Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

Habari Njema Kutoka kwa Mungu!

 SOMO LA 14

Kwa Nini Mungu Ana Kikundi au Tengenezo la Watu Wanaomwabudu?

Kwa Nini Mungu Ana Kikundi au Tengenezo la Watu Wanaomwabudu?

1. Kwa nini Mungu alianzisha taifa la Israeli?

Mungu aliwafanya wazao wa Abrahamu kuwa taifa naye akawapa sheria. Aliliita taifa hilo “Israeli” na kulipatia jukumu la kuendeleza ibada ya kweli na kulitunza neno lake. (Zaburi 147:19, 20) Kwa hiyo, kupitia taifa la Israeli, watu wa mataifa mengine wangefaidika.Soma Mwanzo 22:18.

Mungu aliwachagua Waisraeli wawe mashahidi wake. Historia yao ya kale inathibitisha jinsi ambavyo watu hufaidika wanapotii sheria za Mungu. (Kumbukumbu la Torati 4:6) Kwa hiyo, kupitia taifa la Israeli, watu wa mataifa mengine wangeweza kumjua Mungu wa kweli.Soma Isaya 43:10, 12.

2. Kwa nini Wakristo wa kweli wanamwabudu Mungu wakiwa kikundi?

Baada ya muda, Waisraeli walipoteza kibali cha Mungu, hivyo Yehova akachagua kutaniko la Kikristo lichukue mahali pa taifa hilo. (Mathayo 21:43; 23:37, 38) Leo, Wakristo wa kweli ndio wanaotumikia wakiwa mashahidi wa Yehova.Soma Matendo 15:14, 17.

Yesu aliwazoeza wafuasi wake wakiwa kikundi ili watekeleze kazi ya kuhubiri na kufanya wanafunzi kutoka katika mataifa yote. (Mathayo 10:7, 11; 24:14; 28:19, 20) Kazi hiyo inakaribia mwisho wake kwenye umalizio wa mfumo huu wa mambo. Kwa mara ya kwanza katika historia, Yehova ameunganisha mamilioni ya watu kutoka katika mataifa yote kwenye ibada ya kweli. (Ufunuo 7:9, 10) Wakristo wa kweli humwabudu Mungu wakiwa kikundi, au kutaniko, kwa kusudi la kutiana moyo na kusaidiana. Wanafurahia programu ileile ya mafundisho ya Biblia kwenye mikutano yao ulimwenguni pote.Soma Waebrania 10:24, 25.

 3. Katika nyakati zetu, tengenezo la Mashahidi wa Yehova lilianzaje?

Katika miaka ya 1870, kikundi kidogo cha wanafunzi wa Biblia kilianza kuelewa kweli za Biblia ambazo hazikuwa zikijulikana kwa muda mrefu. Walijua kwamba Yesu alikuwa ameanzisha kutaniko la Kikristo kwa kusudi la kuhubiri. Hivyo, walianza kampeni ya kuhubiri kuhusu Ufalme ulimwenguni pote. Katika mwaka wa 1931 walianza kutumia jina Mashahidi wa Yehova.Soma Matendo 1:8; 2:1, 4; 5:42.

4. Mashahidi wa Yehova wanasimamiwaje?

Katika karne ya kwanza, makutaniko ya Kikristo katika maeneo mengi yalipata mwongozo kutoka kwa baraza linaloongoza ambalo lilimtambua Yesu kuwa Kichwa cha kutaniko. (Matendo 16:4, 5) Vivyo hivyo leo, Mashahidi wa Yehova ulimwenguni pote hupata mwongozo kutoka kwa Baraza Linaloongoza lenye wazee wenye uzoefu. Baraza hilo linasimamia ofisi za tawi za Mashahidi wa Yehova ambazo zinafanya kazi ya kutafsiri, kuchapa, na kugawa vifaa vinavyotumiwa kwa ajili ya kujifunza Biblia katika lugha zaidi ya 600. Hivyo, Baraza Linaloongoza linaweza kuandaa kitia-moyo cha Kimaandiko na mwongozo kwa ajili ya makutaniko zaidi ya 100,000 ulimwenguni pote. Katika kila kutaniko, wanaume wanaostahili wanatumikia wakiwa wazee, au waangalizi. Wanaume hao wanalitunza kundi la Mungu kwa upendo.Soma 1 Petro 5:2, 3.

Mashahidi wa Yehova hufuata utaratibu wanapofanya kazi ya kuhubiri habari njema na kufanya wanafunzi. Kama walivyofanya mitume, Mashahidi wa Yehova wanahubiri nyumba kwa nyumba. (Matendo 20:20) Pia, hujitolea kujifunza Biblia kibinafsi na watu wanyoofu wanaoipenda kweli. Hata hivyo, Mashahidi wa Yehova si kikundi au tengenezo tu. Sisi ni familia yenye Baba mwenye upendo. Sisi ni ndugu na dada tunaohangaikiana. (2 Wathesalonike 1:3) Kwa kuwa watu wa Yehova wanazingatia kumpendeza Mungu na kuwasaidia wengine, wao ni familia yenye furaha zaidi duniani.Soma Zaburi 33:12; Matendo 20:35.

 

Pata Kujua Mengi Zaidi

Kaa Katika Upendo wa Mungu

Tunawezaje kuonyesha shukrani kwa ajili ya yote ambayo Mungu ametufanyia?

Mashahidi wa Yehova Ni Watu wa Aina Gani?

Unawafahamu Mashahidi wangapi wa Yehova? Unajua nini hasa kutuhusu?