Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI MEI 2013

Je, Utamwamini Mungu?

Je, Utamwamini Mungu?

WAZIA kwamba una rafiki unayemheshimu sana, lakini anafanya jambo ambalo huelewi. Wengine wanamkosoa na kusema ana nia mbaya, wakidai kwamba rafiki yako ni mkatili. Je, ungekubaliana nao mara moja, au kwanza ungesikiliza maoni ya rafiki yako? Kama hangekuwapo ili ajieleze, je, ungeonyesha subira, bila kumhukumu haraka haraka?

Kabla ya kujibu, huenda ukataka kujua mengi. Unaweza kujiuliza, ‘Je, kweli ninamfahamu vizuri rafiki huyu, na nini kinachofanya nimheshimu?’ Lazima uwe na sababu. Sasa fikiria: Je, hatupaswi kufuata njia hiyo tunapochunguza kama kweli Mungu ni mkatili?

Huenda usielewe mambo fulani ambayo Mungu amefanya, au ukashangazwa na mambo ambayo ameruhusu yatokee. Watu wengi watakuambia kwamba Mungu ni mkatili na watakuhimiza utilie shaka nia yake. Je, utakuwa na maoni yanayofaa kumhusu na ujitahidi kumwelewa zaidi? Jibu litategemea kadiri unavyomjua. Jiulize, ‘Namwona Mungu kuwa rafiki wa aina gani?’

Kama umekabili matatizo maishani, huenda ukasema Mungu si rafiki mzuri hata kidogo. Lakini hebu fikiria. Je, Mungu amekusababishia matatizo maishani au amekubariki? Kama tulivyoona, Shetani ndiye “mtawala wa ulimwengu huu,” si Yehova. (Yohana 12:31) Basi, Shetani ndiye anayesababisha mateso mengi ulimwenguni. Vilevile, matatizo mengi yanasababishwa na hali yetu ya kutokamilika na mambo yasiyotazamiwa?

Je, Mungu amekusababishia matatizo maishani au amekubariki?

Kwa upande mwingine, Mungu amesababisha nini? Biblia inasema kwamba Mungu ndiye “Mtengenezaji wa mbingu na dunia”; kwamba kazi zake zinatia ndani miili yetu, ambayo ‘imeumbwa kwa njia ya ajabu’; na kwamba Yehova ndiye “Mungu ambaye pumzi yako imo mkononi mwake.” (Zaburi 124:8; 139:14; Danieli 5:23) Hayo yote yanamaanisha nini?

Yanamaanisha kwamba Muumba wetu ndiye aliyetupatia pumzi, na kila kitu. (Matendo 17:28) Mungu ndiye aliyetupatia zawadi ya uhai, mazingira na viumbe maridadi, mahusiano yenye upendo na urafiki, uwezo wa kuonja, kugusa, kusikia, na kunusa. (Yakobo 1:17) Je, baraka hizo hazimfanyi awe Rafiki tunayepaswa kumwamini na kumheshimu?

Hata hivyo, huenda si rahisi kwako kumwamini Mungu. Labda unahisi bado humfahamu vizuri na hivyo huwezi kumwamini. Na hilo linaeleweka. Katika makala hizi, hatuwezi kuzungumzia sababu zote zinazofanya watu fulani waseme Mungu ni mkatili. Lakini je, si ni afadhali kujitahidi kumfahamu Mungu vizuri zaidi? * Tuna hakika kwamba ukijitahidi, utajua ukweli kumhusu Mungu. Je, ni mkatili? La hasha: “Mungu ni upendo.”—1 Yohana 4:8.

^ fu. 8 Kwa mfano, ili uone sababu zaidi kwa nini Mungu anaruhusu uovu soma sura ya 11 ya kitabu Biblia Inafundisha Nini Hasa? kilichochapishwa na Mashahidi wa Yehova.

Pata Kujua Mengi Zaidi

Kwa Nini Mungu Anaruhusu Uovu na Kuteseka?

Uovu ulianzaje, na kwa nini Mungu ameruhusu uendelee? Je, kuteseka kutaisha?