Licha ya kushtakiwa mahakamani na kukabili hali ngumu, ndugu na dada zetu Wakristo wanaendelea kudhihirisha ushikamanifu wao kwa Yehova Mungu. Mfano wao unatuchochea kubaki imara katika imani, tukiwa na uhakika kwamba “Yehova atamtendea mshikamanifu wake kwa njia ya pekee.”—Zb. 4:3.

ARGENTINA | Haki ya Kuwafundisha Watoto Mambo ya Kidini

Ruth alilelewa katika familia ya Kikristo lakini aliacha kutenda akiwa bado mdogo. Baadaye, alianzisha uhusiano na mwanamume fulani na kisha akajifungua mtoto wa kike. Siku moja, akiwa jijini La Plata, Ruth aliwaona Mashahidi wa Yehova kwenye meza ya machapisho na akakumbuka jinsi alivyolelewa katika familia ya Kikristo. Alichochewa kuanza kushirikiana tena na kutaniko na akaanza kumfundisha binti yake Biblia. Baba ya mtoto huyo alipinga jambo hilo na akamshtaki Ruth mahakamani ili azuiwe kumfundisha binti yao Biblia au kumpeleka kwenye mikutano ya Kikristo.

Wakili wa Ruth alipinga mashtaka hayo na kusema kuwa wazazi wote wawili wana haki ya kumfundisha mtoto wao mambo ya dini na kuwa mahakama haipaswi kuingilia uhuru huo isipokuwa kuwe na uthibitisho kwamba mafundisho hayo yanamharibu mtoto. Mahakama iliamua kwamba wazazi wanapaswa kuheshimu haki ya mtoto ya kuabudu kwa uhuru ingawa wakati huo alikuwa na umri wa miaka minne tu! Mahakama ya rufaa ilieleza kuwa mtoto huyo alikuwa mdogo sana kujifanyia maamuzi kuhusu ibada, hivyo, wazazi wote wawili wana haki ya kumfundisha mambo ya kidini.

Binti ya Ruth husoma Biblia kila siku na kuhudhuria mikutano pamoja na mama yake. Anatazamia kwa hamu kutembelea Betheli iliyo jijini Buenos Aires.

 AZERBAIJAN | Haki ya Kueleza Wengine Imani ya Kidini

Mtume Paulo alisema kwamba katika kutaniko la kweli la Kikristo, “kiungo kimoja kikiumia, vile viungo vingine vyote huumia pamoja nacho.” (1 Kor. 12:26) Hilo limethibitika kuwa kweli. Mashahidi wa Yehova duniani kote walisikitishwa sana na mateso ambayo Dada Irina Zakharchenko na Valida Jabrayilova walikabili nchini Azerbaijan. Mwezi Februari 2015, wenye mamlaka waliwashtaki dada hao kwa kujihusisha na utendaji wa kidini usio halali. Hakimu aliamuru wafungwe wakisubiri kesi yao isikilizwe, na kwa kuwa kesi iliahirishwa mara kadhaa, dada hao walikaa gerezani kwa karibu mwaka mmoja wakivumilia kutendewa vibaya na kunyimwa vitu muhimu.

Azerbaijan: Valida Jabrayilova na Irina Zakharchenko

Kesi yao iliposikilizwa Januari 2016, hakimu aliwapata na hatia na wakatozwa faini. Hata hivyo, hakimu huyo alifuta faini hiyo kwa sababu walifungwa kabla ya kesi yao kusikilizwa na akawaachilia huru. Mahakama ya Rufaa ya Baku ilipokataa kuondoa mashtaka ya uhalifu dhidi yao, walikata rufaa katika Mahakama Kuu. Kwa kuongezea, walituma malalamiko yao kwa Kamati ya Haki za Kibinadamu ya Umoja wa Mataifa kwa sababu ya kutendewa kikatili na kukiukwa kwa haki yao ya kueleza imani ya kidini.

Kwa sasa, dada hao wanaendelea vizuri. Wanathamini sana jinsi walivyohangaikiwa, pia sala nyingi zilizotolewa kwa ajili yao. Dada Jabrayilova aliandikia Baraza Linaloongoza  barua iliyosema hivi: “Ninaamini kwamba sala zenu zilitusaidia kuvumilia hali ngumu. Sitasahau kamwe jinsi Yehova, ninyi, na ndugu na dada zetu duniani kote walivyotujali na kutuonyesha upendo.”

