Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI OKTOBA 2013

 BIBLIA INABADILI MAISHA

“Nilichukiwa na Watu Wengi”

“Nilichukiwa na Watu Wengi”
  • ALIZALIWA: 1978

  • NCHI: CHILE

  • HISTORIA: MWENYE HASIRA KALI

MAISHA YANGU YA ZAMANI:

Nililelewa huko Santiago, mji mkuu wa Chile, katika eneo lililojaa dawa za kulevya na magenge ya wahalifu. Nilipokuwa na umri wa miaka mitano, baba yangu aliuawa. Kisha mama akaishi na mwanamume aliyekuwa mkatili. Alitupiga sote mara kwa mara. Bado ninaumia kihisia ninapokumbuka miaka hiyo.

Nilipoendelea kukua nikawa mjeuri sana kwa sababu ya mambo mabaya niliyokabili. Nilisikiliza muziki wenye mdundo mzito, nikanywa pombe kupita kiasi, na kutumia dawa za kulevya mara kwa mara. Nilihusika katika mapigano na wauzaji wa dawa za kulevya, ambao walijaribu kuniua mara kadhaa. Pindi moja, niliponea chupuchupu baada ya kudungwa kisu na mtu aliyekodiwa na genge la wahalifu ili aniue. Pindi nyingine, kikundi fulani cha wauzaji wa dawa za kulevya kilitishia kunipiga risasi kichwani na kujaribu kuninyonga.

Mwaka wa 1996, nilimpenda mwanamke anayeitwa Carolina, na tukaoana 1998. Baada ya mwana wetu wa kwanza kuzaliwa, nilikuwa na wasiwasi kwamba kwa sababu ya hasira yangu kali, ningekuwa kama babangu mlezi na kuitesa familia yangu. Basi, nilitafuta msaada kwenye kituo fulani cha kubadili tabia kilichokuwa karibu. Nilipokea matibabu na ushauri, lakini sikubadilika. Bado niliendelea kukasirishwa na mambo madogo, na sikuweza kujidhibiti. Nilijaribu kujiua nikifikiri kwamba hiyo ilikuwa njia nzuri ya kuepuka kuiumiza familia yangu. Hata hivyo, sikufaulu.

Kwa miaka mingi, sikuamini kuna Mungu, lakini nilitaka kuamini yuko. Basi, nikaanza kushirikiana na dini fulani ya kiinjilisti. Wakati huohuo, mke wangu alikuwa akijifunza Biblia pamoja na Mashahidi wa Yehova. Niliwachukia Mashahidi, na mara nyingi niliwatukana kwa sauti. Lakini sikuzote walikuwa wapole, ingawa sikutazamia hivyo.

 Siku moja, Carolina aliniomba nisome andiko la Zaburi 83:18 katika Biblia yangu. Andiko hilo linasema waziwazi jina la Mungu ni Yehova. Nilishangaa kwamba katika dini yangu nilikuwa nimejifunza kumhusu Mungu lakini si kumhusu Yehova. Mwanzoni mwa mwaka wa 2000, mimi pia nilianza kujifunza Biblia pamoja na Mashahidi.

JINSI BIBLIA ILIVYOBADILI MAISHA YANGU:

Nilipoendelea kujifunza, nilifurahi kujua kwamba Yehova ni mwenye huruma naye husamehe. Kwa mfano, andiko la Kutoka 34:6, 7 linamfafanua Yehova kuwa “Mungu mwenye rehema na neema, si mwepesi wa hasira naye ni mwingi wa fadhili zenye upendo na kweli, anayehifadhi fadhili zenye upendo kwa ajili ya maelfu, anayesamehe kosa na ubaya na dhambi.”

Nilifurahi kujua kwamba Yehova ni mwenye huruma naye husamehe

Hata hivyo, ilikuwa vigumu kufuata mambo niliyokuwa nikijifunza. Niliamini kwamba singeweza kamwe kuidhibiti hasira yangu kali. Kila mara niliposhindwa, Carolina alinitia moyo. Alinikumbusha kwamba Yehova aliona jitihada zangu. Alinisaidia kupata nguvu za kuendelea kujitahidi kumpendeza Yehova, ingawa mara nyingine nilihisi sitafaulu.

Siku moja, Alejandro, ambaye alikuwa akinifundisha Biblia, aliniambia nisome Wagalatia 5:22, 23. Andiko hilo linasema tunda la roho ya Mungu linatia ndani “upendo, shangwe, amani, ustahimilivu, fadhili, wema, imani, upole, kujizuia.” Alejandro aliniambia ili nisitawishe sifa hizo, sikupaswa kutegemea uwezo wangu, bali roho takatifu ya Mungu. Hilo lilibadili kabisa maoni yangu!

Baadaye, nilihudhuria kusanyiko kubwa la Mashahidi wa Yehova. Utaratibu na urafiki nilioona ulinisadikisha kwamba nilikuwa nimeipata dini ya kweli. (Yohana 13:34, 35) Nilibatizwa Februari mwaka wa 2001.

JINSI AMBAVYO NIMEFAIDIKA:

Kwa msaada wa Yehova, nimefaulu kushinda hasira yangu kali na sasa naishi kwa amani. Ninahisi amenitoa katika mtego uliokuwa umeninasa. Nilichukiwa na watu wengi, lakini siwalaumu. Hata hivyo, sasa ninafurahi kumtumikia Yehova kwa amani pamoja na mke wangu na wavulana wetu wawili.

Watu wa ukoo na rafiki zangu wa zamani hawaamini kwamba nimebadilika. Hata baadhi yao wameanza kujifunza Biblia. Pia, nimepata nafasi ya kuwasaidia wengine wamjue Yehova. Nimefurahi sana kuona kweli ya Biblia ikibadili maisha yao pia!