Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

2016 Kitabu cha Mwaka cha Mashahidi wa Yehova

 INDONESIA

Ofisi ya Tawi Iliyo Angani

Ofisi ya Tawi Iliyo Angani

Ofisi katika ghorofa ya  31

Mwaka 2008, nchi ya Indonesia ilifikia kilele cha wahubiri 21,699. Ofisi ilikuwa na nafasi ndogo. Pia, kwa kuwa ilijengwa wakati wa marufuku ilikuwa mbali na mji. Ni wazi kwamba kulikuwa na uhitaji wa kujenga ofisi kubwa karibu na mji wa Jakarta.

 Miaka miwili baadaye, ndugu walinunua sehemu ya jengo lililokuwa tofauti kabisa na ofisi ya awali, yaani, vyumba vyote katika ghorofa ya 31 katika jengo la kisasa la ofisi lenye ghorofa 42 karibu na jiji la Jakarta. Kisha, walinunua ghorofa 12 katika jengo lililo jirani na jengo la ofisi kwa ajili ya makao ya Wanabetheli zaidi ya 80. Pia, walinunua nyumba yenye ghorofa tano kwa ajili ya Idara ya Makao ya Betheli.

Ghorofa 12 za jengo hili ni makao ya Betheli

Kikundi cha watumishi wa ujenzi kutoka nchi mbalimbali kilifanya kazi pamoja na wajenzi wenyeji kurekebisha majengo ya ofisi. Darren Berg, msimamizi wa ujenzi alisema hivi: “Mara nyingi Yehova ametusaidia hata katika hali ngumu sana. Kwa mfano, tulipotaka kuweka mtambo wa kisasa wa kusafisha maji, wenye mamlaka walikataa kutoa kibali cha kuweka mtambo huo kwa sababu hawakujua vizuri teknolojia hiyo. Kisha, Shahidi mmoja mwenyeji ambaye ni injinia alimpelekea ombi hilo ofisa wa cheo cha juu. Mara moja ofisa huyo alikubali ombi letu na akasema kwamba anaamini pendekezo la akina ndugu.”

“Hatujifichi tena. Watu wanawajua Mashahidi wa Yehova. Wanatambua kwamba tutaendelea kukaa hapa”

Majengo mapya ya ofisi yaliwekwa wakfu Februari 14, 2015. Anthony Morris III, mshiriki wa Baraza Linaloongoza alitoa hotuba ya kuweka wakfu. Vincent Witanto Ipikkusuma, mshiriki wa Halmashauri ya Tawi alisema hivi: “Sasa tunaishi katika eneo maarufu mjini pamoja na mashirika makubwa nchini Indonesia. Hatujifichi tena. Watu wanawajua Mashahidi wa Yehova. Wanatambua kwamba tutaendelea kukaa hapa.”

Halmashauri ya Tawi, kutoka kushoto kwenda kulia: Budi Sentosa Lim, Vincent Witanto Ipikkusuma, Lothar Mihank, Hideyuki Motoi

 “Kuhubiri Hapa Ni Kama Sherehe!”

Miaka ya hivi karibuni, Mashahidi wengi kutoka nchi mbalimbali wamehamia Indonesia. Lothar Mihank alisema hivi: “Wajitoleaji wanatimiza fungu muhimu hapa nchini kama ilivyo katika nchi nyingine. Wanachangia ukomavu na uzoefu, uchangamfu wa makutaniko na pia wanachochea uthamini kwa undugu wetu wa ulimwenguni pote.” Ni nini kilichowachochea kuhamia? Na wamepata matokeo gani? Fikiria baadhi ya maelezo yao.

Wajitoleaji

1. Janine na Dan Moore

2. Mandy na Stuart Williams

3. Casey na Jason Gibbs

4. Mari (mbele kulia) na Takahiro Akiyama (nyuma kulia)

Jason na Casey Gibbs kutoka Marekani wanasema hivi: “Tuliposoma katika Kitabu cha Mwaka kuhusu uwiano kati ya mhubiri na idadi ya watu, tuligundua kwamba Indonesia ni nchi yenye uwiano mkubwa zaidi duniani. Kisha, baadhi ya rafiki zetu waliokuwa kwenye eneo lenye uhitaji mkubwa walitusimulia matokeo mazuri ya nchi ya Indonesia. Hivyo tulipiga simu ofisi ya tawi ya Indonesia, nao wakatutuma kisiwa cha Bali. Eneo lenye watu wanaozungumza Kiingereza lilikuwa limeanza kuhubiriwa nchini Indonesia, hivyo tungeweza kutumia fursa hiyo mara moja. Tulipanga kuishi kwa mwaka mmoja, lakini tumekaa miaka mitatu. Watu  wengi tunaowahubiria hawajawahi kuwasikia Mashahidi wa Yehova. Utumishi unaburudisha sana!”

