Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

MNARA WA MLINZI (TOLEO LA FUNZO) OKTOBA 2014

Thamini Pendeleo Lako la Kufanya Kazi na Yehova!

Thamini Pendeleo Lako la Kufanya Kazi na Yehova!

“Sisi ni wafanyakazi wenzi wa Mungu.” —1 KOR. 3:9.

1. Yehova anahisije kuhusu kazi, naye hufanya nini?

YEHOVA ni mfanyakazi anayefurahia kazi yake. (Zab. 135:6; Yoh. 5:17) Yehova amewapa wanadamu na malaika kazi yenye kufurahisha na kuridhisha ili pia wapate shangwe na uradhi kutokana na kazi yao. Kwa mfano, alimshirikisha Mwana wake mzaliwa wa kwanza katika kazi Yake ya uumbaji. (Soma Wakolosai 1:15, 16.) Biblia inatuambia kwamba kabla ya kuwa mwanadamu, Yesu alikuwa kando ya Mungu mbinguni ‘akiwa stadi wa kazi.’—Met. 8:30.

2. Ni nini kinachoonyesha kwamba viumbe wa roho wamekuwa sikuzote na kazi muhimu yenye kuridhisha?

2 Kuanzia mwanzo mpaka mwisho, Biblia ina mifano inayoonyesha kwamba sikuzote Yehova huwapa kazi wanawe wa roho. Baada ya Adamu na Hawa kufanya dhambi na kufukuzwa kutoka katika makao yao ya Paradiso, Mungu ‘aliweka upande wa mashariki wa bustani ya Edeni makerubi na upanga unaowaka ambao ulikuwa unajizungusha-zungusha ili kuilinda njia ya kwenda kwenye ule mti wa uzima.’ (Mwa. 3:24) Na andiko la Ufunuo 22:6 linafunua kwamba Yehova “alimtuma malaika wake ili kuwaonyesha watumwa wake mambo ambayo lazima yatendeke upesi.”

 NAMNA GANI WANADAMU?

3. Alipokuwa duniani, Yesu aliigaje mfano wa Baba yake?

3 Yesu alipokuwa duniani akiwa mwanadamu mkamilifu, alifanya kwa shangwe kazi aliyopewa na Yehova. Yesu aliiga mfano wa Baba yake kwa kuwapa pia wanafunzi wake kazi muhimu ya kufanya. Ili kuwachochea kutarajia kwa hamu mambo ambayo wangetimiza, aliwaambia hivi: “Kwa kweli kabisa ninawaambia ninyi, Yule anayeniamini, huyo pia atafanya kazi ambazo mimi hufanya; naye atafanya kazi kubwa kuliko hizi, kwa sababu ninaenda kwa Baba.” (Yoh. 14:12) Yesu alikazia umuhimu wa kazi hizo kwa kusema hivi: “Lazima tufanye kazi zake aliyenituma kukiwa mchana bado; usiku unakuja wakati ambapo hakuna mtu anayeweza kufanya kazi.”—Yoh. 9:4.

4-6. (a) Kwa nini tunashukuru kwamba Noa na Musa walitimiza migawo waliyopewa na Yehova? (b) Kazi zote ambazo Mungu huwapa wanadamu hutimiza makusudi gani?

4 Hata kabla ya Yesu kuja duniani, Yehova aliwapa wanadamu kazi zenye kuridhisha. Ingawa Adamu na Hawa walishindwa kutimiza mgawo waliopewa, wanadamu wengine walitimiza migawo waliyopewa na Mungu. (Mwa. 1:28) Noa alipewa maagizo hususa kuhusu jinsi ya kujenga safina ili kuhifadhi uhai wakati wa ile Gharika kubwa. Alitekeleza kwa makini maagizo ya Yehova. Tuko hai leo kwa sababu Noa alifanya yote aliyoambiwa afanye!—Mwa. 6:14-16, 22; 2 Pet. 2:5.

5 Musa alipewa maagizo hususa ya kujenga maskani na kupanga ukuhani, na aliyafuata kwa makini. (Kut. 39:32; 40:12-16) Tunanufaika hata leo kwa sababu alitimiza mgawo huo kwa uaminifu. Jinsi gani? Mtume Paulo alieleza kwamba mambo hayo ya Sheria yalikuwa mifano ya “mambo mema yatakayokuja.”—Ebr. 9:1-5, 9; 10:1.

