Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) JANUARI 2015

Mshukuruni Yehova, Mpate Baraka

Mshukuruni Yehova, Mpate Baraka

“Mshukuruni Yehova, kwa maana yeye ni mwema.” —ZAB. 106:1.

1. Kwa nini inafaa tumshukuru Yehova?

YEHOVA, Mpaji wa “kila zawadi njema na kila tuzo kamilifu,” kwa kweli anastahili shukrani zetu. (Yak. 1:17) Akiwa Mchungaji wetu mwenye upendo, yeye hutuandalia mahitaji yetu ya kimwili na kiroho. (Zab. 23:1-3) Amethibitika kuwa “kimbilio na nguvu” zetu, hasa wakati wa taabu! (Zab. 46:1) Kwa kweli, tuna sababu nyingi za kukubaliana kwa moyo wote na mtunga-zaburi ambaye aliandika hivi: “Mshukuruni Yehova, kwa maana yeye ni mwema; kwa maana fadhili zake zenye upendo ni za mpaka wakati usio na kipimo.”—Zab. 106:1.

Andiko letu la mwaka wa 2015 ni: “Mshukuruni Yehova, kwa maana yeye ni mwema.”—Zaburi 106:1

2, 3. (a) Kuna hatari gani ya kukosa kuthamini baraka ambazo tumepata? (b) Tutazungumzia maswali gani katika makala hii?

2 Kwa nini ni muhimu tuzungumze kuhusu kutoa shukrani? Kama ilivyotabiriwa, watu katika siku hizi za mwisho wamekuwa wasio na shukrani. (2 Tim. 3:2) Watu wengi hawathamini baraka ambazo wamepata. Ulimwengu wa kibiashara pamoja na matangazo yake ya kibiashara umefanya wengi wafuatilie vitu vya kimwili badala ya kutosheka na vitu walivyo navyo. Sisi pia tunaweza kuathiriwa na roho hiyo ya kukosa shukrani. Kama  Waisraeli wa kale, tunaweza kukosa kuwa wenye shukrani na kutothamini uhusiano wetu wenye thamani pamoja na Yehova na baraka ambazo tumepata kutoka kwake.—Zab. 106:7, 11-13.

3 Pia, fikiria jambo linaloweza kutokea tunapokabili majaribu magumu. Nyakati hizo, huenda tukalemewa kirahisi na majaribu na kusahau baraka tulizo nazo. (Zab. 116:3) Hivyo basi, tunawezaje kusitawisha moyo wenye shukrani na kuendelea kuwa nao? Ni nini kitakachotusaidia kuwa na mtazamo unaofaa hata tunapokabili majaribu makali? Acheni tuone.

“WEWE MWENYEWE UMEFANYA MAMBO MENGI, EE YEHOVA”

4. Tunawezaje kudumisha moyo wenye shukrani?

4 Ili tusitawishe moyo wenye shukrani na kuendelea kuwa nao, ni lazima tutambue na kutafakari baraka ambazo tumepata kutoka kwa Yehova na kuchunguza kwa uangalifu matendo yake ya fadhili zenye upendo. Mtunga-zaburi alipofanya hivyo, alishangazwa na mambo mengi ya ajabu ambayo Yehova amefanya.—Soma Zaburi 40:5; 107:43.

5. Mtume Paulo anatufunza nini kuhusu kutoa shukrani?

5 Mtume Paulo anaweza kutufunza mambo mengi kuhusu jinsi ya kuwa wenye shukrani. Bila shaka alitafakari kuhusu baraka alizopata, kwa kuwa mara nyingi alimshukuru Yehova kutoka moyoni kupitia sala. Paulo alijua vizuri kwamba zamani alikuwa “mkufuru na mtesaji na mtu mwenye dharau.” Kwa hiyo, alimshukuru Mungu na Kristo kwa sababu walimwonyesha rehema na kumkabidhi huduma licha ya mwenendo wake wa zamani wenye dhambi. (Soma 1 Timotheo 1:12-14.) Pia, Paulo aliwathamini sana Wakristo wenzake, na mara nyingi alimshukuru Yehova kwa sababu ya sifa zao nzuri na utumishi wao mwaminifu. (Flp. 1:3-5, 7; 1 The. 1:2, 3) Paulo alipokabili hali ngumu, alimshukuru Yehova mara moja kwa sababu ndugu zake wa kiroho walimtegemeza kwa wakati unaofaa. (Mdo. 28:15; 2 Kor. 7:5-7) Si ajabu kwamba Paulo aliwatia moyo Wakristo kwa maneno haya: “Mjionyeshe kuwa wenye shukrani . . . , kuonyana kwa zaburi, sifa kwa Mungu, nyimbo za kiroho kwa neema.”—Kol. 3:15-17.

