Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) JANUARI 2015

Walijitoa Wenyewe kwa Hiari—New York

Walijitoa Wenyewe kwa Hiari—New York

MIAKA michache iliyopita, Cesar na mke wake Rocio waliishi raha mustarehe jijini California. Cesar alifanya kazi ya wakati wote ya kufunga vifaa vya kupasha na kupunguza joto, na mifumo ya kurekebisha hewa. Rocio alifanya kazi ya muda katika ofisi ya daktari. Walikuwa na nyumba yao wenyewe na hawakuwa na watoto. Hata hivyo, jambo fulani lilitokea ambalo lilibadili maisha yao. Jambo gani hilo?

Mnamo mwezi wa Oktoba 2009, ofisi ya tawi ya Marekani ilituma barua kwa makutaniko yote nchini humo, ikiwaalika wajitoleaji wenye ustadi kutuma maombi ya kutumika Betheli kwa muda ili kusaidia upanuzi wa majengo ya ofisi ya tawi huko Wallkill, New York. Hata wale ambao walikuwa wamepita umri wa kualikwa kutumika Betheli walialikwa kutuma maombi. Cesar na Rocio wanasimulia hivi: “Kwa sababu ya umri wetu, tulijua kwamba hiyo ingekuwa fursa pekee ya kutumika Betheli, na hivyo hatungeruhusu jambo lolote lituzuie.” Bila kukawia, wenzi hao walituma maombi yao.

Baadhi ya wajitoleaji wanaofanya kazi Warwick

Mwaka mmoja ulipita bila ya Cesar na Rocio kualikwa Betheli. Hata hivyo, waliamua kurahisisha maisha yao ili wafikie mradi wao. Cesar anasema hivi: “Tulibadili gereji yetu iwe nyumba ndogo ya kuishi ili tuweze kupangisha nyumba yetu kubwa. Baadaye, tulihama kutoka katika nyumba yetu ya kifahari tuliyojenga miaka michache tu iliyopita yenye upana wa mita 200 za mraba, kisha tukahamia kwenye nyumba hiyo ndogo yenye upana wa mita 25 za mraba. Kufanya mabadiliko hayo kungetuwezesha kuwa tayari kukubali mwaliko wa Betheli iwapo tungepata.” Matokeo yakawa nini? Rocio anasema hivi: “Mwezi mmoja tu baada ya kuhamia kwenye nyumba yetu ndogo, tulipata mwaliko wa kutumika tukiwa wajitoleaji wa muda huko Wallkill. Ilikuwa wazi kwamba Yehova alitubariki kwa sababu ya kurahisisha maisha yetu.”

Jason, Cesar na William

 ROHO YAO YA KUJIDHABIHU YABARIKIWA

Kama Cesar na Rocio, mamia ya ndugu na dada pia wamejidhabihu ili kushiriki ujenzi unaoendelea katika Jimbo la New York. Baadhi yao wanasaidia upanuzi wa majengo huko Wallkill, na wengine wengi wanapendeleo la kushiriki ujenzi wa makao makuu ya ulimwenguni pote huko Warwick. * Wengi wao wameacha nyumba, kazi nzuri na hata wanyama vipenzi ili wamtumikie Yehova kikamili. Je, Yehova amebariki roho hiyo ya kujidhabihu? Ndiyo, amebariki!

Way

Kwa mfano, Way, ambaye ni fundi-umeme, na mke wake Debra, wote wana umri wa miaka 60 hivi, waliuza nyumba yao na vitu vingine vingi huko Kansas na kuhamia Wallkill ili watumike wakiwa Wanabetheli wanaoishi nje ya ofisi ya tawi. * Ingawa walilazimika kufanya mabadiliko maishani, wanahisi kwamba wamefaidika sana kwa sababu ya kujidhabihu. Debra anasema hivi kuhusu mgawo wake: “Nyakati nyingine, mimi huhisi kana kwamba ninashiriki ujenzi katika Paradiso kama inavyoonyeshwa katika machapisho yetu!”

Melvin na Sharon waliuza nyumba na vitu vingine huko South Carolina ili washiriki ujenzi huko Warwick. Ingawa haikuwa rahisi kufanya hivyo, wenzi hao wanahisi kuwa ni pendeleo kushiriki mradi huo wa kihistoria. Wao wanasema hivi: “Kushiriki ujenzi ambao utanufaisha tengenezo la ulimwenguni pote hutupa shangwe ya pekee sana.”

