Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

2015 Kitabu cha Mwaka cha Mashahidi wa Yehova

 JAMHURI YA DOMINIKA

Kiongozi Ni Nani?

Kiongozi Ni Nani?

‘Wafukuzeni Nchini Viongozi Wao’

Julai 13, 1957, Inspekta Colón alimwandikia waziri wa nchi hivi: “Kuna msemo maarufu usemao: ‘Ukitaka kuua nyoka, mpige kichwani.’ Hatua kubwa ya kuliangamiza dhehebu la Mashahidi wa Yehova nchini ni kuwafukuza wamishonari wao. Hatua hiyo itawaacha bila uongozi, na hivyo malengo yao hayatafanikiwa.”

Muda mfupi baadaye, Waziri wa Ulinzi Arturo Espaillat aliamuru wamishonari kumi waliokuwa wamebaki waondoke nchini. Julai 21, 1957, Roy Brandt alimwandikia Trujillo, akimwomba kukutana naye ili kuzungumzia msimamo wetu. Kwa sehemu barua hiyo ilisema: “Kampeni ya chuki ambayo watu fulani nchini wanafanya dhidi ya jina la Yehova Mungu ni sawa na ile iliyofanywa na watu ambao hawakuwa na habari sahihi dhidi ya mitume wa Yesu.” Kisha Ndugu Brandt alimwomba Trujillo asome Matendo sura ya 2 hadi 6 na akaeleza kwamba “Shauri la moja kwa moja lililotolewa na Hakimu Gamalieli wakati huo linafaa kutumika leo pia.” Halafu Ndugu Brandt akanukuu kwa herufi  kubwa andiko la Matendo 5:38, 39: “WAACHENI; KWA SABABU, IKIWA KAZI HII IMETOKA KWA MUNGU, HUENDA MKAONWA KUWA KWA KWELI MNAPIGANA NA MUNGU.” Hata hivyo barua yake haikuzingatiwa. Agosti 3, 1957, wamishonari walipelekwa uwanja wa ndege na kurudishwa kwao.

‘Yesu Ndiye Kichwa’

Donald Nowills alianza kusimamia ofisi ya tawi alipokuwa na umri wa miaka 20 tu

Kwa kuwa wamishonari walikuwa wameondoka, ndugu na dada wenyeji wangefanyaje? Je, wangekosa “kichwa” kama Inspekta Colón alivyosema? La hasha, Yesu ndiye “kichwa cha mwili, kutaniko.” (Kol. 1:18) Kwa hiyo, watu wa Yehova katika Jamhuri ya Dominika hawakuachwa bila “kichwa.” Badala yake waliendelea kutunzwa na Yehova na tengenezo lake.

Donald Nowills, aliyepewa mgawo wa kusimamia kazi katika ofisi ya tawi baada ya wamishonari kufukuzwa,  alikuwa na umri wa miaka 20, na miaka minne tu ilikuwa imepita tangu abatizwe. Ingawa alikuwa ametumikia akiwa mwangalizi wa mzunguko kwa miezi michache, kazi ya ofisini ilikuwa mpya kwake. Ndugu Nowills alikuwa na ofisi ndogo katika nyumba yake, ambayo ilikuwa imejengwa kwa mbao, bati na sakafu ya udongo. Ilikuwa huko Gualey, eneo hatari sana la Ciudad Trujillo. Akisaidiwa na Félix Marte, alichapisha nakala za Mnara wa Mlinzi kwa ajili ya nchi nzima.

Gazeti Mnara wa Mlinzi la mwaka wa 1958 lililonakiliwa kwa mashine

Mary Glass, ambaye mume wake, Enrique, alikuwa amefungwa wakati huo, alimsaidia Ndugu Nowills. Anaeleza hivi: “Ningemaliza kazi yangu saa 11:00 jioni na kwenda kwenye ofisi ya Ndugu Nowills kuchapa magazeti ya Mnara wa Mlinzi. Halafu Ndugu Nowills angepiga fotokopi kwa mashine ndogo. Baadaye, dada kutoka Santiago tuliyemwita ‘malaika,’ angeweka  magazeti hayo ndani ya debe tupu la mafuta ya kupikia. Kisha alifunika machapisho hayo kwa kitambaa, halafu akaweka mihogo, viazi, au majimbi (nduma) juu yake. Kisha angefunika kwa gunia. Halafu angesafiri kwa basi kuelekea kaskazini mwa nchi na kuliachia kila kutaniko nakala moja. Kila familia ingejifunza nakala hiyo na kisha kuipa familia nyingine.”

Mary anaongezea hivi: “Tulihitaji kuwa macho, kwa kuwa barabara zilikuwa na maofisa wa serikali waliokuwa wakipeleleza mahali ambako magazeti ya Mnara wa Mlinzi yalikuwa yakichapishwa. Hata hivyo hawakufanikiwa. Yehova alitulinda sikuzote.”