Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

2015 Kitabu cha Mwaka cha Mashahidi wa Yehova

 KUHUBIRI NA KUFUNDISHA DUNIANI KOTE

Ulaya

Ulaya
  • IDADI YA NCHI 47

  • IDADI YA WATU 741,311,996

  • IDADI YA WAHUBIRI 1,611,036

  • IDADI YA MAFUNZO YA BIBLIA 847,343

Wanafunzi Walitembelea Jumba la Ufalme

Finland: Wanafunzi wa darasa la nne waliotembelea Jumba la Ufalme

Ines, mwanafunzi wa darasa la nne nchini Finland, alisikia kwamba wangezungumzia imani ya Mashahidi wa Yehova darasani katika somo la dini, hivyo akaamua kuwaalika wanafunzi wa darasa lao kutembelea Jumba la Ufalme. Wanafunzi na walimu walikubali mwaliko huo.

Juma lililofuata, wanafunzi 38 waliendesha baiskeli zao kwa  mwendo wa kilomita tano hadi kwenye Jumba la Ufalme. Walimu wawili na mkuu wa shule walienda pia. Ndugu wawili na dada watatu walikutana na wafunzi hao kwenye Jumba la Ufalme. Wanafunzi hao walipokuwa wakipumzika, waliuliza maswali kuhusu Jumba la Ufalme na kuhusu Mashahidi: “Mikutano yenu hufanywaje?” Kuhusu chumba cha maktaba, waliuliza hivi: “Chumba kile ni cha nini?” “Kwa nini mmeandika ‘sita gawanya kwa kumi’ ukutani?” Andiko la mwaka lilikuwa Mathayo 6:10.

Kwa kuwa shule hiyo inashiriki katika mradi wa kupinga unyanyasaji shuleni, ndugu waliwaonyesha wanafunzi hao video Mshinde Mnyanyasaji Bila Kutumia Ngumi, kwenye Tovuti yetu ya jw.org. Pia, waliwaonyesha sehemu nyingine katika Tovuti yetu na kuwachezea wimbo wa Ufalme. Ziara hiyo ilifanywa kwa saa moja hivi.

Mkuu wa shule, walimu, na wanafunzi walifurahia sana ziara hiyo. Mkuu wa shule alipendezwa na habari zilizo kwenye Tovuti yetu kwa sababu alihisi kwamba zinaweza kutumiwa wakati wa masomo ya dini. Alifurahi kusikia kwamba hata wanafunzi wengine wanaweza kutembelea Jumba la Ufalme. Mwalimu wa wanafunzi wengine aliwasiliana na Mashahidi wa Yehova siku iliyofuata na kuuliza ikiwa wao pia wanaweza kutembelea Jumba la Ufalme.

Alipata Hazina Katika Takataka

Cristina, anayeishi nchini Rumania, hajui kusoma wala kuandika. Alikuwa maskini sana na alitafuta chakula kwenye mapipa ya takataka mjini. Siku moja alipokuwa akitafuta chakula, aliona kitu fulani chenye kuvutia, yaani, chapisho la Biblia lenye picha maridadi za watu wenye furaha. Alijiambia hivi, ‘Lazima watu hawa  wanaishi mahali fulani hapa duniani.’ Cristina alitamani sana kujua yale yaliyoandikwa katika chapisho hilo, hivyo akamwomba mtu fulani amsomee. Aliposikia kwamba machapisho hayo yalizungumzia mambo ya dini, alisikitika kwamba habari zinazohusu Neno la Mungu zimetupwa katika takataka. Cristina aliendelea kuokota broshua, trakti, na magazeti katika takataka.  Machapisho mengine yalikuwa katika hali nzuri, na mengine yalikuwa yamechanika. Alijifunza kusoma ili ajue mambo mengi zaidi yaliyoandikwa katika machapisho hayo.

Baadaye, Cristina aliwasiliana na Mashahidi, na akaanza kujifunza Biblia. Alifurahi sana kujua kwamba Yehova alimvuta kupitia machapisho ambayo watu wengine waliyapuuza. Anahudhuria mikutano na anafurahia sana mambo anayojifunza. Jambo linalomletea shangwe zaidi ni kwamba sasa ana magazeti, vitabu, na broshua mpya. Hahitaji tena kuyatafuta katika takataka. Kwa kweli, Cristina alipata hazina katika takataka!

Kujifunza Biblia “Msituni”

Ujerumani: Margret akiongoza funzo la Biblia msituni

Kila siku asubuhi, Margret anayeishi nchini Ujerumani hutembea msituni akiwa na mbwa wake. Anasema hivi: “Mimi hujitahidi kuzungumza na wapita-njia. Wakikubali, ninazungumza nao kuhusu Biblia.”