Kenneth

Kenneth, mjenzi aliyestaafu na Maureen, ambao wana umri wa miaka 55 hivi walihama California ili wasaidie mradi wa ujenzi huko Warwick. Ili wahame, walifanya mipango na dada katika kutaniko atunze nyumba yao, na pia waliomba familia zao zimtunze baba ya Ken aliyezeeka. Je, wanajuta kwa sababu ya kujidhabihu ili kutumika Betheli? La! Ken anasema hivi: “Tunafaidika kwa njia kubwa sana. Haimaanishi kwamba hatupati changamoto, hata hivyo, tunaishi maisha yenye kuridhisha na tunapendekeza kwa moyo wote utumishi huu kwa wengine.”

KUSHINDA CHANGAMOTO

Wengi wanaojitolea walihitaji kushinda vizuizi fulani. Kwa mfano, William na Sandra wenye umri wa miaka 60 hivi, waliishi maisha mazuri huko Pennsylvania. Walikuwa na kiwanda cha kutengeneza vipuri vya mashine chenye mafanikio, kilichokuwa na wafanyakazi 17. Walishirikiana na kutaniko moja tangu wakiwa watoto, na watu wengi wao wa ukoo waliishi katika eneo hilo. Hivyo, walipopata fursa ya kutumika Wallkill wakiwa Wanabetheli wanaoishi  nje ya makao ya Betheli, walijua kwamba wangeacha marafiki wao na kila kitu walichozoea. William anasema hivi: “Kwa kweli, kuacha maisha tuliyozoea ilikuwa changamoto kubwa zaidi kwetu.” Hata hivyo, baada ya kusali sana kuhusu jambo hilo, waliamua kufanya mabadiliko nao hawajuti kamwe. William anaendelea kusema hivi: “Shangwe tunayopata kwa kushiriki moja kwa moja katika kazi hiyo na kutumika pamoja na familia ya Betheli haiwezi kulinganishwa na kitu kingine chochote. Mimi na Sandra tuna furaha zaidi kuliko awali!”

Baadhi ya wenzi wa ndoa wanaofanya kazi Wallkill

Ricky, ambaye ni msimamizi wa ujenzi huko Hawaii, alialikwa kusaidia ujenzi huko Warwick akiwa Mwanabetheli anayeishi nje ya makao ya Betheli. Mke wake, Kendra, alimtia moyo akubali mwaliko huo. Hata hivyo, walihangaikia hali ya mwana wao, Jacob mwenye umri wa miaka 11. Hawakuwa na uhakika kama lingekuwa jambo la busara kuhamia Jimbo la New York na ikiwa mwana wao angeweza kuzoea mazingira tofauti.

Ricky anasema hivi: “Tulitamani kushirikiana na kutaniko ambalo lilikuwa na watoto wenye maendeleo ya kiroho ili Jacob apate marafiki wengi wazuri.” Hata hivyo, kutaniko walilohamia lilikuwa na watoto wachache tu na Wanabetheli kadhaa. Ricky anaendelea kusema hivi: “Baada ya mkutano wetu wa kwanza, nilimuuliza Jacob alionaje kutaniko jipya, hasa kwa sababu hakukuwa na watoto wa umri wake. Alinijibu, ‘Baba, usijali. Wanabetheli vijana watakuwa rafiki zangu.’”

Jacob na wazazi wake wanafurahia ushirika pamoja na Wanabetheli katika kutaniko lao

Kwa kweli, Jacob na Wanabetheli hao wamekuwa marafiki sana. Hilo limekuwa na matokeo gani? Ricky anaeleza hivi: “Usiku mmoja nilikuwa napita karibu na chumba cha mwana wangu, na nikagundua kwamba taa ilikuwa bado inawaka. Nilidhani ningempata akicheza michezo ya kompyuta, lakini kumbe alikuwa akisoma Biblia! Nilipomuuliza alikuwa akifanya nini, Jacob alisema, ‘Mimi ni Mwanabetheli mchanga, na ninataka kusoma Biblia kwa mwaka mmoja.’” Ricky na Kendra wanafurahi sana, si kwa sababu tu Ricky anashiriki ujenzi unaoendelea huko Warwick bali pia kuhamia huko kunamsaidia mwana wao kukua kiroho.—Met. 22:6.

