Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

MNARA WA MLINZI AGOSTI 2013

 WASOMAJI WETU WANAULIZA . . .

Kwa Nini Watu Fulani Hawatajwi Majina Katika Biblia?

Kwa Nini Watu Fulani Hawatajwi Majina Katika Biblia?

Katika kitabu cha Biblia cha Ruthu, mwanamume aliyekataa kutimiza mgawo wake kulingana na Sheria ya Musa anaitwa Fulani wa Fulani. (Ruthu 4:1-12) Je, tunapaswa kukata kauli kwamba watu wasiotajwa majina katika Biblia walikuwa wabaya au hawakuwa muhimu?

Hapana. Fikiria mfano tofauti. Ili kuandaa mlo wake wa mwisho wa Pasaka, Yesu aliwaambia wanafunzi wake “nendeni jijini kwa Fulani-wa-fulani [“mtu fulani,” Biblia Habari Njema]” na kutayarisha sherehe katika nyumba yake. (Mathayo 26:18) Je, tunaweza kusema “Fulani-wa-fulani” anayetajwa katika mstari huo alikuwa mtu mbaya au hakuwa muhimu? La hasha; “mtu fulani” anayetajwa hapa bila shaka alikuwa mwanafunzi wa Yesu. Kwa kuwa jina lake halikuwa muhimu kwenye simulizi hilo, halitajwi.

Zaidi ya hayo, Biblia ina majina ya watu wengi waovu; pia ina mifano ya watu wengi waaminifu ambao hawatajwi majina. Kwa mfano, jina la mwanamke wa kwanza Hawa, linajulikana sana. Hata hivyo, ubinafsi na kutotii kwake kulichangia dhambi ya Adamu ambayo ina matokeo mabaya kwetu sote. (Waroma 5:12) Kinyume chake, mke wa Noa hatajwi jina katika Maandiko, lakini alikuwa mtiifu na alimuunga mkono mumewe bila ubinafsi katika kazi yake muhimu. Kwa kweli, ingawa hatajwi jina alikuwa mtu muhimu na alibarikiwa na Mungu.

Kuna wengine waliofanya mambo muhimu, hata ya kishujaa ili kutimiza kusudi la Yehova, ambao hawatajwi majina katika Biblia. Mfikirie msichana Mwisraeli ambaye alikuwa kijakazi katika nyumba ya Naamani, mkuu wa jeshi la Siria. Kwa ujasiri alimwambia bimkubwa wake, mke wa Naamani, kuhusu nabii wa Yehova huko Israeli. Hilo lililotokeza muujiza mkubwa. (2 Wafalme 5:1-14) Pia, binti ya mwamuzi Mwisraeli Yeftha aliweka mfano mzuri wa imani. Kwa kupenda, aliamua kwamba hangeolewa na hangezaa watoto ili kutimiza nadhiri iliyowekwa na baba yake. (Waamuzi 11:30-40) Vivyo hivyo kuna watu ambao hawatajwi majina waliotunga zaburi zaidi ya 40 kutia ndani manabii waliotimiza migawo muhimu kwa uaminifu.1 Wafalme 20:37-43.

Labda mfano unaovutia zaidi ni ule wa malaika waaminifu. Kuna mamia ya mamilioni ya malaika, lakini wawili tu ndio wanaotajwa majina katika Biblia—Gabrieli na Mikaeli. (Danieli 7:10; Luka 1:19; Yuda 9) Malaika wengine hawatajwi majina katika Biblia. Kwa mfano, malaika aliyeulizwa na Manoa, baba ya Samsoni: “Jina lako ni nani, ili neno lako litakapotimia, tukupe heshima?” Malaika huyo alijibuje? “Kwa nini unauliza juu ya jina langu?” Kwa unyenyekevu, malaika huyo alikataa heshima ambayo ni Mungu pekee anapaswa kupewa.Waamuzi 13:17, 18.

Biblia haisemi sababu iliyofanya baadhi ya watu watajwe majina na wengine wasitajwe. Lakini tunaweza kujifunza mengi kutoka kwa watu waliomtumikia Mungu si kwa lengo la kujipatia umaarufu au kujulikana.