Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI JUNI 2013

Ubaguzi Utakwisha Lini?

Ubaguzi Utakwisha Lini?

“NINA ndoto.” Miaka hamsini iliyopita, Agosti 28, 1963, mpigania-haki wa Marekani Martin Luther King, Jr., alitamka maneno hayo katika hotuba yake inayojulikana sana. Katika hotuba hiyo, King alielezea ndoto yake, au tumaini, kwamba siku moja watu wangeishi bila ubaguzi. Ingawa hotuba hiyo ilitolewa nchini Marekani, maneno yake yamewachochea watu katika mataifa mengi.

Martin Luther King, Jr., akitoa hotuba yake kuhusu haki za kijamii

Miezi mitatu baada ya hotuba ya King, Novemba 20, 1963, zaidi ya nchi 100 ulimwenguni zilikubali Azimio la Umoja wa Mataifa la Kuondoa Aina Zote za Ubaguzi wa Kijamii. Maazimio mengi yaliendelea kutolewa miaka iliyofuata. Jitihada hizo zote zinazusha swali, Je, kumekuwa na mafanikio?

Mnamo Machi 21, 2012, Katibu Mkuu wa Umoja wa Mataifa Ban Ki-moon alisema hivi: “Kumekuwa na mikataba na malengo muhimu—kutia ndani mikakati ya ulimwenguni pote—ya kuzuia na kuondoa kabisa ubaguzi wa rangi, kijamii, kizalendo na aina nyinginezo za ubaguzi. Hata hivyo, ubaguzi unaendelea kuwasababishia mateso mamilioni ya watu ulimwenguni.”

Hata katika nchi ambazo zimejitahidi kuondoa ubaguzi, swali linabaki: Je, jitihada hizo zimefanikiwa kuondoa kabisa ubaguzi katika mioyo ya watu au zimewafanya tu wasionyeshe ubaguzi hadharani? Wengine wanadai kwamba jitihada hizo zinaweza tu kudhibiti matendo ya watu lakini haziwezi kuondoa kabisa ubaguzi. Kwa nini? Kwa sababu matendo yanaweza kuonekana na kuadhibiwa na sheria, lakini ubaguzi ni mawazo na hisia zilizo ndani, ambazo ni vigumu kudhibitiwa.

Kwa hiyo, ili kuondoa ubaguzi jambo muhimu si kudhibiti tu matendo lakini pia kubadili mawazo na hisia za mtu kuelekea watu wa jamii au kikundi kingine. Je, kweli inawezekana kufanya hivyo? Ikiwa ndivyo inawezekanaje? Acheni tuangalie visa halisi ambavyo vitatusaidia kuona kwamba inawezekana kwa watu kufanya mabadiliko na kwamba kuna jambo linaloweza kuwasaidia kufanya hivyo.

BIBLIA ILIWASAIDIA KUSHINDA UBAGUZI

“Ninahisi nimekombolewa kutoka kwenye utumwa wa ubaguzi.”—Linda

Linda: Nilizaliwa nchini Afrika Kusini. Niliwaona watu ambao hawakuwa weupe kuwa wa hali ya chini, wasio na elimu na wasiotegemeka, na kama watumwa wa watu weupe. Nilikuwa nimezama katika mtazamo wa kibaguzi na sikutambua jambo hilo. Hata hivyo, nilibadili mtazamo wangu nilipoanza kujifunza Biblia. Nilijifunza kwamba “Mungu hana ubaguzi” na kwamba moyo ni muhimu kuliko rangi ya ngozi au lugha tunayozungumza. (Matendo 10:34, 35; Methali 17:3) Andiko la Wafilipi 2:3 lilinisaidia kuona kwamba ikiwa ningemwona kila mtu kuwa bora kuliko mimi ningefaulu kushinda ubaguzi. Kufuata kanuni hizo kumenisaidia kupendezwa na watu wa rangi zote. Sasa ninahisi nimekombolewa kutoka kwenye utumwa wa ubaguzi.

“Niliona mtazamo wa Mungu kuhusu watu.”—Michael

Michael: Nililelewa katika maeneo ya watu weupe nchini Australia, na niliwabagua sana watu kutoka bara la Asia, hasa Wachina.  Nilipokuwa nikiendesha gari na kumwona mtu mwenye asili ya Asia, nilizoea kufungua kioo cha gari na kumwambia “Nenda kwenu, Asia!” Baadaye nilipoanza kujifunza Biblia, niliona mtazamo wa Mungu kuhusu watu. Yeye anawapenda watu wa mataifa na rangi zote. Nilichochewa na upendo huo, na nikaacha kuwabagua. Inastaajabisha kufanya mabadiliko kama hayo. Sasa ninafurahia kushirikiana na watu kutoka nchi na malezi mbalimbali. Hilo limeboresha maisha yangu na kuniletea shangwe nyingi.

