Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) DESEMBA 2013

Je, Utatoa Dhabihu kwa Ajili ya Ufalme?

Je, Utatoa Dhabihu kwa Ajili ya Ufalme?

“Mungu humpenda mtoaji mchangamfu.”2 KOR. 9:7.

1. Watu wengi hujidhabihu kwa njia gani, na kwa nini?

WATU hujidhabihu kwa hiari kwa ajili ya mambo yaliyo muhimu kwao. Wazazi hutumia wakati, pesa, na nguvu zao kwa faida ya watoto wao. Wanariadha vijana wanaotamani kuwakilisha nchi yao katika michezo ya Olimpiki, hufanya mazoezi makali kwa saa kadhaa kila siku badala ya kujiburudisha na vijana wenzao. Yesu pia alijidhabihu kwa ajili ya mambo yaliyokuwa muhimu kwake. Hakuishi maisha ya anasa wala hakuwa na watoto. Badala yake, alichagua kuendeleza masilahi ya Ufalme. (Mt. 4:17; Luka 9:58) Wafuasi wake pia waliacha vitu vingi ili kuunga mkono Ufalme wa Mungu. Jambo muhimu zaidi maishani mwao lilikuwa kutanguliza Ufalme, nao walijidhabihu ili kuunga mkono Ufalme huo kikamili iwezekanavyo. (Mt. 4:18-22; 19:27) Basi tunaweza kujiuliza hivi: ‘Ni nini kilicho muhimu maishani mwangu?’

2. (a) Ni lazima Wakristo wote wa kweli wadhabihu mambo gani? (b) Baadhi ya Wakristo wanajidhabihu kwa njia gani nyingine?

2 Ni lazima Wakristo wote wa kweli wadhabihu mambo fulani ili kusitawisha na kuendelea kuwa na uhusiano mzuri na Yehova. Dhabihu hizo zinatia ndani kutumia wakati na nguvu zetu kusali, kusoma Biblia, kufanya ibada ya familia, kuhudhuria mikutano, na kuhubiri. * (Yos. 1:8; Mt. 28:19, 20; Ebr. 10:24, 25) Kazi ya kuhubiri inapanuka haraka kwa sababu Yehova anabariki jitihada zetu, na wengi wanaendelea kumiminika kwenye “mlima wa nyumba ya Yehova.” (Isa. 2:2) Ili kuunga mkono kazi ya Ufalme, wengi  hujidhabihu kwa kutumika Betheli, kushiriki katika ujenzi wa Majumba ya Ufalme na Majumba ya Kusanyiko, kupanga makusanyiko, au kuwasaidia walioathiriwa na misiba ya asili. Kupata uzima wa milele hakutegemei kufanya kazi hizo, hata hivyo, ni muhimu kwa kuwa zinategemeza kazi ya Ufalme.

3. (a) Tunanufaikaje tunapojidhabihu kwa ajili ya Ufalme? (b) Ni maswali gani tunayopaswa kufikiria?

3 Leo, kuliko wakati mwingine wowote, kuna uhitaji mkubwa zaidi wa kuunga mkono kwa bidii kazi ya Ufalme. Ni shangwe iliyoje kuona wengi wakijidhabihu kwa hiari ili kumtumikia Yehova! (Soma Zaburi 54:6.) Roho hiyo ya ukarimu hutuletea shangwe nyingi tunapongojea Ufalme wa Mungu uje. (Kum. 16:15; Mdo. 20:35) Hata hivyo, sote tunapaswa kujichunguza kwa makini. Je, tunaweza kujidhabihu kwa njia nyingine kwa ajili ya Ufalme? Tunatumiaje wakati, pesa, nguvu, na uwezo wetu? Hatupaswi kupuuza nini tunapojidhabihu? Acheni tuchunguze kielelezo cha kujidhabihu kwa hiari tunachoweza kuiga na hivyo kuongeza shangwe yetu.

DHABIHU KATIKA TAIFA LA KALE LA ISRAELI

4. Waisraeli walinufaikaje kwa kutoa dhabihu?

4 Waisraeli wa kale walihitaji kutoa dhabihu ili wasamehewe dhambi. Walipaswa pia kutoa dhabihu ili wapate kibali cha Yehova. Baadhi ya dhabihu hizo zilikuwa za lazima lakini nyingine zilikuwa za hiari. (Law. 23:37, 38) Matoleo mazima ya kuteketezwa yangeweza kutolewa kwa Yehova yakiwa matoleo ya hiari, au zawadi. Matoleo kama hayo yalitolewa wakati hekalu lilipozinduliwa katika siku za Sulemani.—2 Nya. 7:4-6.

