Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

2015 Kitabu cha Mwaka cha Mashahidi wa Yehova

Miaka Mia Moja Iliyopita—1915

Miaka Mia Moja Iliyopita—1915

 “HIKI ni kipindi cha majaribu,” likasema gazeti Mnara wa Mlinzi la Machi 1, 1915. “Je, wakati uliopita tulikuwa na bidii kwa sababu tu tulitazamia badiliko kubwa mwaka wa 1914 W.K., au tumekuwa na bidii kwa sababu tunampenda na kushikamana na BWANA na Ujumbe Wake na ndugu zetu?” Mwaka wa 1915, baadhi ya Wanafunzi wa Biblia walivunjika moyo sana. Ingawa hivyo, ulimwengu ulikuwa ukipambana na jambo tofauti.

Vita Vikuu, ambavyo baadaye viliitwa Vita vya Kwanza vya Ulimwengu vilikuwa vikiendelea barani Ulaya. Silaha za kisasa za vita zilikuwa zikiangamiza watu kwa kiwango kikubwa. Kwa mfano, mwaka wa 1915, nyambizi za Ujerumani, au mashua za vita, zilianza kuzunguka baharini karibu na Uingereza. Mei 7, 1915, mojawapo ya mashua hizo ilizamisha meli ya abiria ya Uingereza iliyoitwa Lusitania. Zaidi ya watu 1,100 walikufa.

Suala la Kutounga Mkono Upande Wowote

Wanafunzi wa Biblia hawakutaka kushiriki vita. Hata hivyo, wakati huo hawakuelewa kikamili msimamo wa Kikristo wa kutounga mkono upande wowote. Ingawa hawakujiandikisha jeshini kwa hiari, baadhi yao walikubali walipoandikishwa, lakini walijitahidi kuepuka kazi zinazohusisha kutumia silaha. Walipolazimishwa kwenda vitani, wengine waliamua “kupiga risasi hewani badala ya kuwalenga maadui.”

Gazeti Mnara wa Mlinzi la Julai 15, 1915, lilichapisha simulizi la mwanajeshi wa Hungaria aliyebatizwa alipokuwa akiuguza majeraha yake na baada ya kupona akarudi vitani. Simulizi hilo linasema kilichofuata: “Walifika [wanajeshi wa Hungaria] umbali wa mita 244 karibu na wanajeshi wa Urusi, na wakaamriwa hivi: ‘Pachika singe [au kisu] kwenye bunduki!’ Yule ndugu kutoka Hungaria alikuwa upande wa  kushoto. Alitaka kujilinda tu dhidi ya adui, hivyo alijitahidi kuipiga silaha iliyokuwa mikononi mwa Mrusi aliyekuwa akimkabili. Papo hapo akaona kwamba yule mwanajeshi Mrusi hakutaka pia kumshambulia . . . Yule askari Mrusi aliiangusha silaha yake, huku akilia. Kisha, ndugu yetu akamwangalia ‘adui’ yake kwa ukaribu, na akaona beji yenye ‘Msalaba na Taji’ kwenye koti lake! Yule Mrusi alikuwa ndugu pia katika Bwana!” *

Makala iliyochapishwa katika Mnara wa Mlinzi la Septemba 1, 1915 yenye kichwa “Wajibu wa Kikristo na Vita,” ilizungumzia suala la Wakristo kutounga mkono vita. Ilisema: “Mtu anapojiunga na jeshi na kuvaa sare za jeshi, anakubali wajibu na matakwa ya mwanajeshi kama yanavyotambulika na kukubalika. . . . Kwa hiyo je, Mkristo anaweza kufanya kazi katika hali kama hizo?” Baada ya muda, ikawa wazi kwamba Wakristo hawapaswi kabisa kushiriki vita.

Mabadiliko Katika Makao Makuu

Mwaka wa 1915, washiriki 70 wa familia ya Betheli huko New York walijulishwa kwamba kwa sababu ya uhaba wa fedha, ingebidi waondoke Betheli wakatumikie shambani. Waliambiwa hivi: “Hatupaswi kujiingiza kwenye madeni au kuhatarisha kazi kwa ujumla; hivyo inafaa kupunguza gharama.”

Clayton J. Woodworth na ndugu wengine wawili walitia sahihi barua ya pamoja kutoka kwa “Wale Sabini Wanaoondoka.” Barua hiyo ilichapishwa kwenye Mnara wa Mlinzi la Mei 1, 1915. Wale waliokuwa wakiondoka walisema kwamba walifanya hivyo “kwa shangwe na walishukuru kwa sababu ya baraka na mapendeleo mengi”  waliyofurahia pindi “walipokuwa washiriki wa ‘Familia ya Betheli.’”

Ingawa badiliko hilo la mgawo lilikuwa gumu, liliwapa ndugu hao nafasi ya kuonyesha uaminifu wao. Je, wangeendelea kuwa waaminifu kwa Mungu au wangekasirika? Ndugu Woodworth aliendelea kuhubiri, baadaye alirudi Betheli, na mwaka wa 1919 akawa mhariri wa kwanza wa gazeti la The Golden Age, ambalo sasa linaitwa Amkeni! Aliendelea kuwa mhariri wa gazeti hilo hadi mwaka wa 1946.

Nafasi za Kutumikia

Katika mwaka huo mgumu, gazeti la Mnara wa Mlinzi liliwahimiza ndugu zetu waendelee kuhubiri. Watu waliokuwa wamependezwa mwanzoni walikaziwa fikira. “Tuna orodha ya watu nchini kote wanaotuma kadi za kuomba machapisho,” likasema toleo la Desemba 15, 1915. “Tunapendekeza kwamba watu hao watembelewe . . . ili kuona kama wamepotoshwa.” Lengo lilikuwa kuwachochea “wawake moto, yaani, wawe na bidii ya kumtumikia Mungu na kuipenda Kweli.”

Kwa hiyo, kama ilivyo leo, ilikuwa muhimu sana kwa Wakristo kuendelea kuutanguliza Ufalme. “Sisi ambao tuko macho tunapaswa kumtumikia Mungu kwa nguvu na bidii,” likasema gazeti Mnara wa Mlinzi la Februari 15, 1915. Watumishi wa Mungu walihitaji kukaa macho. Gazeti hilo liliendelea kusema: “Tunapaswa kuwa macho. Tunapaswa kuwa macho kuhusiana na nini? Kihususa tunapaswa kujichunguza sisi wenyewe, na kujilinda dhidi ya mitego ya mfumo huu.”

Andiko la mwaka wa 1916 liliwahimiza akina ndugu wabaki “imara katika imani,” kulingana na Waroma 4:20 katika tafsiri ya King James Version. Andiko hilo lingewatia moyo Wakristo waaminifu katika mwaka uliofuata, mwaka ambao ulikuwa na majaribu tofauti.

^ fu. 4 Kwa miaka mingi, Wanafunzi wa Biblia walivaa beji ya utambulisho iliyokuwa na msalaba na taji. Nembo hiyo ilikuwa kwenye ukurasa wa kwanza wa Mnara wa Mlinzi kwa miaka mingi. Kufikia miaka ya 1930, Mashahidi wa Yehova walikuwa wameacha kutumia nembo ya msalaba na taji.