Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

2017— Kitabu cha Mwaka cha Mashahidi wa Yehova

Macao

 KUHUBIRI NA KUFUNDISHA ULIMWENGUNI POTE

Asia na Mashariki ya Kati

Asia na Mashariki ya Kati
  • IDADI YA NCHI 49

  • IDADI YA WATU 4,464,374,770

  • IDADI YA WAHUBIRI 728,989

  • IDADI YA MAFUNZO YA BIBLIA 771,272

Alizungumza na Mtu Mmoja Lakini Wengi Wakaitikia Vizuri

Nchini Filipino, Jonathan alikuwa akisubiri kumwona daktari. Mwanamke mmoja alimwuliza ikiwa yeye ni wakala wa bima kwa kuwa alikuwa amevalia vizuri na nadhifu. Jonathan alimwambia kuwa yeye ni Shahidi wa Yehova na kwamba alikuwa hapo ili kumsaidia Shahidi mgonjwa aliyehitaji msaada wa kitiba. Akiwa  amechochewa, Laila, aliyefanya kazi ya kuwapokea wageni, alimwambia Jonathan kwamba baba yake ambaye alikuwa amekufa muda mfupi kabla ya hapo, alikuwa akisoma kwa ukawaida gazeti la Mnara wa Mlinzi. Jonathan alimsomea Yoh 5:28, 29 kisha akampa trakti Kuna Tumaini Gani kwa Wapendwa Waliokufa?

Filipino: Jonathan alimhubiria mpokea-wageni

Alirudi hospitalini mara kadhaa, na kila mara alimletea Laila machapisho zaidi na kisha kumjulisha kwa dada ambaye alianza kujifunza naye Biblia. Baada ya muda mfupi,  mume, dada, na mama ya Laila, ambao waliishi pamoja naye, pia wakaanza kujifunza Biblia.

Rose, jirani ya Laila, alimwendea Laila na kumwuliza kwa nini alikuwa akitembelewa na wageni wengi nyumbani kwake. Laila alimwambia kwamba alikuwa akijifunza Biblia na Mashahidi wa Yehova. Matokeo ni kuwa Rose alianza pia kujifunza, na alipoenda kumtembelea dada yake aliyeishi eneo la kijijini kwao, alimwambia kwa furaha kile alichokuwa akijifunza. Dada yake, Abigail, alivutiwa na mambo aliyosikia, hivyo akaomba afundishwe Biblia. Mama ya Rose pia alikubali funzo la Biblia.

Laila alibatizwa katika kusanyiko la eneo lililofanywa hivi karibuni. Kwa sasa, mama yake pia amebatizwa. Rose, dada yake, na jirani yake, walibatizwa mwaka uliopita. Mama ya Rose anahudhuria mikutano kwa ukawaida. Na baadhi ya watu wa familia ya Laila wanaendelea kujifunza Biblia. Yote hayo yalitokana na kuzungumza na mtu mmoja hospitalini!

Kutumia Teknolojia Kuwafikia Viziwi

Sasa kuna ongezeko katika eneo la lugha ya ishara nchini Sri Lanka. Katika 2015, Mashahidi walikuwa na anwani za viziwi zisizozidi 80, ambazo zilikuwa zimeandikwa kwenye vipande vidogo vya karatasi. Tangu wakati huo, kutaniko la Lugha ya Ishara nchini Sri Lanka limeanzishwa, na orodha imetayarishwa katika kompyuta iliyo na majina 420 hivi na vilevile anwani zilizo na ramani ya GPS. Akina ndugu wamewasiliana na asilimia 80 hivi ya watu hao iwe ni moja kwa moja, kupitia video, au ujumbe mfupi. Wenzi fulani wa ndoa wamishonari wanasema hivi: “Sasa tunaweza kuwapa wahubiri wetu viziwi eneo la kuhubiri. Mwanzoni, wangewatembelea tu viziwi waliowafahamu.”

 Afisa wa Serikali Atoa Shukrani

Ndugu nchini Mongolia wanashiriki kwa bidii katika mpango wa pekee wa kuhubiri hadharani katika miji mikubwa, hata wakati ambapo kiwango cha joto hufikia nyuzi 20 chini ya sufuri. Afisa mmoja wa serikali alichukua machapisho kutoka kwenye kigari kisha akaandika barua ya shukrani. Ilisema hivi: “Mimi ni Mbudha. Kwa kuwa ninaamini kwamba hatupaswi kufuata dini moja tu bali tunapaswa kuchunguza dini nyingine, nimechunguza dini tofauti-tofauti. Baada ya kusoma baadhi ya machapisho ambayo mmeandaa kwa ajili ya wanadamu, nimeamua kuandika barua kuelezea hisia zangu. Ni kweli kwamba mmetumia wakati na nguvu nyingi kuandaa habari inayotuhusu na inayotusaidia. Jambo moja ambalo nimejifunza katika machapisho yenu ni kwamba Biblia ni kitabu ambacho mtu anapaswa kusoma. Kitabu hiki kina kweli. Biblia inaandaa mwongozo wa kweli kwa ajili yetu. Ningependa kuwashukuru wote wanaojitahidi sana kutafsiri machapisho hayo katika Kimongolia. Pia, ningependa kuwashukuru wote ambao husambaza machapisho hayo ili yawasaidie watu, iwe hali ya hewa ni yenye joto sana au baridi kali.”

Mongolia: Mahubiri ya hadharani katika majira ya baridi

Sala Yake Ilisikiwa

Nchini Hong Kong, ndugu fulani painia anayeitwa Brett alimwendea mwanamume fulani aliyekuwa na umri wa karibu miaka 30 na kumpatia trakti yenye kichwa Ni Nini Siri ya Kuwa na Familia Yenye Furaha? Mwanamume huyo alipoona trakti hiyo, alitokwa na machozi. Alisema kwamba alikuwa amelelewa katika kweli, lakini alipokuwa na umri wa miaka 16, alitoroka nyumbani. Kwa miaka mitano iliyofuata, alikuwa akiishi mitaani na akawa mraibu wa dawa za kulevya mpaka alipopatikana na kusaidiwa na shirika fulani la kutoa msaada.

 Aliendelea kusema kuwa asubuhi hiyo alikuwa amesali hivi, “Ikiwa nililelewa katika dini ya kweli, tafadhali nithibitishie hilo leo.” Alihisi kuwa sala yake ilikuwa imejibiwa. Wote wawili walienda kwenye duka la kahawa lililokuwa karibu ambako walichunguza habari fulani katika broshua Mrudie Yehova. Kwa kuwa mwanamume huyo alihitaji kurudi nchini Ufaransa jioni hiyo, walibadilishana anwani. Baadaye, mwanamume huyo alimwandikia Brett hivi: “Ndugu yangu mpendwa, Yehova amejibu sala zangu. Jumapili, nitaenda kwenye Jumba la Ufalme lililo karibu.” Aliwasiliana na Mashahidi nchini Ufaransa na akaanza kujifunza Biblia na kuhudhuria mikutano.