6 Mungu huwapa watumishi wake kazi tofauti-tofauti katika pindi mbalimbali ikitegemea jinsi kusudi lake linavyotimia hatua kwa hatua. Hata hivyo, kazi hizo humtukuza Yehova sikuzote na kuwanufaisha wanadamu wanaomwamini. Bila shaka, kazi alizofanya Yesu kabla ya kuwa mwanadamu na baadaye akiwa hapa duniani zilitimiza makusudi hayo. (Yoh. 4:34; 17:4) Vivyo hivyo, kazi ambayo tumepewa leo inamtukuza Yehova. (Mt. 5:16; soma 1 Wakorintho 15:58.) Kwa nini?

KUDUMISHA MAONI YANAYOFAA KUHUSU MIGAWO YA KAZI

7, 8. (a) Wakristo wana pendeleo la kufanya kazi gani leo? (b) Tunapaswa kuitikiaje mwongozo wa Yehova?

7 Utakubali kuwa ni jambo la kustaajabisha kwamba Yehova amewaheshimu wanadamu wasio wakamilifu kwa kuwapa pendeleo la kuwa wafanyakazi wenzake. (1 Kor. 3:9) Wale wanaojenga Majumba ya Kusanyiko, Majumba ya Ufalme, na ofisi za tawi wanashiriki katika kazi halisi ya ujenzi kama Noa na Musa. Iwe unakarabati Jumba la Ufalme au unashiriki katika ujenzi wa makao yetu makuu huko Warwick, New York, thamini pendeleo lako la utumishi. (Tazama mchoro kwenye ukurasa wa 23.) Ni utumishi mtakatifu. Hata hivyo, Wakristo wote wanaalikwa kushiriki katika ujenzi wa kiroho. Ujenzi huo unakusudiwa pia kumtukuza Yehova na kuwanufaisha wanadamu watiifu. (Mdo. 13:47-49) Mwongozo unaofaa kuhusu njia bora ya kufanya kazi hiyo unatolewa kupitia tengenezo la Mungu. Hilo linamaanisha kwamba huenda nyakati nyingine tukapewa migawo mipya ya kazi.

8 Watumishi waaminifu wa Yehova wamekuwa tayari sikuzote kutii mwongozo wa kitheokrasi. (Soma Waebrania 13:7, 17.) Huenda mwanzoni tusielewe kikamili kwa  nini tunaagizwa tufanye kazi yetu kwa njia fulani. Hata hivyo, tunajua vizuri kabisa manufaa ya kushirikiana na Yehova katika marekebisho yoyote ambayo anaona kwamba yanapaswa kufanywa.

9. Wazee huliwekea kutaniko mfano gani inapohusu kazi?

9 Wazee huongoza kutaniko kwa njia inayoonyesha kwamba wanatamani sana kufanya mapenzi ya Yehova. (2 Kor. 1:24; 1 The. 5:12, 13) Wanaonyesha kwamba wako tayari kufanya kazi kwa bidii na kwenda sambamba na hali zinazobadilika. Wanafanya marekebisho ya haraka na kutumia njia mpya zinazofaa za kufanya kazi yetu ya kuhubiri kuhusu Ufalme wa Mungu unaotawala. Huenda mwanzoni baadhi yao walisita kufanya mipango ya kuhubiri bandarini, kupitia simu, au hadharani, lakini baada ya muda walipata matokeo mazuri. Kwa mfano, mapainia wanne nchini Ujerumani waliamua kuhubiri eneo la kibiashara ambalo lilikuwa limepuuzwa. Michael anasema hivi: “Hatukuwa tumefanya utumishi wa aina hii kwa miaka kadhaa, kwa hiyo tuliogopa sana. Ni wazi kwamba Yehova alijua jambo hilo kwa sababu alitubariki na hivyo tukafurahia sana utumishi asubuhi hiyo. Tulifurahi sana kwamba tulifuata mwongozo uliotolewa katika Huduma Yetu ya Ufalme na kumtegemea Yehova atusaidie.” Je, una hamu ya kujaribu njia mpya za kuhubiri katika eneo lenu?