KUTAFAKARI NA KUSALI—HUTUSAIDIA KUENDELEA KUWA WENYE SHUKRANI

6. Una sababu gani hasa ya kumshukuru Yehova?

6 Tunawezaje kuiga mfano mzuri wa Paulo katika kusitawisha na kuonyesha shukrani? Kama Paulo, tunahitaji kutafakari yale ambayo Yehova ametufanyia sisi binafsi. (Zab. 116:12) Ikiwa ungeulizwa, ‘Unamshukuru Yehova kwa baraka zipi?’ Ungejibuje? Je, ungetaja uhusiano wako wenye thamani pamoja na Yehova? Au msamaha wa dhambi zako kwa sababu ya kuonyesha imani katika dhabihu ya fidia ya Kristo? Je, ungetaja majina ya baadhi ya ndugu na dada ambao walikutegemeza ulipokuwa ukipitia majaribu mbalimbali magumu? Bila shaka, ungetaja mwenzi wako mpendwa au watoto wako. Tukitenga wakati wa kutafakari baraka hizo nzuri kutoka kwa Baba yetu mwenye upendo Yehova, moyo wetu utajawa na shukrani na tutachochewa kutoa shukrani kila siku.—Soma Zaburi 92:1, 2.

7. (a) Kwa nini tunapaswa kutoa sala za shukrani? (b) Utapata faida gani kwa kumshukuru Yehova katika sala?

7 Tunapotafakari baraka ambazo tumepata, tutachochewa kumshukuru Yehova  katika sala. (Zab. 95:2; 100:4, 5) Watu wengi huona sala kuwa njia ya kumwomba Mungu vitu tu. Hata hivyo, sisi tunajua kwamba Yehova hufurahi sana tunapomshukuru kwa vitu tulivyo navyo. Biblia ina sala nyingi za shukrani zenye kugusa moyo, kutia ndani sala zilizotolewa na Hana na Hezekia. (1 Sam. 2:1-10; Isa. 38:9-20) Kwa hiyo, iga mfano wa watumishi hao waaminifu walioonyesha shukrani. Naam, mshukuru Yehova katika sala kwa baraka ulizo nazo. (1 The. 5:17, 18) Kuna faida nyingi za kufanya hivyo. Utatiwa moyo, upendo wako kwa Yehova utaongezeka na utamkaribia zaidi.—Yak. 4:8.

Unamshukuru Yehova kwa baraka gani? (Tazama fungu la 6 na 7)

8. Ni mambo gani yanayoweza kutufanya tuache kuthamini yale yote ambayo Yehova ametufanyia?

8 Kwa nini tunapaswa kujihadhari ili tusiache kuthamini wema wa Yehova? Kwa sababu tumerithi mwelekeo wa kukosa shukrani. Hebu fikiria: Wazazi wetu wa kwanza, Adamu na Hawa, waliwekwa katika bustani iliyokuwa paradiso. Walitimiziwa mahitaji yao yote, na walikuwa na tarajio la kuishi milele kwa amani. (Mwa. 1:28) Lakini hawakuthamini baraka zao. Kwa pupa, walitamani kupata zaidi. Kwa sababu hiyo, walipoteza kila kitu. (Mwa. 3:6, 7, 17-19) Kwa kuwa tumezungukwa na ulimwengu usio na shukrani, sisi pia tunaweza kuacha kuthamini mambo yote ambayo Yehova ametufanyia. Tunaweza kuanza kuona urafiki wetu pamoja naye kuwa jambo la kawaida tu. Tunaweza kuacha kuthamini pendeleo la kuwa sehemu ya undugu wa ulimwenguni pote. Tunaweza kuzama katika mambo ya ulimwengu huu ambao utapitilia mbali hivi karibuni. (1 Yoh. 2:15-17) Ili kuepuka mtego huo, tunapaswa kutafakari kuhusu baraka nyingi tulizo nazo, na sikuzote kumshukuru Yehova kwa pendeleo la kuwa watu wake.—Soma Zaburi 27:4.