5. Yehova alifanya mpango gani kwa ajili ya maskini?

5 Kwa upendo, Yehova alielewa kwamba si kila mtu angeweza kutoa kiasi kilekile, hivyo alitaka kila mtu atoe kulingana na uwezo wake. Sheria ya Yehova iliagiza kwamba damu ya wanyama imwagwe. Damu hiyo ingekuwa “kivuli cha mambo mema yatakayokuja” kupitia Yesu, Mwana wake. (Ebr. 10:1-4) Hata hivyo, Yehova hakutekeleza sheria hiyo bila usawaziko. Kwa mfano, Mungu alikubali mtu atoe njiwa-tetere ikiwa hangeweza kutoa toleo kutoka katika kundi au mifugo. Kwa hiyo, hata maskini  wangefurahia kumtolea Yehova dhabihu. (Law. 1:3, 10, 14; 5:7) Ingawa huenda watu walitoa wanyama tofauti kama dhabihu, kila mtu aliyetoa dhabihu za hiari alipaswa kutimiza matakwa mawili.

6. Kila mtu alipaswa kutimiza matakwa gani alipotoa dhabihu? Ilikuwa muhimu kadiri gani kutimiza matakwa hayo?

6 Kwanza, mtu alipaswa kutoa kilicho bora. Yehova aliliambia taifa hilo kwamba ili kila toleo ‘liwaletee kibali,’ halikupaswa kuwa na kasoro yoyote. (Law. 22:18-20) Yehova hangekubali dhabihu ya mnyama mwenye kasoro. Pili, mtu aliyetoa dhabihu alipaswa kuwa safi na bila unajisi. Mtu asiye safi alipaswa kutoa toleo la dhambi au toleo la hatia ili awe tena na msimamo mzuri mbele za Yehova kabla ya kutoa toleo la hiari. (Law. 5:5, 6, 15) Hilo lilikuwa jambo zito. Yehova aliagiza kwamba mtu yeyote asiye safi ambaye alikula dhabihu ya ushirika, iliyotia ndani matoleo ya hiari, alipaswa kukatiliwa mbali na watu wa Mungu. (Law. 7:20, 21) Lakini mtu aliyetoa dhabihu isiyo na kasoro akiwa na msimamo mzuri mbele za Yehova aliridhika na kushangilia.—Soma 1 Mambo ya Nyakati 29:9.

KUTOA DHABIHU LEO

7, 8. (a) Wengi hupataje shangwe wanapojidhabihu kwa ajili ya Ufalme? (b) Tunaweza kumtolea Yehova dhabihu gani?

7 Leo pia, wengi wako tayari kujidhabihu ili kumtumikia Yehova, na hilo linampendeza. Tunathawabishwa tunapowatumikia ndugu zetu. Ndugu mmoja anayeshiriki katika ujenzi wa Majumba ya Ufalme na kuwasaidia walioathiriwa na misiba ya asili anasema kwamba anapata shangwe isiyo na kifani anapotumikia kwa njia hiyo. Anasema hivi: “Ninapoona ndugu na dada wakifurahi na kuthamini wanapopata Jumba jipya la Ufalme au wanapopokea msaada baada ya msiba wa asili, ninahisi kwamba jitihada na kazi hiyo yote haikuwa ya bure.”

Matoleo mengi yalikuwa ya hiari, sawa tu na dhabihu tunazotoa leo (Tazama fungu la 7-13)

8 Tengenezo la Yehova hutegemeza kazi ya Yehova kwa kila njia. Katika mwaka wa 1904, Ndugu C. T. Russell aliandika hivi: “Kila mtu anapaswa kukumbuka kwamba amewekwa rasmi na Bwana kuwa msimamizi wa wakati, uwezo, pesa, na vitu vyake vingine, na kila mtu anapaswa kujitahidi kuvitumia kadiri awezavyo, kwa utukufu wa Bwana.” Ili kumtolea Yehova dhabihu, gharama  inahusika, lakini tunapata baraka nyingi. (2 Sam. 24:21-24) Je, tunaweza kutumia kwa njia bora zaidi vitu tulivyo navyo?