10. Ni marekebisho gani ya kitengenezo yaliyofanywa hivi karibuni?

10 Nyakati nyingine, marekebisho ya kitengenezo yanahitaji kufanywa. Katika miaka ya karibuni, ofisi kadhaa za tawi zimeunganishwa. Ingawa mabadiliko hayo yamewalazimu ndugu na dada wanaotumikia katika ofisi hizo kufanya marekebisho, baada ya muda, wote wanaohusika wanaona faida za mabadiliko hayo. (Mhu. 7:8) Ni shangwe kama nini kwa wafanyakazi hao waliojitoa kwa hiari kutimiza sehemu fulani katika historia ya watu wa Yehova!

11-13. Ni changamoto gani ambazo wengine wamekabili kwa sababu ya marekebisho ya kitengenezo?

11 Tunaweza kujifunza mambo muhimu kutokana na wale ambao ofisi zao za tawi ziliunganishwa. Baadhi yao walitumikia kwa makumi ya miaka katika Betheli nchini mwao. Wenzi wa ndoa waliotumika katika familia ndogo ya Betheli huko Amerika ya Kati waliombwa wajiunge na familia ya Betheli ya Mexico yenye idadi ambayo ni karibu mara 30 zaidi ya idadi ya Wanabetheli waliokuwa nchini mwao. Rogelio anasema hivi: “Ilikuwa vigumu sana kuacha familia na marafiki.” Juan, ndugu mwingine aliyeombwa ahamie Mexico anasema hivi: “Ni kana kwamba unazaliwa mara ya pili; ni lazima utafute marafiki wapya. Unahitaji kuzoea desturi na njia mpya za kufikiri.”

12 Wanabetheli ambao waliombwa wahamie ofisi ya tawi nchini Ujerumani kutoka nchi nyingine za Ulaya walikabili pia changamoto. Mtu yeyote anayefurahia mandhari yenye milima anaweza kuelewa jinsi ilivyokuwa vigumu kwa wale waliohama Uswisi kuondoka katika mazingira yenye Milima mikubwa ya Alps. Na wale waliotoka Austria walitamani mwanzoni maisha matulivu zaidi nchini mwao.

13 Wale waliohamia nchi nyingine walihitaji kuzoea makao mapya, kufanya kazi na ndugu na dada wasiowafahamu, na labda hata kujifunza kazi tofauti. Walihitaji pia kuzoea kutaniko jipya, kuhubiri katika eneo jipya, na labda hata kutumia lugha nyingine. Inaweza kuwa vigumu kufanya mabadiliko hayo. Hata hivyo, Wanabetheli wengi wamekubali changamoto hizo. Kwa nini?

14, 15. (a) Wengi wameonyeshaje kwamba wanathamini pendeleo la kufanya kazi na Yehova katika mgawo wowote ule? (b) Wanatuwekeaje sote mfano mzuri?

 14 Grethel anasema hivi: “Nilikubali mgawo huo kwa sababu ilikuwa fursa ya kumwonyesha Yehova kwamba upendo wangu kumwelekea hautegemei nchi, jengo, au pendeleo fulani.” Dayska anasema hivi: “Nilipokumbuka kwamba mgawo huo ulitoka kwa Yehova, niliukubali kwa furaha.” André na Gabriela wanakubali jambo hilo. Wanasema hivi: “Hilo lilitupatia fursa zaidi ya kumtumikia Yehova kwa kutotanguliza mapendezi yetu. Tulijiambia hivi: ‘Yehova anapofanya mabadiliko, ni bora zaidi kuyakubali badala ya kuyapinga.’”

Pendeleo kubwa zaidi tulilo nalo ni kufanya kazi ya Yehova!