ERITREA | Kufungwa Gerezani Kwa Sababu ya Imani Yao

Kufikia Julai 2016, serikali ya Elitrea imewahukumu kifungo cha gerezani Mashahidi wa Yehova wapatao 55 kwa sababu ya imani yao. Ndugu watatu, yaani, Paulos Eyassu, Isaac Mogos, na Negede Teklemariam wamekuwa gerezani tangu Septemba 1994, na ndugu wengine tisa wamekuwa gerezani kwa miaka kumi hivi.

Hata hivyo, jambo zuri lilitukia Januari 2016, mahakama iliposikiliza kesi ya Mashahidi waliokamatwa huko Asmara mwezi wa Aprili 2014 kwa sababu ya kuhudhuria Ukumbusho. Hii ilikuwa mara ya kwanza kwa mamlaka kuwashtaki rasmi Mashahidi kwa kosa la“uhalifu” na kuwapa nafasi ya kujitetea. Kama ilivyotazamiwa, ndugu na dada wengi walipatikana na hatia ya kuhudhuria mkutano “usio halali,” wakatozwa faini na kisha wakaachiliwa. Hata hivyo, Saron Gebru, mmoja wa dada walioshtakiwa, alikataa kutoa faini. Hivyo, alihukumiwa kifungo cha miezi sita gerezani. Dada Gebru alipokuwa gerezani aliweza kutembelewa na wageni mara moja kwa Juma na alisema kwamba alitunzwa vizuri. Yeye pamoja na Mashahidi wengine 54 walio gerezani wanathamini sana sala nyingi zinazotolewa kwa ajili yao, na sote tunaendelea ‘kuwakumbuka wale walio katika vifungo vya gereza kana kwamba sisi tumefungwa pamoja nao.’—Ebr. 13:3.

UJERUMANI | Uhuru wa Kidini—Kuandikishwa Kisheria

Mnamo Desemba 21, 2015, Shirika la Kidini la Mashahidi wa Yehova liliandikishwa kisheria katika jimbo la Bremen, lililo kaskazini-magharibi mwa Ujerumani. Uamuzi huo ulimaliza pambano la kutaka kusajiliwa kisheria ambalo limedumu katika mahakama za Ujerumani kwa miaka minne. Kufuatia  uamuzi wa Mahakama Kuu jijini Berlin, mengi kati ya majimbo 16 nchini Ujerumani yaliwaandikisha kisheria Mashahidi wa Yehova. Hata hivyo, mamlaka katika jimbo la Bremen zilikataa kulitambua shirika la kidini la Mashahidi wa Yehova, hasa kwa sababu ya madai ya uwongo kutoka kwa wapinzani.

Mwaka wa 2015, Mahakama Kuu ya Kikatiba nchini Ujerumani ilitangaza kwamba jimbo la Bremen lilikiuka haki ya kikatiba ya Mashahidi kwa kukataa kuwasajili kisheria. Uamuzi huo unaonyesha kuwa katiba inayoruhusu uhuru wa ibada inalinda utendaji wa Mashahidi wa Yehova katika jimbo la Bremen. Makutaniko katika jimbo hilo hayapaswi kutozwa kodi na yanapaswa kuwa na uhuru kama dini nyingine nchini Ujerumani.

KYRGYZSTAN | Haki ya Kueleza Imani ya Kidini

Mwezi Machi 2013, mamlaka jijini Osh, nchini Kyrgyzstan iliwasingizia mashtaka ya uwongo Oksana Koriakina na mama yake Nadezhda Sergienko. Mwendesha mashtaka aliwashtaki Mashahidi hao kwa kosa la kuwadanganya watu walipowafundisha Biblia, na hivyo walihukumiwa kifungo cha nyumbani wakisubiri kesi yao isikilizwe. Oktoba 2014, mahakama ilitambua kwamba ushahidi uliotolewa ulikuwa wa uwongo, utaratibu ulikiukwa, na hivyo dada hao hawakuwa na hatia. Mahakama ya rufaa ilikubaliana na uamuzi huo mwezi Oktoba 2015.

Hata hivyo, mwendesha mashtaka wa jiji la Osh kwa mara nyingine alikata rufaa wakati huu katika Mahakama Kuu ya Kyrgyzstan. Mahakama iliamuru dada hao wakamatwe tena na kufunguliwa kesi upya. Kesi hiyo iliposikilizwa Aprili 2016, mawakili ambao waliwawakilisha dada hao waliomba kesi hiyo itupiliwe mbali kwa sababu kulingana na sheria muda ambao kesi yao ilipaswa kusikilizwa ulikuwa umeisha. Hakimu alifuta kesi hiyo, na kumaliza mashtaka ya uhalifu dhidi ya dada hao.

