Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

2017— Kitabu cha Mwaka cha Mashahidi wa Yehova

 GEORGIA

Walimkumbuka Muumba Wao Mkuu

Walimkumbuka Muumba Wao Mkuu

Masimulizi mengi tuliyosoma katika kurasa zilizotangulia, yanahusu vijana ‘waliomkumbuka Muumba wao Mkuu katika siku za ujana wao.’ (Mhu. 12:1) Kati ya mapainia 3,197 walioko nchini Georgia, asilimia 33 hivi wana umri wa miaka isiyozidi 25. Kwa nini vijana wengi sana wana bidii katika mambo ya kiroho?

Inaonekana kuna mambo kadhaa yaliyochangia hali hiyo. Jambo moja ni kwamba nchini Georgia washiriki wa familia wana uhusiano wa karibu sana. Konstantine, aliyelea watoto watano katika kweli anaeleza hivi: “Jambo lililofanya nivutiwe na kweli ni kuhisi kwamba Yehova ni Baba mwenye upendo. Hivyo nilipopata watoto, lengo langu lilikuwa kuwasaidia watoto wangu wajihisi huru kuwa pamoja nami.”

Malkhazi na mke wake, wana watoto watatu na wanajitahidi sana kuimarisha uhusiano wa familia yao. Anasema hivi: “Mara kwa mara, sisi huwaomba watoto wetu  watafakari kuhusu kile wanachothamini kumhusu kila mshiriki wa familia yetu. Kisha tunawaomba watueleze mambo hayo wakati wa ibada ya familia. Kufanya hivyo kumewasaidia wajifunze kuona sifa nzuri za wengine na kuwathamini.”

“Sasa Maisha Yangu Yana Kusudi Halisi!”

Ili kuwaunga mkono wazazi wanapowazoeza watoto, wazee huwahusisha watoto katika utendaji mbalimbali wa kutaniko mapema iwezekanavyo. Nestori, ambaye alibatizwa akiwa na umri wa miaka 11, anaeleza hivi: “Wazee walinipa migawo midogo-midogo tangu nilipokuwa na umri mdogo sana. Jambo hilo lilifanya nijihisi kuwa sehemu ya kutaniko.”

Ndugu wenye mifano mizuri kutanikoni na msaada kutoka kwa wazee ni muhimu pia. Koba, ndugu ya Nestori, anaeleza hivi: “Kati ya watoto wote katika familia yetu, hali yangu ya kiroho ndiyo iliyoathiriwa zaidi nilipokuwa tineja. Lakini mzee mmoja wa kutaniko ambaye alikuwa  kijana, alikuwa mfano mzuri kwangu, naye alijitahidi siku zote kunielewa na hakunihukumu. Alinisaidia sana kumrudia Yehova.”

Leo, Nestori na Koba, pamoja na dada yao, Mari, wanatumikia pamoja katika eneo la mbali. Koba anasema hivi, “Sasa maisha yangu yana kusudi halisi!”

“Watoto Wangu Wanaendelea Kutembea Katika Kweli”

Ofisi ya tawi pia huunga mkono jitihada za wazazi za kuwazoeza watoto wao, kwa kuwahusisha vijana Wakristo katika miradi ya kitheokrasi. Mshiriki mmoja wa Halmashauri ya Tawi anaeleza hivi: “Tunawathamini sana vijana wetu, kwa hiyo tunajaribu kuwategemeza wanapojitahidi kufikia miradi yao ya kiroho.”

Mashahidi nchini Georgia wakifanya kazi pamoja na watumishi wa kimataifa kwenye ujenzi wa Jumba la Kusanyiko jijini Tbilisi

Vijana huchochewa kwa njia kubwa wanapofanya kazi na kushirikiana kwa ukaribu na ndugu na dada wakomavu. Mamuka, ambaye alifanya kazi pamoja na watumishi wa kimataifa kwenye ujenzi wa Jumba la Kusanyiko jijini Tbilisi, anasema hivi: “Miradi hiyo ya kimataifa ilinipa fursa za kujifunza kutoka kwa wengine. Mbali na kupata ustadi mwingi wa kazi, nilijifunza pia mambo mengi ya kiroho.”

Uhusiano wa karibu katika familia, kitia-moyo cha wazee, na kuwa na ndugu wenye mfano mzuri kutanikoni kumewasaidia vijana wengi nchini Georgia kufanya maendeleo ya kiroho. Wazazi wao wanahisi kama mtume Yohana aliyeandika hivi: “Sina sababu nyingine kubwa zaidi ya kuwa na shukrani kuliko mambo haya, kwamba niwe nikisikia watoto wangu wanaendelea kutembea katika kweli.”—3 Yohana 4.