15 Ofisi za tawi zinapounganishwa, baadhi ya Wanabetheli hupewa migawo ya upainia. Ndivyo ilivyokuwa kwa Wanabetheli wengi wakati ofisi ya tawi ya Denmark, ya Norway, na ya Sweden zilipounganishwa na kufanyiza ofisi ya tawi ya Skandinavia. Florian na Anja walikuwa miongoni mwao. Walisema hivi: “Tunaona mgawo wetu mpya kuwa changamoto yenye kusisimua. Ni jambo zuri kwetu kutumiwa na Yehova mahali popote pale. Kwa kweli, tunaweza kusema kwamba tumebarikiwa sana!” Huenda wengi wetu tusilazimike kamwe kufanya mabadiliko hayo, hata hivyo, tunaweza kuiga utayari wa ndugu na dada hao wa kutanguliza masilahi ya Ufalme. (Isa. 6:8) Sikuzote Yehova huwabariki wale wanaothamini pendeleo lao la kufanya kazi naye, mahali popote pale.

ENDELEA KUFURAHIA PENDELEO LAKO LA KUFANYA KAZI NA YEHOVA!

16. (a) Andiko la Wagalatia 6:4 linatuambia tufanye nini? (b) Ni pendeleo gani kubwa zaidi ambalo mwanadamu yeyote anaweza kupata?

16 Wanadamu wasio wakamilifu wana mwelekeo wa kujilinganisha na wengine, lakini Neno la Mungu linatuambia tukazie fikira yale tunayoweza kutimiza kibinafsi. (Soma Wagalatia 6:4.) Wengi wetu si waangalizi katika tengenezo. Pia, sisi sote hatuwezi kuwa mapainia, wamishonari, au Wanabetheli. Ingawa hayo ni mapendeleo mazuri, hatupaswi kamwe kusahau  kwamba sote tuna pendeleo kubwa zaidi ambalo mwanadamu yeyote anaweza kupata—pendeleo la kuwa mfanyakazi mwenzi wa Yehova katika huduma ya Kikristo. Tunapaswa kuthamini sana pendeleo hilo!

17. Ni hali gani itakayoendelea kuwapo maadamu ulimwengu wa Shetani upo, lakini kwa nini hilo halipaswi kutuvunja moyo kupita kiasi?

17 Maadamu ulimwengu wa Shetani unaendelea kuwapo, huenda tusiweze kumtumikia Yehova kama vile ambavyo tungependa. Huenda tusiweze kubadili majukumu yetu ya familia, hali yetu ya afya, au hali nyingine. Lakini hilo halipaswi kutuvunja moyo kupita kiasi. Usipuuze kamwe pendeleo lako la kufanya kazi na Mungu kwa kutoa ushahidi kuhusu jina lake na kutumia kila fursa unayopata kutangaza Ufalme wake. Jambo muhimu zaidi ni kwamba unajitahidi kadiri uwezavyo kufanya kazi pamoja naye na unasali ili awabariki ndugu zako wanaoweza kufanya mengi kuliko wewe. Kumbuka kwamba kila mtu anayelisifu jina la Yehova ni mwenye thamani machoni pake!

18. Tunapaswa kuwa tayari kutofuatilia nini kwa sasa, na kwa nini?

18 Yehova hufurahi kututumia tukiwa wafanyakazi wenzake licha ya udhaifu na kutokamilika kwetu. Tunathamini sana pendeleo letu la kufanya kazi na Mungu katika siku hizi za mwisho! Kwa sasa, tunapaswa kuwa tayari kutofuatilia mapendezi yetu mengi kwa kuwa tunajua kwamba katika ulimwengu mpya, Yehova ataturuhusu kufurahia “uzima ulio wa kweli,” uzima wa milele katika mazingira yenye furaha na amani.—1 Tim. 6:18, 19.

Je, unathamini pendeleo lako la utumishi?

19. Yehova anatuahidi nini wakati ujao?

19 Tunapokaribia sana kuingia katika ulimwengu mpya, fikiria maneno ambayo Musa aliwaambia Waisraeli muda mfupi kabla ya kuingia katika Nchi ya Ahadi: “Yehova Mungu wako kwa kweli atakufanya uwe na wingi kupita kiasi katika kila kazi ya mkono wako.” (Kum. 30:9) Baada ya Har–Magedoni, wale ambao wamekuwa wakifanya kazi kwa bidii na Mungu wataimiliki nchi ambayo amewaahidi. Kisha, tutakazia fikira mgawo mpya wa kuifanya dunia iwe paradiso maridadi!