Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI JANUARI 2015

Waume—Dumisheni Amani Nyumbani

Waume—Dumisheni Amani Nyumbani

MWANAMKE anahitaji usalama wa aina gani? Watu wengi wanaamini kwamba jukumu muhimu zaidi la mume ni kuchuma fedha za kutosha kwa ajili ya familia yake. Hata hivyo, baadhi ya wanawake ambao waume zao huwapatia pesa nyingi bado hawako salama kihisia—na hata hawana furaha. Kwa mfano, mwanamke anayeitwa Rosa, kutoka nchini Hispania anasema hivi kumhusu mume wake: “Kwa wapita njia alionekana mume bora, lakini alipokuwa nyumbani alikuwa mkorofi.” Naye Joy kutoka Nigeria anakiri hivi: “Nilipokuwa na maoni tofauti, mume wangu aliniambia, ‘Lazima unisikilize kwa sababu mimi ni mume wako.’”

Mume anawezaje kutimiza majukumu yake kwa upendo? Ni nini kinachohitajika ili mume adumishe amani nyumbani mwake na kupafanya kuwa “mahali pa kupumzika” kwa ajili ya mke wake?—Ruthu 1:9.

MAONI YA BIBLIA KUHUSU MAMLAKA YA MUME

Ingawa mume na mke wana msimamo sawa mbele za Mungu, Biblia inasema kwamba kila mmoja ana jukumu lake. Andiko la Waroma 7:2 linasema kwamba mwanamke aliyeolewa yuko chini ya “sheria kwa mume wake.” Kampuni mbalimbali huteua kiongozi wa kusimamia shughuli za kampuni, Mungu pia amemteua mume kuwa kichwa cha mke wake. (1 Wakorintho 11:3) Waume wanapaswa kuongoza familia zao.

Ukiwa mume unawezaje kutimiza wajibu uliopewa na Mungu? Biblia inasema hivi: “Endeleeni kuwapenda wake zenu, kama vile Kristo pia alivyolipenda kutaniko.” (Waefeso 5:25) Kwa kweli, ingawa hakuoa, Yesu Kristo aliweka mfano mzuri unaoweza kukusaidia kuwa mume bora. Acheni tuchunguze mfano wake.

MAISHA YA YESU—MFANO BORA KWA WAUME

Yesu alitafuta fursa za kuwafariji na kuwasaidia wengine. Yesu aliwaalika wale waliokuwa wamechoshwa na kulemewa na matatizo mbalimbali: “Njooni kwangu, . . . nami nitawaburudisha ninyi.” (Mathayo 11:28, 29) Mara kwa mara Yesu aliwaponya watu na kutoa faraja ya kiroho. Ndio maana watu wengi walimkaribia Yesu wakitumaini kwamba angewasaidia!

Jinsi waume wanavyoweza kumwiga Yesu. Msaidie mke wako kufanya kazi mbalimbali. Wake wengine huhisi kama alivyohisi Rosa, aliyeomboleza hivi: “Nilikuwa mtumishi  wa mume wangu.” Kinyume na hilo, mume anayeitwa Kweku, ambaye anafurahia ndoa nzuri, anasema hivi: “Mara nyingi mimi humuuliza mke wangu jinsi ninavyoweza kumsaidia. Kwa sababu nampenda, mimi humsaidia kufanya kazi za nyumbani.”

Yesu alikuwa mwenye huruma na fadhili. Mwanamke fulani alikuwa ameugua ugonjwa mbaya kwa miaka 12. Alikuwa amesikia kuhusu nguvu za Yesu za kuponya na hivyo “alikuwa akisema, ‘Nikiyagusa tu mavazi yake ya nje nitapona.’” Alikuwa sahihi. Alimkaribia Yesu, akagusa mavazi yake, na akapona papo hapo! Ingawa wengine walisema kwamba mwanamke huyo alitenda kwa kimbelembele, Yesu alitambua kwamba mwanamke huyo alikuwa ameteseka sana kwa sababu ya ugonjwa. * Alimwambia hivi kwa fadhili: “Binti yangu, . . . uwe na afya njema kutokana na ugonjwa wako wenye kuhuzunisha.” Yesu alitambua hali yake ya ugonjwa na hakumwaibisha wala kumkemea. Hivyo alionyesha jinsi alivyokuwa mwanamume mwenye huruma na fadhili.—Marko 5:25-34.

