Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI JULAI 2013

 SIRI YA FURAHA YA FAMILIA

Jinsi ya Kufanikiwa Katika Ndoa ya Pili

Jinsi ya Kufanikiwa Katika Ndoa ya Pili

HERMAN: * “Mke wangu wa kwanza alikufa baada ya kuugua kansa na tulikuwa tumeishi pamoja kwa miaka 34. Nilipooa tena, mke wangu Linda alihisi kila wakati nilikuwa nikimlinganisha na mke wangu wa kwanza. Isitoshe, rafiki zangu wa zamani walizungumzia sifa nzuri za mke wangu aliyekufa, na hilo lilimfadhaisha sana Linda.”

LINDA: “Baada ya kufunga ndoa na Herman, nilihisi kwamba hangenipenda kama alivyompenda mke wake wa kwanza. Mke huyo alikuwa mwenye fadhili, mpole, na mwenye adabu. Nyakati nyingine najiuliza kama Herman anaweza kunipenda kama alivyompenda.”

Herman na Linda wanafurahi kwamba walikutana. Linda, ambaye alitalikiana na mume wake wa kwanza, anasema Herman ni “shujaa wa mashujaa.” Lakini, kama maneno yao yanavyoonyesha, ndoa ya pili inaweza kutokeza matatizo ambayo hayakuwepo kwenye ndoa ya kwanza. *

Ikiwa umefunga ndoa tena unahisije kuhusu ndoa ya pili? Tamara, mwanamke aliyeolewa tena miaka mitatu baada ya kutalikiana na mumewe, anasema hivi: “Unapofunga ndoa mara ya kwanza, unakuwa na matumaini kwamba ndoa yenu itadumu milele. Lakini, huenda usiwe na hisia hizo katika ndoa ya pili kwa sababu unakumbuka ndoa yako ya kwanza ilivunjika.”

Hata hivyo, wenzi wengi wa ndoa wamepata furaha nyingi baada ya kufunga ndoa tena. Wamejitahidi kufanikisha ndoa zao, na wewe pia unaweza  kufanikiwa! Jinsi gani? Fikiria matatizo matatu ya kawaida na jinsi kanuni za Biblia zinavyoweza kukusaidia kuyatatua. *

TATIZO LA KWANZA: UNAJITAHIDI KUTOLINGANISHA NDOA YA PILI NA ILE YA KWANZA.

“Siwezi kusahau kumbukumbu za ndoa ya kwanza, hasa tunapotembelea maeneo ambayo mimi na mume wangu wa kwanza tulikuwa tukienda likizo,” anasema Ellen, anayeishi Afrika Kusini. “Nyakati nyingine ninamlinganisha mume wangu wa sasa na mume wangu wa kwanza.” Kwa upande mwingine, ikiwa mwenzi wako alikuwa kwenye ndoa nyingine, huenda ukahisi vibaya ikiwa mara nyingi anazungumza kuhusu ndoa hiyo.

Anzisheni kumbukumbu mpya ambazo zitaimarisha ndoa yenu

PENDEKEZO: Kubali kwamba wewe na mwenzi wako hamwezi kusahau haraka ndoa zenu za kwanza hasa ikiwa zilidumu kwa miaka kadhaa. Hata watu fulani wamesema kwamba wamemwita mwenzi wao kimakosa jina la mwenzi wao wa kwanza! Unawezaje kushughulika na hali kama hiyo? Biblia inatoa ushauri huu: “Jitahidi kumwelewa mwenzako.”—1 Petro 3:8, New Century Version.

Usimkataze mwenzi wako kuzungumza kuhusu ndoa ya kwanza. Mwenzi wako anapoanza kuzungumza kuhusu mwenzi wake wa kwanza, msikilize kwa makini na kwa huruma. Pia, usiamue haraka-haraka kwamba anakulinganisha na mwenzi huyo. Ian ambaye alioa tena miaka kumi iliyopita anasema “Mke wangu Kaitlyn hakuhisi vibaya nilipozungumza kuhusu mke wangu aliyekufa. Badala yake aliiona kuwa nafasi ya kunielewa vizuri.” Hata huenda ukatambua kwamba mazungumzo kama hayo yatakusaidia kuimarisha uhusiano wako na mwenzi wako wa pili.

