Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) NOVEMBA 2014

 KUTOKA KATIKA HIFADHI YA VITU VYETU VYA KALE

Kweli Yaangaza Katika Nchi ya Macheo ya Jua

Kweli Yaangaza Katika Nchi ya Macheo ya Jua

Mialiko ya hotuba za watu wote ilitumiwa huko Tokyo na kutawanywa na ndege katika jiji la Osaka

MNAMO Septemba 6, 1926, pilgrimu (mwangalizi anayesafiri) Mjapani aliyetumika nchini Marekani alirudi Japani akiwa mmishonari. Alikaribishwa na mtu mmoja aliyekuwa akipokea kwa ukawaida magazeti ya Mnara wa Mlinzi. Mtu huyo alikuwa ameanzisha kikundi cha kujifunza Biblia katika jiji la Kobe. Wanafunzi wa Biblia walifanya kusanyiko lao la kwanza katika jiji hilo Januari 2, 1927. Jumla ya watu 36 walihudhuria, na 8 wakabatizwa. Huo ulikuwa mwanzo mzuri, hata hivyo, kikundi hicho kidogo kingewezaje kuwahubiria watu milioni 60 waliokuwa nchini Japani ambao walihitaji kupata nuru ya kweli ya Biblia?

Mnamo Mei 1927, Wanafunzi wa Biblia wenye bidii walianzisha kampeni ya kuwakaribisha watu waje kusikiliza mfululizo wa hotuba za Biblia. Ndugu walitangaza hotuba ya kwanza ambayo ingetolewa katika jiji la Osaka kwa kuweka matangazo pembeni mwa vijia na mabango makubwa kotekote jijini, na pia walituma mialiko 3,000 kwa watu mashuhuri. Waligawanya mialiko 150,000 na kuitangaza hotuba hiyo kwenye magazeti maarufu ya Osaka na pia kwenye tiketi 400,000 za treni. Siku ya hotuba, ndege mbili zilipaa juu ya jiji hilo na kutawanya mialiko 100,000. Watu 2,300 hivi walijaa katika Ukumbi wa Osaka Asahi ili kusikiliza hotuba yenye kichwa “Ufalme wa Mungu Umekaribia.” Watu wengine elfu moja hivi hawakuruhusiwa kuingia kwa sababu ukumbi ulikuwa umejaa. Baada ya hotuba, wahudhuriaji zaidi ya 600 walibaki kwa ajili ya kipindi cha maswali na majibu. Katika miezi iliyofuata, hotuba za watu wote za Biblia zilitolewa Kyoto na katika majiji mengine magharibi mwa Japani.

Mnamo Oktoba 1927, Wanafunzi wa Biblia walifanya mipango ili hotuba zitolewe Tokyo. Kwa mara nyingine tena, waliwapa watu mashuhuri mialiko hiyo, kutia ndani waziri mkuu, wabunge, na viongozi wa dini na jeshi. Walitangaza pia kupitia mabango na magazeti, na kusambaza mialiko 710,000. Jumla ya watu 4,800 walisikiliza hotuba tatu zilizotolewa katika mji mkuu wa Japani.

MAKOLPOTA WENYE BIDII

Katsuo na Hagino Miura

Makolpota (mapainia) walitimiza sehemu muhimu katika kutangaza ujumbe wa Ufalme nyumba kwa nyumba. Matsue Ishii, mmoja wa makolpota wa kwanza nchini Japani, na mume wake, Jizo, walihubiri robo tatu ya nchi, kuanzia mji wa Sapporo ulio kaskazini kabisa mwa Japani mpaka Sendai, Tokyo, Yokohama, Nagoya, Osaka, Kyoto, Okayama, na Tokushima. Dada Ishii na dada mwenye umri mkubwa, Sakiko Tanaka, walivaa nguo rasmi za kimono ili kuwatembelea maofisa wakuu wa serikali. Mmoja wao aliomba vitabu 300 vya The Harp of God na Deliverance ili viwekwe katika maktaba za gereza.

Katsuo na Hagino Miura walisoma vitabu walivyopewa na Dada Ishii na kutambua kwamba walikuwa wamepata kweli. Walibatizwa katika mwaka wa 1931 na baadaye wakawa makolpota. Haruichi na Tane  Yamada pamoja na watu wao wengi wa ukoo walikubali ujumbe wa Ufalme kabla ya mwaka wa 1930. Haruichi na Tane walianza kazi ya ukolpota, na binti yao, Yukiko alienda kutumikia katika Betheli jijini Tokyo.

MAGARI MAKUBWA NA MADOGO YALIYOITWA “YEHU”

Gari kubwa la Yehu lilitoshea mapainia sita

Wakati huo, magari yalikuwa ghali sana na barabara zilikuwa mbaya. Hivyo, Kazumi Minoura na makolpota wengine vijana walitumia magari ya kukokotwa yaliyotumiwa kama nyumba. Waliyaita Yehu, jina la yule mwanamume aliyeendesha gari kwa kasi ambaye baadaye alikuwa mfalme wa Israeli. (2 Fal. 10:13-16) Magari matatu makubwa ya Yehu yalikuwa na urefu wa mita 2.2, upana wa mita 1.9, na kimo cha mita 1.9, na kila gari lilitoshea mapainia sita. Kwa kuongezea, ofisi ya tawi ya Japani ilitengeneza magari 11 madogo ya Yehu yaliyokokotwa na baiskeli. Magari hayo yalitoshea watu wawili. Kiichi Iwasaki aliyesaidia kutengeneza magari hayo ya Yehu alisema hivi: “Kila gari la Yehu lilikuwa na hema na pia betri ya gari iliyotumika kuwasha taa.” Makolpota waliangaza nuru ya kweli katika nchi yote ya Japani, wakisukuma na kukokota magari ya Yehu, wakipanda na kushuka milima na kuvuka mabonde kutoka jiji la Hokkaido lililo kaskazini mpaka Kyushu lililo kusini.

Gari dogo la Yehu lilitoshea mapainia wawili

Kolpota aliyeitwa Ikumatsu Ota alisema hivi: “Tulipowasili katika mji, tulisimamisha gari letu la Yehu kwenye ukingo wa mto au uwanjani. Kwanza tuliwatembelea watu mashuhuri mjini, kama vile meya, na kisha tuliwatembelea watu nyumbani ili kuwaonyesha machapisho yetu. Baada ya kuhubiri eneo lote, tulihamia mji mwingine.”

Kikundi hicho cha Wanafunzi 36 wa Biblia katika jiji la Kobe kilipofanya kusanyiko lao la kwanza, ilikuwa “siku ya mambo madogo.” (Zek. 4:10) Miaka mitano tu baadaye, yaani, katika mwaka wa 1932, makolpota na wahubiri 103 nchini Japani waliripoti utendaji wao, nao waliwaachia watu vitabu zaidi ya 14,000. Leo, kazi ya kuhubiri hadharani iliyopangwa vizuri inafanywa kwenye maeneo mbalimbali katika majiji ya Japani, na karibu wahubiri 220,000 wanaangaza nuru yao kotekote katika Nchi ya Macheo ya Jua.—Kutoka katika hifadhi ya vitu vyetu vya kale nchini Japani.

Magari ya Yehu yaliyochorwa na kutengenezwa na Kiichi Iwasaki katika Betheli ya Japani