Siku moja alikutana na mwanamke mwenye umri wa miaka 70 hivi ambaye pia alikuwa akitembea na mbwa wake. Margret alianza kuzungumza na mwanamke huyo. Mwanamke huyo alifurahia mazungumzo hayo na alimwambia Margret kwamba yeye husali kwa Mungu na kuisoma Biblia kila siku. Kuanzia siku hiyo, waliendelea kukutana kila siku na kuzungumzia mambo ya kiroho. Siku moja, mwanamke huyo alimwuliza hivi Margret: “Umejuaje mambo mengi hivyo kuhusu Biblia?” Margret alimweleza kwamba yeye ni Shahidi wa Yehova.

Margret alimuuliza mwanamke huyo mara nyingi ikiwa angependa kujifunza Biblia, lakini alikataa. Hata hivyo waliendelea kuzungumza kila siku. Miezi kadhaa  baadaye, Margret alimuuliza tena ikiwa angependa kujifunza Biblia akiwa nyumbani. Pindi hii mwanamke huyo alimweleza kwamba aliogopa kujifunza kwa sababu mwanamume aliyeishi naye hapendi Mashahidi wa Yehova.

Margret alipoenda tena msituni kutembea, alibeba Biblia na kitabu Biblia Inafundisha. Alipomwona mwanamke huyo, Margret alisema hivi kwa ujasiri: “Wakati huu ningependa tujifunze Biblia ‘msituni,’ wala si nyumbani kwako.” Mwanamke huyo alikubali huku akitokwa na machozi. Anajifunza Biblia “msituni” mara sita kila juma. Kwa sababu ya hali ya hewa, wakati mwingine Margret anaongoza funzo hilo la Biblia akiwa na mwavuli na taa.

Itikio Lililowachanganya

Dada anayeitwa Delphine alijifunza Biblia na Irina nchini Bulgaria. Irina alithamini mambo aliyojifunza na alihudhuria mikutano kwa ukawaida. Hata hivyo, mume wake hakutaka ajifunze Biblia na Mashahidi wa Yehova. Aliihamishia familia yake ikaishi kijijini nchini Sweden, hivyo Irina hakuweza kuwasiliana tena na Delphine. Hata hivyo, mapainia wawili, Alexandra na Rebecca, walikutana na Irina, ambaye hakujua kuzungumza Kiswedi. Dada hao walitumia kijitabu Good News for People of All Nations na kumwambia Irina asome ujumbe wa Biblia katika Kibulgaria. Baadaye, kwa kutumia kijitabu hicho, walimwuliza ikiwa angependa machapisho katika lugha yake. Irina alitikisa kichwa chake kwa nguvu. Dada hao waliondoka, wakifikiri kwamba hakupendezwa.

Baadaye, Alexandra alikumbuka kwamba Linda, dada kutoka Sweden anayetumikia nchini Bulgaria, atakuja  kuwatembelea majuma machache yanayofuata. Alifikiria kwamba huenda kukawa na matokeo ikiwa Irina atasikia ujumbe wa kweli katika lugha yake mwenyewe. Linda alipowasili, walimtembelea Irina. Irina alimwambia Linda kwamba alikuwa akisali kwa Yehova kila siku akimwomba amsaidie ili aendelee kujifunza Biblia. Mara nyingi alibeba kitabu chake Biblia Inafundisha cha Kibulgaria. Alifanya hivyo ili awaonyeshe Mashahidi atakaokutana nao njiani, ingawa hakukutana na Shahidi yeyote. Sasa Irina alifurahi sana kupata machapisho mengine ya Kibulgaria.

Linda alimwuliza Alexandra kwa nini walifikiri kwamba Irina hakupendezwa walipomtembelea mara ya kwanza. Alexandra alieleza kwamba Irina alitikisa kichwa kwa njia iliyowafanya wafikiri hakupendezwa. Linda alitabasamu, kisha akaeleza kwamba Wabulgaria huinua na kushusha kichwa ili kuonyesha kwamba hawataki kitu fulani, na kutikisa kichwa kuonyesha kwamba wamekubali. Hivyo, Irina anaendelea kujifunza Biblia katika Kibulgaria mpaka atakapojifunza Kiswedi. Jinsi gani? Aliunganishwa na Delphine na wanajifunza kupitia video.

