hilo. Ndiyo, hata malaika wanajitiisha kwa mpango wa Yehova—jambo ambalo malaika kadhaa walishindwa kufanya wakati uliopita. (Yuda 6) Huenda malaika wakamwona mwanamke Mkristo ambaye ana uzoefu mwingi, ujuzi mwingi, na akili nyingi kuliko mwanamume fulani ambaye amebatizwa kutanikoni; na ijapokuwa hayo yote, mwanamke huyo anajitiisha kwa kupenda chini ya mamlaka ya mwanamume huyo. Katika visa fulani, huenda ikawa mwanamke huyo ni Mkristo mtiwa-mafuta ambaye baadaye atakuwa mmoja wa warithi pamoja na Kristo. Mwanamke huyo  atakuwa na cheo cha juu kuliko malaika, atatawala pamoja na Kristo mbinguni. Huo ni mfano mzuri kama nini ambao malaika wanaweza kujionea kwa sasa! Kwa kweli, akina dada wote wana pendeleo zuri kama nini la kuonyesha utii na unyenyekevu kupitia mwenendo wao wa ushikamanifu huku wakitazamwa na mamilioni ya malaika waaminifu!

^ fu. 3 Kwa kawaida mke Mkristo hatasali kwa sauti mume wake mwamini akiwapo isipokuwa katika hali zisizo za kawaida, kama vile wakati ambapo mume hawezi kuzungumza kwa sababu ya ugonjwa fulani.

^ fu. 2 Unaweza kupata habari zaidi katika gazeti la Mnara wa Mlinzi la Februari 15, 2015, ukurasa wa 30; Julai 15, 2002, ukurasa wa 26-27, na la Septemba 1, 1977, ukurasa wa 404-407.