Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

2017— Kitabu cha Mwaka cha Mashahidi wa Yehova

 MATUKIO MUHIMU YA MWAKA ULIOPITA

Mkutano Mpya wa Huduma na Maisha Yetu ya Kikristo

Mkutano Mpya wa Huduma na Maisha Yetu ya Kikristo

KATIKA mkutano wa kila mwaka wa Watch Tower Bible and Tract Society of Pennsylvania uliofanyika Oktoba 3, 2015, Anthony Morris mshiriki wa Baraza Linaloongoza alitangaza kwamba badala ya kuwa na mikutano ya Shule ya Huduma ya Kitheokrasi, Mkutano wa Utumishi, na Funzo la Biblia la Kutaniko tutakuwa na mkutano wa Huduma na Maisha Yetu ya Kikristo. Ndugu Morris alieleza pia kwamba badala ya kuwa na Huduma Yetu ya Ufalme tutakuwa na chapisho lenye kurasa nane, lililo na rangi kuu nne, linaloitwa Daftari la Mkutano wa—Huduma na Maisha Yetu ya Kikristo, ambalo litakuwa na ratiba ya mkutano wa kila juma na picha zilizokusudiwa kufanya usomaji wa Biblia uwe wenye kuvutia zaidi.

 Mkutano huo mpya umegawanywa katika sehemu kuu tatu:

  1. Hazina za Neno la Mungu. Sehemu hii inaanza kwa hotuba ya dakika 10 inayotegemea usomaji wa Biblia wa juma hilo na kuuhusianisha na picha zilizo kwenye daftari. Kipengele cha pili chenye kichwa “Kutafuta Hazina za Kiroho,” kinahusisha mazungumzo ya dakika nane ya maswali na majibu yanayotegemea usomaji wa Biblia wa juma hilo, kisha kufuatiwa na usomaji wa Biblia wa dakika nne.

  2. Boresha Huduma Yako. Kwa kawaida katika sehemu hii, wanafunzi watatu wataonyesha jinsi ya kufundisha katika ziara ya kwanza, ya pili, na katika funzo la Biblia.

  3. Maisha ya Mkristo. Sehemu hii inazungumzia jinsi ya kutumia kanuni za Biblia katika maisha yetu ya kila siku. Kipengele kikuu katika sehemu hii ni Funzo la Biblia la Kutaniko linaloongozwa kwa maswali na majibu.

Wahubiri kutoka katika maeneo mbalimbali duniani wameonyesha shukrani zao kwa ajili ya mazoezi mazuri wanayopata kutokana na mkutano huo mpya. Ndugu mmoja anayeishi nchini Australia aliandika hivi: “Mkutano wa Huduma na Maisha Yetu ni mzuri sana! Habari zinazozungumziwa zinahusu maisha yetu moja kwa moja, na maonyesho ni rahisi. Jioni inaonekana kusonga kwa kasi, kwa kuwa sehemu za [mkutano] ni fupi, ziko wazi, na zinavutia sana, hasa video na pia kwa kuwa watoto wanahusishwa.”

Baraza moja la wazee nchini Italia liliandika hivi: “Tumeona kwamba mkutano huu mpya umetuchochea sisi sote kujitayarisha vizuri zaidi, na matokeo ni kwamba, tumeboresha ustadi wetu wa kufundisha. Mkutano mpya wa  katikati ya juma unaonyesha marekebisho mazuri ambayo Yehova amefanya ili kuwafundisha watu wake. Mhubiri mmoja mwenye umri wa miaka 15, alisema hivi: ‘Awali, ilikuwa vigumu kwangu kukazia fikira mkutano mzima. Lakini mkutano huu umenisaidia kukazia fikira na kujitayarisha vizuri zaidi ninapokuwa nyumbani.’”

Familia moja nchini Austria iliandika hivi: “Ilikuwa vigumu kufanya usomaji wa Biblia wa kila juma pamoja na binti yetu mwenye umri wa miaka 10. Lakini sehemu ya ‘Hazina za Neno la Mungu’ imetuchochea kutoa maelezo zaidi. Sasa, sote watatu tunafurahia kujitayarisha kwa ajili ya usomaji wa Biblia wa kila juma. Kwa kuongezea, tunamwona binti yetu akifanya maendeleo ya kiroho.”

Ines anayeishi nchini Ujerumani alieleza hivi: “Nimetiwa moyo kujitayarisha na kutafakari kwa kina zaidi kuhusu habari zitakazozungumziwa. Sijawahi kufanya utafiti mwingi kama ninavyofanya. Sasa ninafurahia uhusiano mzuri zaidi pamoja na Yehova. Ulimwengu wa Shetani hunifanya nivunjike moyo na kukata tamaa. Lakini mikutano huniimarisha na kunifanya nisonge mbele.”

Makutaniko katika Visiwa vya Solomon yanafurahia sana mkutano wa katikati ya juma na yanafanya jitihada zinazofaa ili kufaidika na mkutano huo kikamili. Makutaniko mengi yako katika maeneo ambayo hayana umeme au huduma za Intaneti, na akina ndugu wanaishi katika visiwa vya mbali. Wanafanya nini ili kupata vifaa na video za kila mwezi kwa ajili ya mikutano? Wahubiri wa kutaniko moja katika kisiwa cha Malaita waliamua kufanya kazi ya kuuza nazi pamoja. Walitumia pesa walizokusanya kununua kifaa rahisi cha kuchezea video kinachotumia umeme wa jua. Na ili kupata video za kila mwezi, akina ndugu  husafiri hadi kwenye eneo ambalo lina intaneti ili waweze kuzipakua, kisha, huwatumia video hizo akina ndugu wengine kutanikoni.

Ndugu mmoja nchini Marekani, aliandika hivi: “Mimi hujifunza zaidi kwa kutazama. Haijawa rahisi kwangu kujifunza kwa zaidi ya miaka 40. Ninahitaji kusoma jambo mara kadhaa ili niweze kumfafanulia mtu mwingine jambo hilo. Kwa hiyo, ninataka kulishukuru Baraza Linaloongoza kwa video na picha za kujifunzia ambazo tumepata. Video za utangulizi wa vitabu vya Biblia zinavutia sana, na picha katika daftari la mkutano zinanisaidia kwelikweli! Ni wazi kwamba Yehova amebariki jitihada zenu kwa ajili ya watu wake. Asanteni sana.”

Malawi