TUNAPOKABILIANA NA MAJARIBU

9. Tunapokabili majaribu yenye kuhuzunisha, kwa nini tutafakari baraka tulizo nazo?

9 Kuwa na moyo wenye shukrani kunaweza kutusaidia kukabiliana na majaribu yenye kuhuzunisha. Huenda tukahisi tumelewa ikiwa tunakumbwa ghafla na hali ambazo zitabadili kabisa maisha yetu, kama vile mwenzi wa ndoa kukosa uaminifu, ugonjwa hatari, kifo cha mpendwa, au madhara ya msiba wa asili. Nyakati kama hizo, tutafarijiwa na kuimarishwa tukitafakari baraka tulizo nazo. Fikiria masimulizi halisi yafuatayo.

10. Irina alifaidikaje kwa kushukuru kwa baraka alizo nazo?

 10 Irina, * ambaye ni painia wa kawaida nchini Marekani, alikuwa ameolewa na mzee wa kutaniko ambaye alifanya uzinzi na akamwacha yeye pamoja na watoto wao. Ni nini kilichomsaidia Irina kuendelea kumtumikia Yehova kwa uaminifu? Anasema hivi: “Ninashukuru kwa kuwa Yehova amenitunza kibinafsi. Kwa kuwa niliamua kila siku kumshukuru Yehova kwa baraka nilizo nazo, ninaliona kuwa pendeleo kubwa kujulikana na kupendwa na Baba yetu wa mbinguni anayetulinda. Ninajua kwamba hataniacha kamwe.” Ingawa Irina amepatwa na mambo mengi yenye kuhuzunisha maishani mwake, shangwe yake inaendelea kumtegemeza, naye huwatia moyo wengine.

11. Ni nini kilichomsaidia Kyung-sook kukabiliana na ugonjwa hatari?

11 Kyung-sook, ambaye anaishi barani Asia, alifanya upainia pamoja na mume wake kwa zaidi ya miaka 20. Ghafla, aligunduliwa kuwa ana kansa ya mapafu ambayo ilikuwa imeenea sana, na aliambiwa kwamba ataishi kwa miezi mitatu hadi sita. Ingawa yeye na mume wake walikuwa wamekabili majaribu mengi, makubwa na madogo, sikuzote walijua kuwa wana afya nzuri. Anasema hivi: “Ugonjwa huo uliniathiri sana. Nilihisi kwamba nimepoteza kila kitu, na niliogopa sana.” Ni nini kimemsaidia Kyung-sook kukabiliana na hali hiyo? Anasema hivi: “Kila siku, kabla sijaenda kulala, mimi huenda kwenye paa la nyumba yetu na kusali kwa sauti kuhusu mambo matano ambayo ninashukuru kuwa nayo siku hiyo. Baada ya kufanya hivyo, mimi huhisi nimefarijika sana, na ninachochewa kuonyesha upendo wangu kwa Yehova.” Kyung-sook amefaidikaje na vipindi hivyo vya kusali usiku? Anasema hivi: “Nimetambua kwamba Yehova hututegemeza nyakati za taabu na kuna baraka nyingi maishani mwetu kuliko majaribu tunayopitia.”

Akiwa na ndugu yake John, ambaye pia aliokoka kimbunga (Tazama fungu la 13)

12. Ni nini kilichomsaidia Jason kupata faraja baada ya kufiwa na mke wake?

12 Jason, ambaye anatumika katika ofisi moja ya tawi barani Afrika, amekuwa katika utumishi wa wakati wote kwa zaidi ya miaka 30. Anasema hivi: “Mke wangu alikufa miaka saba iliyopita, na nililemewa sana na huzuni. Kufikiria hali aliyopitia alipokuwa akipambana na kansa kulinivunja moyo sana.” Jason amewezaje kukabiliana na hali hiyo? Anasema: “Wakati fulani nilikumbuka pindi moja niliyofurahia pamoja na mke wangu, na nilisali kwa Yehova na kumshukuru kwa kumbukumbu hiyo. Nilihisi nimetulia na nikaanza kumshukuru Yehova kwa ukawaida kwa kumbukumbu kama hizo zenye furaha. Kuwa mwenye shukrani kumebadili sana mtazamo wangu. Bado nina huzuni ya kufiwa, lakini mtazamo wangu umebadilika kwa sababu ya kumshukuru Yehova kwa kuwa nilikuwa na ndoa yenye furaha na pendeleo la kumtumikia pamoja na mtu aliyempenda sana.”