“Nilibadili mtazamo wangu na nikawa na uhusiano mzuri.”—Sandra

Sandra: Mama yangu alizaliwa huko Umunede Jimbo la Delta, Nigeria. Hata hivyo familia ya baba yangu ni kutoka Jimbo la Edo, nao huzungumza lugha ya Esan. Kwa sababu ya tofauti hizo, sikuzote mama yangu alibaguliwa na familia ya baba yangu mpaka alipokufa. Kwa hiyo, niliapa singekuwa na uhusiano wowote na watu kutoka jamii ya Esan na kwamba singeolewa na mtu kutoka Jimbo la Edo. Lakini nilipoanza kujifunza Biblia, nilianza kuona mambo kwa njia tofauti. Kwa kuwa Biblia inasema Mungu hana ubaguzi na kwamba mtu yeyote anayemwogopa anakubalika kwake, mimi ni nani hata niwachukie watu kwa sababu ya kabila au lugha yao? Nilibadili mtazamo wangu na nikawa na uhusiano mzuri na familia ya baba yangu. Kufuata kanuni za Biblia kumeniletea amani ya akili na furaha. Pia, kumenisaidia kuishi vizuri na watu wa malezi, rangi, lugha, au taifa tofauti. Namna gani mtu aliyenioa? Mume wangu ametoka Jimbo la Edo na anazungumza lugha ya Esan!

Kwa nini Biblia imefaulu kuwasaidia watu hao kutia ndani wengine wengi kushinda chuki na ubaguzi? Ni kwa sababu Biblia ni Neno la Mungu. Inaweza kubadili jinsi mtu anavyowaona watu wengine. Zaidi ya hayo, Biblia inaonyesha kinachohitajiwa ili kukomesha aina zote za ubaguzi.

UFALME WA MUNGU UTAONDOA KILA AINA YA UBAGUZI

Ingawa Biblia inaweza kutusaidia kudhibiti na kuondoa hisia za ubaguzi, kuna mambo mawili ambayo lazima yaondolewe ili kukomesha kabisa ubaguzi. Kwanza, kuna dhambi na kutokamilika kwa wanadamu. Biblia inasema hivi waziwazi: “Hakuna mwanadamu asiyetenda dhambi.” (1 Wafalme 8:46) Kwa hiyo, hata tukijitahidi kadiri gani, tunakabili hali ambayo mtume Paulo alikabili, na akaandika hivi: “Ninapotaka kufanya yaliyo sawa, yaliyo mabaya yapo pamoja nami.” (Waroma 7:21) Kwa hiyo, pindi kwa pindi, moyo wetu unafikiria “mawazo mabaya” yanayoweza kuongoza kwenye ubaguzi.Marko 7:21.

Pili, kuna uvutano wa Shetani Ibilisi. Biblia inasema Shetani ni “muuaji” na kwamba ndiye “anayeipotosha dunia nzima inayokaliwa.” (Yohana 8:44; Ufunuo 12:9) Hilo linaonyesha wazi sababu ya kuenea kwa aina mbalimbali za ubaguzi leo, na kwa nini wanadamu wameshindwa kukomesha ukosefu wa haki, ubaguzi, mauaji ya jamii nzima, na uovu mwingine.

Kwa hiyo, ili kukomesha ubaguzi, ni lazima kwanza dhambi na hali ya kutokamilika ya wanadamu pamoja na uvutano wa Shetani Ibilisi uondolewe. Biblia inaonyesha kwamba Ufalme wa Mungu utatimiza jambo hilo.

Yesu Kristo aliwafundisha wafuasi wake wasali kwa Mungu wakisema: “Ufalme wako na uje. Mapenzi yako na yatendeke duniani kama ilivyo mbinguni.” (Mathayo 6:10) Ufalme wa Mungu ndio utakaoondoa kabisa ukosefu wote wa haki—kutia ndani aina zote za ubaguzi.

Ufalme wa Mungu utakapoanza kutawala, Shetani ‘atafungwa,’ yaani kuzuiwa kabisa, “ili asipotoshe mataifa tena.” (Ufunuo 20:2, 3) Kisha kutakuwa na “dunia mpya” au, jamii ya wanadamu, na humo “uadilifu utakaa.” *2 Petro 3:13.

Mwishowe, wale watakaoishi katika ulimwengu huo watakuwa wakamilifu, na hawatakuwa na dhambi. (Waroma 8:21) Wakiwa raia wa Ufalme wa Mungu, “hawatasababisha madhara yoyote wala kusababisha uharibifu wowote.” Kwa nini? “Kwa maana dunia hakika itajawa na kumjua Yehova.” (Isaya 11:9) Wakati huo, wanadamu wote watajifunza njia za Yehova Mungu na kuiga utu wake. Hilo linamaanisha kwamba hakutakuwa na ubaguzi kabisa, “kwa maana hakuna ubaguzi kwa Mungu.”Waroma 2:11.

^ fu. 17 Ili upate habari zaidi kuhusu Ufalme wa Mungu na yale ambayo utatimiza, ona sura ya 3, 8, na 9 katika kitabu Biblia Inafundisha Nini Hasa? kilichochapishwa na Mashahidi wa Yehova.

Pata Kujua Mengi Zaidi

Amani Duniani—Itapatikanaje?

Jifunze jinsi ambavyo Mungu ameahidi kuleta amani duniani kupitia Ufalme wake.

Maoni ya Biblia Ni Nini Kuhusu Ubaguzi wa Kijamii?

Je, jamii zote ziko sawa? Je, ubaguzi wa kijamii utakwisha?