Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Majibu ya Maswali 10 Ambayo Vijana Huuliza

 SWALI LA 3

Ninaweza Kuzungumzaje na Wazazi Wangu?

Ninaweza Kuzungumzaje na Wazazi Wangu?

KWA NINI NI MUHIMU

Ukipatana na wazazi wako, maisha yako yatakuwa mazuri.

WEWE UNGEFANYA NINI?

Fikiria hali hii: Ni Jumatano usiku. Geoff, mwenye umri wa miaka 17, amemaliza kazi zake za nyumbani naye anataka kupumzika! Anawasha televisheni na kuketi kwenye kiti anachopenda.

Wakati huohuo, baba yake anaingia, na anaonekana wazi hajafurahi.

“Geoffrey! Kwa nini unapoteza wakati ukitazama televisheni badala ya kumsaidia mdogo wako kufanya kazi za shule? Kwa nini wewe husikilizi unachoambiwa?”

“Sikia sasa,” Geoff anasema kimyakimya, lakini Baba anamsikia.

Baba yake anamkaribia. “Eti umesema nini?”

“Sijasema kitu,” Geoff anasema akishusha pumzi, huku akizungusha macho kwa dharau.

Sasa Baba anakasirika kwelikweli. “Unazungumza na nani hivyo?” anauliza kwa ukali.

Ikiwa ungekuwa Geoff, ungezuiaje mabishano hayo yasitokee?

TUA NA UFIKIRI!

Kuwasiliana na wazazi wako ni kama tu kuendesha gari. Unapokuta kizuizi barabarani, unaweza kutafuta njia nyingine.

 KWA MFANO:

“Ni vigumu kwangu kuzungumza na baba yangu,” anasema msichana anayeitwa Leah. “Nyakati nyingine ninaweza kuzungumza naye kwa muda kisha aseme, ‘Samahani, ulikuwa unazungumza na mimi?’”

LEAH ANAWEZA KUFANYA MAMBO MATATU.

  1. Kumfokea baba yake.

    Leah anasema kwa hasira: “Nakwambia jambo muhimu! Nisikilize!”

  2. Kuacha kabisa kuzungumza na baba yake.

    Leah anaacha kabisa kumweleza baba yake matatizo yake.

  3. Kungoja hadi wakati mwingine unaofaa na kujaribu tena kuzungumzia tatizo lake.

    Leah anazungumza na baba yake uso kwa uso baadaye, au anamwandikia barua akimweleza tatizo lake.

Wewe ungependekeza Leah atumie njia gani?

FIKIRIA: Mawazo ya baba yake yako mbali, naye hatambui kwamba Leah amekasirika. Kwa hiyo, ikiwa Leah atachagua Njia ya 1, huenda baba yake akaona kwamba anafoka bila sababu. Huenda njia hiyo isimfanye baba yake amsikilize, wala haitaonyesha kwamba Leah anamheshimu. (Waefeso 6:2) Hivyo basi, kwa kweli njia hiyo haitakuwa na matokeo mazuri.

Unapokuta kizuizi barabarani si lazima uvunje safari yako, kwa njia hiyohiyo pia unaweza kutafuta njia nyingine ya kuwasiliana na wazazi wako

Huenda Njia ya 2 ikaonekana kuwa rahisi kati ya zote, hata hivyo, si jambo la hekima kuitumia. Kwa nini? Kwa sababu ili atatue matatizo yake, Leah anahitaji kuzungumza na baba yake, na ili Baba amsaidie anahitaji kuelewa mambo ambayo Leah anakabili maishani. Kukataa kuzungumza hakutimizi lolote.

Hata hivyo, kwa kutumia Njia ya 3, Leah haruhusu kizuizi kimfungie njia. Badala yake, anajaribu kuzungumzia jambo hilo wakati mwingine. Na akiamua kumwandikia baba yake barua, huenda Leah akatulia mara moja.

Pia, kuandika barua kunaweza kumsaidia achague maneno hususa anayotaka kumwambia baba yake. Atakaposoma barua hiyo, baba ya Leah ataelewa kile ambacho Leah alikuwa anajaribu kumwambia na hilo litamsaidia kuelewa vizuri zaidi matatizo ya Leah. Hivyo basi, Njia ya 3 itakuwa na manufaa kwa Leah na pia kwa baba yake. Iwe atazungumza na baba yake uso kwa uso au atamwandikia barua, kufuata njia hii ni kutii himizo la Biblia la ‘kufuatilia mambo yanayofanya kuwe na amani.’—Waroma 14:19.

Leah anaweza kutumia njia gani nyingine?

Jaribu kufikiria njia nyingine. Kisha fikiria matokeo yanayoweza kupatikana kwa kutumia njia hiyo.

 EPUKA KUWACHANGANYA WAZAZI WAKO

Kumbuka, nyakati nyingine maneno unayosema na ujumbe ambao wazazi wako wanapata hutofautiana.

KWA MFANO:

Wazazi wako wanakuuliza kwa nini unaonekana huna furaha. Unawajibu, “Sitaki kuzungumzia hilo.”

Wazazi wako wanaweza kufikiri unamaanisha: “Siwaamini, na hivyo siwezi kuwaambia. Afadhali nikazungumze na rafiki zangu kuhusu tatizo hili lakini si ninyi.”

Wazia kwamba una tatizo zito, na mzazi wako anataka kukusaidia. Ukisema: “Usijali. Nitalishughulikia mwenyewe.”

  • Wazazi wako wanaweza kufikiri unamaanisha nini?

  • Afadhali ungesema nini?