 Dada hao walidumisha mtazamo unaofaa kwa kipindi hicho chote walichokuwa wakikabili hali hizo. Dada Sergienko alisema hivi: “Watu hukasirika wanapotendewa vibaya, lakini nilihisi kwamba Yehova anatupenda na kutujali kupitia ndugu na dada zetu. Hatukuwa peke yetu.” Dada hao walijionea moja kwa moja Yehova akitimiza ahadi iliyo katika andiko la Isaya 41:10 linalosema hivi: “Usiogope . . . Nitakushika kwelikweli kwa mkono wangu wa kuume wa uadilifu.”

KYRGYZSTAN | Uhuru wa Kidini—Kutambuliwa Kisheria

Agosti 9, 2015, maofisa kumi wa polisi katika jiji la Osh, nchini Kyrgyzstan, waliwavamia wahudhuriaji kwenye mkutano wa Kikristo. Maofisa hao waliamuru mkutano huo usio “halali” usitishwe mara moja, na hata wakatishia kuwapiga risasi wahudhuriaji zaidi ya 40 waliokuwepo. Polisi hao waliwakamata ndugu kumi na kuwapeleka kituo cha polisi, huko waliwapiga vikali ndugu tisa na kisha wakawaachilia. Siku mbili baadaye, polisi walimkamata Nurlan Usupbaev, mmoja kati ya ndugu waliopigwa vibaya na wakamshtaki kwa kuendesha mkutano wa kidini kinyume na sheria.

Kesi ya Ndugu Usupbaev ilipowasilishwa kwenye Mahakama ya Jiji la Osh, hakimu alifuta kesi hiyo kwa sababu hakukuwa na ushahidi wowote. Mwendesha mashtaka alikata rufaa katika Mahakama ya Mkoa ya Osh, ambayo pia ilifutilia mbali rufaa hiyo na kusema kwamba Ndugu Usupbaev hakuwa na hatia kwa kuendesha mkutano wa kidini kwa kuwa Mashahidi wa Yehova wameandikishwa kisheria nchini Kyrgyzstan.

Bila kukata tamaa, mwendesha mashtaka huyo alikata rufaa tena katika Mahakama Kuu ya Kyrgyzstan. Ulikuwa ushindi mkubwa kwa Ndugu Usupbaev, Machi 2016, Mahakama Kuu ilipofuta kesi hiyo, na hivyo kuonyesha kwamba mahakama za chini zilikuwa zimetoa uamuzi wa haki, kwa kuwa Mashahidi wa Yehova nchini Kyrgyzstan wana haki ya  kukusanyika pamoja kwa ajili ya mikutano ya kidini. Kesi nyingine iliyowasilishwa na ndugu waliopigwa na polisi inasubiri kusikilizwa.

URUSI | Uhuru wa Kidini

Wenye mamlaka nchini Urusi wanaendelea kuwashambulia Mashahidi wa Yehova na utendaji wao licha ya mashirika ya kutetea haki za kibinadamu ya Urusi kupinga vikali mashambulio hayo. Kufikia sasa, mamlaka zimetangaza kuwa machapisho 88 ya Mashahidi yana “msimamo mkali” na pia wamepiga marufuku tovuti rasmi ya Mashahidi wa Yehova,  yaani, jw.org. Katika mwaka wa 2015, maofisa wa forodha walikataa kuruhusu shehena yenye Biblia Takatifu—Tafsiri ya Ulimwengu Mpya kuingizwa nchini humo, na mahakama mjini Vyborg inaendelea kufanya mazungumzo ili kuamua kama Biblia hiyo mpya ina habari zenye “msimamo mkali.” Mwezi Machi 2016, Ofisi ya Mwendesha Mashtaka Mkuu ilichukua hatua kali ya kutishia kufunga makao makuu ya Mashahidi wa Yehova yaliyoko Solnechnoye, St. Petersburg, kwa madai kuwa yanajihusisha na “utendaji wenye msimamo mkali.”

Licha ya kampeni hizo mbaya zinazofadhiliwa na serikali, kuna habari njema. Oktoba 2015, mwendesha mashtaka aliwasilisha shtaka la kulifuta Shirika la Kidini la Mashahidi wa Yehova jijini Tyumen, jiji lililo kilometa 2100 mashariki mwa mji mkuu wa Moscow. Licha ya uthibitisho kuwa polisi walitoa ushahidi wa uwongo dhidi ya Mashahidi, Mahakama ya Mkoa ya Tyumen ililipata na hatia shirika la Mashahidi. Hata hivyo, Aprili 2016, Mahakama Kuu ya Shirikisho la Urusi ilitengua uamuzi huo, ikiamua kwamba “hakukuwa na sababu zozote za kulifuta Shirika la Kidini la Mashahidi wa Yehova  katika Jiji la Tyumen.” Hakimu aliposoma uamuzi huo, ndugu na dada 60 waliokuwa wakisiliza kesi hiyo, walisimama na kupiga makofi kwa furaha.