Kazia fikira sifa nzuri na za kipekee za mwenzi wako wa sasa. Ni kweli kwamba huenda akakosa sifa na uwezo ambao mwenzi wako wa kwanza alikuwa nao. Lakini huenda mwenzi wako wa sasa anamzidi katika mambo mengine. Basi, imarisha msingi wa ndoa yako ya sasa ‘si kwa kulinganisha na mtu yule mwingine,’ bali kwa kukazia fikira na kuthamini sifa zake nzuri. (Wagalatia 6:4) Mwanamume anayeitwa Edmond, ambaye amefunga ndoa mara mbili, anasema: “Kama vile tu uhusiano kati yako na rafiki mmoja ulivyo tofauti na rafiki mwingine, ndivyo ilivyo na ndoa mbili.”

Unawezaje kuwa na usawaziko kati ya kukumbuka ndoa yako ya kwanza na kuzingatia ndoa ambayo mmeanzisha na mwenzi wako wa pili? Jared anasema: “Wakati mmoja nilimwambia mke wangu kwamba ndoa yetu ya kwanza ilikuwa kama kitabu ambacho mimi na mke wangu wa kwanza tuliandika pamoja. Mara kwa mara ninaweza kufungua kitabu hicho na kuchunguza mambo ambayo tulifurahia. Lakini siishi katika kitabu hicho. Badala yake, mimi na mke wangu tunaandika kitabu chetu pamoja, na hapo ndipo ninapofurahia kuishi sasa.”

JARIBU KUFANYA HIVI: Muulize mwenzi wako ikiwa anahisi vibaya unapozungumza kuhusu mwenzi wako wa kwanza. Tambua wakati ambapo hufai kuzungumza kuhusu mwenzi wako wa kwanza.

TATIZO LA PILI: UNAONA NI VIGUMU KUSHIRIKIANA NA MARAFIKI WA ZAMANI AMBAO HAWAMFAHAMU MWENZI WAKO WA PILI.

“Kwa muda fulani baada ya kuoana, mke wangu alihisi kwamba baadhi ya rafiki zangu walikuwa wakimchunguza,” anasema Javier, ambaye alioa tena miaka sita baada ya kutalikiana. Mume anayeitwa Leo alikabili hali tofauti. Anasema: “Watu fulani walimwambia mke wangu nikiwepo kwamba walimpenda na kumkosa mume wake wa kwanza!”

PENDEKEZO: Jaribu kuelewa hisia za rafiki zako. “Nafikiri nyakati nyingine rafiki wa zamani wanavunjika moyo wanaposhirikiana na wenzi wa ndoa walio tofauti na wale waliozoea,” anasema Ian, aliyetajwa mapema. Hivyo, ‘uwe mwenye usawaziko, na uonyeshe upole wote kuelekea watu wote.’ (Tito 3:2) Wape rafiki zako wakati wa kukubali mabadiliko hayo. Kama vile ndoa yako ilivyobadilika, ndivyo urafiki utakavyobadilika pia. Javier, aliyenukuliwa mapema, anasema kadiri muda ulivyopita,  ndivyo yeye na mkewe walivyoanzisha tena uhusiano na marafiki wa zamani. “Lakini pia tunajaribu kutafuta marafiki wapya,” anaongezea, “na hilo limetusaidia.”

Fikiria hisia za mwenzi wako unapokuwa na rafiki zako wa zamani. Kwa mfano, wanapoanza kuzungumzia mwenzi wako wa kwanza, tumia busara ili mwenzi wako wa sasa asihisi anapuuzwa. Methali fulani ya Biblia husema: “Mtu anaposema bila kufikiri, basi maneno yake yanaweza kuumiza kama upanga. Lakini mtu mwenye hekima anachagua maneno anayosema. Maneno yake yanaweza kuwaponya walioumia.”—Methali 12:18, Holy Bible—Easy-to-Read Version.