“Ninashukuru sana kwamba Yehova ni Mungu wangu.”—Sheryl

13. Ni nini kilichomsaidia Sheryl kukabiliana na vifo vya ndugu zake wengi?

13 Wakati Kimbunga Haiyan kilipopiga katikati mwa nchi ya Filipino mwishoni mwa mwaka wa 2013, Sheryl, ambaye alikuwa na umri wa miaka 13 wakati huo, alipoteza karibu kila kitu. Anasema hivi: “Nilipoteza makao, na nilipoteza ndugu zangu wengi.” Baba, mama, na pia ndugu yake na dada zake wawili walikufa katika dhoruba hiyo yenye nguvu. Ni nini kilichomsaidia Sheryl kukabiliana na msiba huo bila kukata tamaa maishani? Ana moyo wenye shukrani na anakumbuka baraka alizo nazo. “Niliona jinsi ndugu  na dada walivyojitahidi kutoa kitulizo na kitia-moyo kwa wote waliohitaji msaada. Nilijua kwamba ndugu ulimwenguni pote walikuwa wakisali kwa ajili yangu.” Aliendelea kusema hivi: “Ninashukuru sana kwamba Yehova ni Mungu wangu. Sikuzote yeye hutupatia vitu tunavyohitaji.” Naam, tunaposhukuru kwa baraka tulizo nazo, hatutalemewa na huzuni. Moyo wenye kuthamini hutusaidia kuvumilia licha ya matukio yenye kufadhaisha ambayo huenda tukakabili.—Efe. 5:20; soma Wafilipi 4:6, 7.

“MIMI, NITAFURAHI KATIKA YEHOVA”

14. Ni mambo gani yenye kusisimua tunayotarajia? (Tazama picha kwenye ukurasa wa 8.)

14 Katika historia yote, watu wa Yehova wamethamini baraka walizo nazo. Kwa mfano, baada ya kukombolewa kutoka kwa Farao na majeshi yake katika Bahari Nyekundu, Waisraeli walionyesha shangwe yao kwa kuimba nyimbo za sifa na shukrani. (Kut. 15:1-21) Leo, kati ya baraka tunazothamini sana ni tumaini letu thabiti la kukombolewa kutoka katika mambo yote yanayosababisha maumivu na taabu. (Zab. 37:9-11; Isa. 25:8; 33:24) Hebu wazia jinsi tutakavyohisi Yehova atakapowaponda maadui wake wote na kutuingiza katika ulimwengu mpya wenye amani na uadilifu. Tutamshukuru sana Yehova siku hiyo!—Ufu. 20:1-3; 21:3, 4.

15. Umeazimia kufanya nini katika mwaka huu wa 2015?

15 Tunatazamia baraka nyingi za kiroho kutoka kwa Yehova katika mwaka wa 2015. Ni kweli kwamba huenda tukapatwa na majaribu. Vyovyote vile, tunajua kwamba Yehova hatatuacha kamwe. (Kum. 31:8; Zab. 9: 9, 10) Ataendelea kutuandalia chochote tunachohitaji ili kuendelea kumtumikia kwa uaminifu. Kwa hiyo, na tuazimie kudumisha mtazamo kama wa nabii Habakuki, aliyesema hivi: “Ijapokuwa huenda mtini usichanue, kusiwe na mazao kwenye mizabibu; kazi ya mzeituni ikashindwa, matuta yasizae chakula chochote. Huenda kundi liondolewe zizini, na kusiwe na mifugo katika mazizi; Lakini mimi, nitafurahi katika Yehova mwenyewe; nitakuwa na shangwe katika Mungu wa wokovu wangu.” (Hab. 3:17, 18) Naam, kwa mwaka huu wote, na tutafakari kwa furaha baraka tulizo nazo na kuchochewa kufuata himizo hili la andiko letu la mwaka wa 2015: “Mshukuruni Yehova, kwa maana yeye ni mwema.”—Zab. 106:1.

^ fu. 10 Baadhi ya majina katika makala hii yamebadilishwa.

Pata Kujua Mengi Zaidi

‘Kesheni Kuhusiana na Sala’

Kwa nini Wakristo wa kweli wanapaswa kusali sikuzote? Ni nani wanaonufaika unaposali kwa ajili yao?