Watu wa Yehova nchini Urusi wameazimia kuendelea kumwabudu, licha ya “silaha yoyote itakayofanywa juu [yao].”—Isa 54:17.

RWANDA | Haki ya Kupata Elimu Bila Ubaguzi wa Kidini

Katika miaka ya hivi karibuni, watoto ambao ni Mashahidi wa Yehova nchini Rwanda wamefukuzwa shuleni kwa sababu ya kukataa kuunga mkono mambo ya kidini au ya kizalendo. Ili kutatua tatizo hilo, mnamo Desemba 14, 2015, serikali ilitoa sheria inayokusudiwa kumaliza ubaguzi wa kidini shuleni. Sheria hiyo imezitaka shule ziheshimu uhuru wa ibada wa kila mwanafunzi.

Juni 9, 2016, tovuti ya jw.org iliandika Habari yenye kichwa “Serikali ya Rwanda Yadhibiti Ubaguzi wa Kidini Shuleni.” Kwa kupendeza, gazeti la mtandaoni linalojulikana sana lilirudia kuandika habari hiyo. Watu zaidi ya 3,000 walitembelea tovuti ya gazeti hilo na wengi walitoa maoni yanayounga mkono uamuzi huo wa serikali. Mashahidi nchini Rwanda wanathamini sana sheria hiyo ambayo itawawezesha watoto wao kusoma bila kubaguliwa kidini.

Rwanda: Waliruhusiwa kurudi shuleni

KOREA KUSINI | Uhuru wa Dhamiri—Utumishi wa Kiraia Badala ya Utumishi wa Kijeshi

Kwa zaidi ya miaka 60, Mashahidi wanaume nchini Korea Kusini walio kati ya umri wa miaka 19 na 35 wamekabili suala la utumishi wa kijeshi. Serikali ya Korea Kusini haitambui haki ya kukataa utumishi wa kijeshi kwa sababu ya dhamiri na wala hairuhusu utumishi wa badala kwa wale wanaokataa kujiunga na jeshi. Katika visa fulani, familia za Mashahidi, yaani, babu, baba, na mtoto wametumika gerezani kwa kukataa kujiunga na utumishi wa kijeshi.

 Mahakama ya Kikatiba imeamua mara mbili kwamba Sheria ya Utumishi wa Jeshi imo katika katiba, hata hivyo, mahakama za chini na wanaume wanaoadhibiwa kwa sababu ya sheria hiyo wamepeleka malalamishi yao tena kwenye Mahakama ya Kikatiba. Hivyo, mnamo Julai 9, 2015, Mahakama hiyo ilisikiliza kesi ya wale wanaokataa utumishi ya kijeshi kwa sababu ya dhamiri zao. Ndugu Min-hwan Kim, ambaye alitumikia gerezani kwa miezi 18 kwa kuwa dhamiri yake haingemruhusu kujiunga na jeshi, anasema hivi: “Niliadhibiwa na nikaachiliwa huru kutoka gerezani. Hata hivyo, ninatumaini kwamba wengine wanaokataa kujiunga na jeshi kwa sababu ya dhamiri zao hawataadhibiwa. Wakiruhusiwa kufanya utumishi mwingine wa badala, watainufaisha jamii.” Mahakama hiyo ya Kikatiba itatoa uamuzi wake hivi karibuni.

TURKMENISTAN | Bahram Hemdemov

Ndugu Hemdemov mwenye umri wa miaka 53, ana mke na watoto wanne. Yeye ni mwenye bidii katika mambo ya kiroho na anaheshimiwa katika jamii. Mwezi Mei 2015, mahakama ilimhukumu kifungo cha miaka minne gerezani na kazi ngumu kwa sababu ya kufanya mkutano wa dini “usio halali” nyumbani kwake. Amefungwa katika kambi yenye hali mbaya mjini Seydi ambako anateswa vikali kwa kupigwa na kuhojiwa na wenye mamlaka. Hata hivyo, yeye na familia yake wamedumisha utimilifu wao kwa Yehova Mungu. Mke wake, Gulzira, amemtembelea mara kadhaa na kumtia moyo.

Tunapoona watu wa Yehova wakiendelea kudumisha ushikamanifu wao licha ya majaribu, tunasali kwa ajili yao. Mfano wao unatuchochea kuimarisha ushikamanifu wetu kwa Mungu, huku tukiamini ahadi iliyo katika Zaburi 37:28: “Naye hatawaacha washikamanifu wake.”