Kazi ya Kutafsiri Inapanuka

Mnamo 2013, Baraza Linaloongoza liliomba ofisi zote za tawi zichunguze ikiwa kuna uhitaji wa kupata machapisho  ya lugha nyingine zinazozungumzwa katika eneo lao. Lengo lilikuwa kuwafikishia watu wengi zaidi habari njema.

Hivyo, ofisi ya tawi ya Georgia iliamua kutafsiri machapisho katika lugha ya Svan na Mingrelia, lugha ambazo zinakaribiana sana na Kigeorgia hivi kwamba baadhi ya watu wanaziona kuwa lahaja za lugha hiyo.

Mapainia wenye bidii wa eneo la Svaneti waliandika hivi: “Wasvan wanapendezwa kikweli na mambo ya kiroho na wanaheshimu sana Biblia. Hata wale ambao mwanzoni walisita kukubali machapisho yetu walipendezwa kuchukua machapisho yaliyotafsiriwa katika lugha yao.”

Wahubiri wote wanaozungumza Kimingrelia waliguswa sana moyo walipoanza kuwa na mikutano katika lugha yao. Giga, painia kijana, anasema hivi: “Sasa ninatoa  maelezo mkutanoni kwa maneno yangu mwenyewe. Sihitaji kutafsiri mawazo akilini kabla ya kutoa maelezo.”

Zuri, mzee katika kutaniko la Kimingrelia lililo katika eneo la Tkaia, alieleza hivi: “Nimepitia hali nyingi maishani, nyingine zenye kufurahisha na nyingine zenye kuhuzunisha, lakini hakuna ile ambayo imewahi kunifanya nilie. Hata hivyo, nilitokwa na machozi tulipoimba nyimbo za Ufalme katika Kimingrelia kwa mara ya kwanza mikutanoni, na kwa kweli hakuna mtu aliyehudhuria ambaye hakutokwa na machozi.”

Matukio Muhimu ya Karibuni

Tukio muhimu katika historia ya Mashahidi nchini Georgia lilitukia Jumamosi, Aprili 6, 2013. David Splane, mshiriki wa Baraza Linaloongoza, alitoa hotuba ya kuweka  wakfu ofisi ya tawi iliyokarabatiwa na kupanuliwa, Jumba la Kusanyiko, na jengo jipya kwa ajili ya shule ya Biblia. Mashahidi wengi waliwakaribisha kwa moyo wote wajumbe 338 kutoka nchi 24 katika nyumba zao.

Siku iliyofuata, Ndugu Splane alitoa hotuba ya pekee iliyosikilizwa na watu 15,200 waliounganishwa kupitia Intaneti katika majumba ya ufalme nchini kote. Hilo lilikuwa ndilo tukio kubwa zaidi la kitheokrasi kuwahi kufanyiwa nchini Georgia lililohudhuriwa na watu kutoka mataifa mbalimbali. Akina ndugu na dada walifurahia sana ubadilishanaji wa kitia-moyo na shangwe iliyokuwepo. Ndugu mmoja kijana alisema hivi: “Sasa ninajua jinsi mambo yatakavyokuwa katika ulimwengu mpya.”

Kuwekwa wakfu kwa ofisi ya tawi jijini Tbilisi, 2013

Shule ya Biblia ya Wenzi wa Ndoa Wakristo, ambayo sasa inaitwa Shule ya Waeneza-Injili wa Ufalme, imekuwa baraka kwelikweli kwa watu wa Yehova nchini Georgia. Tangu 2013, zaidi ya wanafunzi 200 wamehitimu. Wakiwa na uthamini mwingi kwa elimu waliyopokea, wahitimu hao wako tayari kutumikia kwa bidii popote palipo na uhitaji.

“Kujinyoosha Kwenda Mbele Kuelekea Mambo Yaliyo Mbele”

Kwa sababu ya jitihada za wahubiri wa Ufalme waliokuwa na ujasiri, sasa habari njema inapatikana katika maeneo yote nchini Georgia. Yehova amewabariki sana wahubiri hao wa mapema kwa sababu ya imani, ujasiri, na utayari wao na pia kwa sababu ya upendo wa kujidhabihu walioonyesha kwa Mungu na jirani.

Zaidi ya ndugu na dada 18,000 nchini Georgia wanafurahi kuendeleza kazi ya wahubiri hao wa mapema na hivyo kuwasaidia jirani zao kujionea wenyewe nguvu za Neno la Mungu.Flp. 3:13; 4:13.

Halmashauri ya Tawi ya Georgia: Wayne Tomchuk, Levani Kopaliani, Joni Shalamberidze, Michael E. Jones