Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

2015 Kitabu cha Mwaka cha Mashahidi wa Yehova

 JAMHURI YA DOMINIKA

Wanawapenda Ndugu Zao

Wanawapenda Ndugu Zao

Shule Mpya Yatimiza Uhitaji Mkubwa

Yehova alibariki bidii ya watumishi wake katika Jamhuri ya Dominika. Mnamo 1994 kulikuwa na wahubiri wa Ufalme 16,354 katika makutaniko 259. Ongezeko hilo lenye kusisimua lilitokeza uhitaji mkubwa wa wazee na watumishi wa huduma wenye uwezo. Mwaka huohuo, Baraza Linaloongoza liliidhinisha Shule ya Mazoezi ya Kihuduma, ambayo sasa inaitwa Shule ya Waeneza-Injili wa Ufalme, ifanywe katika Jamhuri ya Dominika.

Kufikia Oktoba 2011, wanafunzi 600 hivi walikuwa  wamehitimu katika madarasa 25 yaliyokuwa yamefanywa nchini humo. Sasa, zaidi ya nusu ya wahitimu hao ni watumishi wa wakati wote, 71 ni mapainia wa pekee, na watano ni waangalizi wa mzunguko. Madarasa kumi ya kwanza yalifanyiwa Betheli, lakini kuanzia darasa la 11, shule hiyo imefanyiwa kwenye jengo maalumu la shule hiyo huko Villa González.

“Mashahidi wa Yehova Huwatunza Ndugu Zao”

Septemba 22, 1998, Jamhuri ya Dominika ilikumbwa na Kimbunga Georges kilichoambatana na upepo uliovuma kwa kasi ya kilometa 190 kwa saa, na kusababisha uharibifu mkubwa. Maelfu ya watu waliachwa bila makao, na zaidi ya watu 300 walikufa. Kwa msaada wa Halmashauri ya Ujenzi ya Mkoa, Halmashauri ya Kutoa Msaada ilifungua kituo cha kutoa msaada katika uwanja wa Jumba la Ufalme huko La Romana. Wajitoleaji 300  hivi walisaidia kazi ya kutoa msaada, kutia ndani Mashahidi kutoka nchi nyingine 16.

Kwa ujumla, Majumba ya Ufalme 23 na zaidi ya nyumba 800 za ndugu na dada zetu zilihitaji kukarabatiwa au kujengwa upya. Kwa mfano, Carmen, dada ambaye ni painia wa kawaida alivunjika moyo sana kimbunga hicho kilipoharibu nyumba aliyokuwa ameishi kwa miaka 38. Hata hivyo, alifurahi sana kikundi cha ndugu 15 kilipofika na kujenga msingi wa nyumba yake mpya. “Sikuzote Yehova hutukumbuka,” anasema Carmen, “naye hututunza. Ona nyumba hii maridadi ambayo akina ndugu wananijengea. Jirani zangu walisema: ‘Mashahidi wa Yehova huwatunza ndugu zao; wanapendana kikweli.’” Maneno kama hayo yalisikika nchini kote wajitoleaji walipokuwa wakiwasaidia ndugu na dada zao walioathiriwa.

Ingawa Kimbunga Georges kilisababisha maafa makubwa, jitihada za upendo za watu wa Yehova ziliwaletea faraja ya kimwili na kiroho ndugu zetu walioathiriwa na kimbunga hicho. Jambo muhimu zaidi ni kwamba roho ya kujidhabihu ya wajitoleaji hao ilimletea Yehova sifa, ambaye ndiye chanzo kikuu cha faraja.

Majumba ya Ufalme Yajengwa kwa Wingi

Ongezeko la haraka la wanafunzi wapya lilileta uhitaji wa Majumba ya Ufalme. Kwa hiyo, mnamo Novemba 2000, ndugu katika Jamhuri ya Dominika walianza kujenga Majumba ya Ufalme kwa msaada wa mpango wa ujenzi katika nchi maskini. Matokeo ni kwamba kutaniko linaweza kujenga Jumba zuri la Ufalme katika muda wa majuma manane. Kufikia Septemba 2011, vikundi viwili vya ujenzi vilikuwa vimejenga au kukarabati Majumba ya Ufalme 145.

 Majengo hayo na vilevile wajenzi wanaojitolea wametoa ushahidi mkubwa. Kwa mfano, katika mji mdogo ulio kaskazini-magharibi mwa nchi hiyo, akina ndugu walitaka kujenga Jumba la Ufalme katika kiwanja fulani. Painia wa pekee mmoja alimuuliza mmiliki wa kiwanja hicho ikiwa angekiuza. “Usipoteze muda wako,” akajibu mwanaume huyo, “Sitawauzia kiwanja hiki, hasa ikiwa mnataka kujenga kanisa.”

Siku chache baada ya mazungumzo hayo, mmiliki wa kiwanja hicho alisafiri kwenda Puerto Plata ili kumtembelea kaka yake ambaye ni Shahidi wa Yehova. Alipowasili, alitambua kwamba kaka yake alikuwa akiishi katika nyumba ya familia ya Mashahidi ambao walikuwa wakimtunza. Familia hiyo ilimpeleka hospitalini, mikutanoni, na kuhubiri. Mwanaume huyo alimuuliza kaka yake pesa alizolipa kwa ajili ya huduma alizokuwa akipata. Akasema: “Siwalipi chochote. Hawa ni ndugu zangu.”

“Hiki ndicho kikundi cha watu wema na wenye umoja zaidi ambacho nimewahi kuona”

Yule mmiliki wa kiwanja alichochewa sana na jinsi Mashahidi walivyoonyesha fadhili hivi kwamba akawasiliana na painia wa pekee aliyekuwa amezungumza naye na kumwambia kwamba amebadili mawazo na yuko tayari kuuza kile kiwanja. Akina ndugu walinunua kiwanja hicho na wakaanza kujenga jumba. Hapo awali, mke wa mmiliki huyo aliwachukia sana Mashahidi wa Yehova. Lakini alipoona jinsi akina ndugu walivyofanya kazi ya ujenzi kwa umoja, alisema, “Hiki ndicho kikundi cha watu wema na wenye umoja zaidi ambacho nimewahi kuona.”