JARIBU KUFANYA HIVI: Fikiria hali ambazo zinaweza kufanya wewe au mwenzi wako ahisi vibaya. Zungumzieni mapema jinsi ambavyo mtashughulikia maswali na mazungumzo kuhusu mwenzi wa kwanza.

TATIZO LA TATU: UNAONA NI VIGUMU KUMWAMWINI MWENZI WAKO WA SASA KWA SABABU MWENZI WAKO WA ZAMANI HAKUWA MWAMINIFU.

“Niliogopa kusalitiwa tena,” anasema Andrew ambaye aliachwa na mke wake wa kwanza. Baadaye alimwoa Riley, mke wake wa sasa. “Mara nyingi nilijiuliza kama ningefaulu kuwa kama mume wa kwanza wa Riley. Hata nilikuwa na wasiwasi kwamba angehisi mimi si mume mzuri kisha aniache na kuolewa na mtu mwingine.”

PENDEKEZO: Zungumza kuhusu mahangaiko yako waziwazi pamoja na mwenzi wako. Biblia inasema: “Mipango huvunjika mahali ambapo hapana mazungumzo ya siri.” (Methali 15:22) Mazungumzo ya siri yaliwasaidia Andrew na Riley waaminiane. “Nilimwambia singemtaliki ili tu kuhepa matatizo,” anasema Andrew, “naye Riley akanihakikishia hivyo pia. Pole kwa pole nimefaulu kumwamini kabisa.”

Ikiwa mwenzi wako wa sasa alisalitiwa katika ndoa ya kwanza, jitahidi kabisa kumfanya akuamini. Kwa mfano, Michel na Sabine, ambao ndoa zao za kwanza zilikatishwa na talaka, waliamua kuambiana kama walikuwa wakiwasiliana na wenzi wao wa zamani. “Hilo lilifanya tuhisi salama kabisa,” anasema Sabine.—Waefeso 4:25.

JARIBUNI KUFANYA HIVI: Wekeni mipaka kuhusu kuwasiliana na watu wa jinsia tofauti, iwe ni ana kwa ana, kupitia simu, au kwenye Intaneti.

Ndoa nyingi za pili zimefanikiwa, na yenu pia inaweza kufaulu. Unapolinganisha na ndoa yako ya kwanza, inaelekea sasa unajielewa vizuri zaidi. Andrew aliyenukuliwa mapema anasema: “Nimepata faraja nyingi katika ndoa yangu na Riley. Baada ya kuishi pamoja kwa miaka 13, tuna uhusiano wa karibu sana ambao hatutaki kamwe kuuvunja.”

^ fu. 3 Majina yamebadilishwa.

^ fu. 5 Bila shaka, hali hutofautiana ndoa inapovunjika kwa sababu ya kifo cha mwenzi au talaka. Makala hii imekusudiwa kuwasaidia watu walio katika mojawapo ya hali hizo wafanikiwe katika ndoa ya pili.

^ fu. 7 Kwa habari zaidi kuhusu matatizo ya kulea watoto wa kambo, ona mfululizo wa makala wenye kichwa “Jinsi Familia za Kambo Zinavyoweza Kufanikiwa” katika gazeti Amkeni! la Aprili 2012 lililochapishwa na Mashahidi wa Yehova.

JIULIZE . . .

  • Ni sifa gani za pekee za mwenzi wangu ambazo ninathamini sana?

  • Rafiki zangu wanapoanza kuzungumzia ndoa yangu ya kwanza, ninawezaje kutumia busara ili kumheshimu mwenzi wangu wa sasa na kumwonyesha ninampenda?

Pata Kujua Mengi Zaidi

Uwe Mshikamanifu kwa Mwenzi Wako

Je, kuwa mwaminifu katika ndoa kunamaanisha tu kuepuka uzinzi?