Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI AGOSTI 2013

 BIBLIA INABADILI MAISHA

“Nilianza Kufikiria kwa Uzito Mwelekeo wa Maisha Yangu”

“Nilianza Kufikiria kwa Uzito Mwelekeo wa Maisha Yangu”
  • MWAKA WA KUZALIWA: 1941

  • NCHI: AUSTRALIA

  • HISTORIA: ALIKUWA MVUTAJI SIGARA NA MLEVI

MAISHA YANGU YA ZAMANI:

Nililelewa huko Warialda, mji mdogo wa mashambani ulio New South Wales. Warialda ni eneo la mashambani ambako wakulima hufuga kondoo na ng’ombe na pia kukuza nafaka na mimea mingine. Mji huo ni safi, na hauna visa vingi vya uhalifu.

Nikiwa mzaliwa wa kwanza kati ya watoto kumi, nilianza kufanya kazi ili kuitegemeza familia nikiwa na umri wa miaka 13. Kwa sababu sikuwa na elimu nyingi, nilifanya kazi kwenye mashamba. Nilipofikisha umri wa miaka 15, nilikuwa nimeajiriwa kazi ya kufuga farasi.

Kufanya kazi shambani kulikuwa na faida na hasara pia. Kwa upande mmoja, nilifurahia sana kazi na mazingira. Usiku niliketi karibu na moto na kutazama mwezi na nyota huku upepo wa jioni ukileta harufu nzuri ya kichaka kilichokuwa karibu. Nilijiambia kwamba lazima kuna Mtu aliyeumba vitu hivyo vyote vyenye kustaajabisha. Kwa upande mwingine, huko shambani nilishawishiwa kujiingiza katika mazoea mabaya. Mara kwa mara nilisikia matusi, na ningepata sigara kwa rahisi. Baada ya muda nikaanza kuvuta sigara na kutumia matusi.

Nilipofikisha umri wa miaka 18, nilihamia Sydney. Nilijaribu kujiunga na jeshi lakini sikukubaliwa kwa sababu ya elimu yangu ndogo. Nilipata kazi na kukaa Sydney kwa mwaka mmoja. Kwa mara ya kwanza nikiwa huko nilikutana na Mashahidi wa Yehova. Nilikubali mwaliko wa kuhudhuria mikutano yao, na mara moja nikatambua kwamba wanafundisha ukweli.

Hata hivyo, muda mfupi baadaye nikaamua kurudi mashambani. Nilienda Goondiwindi, Queensland. Nilipata kazi, nikaoa na jambo la kusikitisha, nilianza kulewa.

Tulikuwa na watoto wawili. Baada ya wanangu kuzaliwa, nilianza kufikiria kwa uzito mwelekeo wa maisha yangu. Nilikumbuka yale niliyosikia kwenye mkutano wa Mashahidi  huko Sydney, na nikaamua kuchukua hatua.

Nilipata nakala ya zamani ya Mnara wa Mlinzi, ambayo ilikuwa na anwani ya ofisi ya tawi ya Mashahidi wa Yehova nchini Australia. Niliandika barua ya kuomba msaada. Kisha, Shahidi mwenye fadhili na upendo akanitembelea. Punde si punde akaanza kunifundisha Biblia.

JINSI BIBLIA ILIVYOBADILI MAISHA YANGU:

Nilipoendelea kujifunza Biblia, nilitambua kwamba nilihitaji kufanya mabadiliko maishani. Andiko la Biblia ambalo hasa lilinigusa moyo ni 2 Wakorintho 7:1. Andiko hilo linatuhimiza “tujisafishe wenyewe kila unajisi wa mwili.”

Niliamua kuacha kuvuta sigara na kulewa. Haikuwa rahisi kufanya mabadiliko kwa sababu mazoea hayo yalikuwa sehemu ya maisha yangu. Hata hivyo, niliamua kuishi maisha yanayompendeza Mungu. Jambo lililonisaidia ni kufuata kanuni iliyo katika Waroma 12:2: “Acheni kufanyizwa kulingana na mfumo huu wa mambo, bali mgeuzwe kwa kufanya upya akili yenu.” Niligundua kwamba ili kubadili tabia yangu, nilihitaji kubadili kufikiri kwangu na kuiona tabia yangu yenye kudhuru kulingana na maoni ya Mungu. Kwa msaada wake, nilifanikiwa kuacha kuvuta sigara na kulewa.

“Niligundua kwamba ili kubadili tabia yangu, nilihitaji kubadili kufikiri kwangu”

Hata hivyo, jambo gumu zaidi lilikuwa kuacha matusi. Nilijua ushauri wa Biblia ulioandikwa kwenye Waefeso 4:29: “Neno lililooza na lisitoke kinywani mwenu.” Hata hivyo, sikufanikiwa haraka kubadili usemi wangu. Kutafakari andiko la Isaya 40:26 kulinisaidia sana. Kuhusu nyota za mbinguni, andiko hilo linasema: “Inueni macho yenu juu, mwone. Ni nani ameviumba vitu hivi? Ni Yeye anayelileta jeshi lake kulingana na hesabu, ambaye zote anaziita kwa jina. Kutokana na wingi wa nguvu zenye msukumo, yeye pia akiwa hodari katika nguvu, hakuna hata moja kati ya hizo inayokosekana.” Nilijiambia ikiwa Mungu ana nguvu za kuumba anga lote hili—ambalo navutiwa kulitazama—kwa hakika anaweza kunipa nguvu za kufanya mabadiliko ili kumpendeza. Kwa sala na jitihada kubwa, mwishowe nilidhibiti usemi wangu.

JINSI AMBAVYO NIMEFAIDIKA:

Nikiwa mashambani, sikupata fursa ya kuzungumza na watu, kwa sababu kulikuwa na watu wachache kwenye mashamba nilikofanya kazi. Hata hivyo, kupitia mazoezi yanayopatikana kwenye mikutano ya Mashahidi wa Yehova, nimejifunza jinsi ya kujieleza. Kati ya mambo mengine, mazoezi hayo yamenisaidia kuzungumza na wengine kuhusu habari njema za Ufalme wa Mungu.Mathayo 6:9, 10; 24:14.

Kwa miaka kadhaa iliyopita, nimefurahia kutumikia nikiwa mzee wa kutaniko. Ninaliona kuwa pendeleo kubwa kufanya yote niwezayo ili kuwasaidia waamini wenzangu. Hata hivyo, baraka kubwa ni kumtumikia Yehova pamoja na mke wangu mwaminifu, na watoto wetu wapendwa.

Ninamshukuru Yehova kwa kunipa nafasi ya kufundishwa naye, hata ingawa nina elimu ndogo. (Isaya 54:13) Ninakubaliana kabisa na maneno ya andiko la Methali 10:22, linalosema: “Baraka ya Yehova—hiyo ndiyo hutajirisha.” Mimi na familia yangu tunatazamia kwa hamu kujifunza mengi zaidi kumhusu Yehova na kumtumikia milele.