Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Mnara wa Mlinzi—Toleo la Funzo ## heading  |  Februari 2014

 KUTOKA KATIKA HIFADHI YA VITU VYETU VYA KALE

Sinema ya Pekee Iliyochochea Imani Miaka 100 Iliyopita

Sinema ya Pekee Iliyochochea Imani Miaka 100 Iliyopita

Kwa kweli huyu ni Ndugu Russell!” —Mtazamaji wa sinema ya “Photo-Drama” katika mwaka wa 1914.

HUU ni mwaka wa 100 tangu sinema ya “Photo-Drama of Creation,” ilipoonyeshwa kwa mara ya kwanza. Sinema hiyo ya pekee ilikusudiwa kuwasaidia watu kujenga imani katika Neno la Mungu, Biblia. Sinema ya “Photo-Drama” ilimtangaza Yehova kuwa Muumba katika kipindi ambacho fundisho la mageuzi na wachambuzi wengi walidhoofisha imani ya wengi.

Charles T. Russell, aliyeongoza katika kazi ya Wanafunzi wa Biblia wakati huo, alitafuta kwa ukawaida njia inayofaa na iliyo rahisi zaidi ya kueneza kweli ya Biblia. Kwa miaka zaidi ya thelathini, Wanafunzi wa Biblia walikuwa wakitumia machapisho kutangaza kweli. Sasa, walipata njia nyingine ya kueneza ujumbe wao, yaani, sinema.

KUTUMIA SINEMA KUENEZA INJILI

Katika miaka ya 1890, sinema zisizo na sauti zilianza kuonyeshwa. Katika mwaka wa 1903, sinema ya kidini ilionyeshwa katika kanisa moja huko New York. Mwaka wa 1912, kwa ujasiri Russell alianza kufanya matayarisho ya kutengeneza sinema ya “Photo-Drama,” kampuni za kutengeneza sinema zilipokuwa zikianza. Aliona kwamba njia hiyo ingeeneza kweli ya Biblia zaidi ya machapisho.

Sinema ya “Photo-Drama” ilikuwa na urefu wa saa nane na ilionyeshwa katika sehemu nne. Sehemu hizo zilitia ndani hotuba fupi 96 zilizorekodiwa za Biblia zilizosimuliwa na msemaji aliyejulikana vizuri na aliye na sauti iliyojulikana zaidi wakati huo. Sinema hiyo iliambatana na muziki mtamu. Wajitoleaji wenye uzoefu walitumia kinanda cha gramafoni kucheza santuri za sauti na muziki. Sauti hizo zilienda sambamba na picha za rangi za maigizo ya hadithi maarufu za Biblia.

Sinema hii ilionyesha matukio kuanzia kuumbwa kwa nyota hadi upeo mtukufu wa Utawala wa Miaka Elfu Moja wa Kristo.”—F. Stuart Barnes, aliyekuwa na umri wa miaka 14 katika mwaka wa 1914

Picha na slaidi nyingi za kioo zilizotumiwa katika sinema hiyo zilinunuliwa kutoka katika studio za kibiashara. Wasanii wenye ujuzi huko Philadelphia, New York, Paris na London, walichora picha na pia  kila slaidi ya kioo. Mara kwa mara, wafanyakazi wa Idara ya Sanaa ya Betheli walichora na kurekebisha slaidi zilizovunjika. Mbali na filamu zilizonunuliwa, Wanabetheli waliigiza katika sinema hiyo wakiwa kama Abrahamu, Isaka, na malaika aliyemzuia Abrahamu kumtoa mwana wake kuwa dhabihu. Picha hizo zilipigwa katika maeneo yaliyo karibu na Yonkers, New York.Mwa. 22:9-12.

Wakipima wakati vizuri, wajitoleaji waliozoezwa waliunganisha sinema iliyokuwa na slaidi zenye urefu wa kilomita 3 hivi, rekodi 26 za gramafoni, na slaidi 500 hivi za vioo

Mshiriki mmoja wa Ndugu Russell aliwaambia waandishi wa habari kwamba sinema hiyo ‘ingewasaidia maelfu ya watu kupendezwa na Maandiko, jambo ambalo halikuwa limefanywa na dini.’ Je, viongozi wa kidini walifurahia jitihada hizo za kuwafikia wengi waliokuwa na njaa ya kiroho? Hapana. Wahudumu wa dini zinazodai kuwa za Kikristo kwa pamoja walishutumu kutokezwa kwa sinema ya “Photo-Drama,” wengine hata wakitumia hila na ukaidi ili kuzuia watu wasitazame sinema hiyo. Katika ukumbi mmoja wa sinema, muungano wa wahudumu wa kanisa ulifanya mpango ili umeme ukatwe.

Dada kutoka makutaniko ya karibu walitoa trakti zilizokuwa na picha za sinema ya Photo-Drama

Wahudhuriaji walipewa beji iliyokuwa na picha ya Yesu akiwa mtoto. Beji hiyo ilimkumbusha mvaaji awe “mwana wa amani”

Hata hivyo, watazamaji walijaa katika majumba ya sinema ili kutazama sinema ya “Photo-Drama” bila malipo. Nchini Marekani, sinema ya “Photo-Drama” ilionyeshwa katika majiji 80 hivi kila siku. Watazamaji wengi walishangaa kuona kwa mara ya kwanza ‘sinema yenye sauti.’ Watazamaji waliweza kuona picha ya kifaranga cha kuku kikianguliwa na ua likichanua hatua kwa hatua. Utafiti wa kisayansi wa wakati huo ulithibitisha hekima ya Yehova yenye kustaajabisha. Kama ilivyotajwa mwanzoni, baada ya kumwona Ndugu Russell akitambulisha sinema ya “Photo-Drama,” mtazamaji mmoja alisema hivi: “Kwa kweli huyu ni Ndugu Russell!”

HATUA MUHIMU KATIKA ELIMU YA BIBLIA

Sinema ya “Photo-Drama” ilionyeshwa kwa mara ya kwanza Januari 11, 1914, katika jumba hili la sinema lililofaa katika jiji la New York City. Jumba hili lilimilikiwa na kutunzwa na International Bible Students Association

Tim Dirks, mwandishi na mwanahistoria wa sinema, alisema kwamba sinema ya “Photo-Drama” ilikuwa “sinema ya kwanza kubwa iliyotia ndani sauti (hotuba iliyorekodiwa), picha zinazofuatana, na slaidi za kioo zenye rangi.” Sinema zilizotokezwa kabla ya “Photo-Drama,” zilizozungumzia Biblia zilitumia baadhi tu ya mbinu hizo. Ni sinema ya “Photo-Drama” tu iliyotazamwa na watu milioni tisa hivi katika Amerika ya Kaskazini, Ulaya, Australia, na New Zealand katika mwaka wake wa kwanza!

Sinema ya “Photo-Drama” ilionyeshwa kwa mara ya kwanza Januari 11, 1914, katika jiji la New York City. Miezi saba baadaye, Vita vya Kwanza vya Ulimwengu vilitokea. Hata hivyo, watu wengi ulimwenguni waliendelea kukusanyika ili kuitazama sinema ya “Photo-Drama,” wakifarijiwa na picha zinazoonyesha baraka za wakati ujao zitakazoletwa na Ufalme. Lilikuwa jambo bora sana kwa sinema ya “Photo-Drama” kuonyeshwa katika mwaka wa 1914.

Seti ishirini za sinema ya “Photo-Drama” zilitumiwa na vikundi mbalimbali kotekote katika Amerika Kaskazini