UNATABASAMU unapomtazama msemaji jukwaani. Yeye ni ndugu kijana katika kutaniko lenu, na anatoa hotuba yake ya kwanza katika programu ya kusanyiko. Unapomsikiliza, unastaajabishwa na jinsi ambavyo watu wa Mungu wamezoezwa. Unakumbuka hotuba ya kwanza ya kijana huyo na unaona jinsi ambavyo amefanya maendeleo. Alizoezwa katika Shule ya Huduma ya Kitheokrasi, kisha katika Shule ya Utumishi wa Painia. Hivi karibuni, yeye na mke wake walifurahia kuhudhuria Shule ya Waeneza-Injili wa Ufalme. Unapopiga makofi kwa sababu ya hotuba nzuri ya ndugu huyo, unatazama huku na huku na kutafakari jinsi ambavyo watu wa Mungu wamefundishwa.

Biblia ilitabiri wakati ambapo watu wa Mungu ‘wangefundishwa na Yehova.’ (Isa. 54:13) Tunaishi wakati huo. Tunaelimishwa kupitia machapisho yetu, mikutano, makusanyiko, na shule mbalimbali ambazo zimekusudiwa kututayarisha kwa ajili ya migawo hususa katika tengenezo la Yehova. Katika sehemu hii, tutazungumzia jinsi ambavyo elimu hiyo inatoa uthibitisho hakika kwamba Ufalme wa Mungu unatawala leo.