 Jinsi waume wanavyoweza kumwiga Yesu. Mkeo anapokuwa mgonjwa, mhurumie na uwe na subira. Jitahidi kuelewa hali yake. Kwa mfano, Ricardo anasema, “Ninapotambua kwamba mke wangu anaudhika upesi, ninajitahidi sana kuepuka kusema maneno ambayo yatamfanya akasirike.”

Yesu aliwasiliana na wanafunzi wake. Yesu alizungumza kwa ukawaida na wanafunzi wake. Alisema hivi: “Mambo yote ambayo nimeyasikia kutoka kwa Baba yangu nimewajulisha ninyi.” (Yohana 15:15) Ni kweli kwamba wakati mwingine Yesu alitaka kuwa peke yake ili aweze kutafakari na kusali. Lakini mara kwa mara aliwaeleza wanafunzi wake hisia zake. Usiku wa kuamkia kifo chake, aliwaambia wazi wanafunzi wake kwamba alikuwa na “huzuni sana.” (Mathayo 26:38) Hata wakati ambapo wanafunzi hao walifanya mambo yaliyomhuzunisha, Yesu hakuacha kuzungumza nao.—Mathayo 26:40, 41.

Kutafakari mfano wa Yesu kunaweza kumsaidia mwanamume awe baba na mume mzuri

Jinsi waume wanavyoweza kumwiga Yesu. Zungumza na mke wako kuhusu hisia zako na maoni yako. Mwanamke anaweza kulalamika kwamba mume wake anazungumza sana anapokuwa hadharani lakini anaporudi nyumbani hunyamaza kimya. Kwa upande mwingine, ona jinsi Ana anavyohisi mume wake anapozungumza naye, “Mimi huhisi kwamba ananipenda na yupo karibu nami.”

Usimnyamazie mke wako eti ukidhani kwamba unamwadhibu. Mwanamke mmoja anasema hivi: “Mume wangu aliponikasirikia, alininyamazia kwa siku nyingi. Alifanya nihisi nimedharauliwa na mwenye hatia.” Hata hivyo mume anayeitwa Edwin, anajitahidi kuiga mfano wa Yesu, naye anasema hivi: “Ninapokasirika, naepuka kufoka, nangojea wakati unaofaa wa kuzungumzia jambo hilo.”

Joy, mwanamke aliyetajwa mwanzoni mwa makala hii, ameona jinsi mume wake alivyobadilika tangu aanze kujifunza Biblia na Mashahidi wa Yehova. Naye anasema hivi: “Amebadilika na anajitahidi sana kuwa mume mwenye upendo kwa kuiga mfano wa Yesu.” Duniani pote, watu waliofunga ndoa wanafaidika na mafundisho ya Biblia. Je, wewe pia ungependa kufaidika na mafundisho ya Biblia? Ongea na Shahidi wa Yehova ili apange kujifunza nawe Biblia bila malipo.

^ fu. 10 Kulingana na Sheria ya Musa, ugonjwa wa mwanamke huyu ulimfanya awe najisi, na hivyo mtu yeyote aliyemgusa angekuwa asiye safi.—Mambo ya Walawi 15:19, 25.

Pata Kujua Mengi Zaidi

Funzo la Biblia Ni Nini?

Pata majibu kwa maswali kuhusu programu yetu ya kujifunza Biblia bila malipo.

Jinsi Familia Yako Inavyoweza Kuwa na Furaha

Yehova, Mungu mwenye furaha, anataka familia ziwe na furaha. Ona ushauri wa Biblia kwa ajili ya waume, wake, wazazi, na watoto.