HAWANA WASIWASI KUHUSU WAKATI UJAO

Luis na Dale

Hatimaye, miradi ya ujenzi ya Wallkill na Warwick itakamilika, hivyo wajitoleaji wanaelewa kwamba utumishi wao Betheli ni wa muda tu. Hata hivyo, je, ndugu na dada hao wana wasiwasi kupita kiasi kuhusu wakati wao ujao? La hasha! Wengi wana maoni sawa na familia mbili za wenzi wa  ndoa wenye umri wa makamo kutoka Florida. John, msimamizi wa ujenzi, na mke wake, Carmen, ambao ni wajitoleaji wa muda huko Warwick wanasema hivi: “Tumeona jinsi ambavyo Yehova ametuandalia mahitaji yetu ya lazima hadi sasa. Tunaamini kabisa kwamba Yehova ametuleta hapa na hatatuacha.” (Zab. 119:116) Luis, ambaye ni mtengenezaji wa mfumo wa kuzima moto, na mke wake Quenia, wanatumika huko Wallkill. Wanasema hivi: “Yehova ametuonyesha sana ukarimu kwa kutuandalia mahitaji yetu ya kimwili. Ingawa hatujui ni kwa njia gani,  lini, au wapi, tuna hakika kwamba ataendelea kututunza.”—Zab. 34:10; 37:25.

“BARAKA HATA KUSIWE NA UHITAJI TENA”

John na Melvin

Huenda wajitoleaji wengi wangetoa sababu za kutojitolea kushiriki ujenzi huko New York. Hata hivyo, wamemjaribu Yehova kama anavyotuhimiza: “Tafadhali, mnijaribu, . . . kama sitawafungulia ninyi malango ya mbinguni na kuwamwagia baraka hata kusiwe na uhitaji tena.”—Mal. 3:10.

Je, wewe pia utamjaribu Yehova ili upate baraka nyingi? Sali na ufikirie mambo unayoweza kufanya ili ushiriki kazi hiyo yenye kusisimua inayoendelea huko New York au katika miradi mingine ya ujenzi ya kitheokrasi na uone jinsi Yehova atakavyokuthawabisha.—Marko 10:29, 30.

Gary

Dale, ambaye ni mhandisi wa ujenzi, na Cathy, kutoka Alabama, wanapendekeza utumishi huo kwa wengine. Wanajitolea Wallkill, nao wanasema hivi: “Ukiwa na ujasiri wa kuacha maisha uliyozoea utaona jinsi ambavyo roho ya Yehova itakusaidia.” Ili uweze kujitolea, unahitaji kufanya nini? Dale anaendelea kusema hivi: “Rahisisha maisha kabisa nawe hutajuta hata kidogo!” Gary, kutoka North Carolina, ana uzoefu wa miaka 30 katika kazi ya kusimamia ujenzi. Yeye na mke wake, Maureen, wanasema kwamba baraka moja ambayo wanafurahia huko Warwick ni “kufahamiana na kufanya kazi pamoja na ndugu na dada wapendwa ambao wamemtumikia Yehova kwa miaka mingi wakiwa Betheli.” Gary anaongezea hivi: “Ili utumike Betheli, unahitaji kuishi maisha rahisi, na hiyo ndiyo njia bora ya kuishi katika mfumo huu wa mambo.” Jason, ambaye ni fundi-umeme, na Jennifer, kutoka Illinois, wanasema kwamba kufanya kazi katika mradi wa Betheli ya Wallkill “huwezesha kuona uhalisi wa maisha katika ulimwengu mpya.” Jennifer anaongezea hivi: “Inasisimua sana kuhisi kwamba Yehova anathamini kila kitu unachofanya na kazi hiyo ina thamani ya kudumu machoni pa Yehova. Yehova anatutajirisha kwa kadiri kubwa.”

^ fu. 7 Wanabetheli wa muda hugharimia mahitaji yao na nyumba wanazoishi, nao hufanya kazi Betheli siku moja au zaidi kwa juma.