Stuart na Mandy Williams, wenzi wa ndoa wenye umri wa makamo kutoka Australia walisema hivi: “Tulitamani kuwahubiria watu wenye kiu ya kweli, hivyo tuliamua kuhamia Indonesia. Tukiwa Malang, Java Mashariki, tunakutana na mamia ya wanafunzi wa chuo wanaozungumza Kiingereza na ambao husikiliza habari njema. Nao wanaipenda tovuti ya jw.org! Kazi ya kuhubiri inasisimua sana.”

Takahiro na Mari Akiyama, mapainia huko Yogyakarta, kisiwa cha Java, wanasimulia hivi: “Tunahisi tukiwa salama zaidi hapa kuliko ilivyo nyumbani nchini Japani. Watu ni wakarimu na wapole. Wengi wao, hasa vijana, wanapendezwa sana na mambo ya dini. Siku moja tulipokuwa katika meza ya mahubiri ya hadharani, tuligawa magazeti 2,600 kwa saa tano tu.”

Dan na Janine Moore, wenzi wa ndoa wenye miaka zaidi ya 50 wanaeleza hivi: “Tunapokwenda kuhubiri, watu hukusanyika. Tukitabasamu; wao hutabasamu pia. Ni wadadisi, wanapendezwa, na wana shauku. Tunapowaonyesha jambo fulani katika Biblia, baadhi yao huuliza: ‘Tunaweza kuandika jambo hilo?’ Wanashangazwa sana na hekima ya Biblia. Tumekuwa hapa kwa mwaka mmoja, na tunasikitika kwa nini hatukuja mapema zaidi. Tulitamani kuhubiri katika eneo lenye matokeo, na sasa tumelipata!”

Misja na Kristina Beerens walikuja wakiwa wamishonari mwaka wa 2009 na sasa wanatumika katika kazi ya kuzunguka. Wanasema hivi: “Hata katika kisiwa cha Madura, Java Mashariki, moja kati ya maeneo yenye Waislamu wengi nchini Indonesia, watu wanaitikia vizuri ujumbe wetu. Watu husimamisha magari na kuomba  magazeti. Wao husema hivi: ‘Mimi ni Mwislamu, lakini ninafurahia sana kusoma magazeti haya. Je, ninaweza kuchukua mengine kwa ajili ya rafiki zangu?’ Kuhubiri hapa ni kama sherehe!”

Mashamba ni Meupe kwa Ajili ya Kuvunwa

Frank Rice alipowasili Jakarta, nchini Indonesia mwaka wa 1931, kulikuwa na watu 60,000,000 hivi. Leo, idadi ya watu nchini humo inakaribia 260,000,000, hivyo kufanya Indonesia kuwa nchi ya nne yenye idadi kubwa ya watu duniani.

Wakati huohuo, Mashahidi wa Yehova nchini Indonesia wamejionea ongezeko kubwa sana. Mwaka wa 1946,  baada ya Vita vya Pili vya Dunia kulikuwa na wahubiri 10 waaminifu. Leo, nchi hiyo ina wahubiri zaidi ya 26,000, huo ni uthibitisho ulio wazi wa baraka za Yehova! Watu 55,864 walihudhuria Ukumbusho mwaka 2015, hivyo kuna uwezekano wa kupata ongezeko kubwa hata zaidi.

Yesu alisema hivi: “Ndiyo, mavuno ni mengi, lakini wafanyakazi ni wachache. Kwa hiyo, mwombeni Bwana wa mavuno awatume wafanyakazi katika mavuno yake.” (Mt. 9:37, 38) Watumishi wa Yehova nchini Indonesia wanachochewa na maneno hayo. Wameazimia kuhubiri kwa bidii ili kuchangia kutakaswa kwa jina kuu la Yehova katika kisiwa hicho.—Isa. 24:15.

Pata Kujua Mengi Zaidi

NI NANI WANAOFANYA MAPENZI YA YEHOVA LEO?

Jinsi Machapisho ya Mashahidi wa Yehova Yanavyoandikwa na Kutafsiriwa

Tunachapisha vitabu na magazeti katika lugha zaidi ya 600. Kwa nini tufanye kazi hiyo yote ya uchapishaji?