Mfano Mzuri wa Baba

Jemima, anayeishi nchini Hispania, alifundishwa kweli alipokuwa mtoto. Hata hivyo, alipokuwa na umri wa miaka saba, maisha yake yalibadilika kabisa. Mama yake aliamua kwamba hataki tena kuwa Shahidi wa Yehova na kumtaliki baba yake. Akiwa na miaka 13, Jemima aliacha kushirikiana na Mashahidi na alikataa msaada wowote wa kiroho kutoka kwa baba yake.

Jemima alipoendelea kukua, alianza kujihusisha na harakati za kijamii na kisiasa ili kupigania “haki” za  watu wa hali ya chini. Baadaye alipoteza kazi, na baba yake anayeitwa Domingo alimwomba wafanye naye kazi ya kupaka rangi.

Siku moja wakiwa kazini, Domingo alimwuliza Jemima ikiwa angependa kujifunza Biblia. Alikataa, hata hivyo, akasema kwamba akitaka kujifunza, atamjulisha. Domingo alikuwa akisikiliza usomaji wa Biblia na magazeti alipokuwa akipaka rangi, lakini binti yake alipenda kusikiliza muziki wa pop kupitia vifaa vya masikioni.

Mnamo Novemba 2012, Domingo ambaye alikuwa ameoa tena, alipata mwaliko wa kuhudhuria Shule ya Biblia ya Wenzi wa Ndoa Wakristo. Jemima alivutiwa sana kujua kwamba baba yake ameamua kuhudhuria shule ya Biblia kwa miezi miwili na baadaye aache kila kitu na kwenda popote atakapotumwa. Kwa mara ya kwanza, Jemima akatambua kwamba baba yake anathamini sana kweli kutoka moyoni, na hivyo akataka kujua sababu.

Jemima aliacha kusikiliza muziki aliopenda na kuanza kusikiliza usomaji wa Biblia na magazeti ambao baba yake alikuwa akisikiliza. Pia, alianza kuuliza maswali. Siku moja Domingo alipokuwa akipaka rangi, Jemima alimuuliza hivi: “Je, unakumbuka nilikwambia kwamba nikiwa tayari kujifunza Biblia nitakujulisha? Sasa niko tayari.”

Domingo alifurahi sana kusikia jambo hilo. Mwezi Januari 2013, walianza kujifunza mara mbili kwa juma. Shule ilianza mwezi Aprili, na waliendelea kujifunza kupitia video. Jemima alihudhuria sherehe ya kuhitimu kwao na alifurahi sana. Desemba 14, 2013, Jemima alibatizwa.

Jemima anasema hivi: “Yehova amenivumilia sana, hakuchoka kamwe. Amenipa marafiki wa kweli, jambo  ambalo sikupata nje ya kutaniko. Upendo wa undugu wa ulimwenguni pote unanifanya nithamini zaidi upendo mwingi ambao Yehova amenionyesha.”

Manufaa ya Utiifu

Vasilii ni Mwanabetheli wa muda mrefu nchini Urusi. Machi 30, 2014 alipokuwa akihubiri kwa kutumia kigari cha kukokotwa cha machapisho karibu na ofisi ya tawi, gari la polisi lilisimama karibu yake. Polisi mmoja alishuka na kumwomba Vasilii aache kuhubiri kwa sababu baadhi ya majirani wanalalamika. Polisi mwingine alirekodi video ya mazungumzo hayo. Vasilii alitii na hakubishana na polisi. Wakati huo, wapita njia wachache walikuwa wamesimama ili kuona kinachoendelea. Vasilii aliondoka, hata hivyo siku mbili baadaye, aliomba kukutana na mkuu wa polisi. Ombi lake lilikubaliwa. Walipokutana, Vasilii alimshukuru mkuu huyo kwa huduma muhimu ambayo polisi wanafanya katika jamii na jinsi walivyozungumza naye kwa heshima siku mbili zilizopita. Mkuu huyo akamtazama msaidizi wake na kusema, “Kwa miaka yote 32 niliyotumikia nikiwa polisi, sijawahi kamwe kusikia mtu yeyote akitushukuru!” Katika mazungumzo hayo, mkuu huyo alisaidiwa kuelewa kwamba kazi yetu ya kuhubiri ni halali kabisa kisheria. Mkuu huyo alimwuliza Vasilii ni kwa nini aliacha kuhubiri alipoamriwa na polisi, na alijua kwamba hajavunja sheria? Vasilii alijibu hivi: “Ninawaheshimu polisi. Wazia ingekuwaje ikiwa ningewashutumu polisi mbele ya watu kwamba hawajui sheria!” Mkuu huyo wa polisi na msaidizi wake waliguswa moyo sana, na wakamhakikishia Vasilii kwamba anaweza kuendelea kutumia kigari chake cha machapisho na hakuna mtu atakayemsumbua tena.