Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

MNARA WA MLINZI (TOLEO LA FUNZO) JULAI 2015

Kumtumikia Yehova Katika “Siku Zenye Msiba”

Kumtumikia Yehova Katika “Siku Zenye Msiba”

“MATATIZO yangu ya afya yanaongezeka siku baada ya siku,” anasema Ernst, mwenye umri wa miaka 70 hivi. * Je, unapitia hali kama hiyo? Ikiwa unazeeka na unahisi kuwa afya yako inadhoofika na nguvu zinapungua, unaweza kuelewa maelezo yaliyo kwenye Mhubiri sura ya 12. Katika mstari wa 1, siku za uzee zinaitwa “siku zenye msiba.” Hata hivyo, haimaanishi kwamba ni lazima uwe na maisha yenye huzuni. Bado unaweza kuishi maisha yenye kuridhisha huku ukimtumikia Yehova kwa shangwe.

DUMISHA IMANI YENYE NGUVU

Ndugu na dada wapendwa mliozeeka, si ninyi peke yenu mnaopitia hali ngumu. Watumishi wa Yehova waliozeeka katika nyakati za Biblia walikabili hali kama zenu. Kwa mfano, Isaka, Yakobo, na Ahiya walipoteza uwezo wao wa kuona. (Mwa. 27:1; 48:10; 1 Fal. 14:4) Sara alihisi ‘amezeeka.’ (Mwa. 18:11, 12) Mfalme Daudi ‘hakuwa akipata joto.’ (1 Fal. 1:1) Barzilai tajiri hangeweza tena kufurahia ladha ya chakula au sauti ya muziki. (2 Sam. 19:32-35) Abrahamu na Naomi walilazimika kukabiliana na huzuni ya kufiwa na wenzi wao wa ndoa.—Mwa. 23:1, 2; Rut 1:3, 12.

Ni nini kilichowasaidia waendelee kuwa na shangwe na kushikamana na Yehova? Alipokuwa amezeeka, Abrahamu aliamini ahadi za Yehova, naye “akawa mwenye nguvu kwa imani yake.” (Rom. 4:19, 20) Sisi pia tunahitaji imani yenye nguvu. Imani ya aina hiyo haitegemei umri, uwezo, au hali zetu. Kwa mfano, mzee wa ukoo Yakobo alikuwa na imani yenye nguvu katika ahadi za Mungu hata alipokuwa dhaifu, alipopoteza uwezo wa kuona, na alipokuwa akiugua kitandani. (Mwa. 48:1-4, 10; Ebr. 11:21) Leo, Ines mwenye umri wa miaka 93 anaugua ugonjwa unaodhoofisha misuli, lakini bado anasema hivi: “Kila siku nahisi nimethawabishwa sana na Yehova. Kila siku ninafikiria kuhusu paradiso. Jambo hilo linanipa tumaini.” Huo ni mtazamo mzuri sana!

Tunaimarisha imani yetu kwa kusali, kuchunguza Neno la Mungu, na kuhudhuria mikutano ya Kikristo. Nabii Danieli aliyezeeka alisali mara tatu kwa siku na aliendelea kujifunza Neno la Mungu. (Dan. 6:10; 9:2) Anna, aliyekuwa mjane, ‘hakukosa kamwe kuwa katika hekalu.’ (Luka 2:36, 37) Unapohudhuria mikutano na kushiriki kadiri uwezavyo, unajiburudisha na kuwaburudisha wote wanaohudhuria. Sikuzote Yehova anapendezwa na sala zako, hata kama hauwezi kufanya mambo mengi.—Met. 15:8.

Watie moyo wengine

Wengi kati yenu ninyi ndugu na dada zetu waaminifu, mngependa kuona, kusoma na kuwa na nguvu za kutosha kuhudhuria mikutano, lakini hali inazidi kuwa ngumu au huenda haiwezekani kufanya hivyo. Basi mfanye nini? Fanyeni chochote kile kilicho ndani ya uwezo wenu. Wengi ambao hawawezi kuhudhuria mikutano wanafurahia kuisikiliza kupitia simu. Licha ya uwezo mdogo wa kuona, Inge mwenye umri wa miaka 79 hutayarisha mikutano kwa kutumia nakala zenye maandishi makubwa sana ambazo ndugu fulani kutanikoni humchapishia.

Huenda ukawa na kitu ambacho wengine wangependa kuwa nacho, yaani, wakati. Kwa nini usiutumie wakati huo kusikiliza rekodi za sauti za Biblia, machapisho ya Biblia, drama, na hotuba? Pia, unaweza kuwapigia simu waumini wenzako ili kuwapa zawadi ya kiroho na kufurahia “ubadilishanaji wa kitia-moyo.”—Rom. 1:11, 12.

UWE NA BIDII KATIKA UTUMISHI WA MUNGU

Hubiri neno

Christa mwenye umri wa miaka zaidi ya 80 anasema hivi kwa masikitiko, “Ni jambo baya sana kutokuwa na bidii kama ulivyokuwa awali.” Basi, wale waliozeeka wanawezaje kudumisha shangwe yao?  Peter mwenye umri wa miaka 75 anasema, “Inafaa kuwa na mtazamo mzuri na kutofikiria kila wakati kuhusu mambo usiyoweza kufanya, badala yake furahia kile unachoweza kufanya.”

Je, unaweza kufikiria njia za kutoa ushahidi ambazo unaweza kutumia? Heidi hawezi kuhubiri nyumba kwa nyumba kama zamani. Akiwa na umri wa zaidi ya miaka 80, alijifunza kuandika barua kwa kutumia kompyuta. Wahubiri wengine wenye umri mkubwa huanzisha mazungumzo ya Biblia wakiwa katika bustani za umma au kituo cha basi. Ikiwa unaishi kwenye nyumba ya kuwatunzia wazee, unaweza kufanya mahali hapo kuwa “eneo” lako la utumishi kwa kuwahubiria wauguzi na watu wengine wanaoishi hapo.

Uwe mkarimu

Mwishoni mwa maisha yake, Mfalme Daudi aliendeleza ibada safi kwa bidii. Alitoa michango na kupanga mambo kwa ajili ya ujenzi wa hekalu. (1 Nya. 28:11–29:5) Vivyo hivyo, unaweza kufuatilia kile kinachoendelea katika kazi ya Ufalme ulimwenguni pote na kufanya kila unachoweza kuunga mkono. Kwa nini usiwategemeze mapainia au wahubiri wenye bidii katika kutaniko lako kwa maneno yenye kutia moyo, kuwapa zawadi ndogo, au viburudisho? Katika sala zako, wakumbuke vijana na familia, watumishi wa wakati wote, wagonjwa, na wale wenye majukumu mazito.

Ndugu na dada wapendwa mliozeeka, ninyi ni wenye thamani sana na utumishi wenu unathaminiwa pia. Baba yetu wa mbinguni hatawaacha kamwe. (Zab. 71:9) Yehova anawapenda na anawathamini sana. Hivi karibuni, sote tutaishi miaka mingi bila maumivu wala taabu. Tutakuwa na nguvu nyingi na afya bora huku tukiendelea kumtumikia kwa umilele wote Mungu wetu mwenye upendo, Yehova!

^ fu. 2 Baadhi ya majina yamebadilishwa.