Wanabetheli nchini Australia

9. Inapohusu kutumia wakati wetu, tunaweza kufuata kanuni gani aliyotaja Yesu katika Luka 10:2-4?

9 Wakati wetu. Wakati na jitihada nyingi zinahusika katika kutafsiri na kuchapisha vitabu vyetu, kujenga majumba ya ibada, kupanga makusanyiko, kutoa misaada wakati wa misiba ya asili, na kushiriki katika utendaji mwingine muhimu. Tuna saa 24 tu kila siku. Yesu alitaja kanuni inayoweza kutusaidia. Alipowatuma wanafunzi wake kuhubiri, Yesu aliwaambia ‘wasimkumbatie mtu yeyote wakimsalimu barabarani.’ (Luka 10:2-4) Kwa nini Yesu alitoa maagizo hayo? Msomi mmoja wa Biblia anasema hivi: “Watu wa Mashariki hawakusalimiana kama tunavyofanya, yaani, kwa kuinama kidogo, au kwa mkono, bali walikumbatiana mara nyingi na kuinamisha kichwa na hata kusujudu. Yote hayo yalihitaji wakati mwingi.” Yesu hakuwa akiwatia moyo wafuasi wake wajiendeshe bila adabu. Badala yake, alikuwa akiwasaidia kuona kwamba walihitaji kutumia vizuri wakati mchache waliokuwa nao kufanya mambo muhimu zaidi. (Efe. 5:16) Je, tunaweza kutumia kanuni hiyo ili tuwe na wakati zaidi wa kufanya kazi ya Ufalme?

Wahubiri wa Ufalme katika Jumba la Ufalme nchini Kenya, Afrika

10, 11. (a) Michango tunayotoa kwa ajili ya kazi ya ulimwenguni pote inatumiwa kwa njia gani? (b) Ni kanuni gani inayotajwa katika 1 Wakorintho 16:1, 2 inayoweza kutusaidia?

10 Pesa zetu. Pesa nyingi zinahitajiwa ili kutegemeza kazi ya Ufalme. Kila mwaka, mamilioni ya pesa hutumiwa kulipia gharama za waangalizi wanaosafiri, mapainia wa pekee, na wamishonari. Tangu mwaka 1999, Majumba ya Ufalme zaidi ya 24,500 yamejengwa katika nchi maskini. Na Majumba mengine 6,400 hivi yanahitajika. Kila mwezi, nakala milioni 100 hivi za magazeti ya Mnara wa Mlinzi na Amkeni! huchapishwa. Kazi hiyo yote hutegemezwa na michango ya hiari.

11 Mtume Paulo alitaja kanuni tunayoweza kufuata inapohusu kutoa michango. (Soma 1 Wakorintho 16:1, 2.) Akiongozwa na roho takatifu, Paulo aliwahimiza ndugu zake huko Korintho waweke kando michango mwanzoni mwa juma kulingana na uwezo wao, badala ya kungojea hadi mwisho wa juma ili kutoa kiasi kidogo kinachosalia. Kama ilivyokuwa katika karne ya kwanza, leo ndugu na dada hupanga mapema kutoa michango ya ukarimu kulingana na hali zao. (Luka 21:1-4; Mdo. 4:32-35) Yehova anathamini sana roho hiyo ya ukarimu.

Mjitoleaji wa Halmashauri ya Ujenzi ya Mkoa huko Tuxedo, New York, Marekani

12, 13. Kwa nini huenda wengine wakasitasita kutumia nguvu na uwezo wao, lakini Yehova atawasaidiaje?

12 Nguvu na uwezo wetu. Yehova hututegemeza tunapotumia nguvu na uwezo wetu kwa ajili ya Ufalme. Anaahidi kutusaidia tunapochoka. (Isa. 40:29-31) Je, tunahisi kwamba hatuwezi kusaidia kwa sababu hatuna ustadi wa kazi unaohitajiwa? Je, tunahisi kwamba kuna wengine wanaostahili zaidi? Kumbuka kwamba Yehova anaweza kuboresha uwezo wetu wa kiasili kama alivyoboresha uwezo wa Bezaleli na Oholiabu.—Kut. 31:1-6; tazama picha kwenye ukurasa wa 11.

13 Yehova anatutia moyo tutoe kilicho bora na kutositasita. (Met. 3:27) Hekalu lilipokuwa likijengwa upya, Yehova aliwaambia Wayahudi jijini Yerusalemu watafakari jinsi walivyounga mkono kazi hiyo ya ujenzi. (Hag. 1:2-5) Walikengeushwa fikira na kuacha kutanguliza kazi ya Yehova. Tunahitaji kuchunguza ikiwa mambo tunayotanguliza ni yale ambayo Yehova anataka tutangulize. Je, tunaweza ‘kuweka  moyo wetu juu ya njia zetu’ ili kushiriki zaidi katika kazi ya Ufalme siku hizi za mwisho?

KUTOA DHABIHU KULINGANA NA TULICHO NACHO

14, 15. (a) Mfano wa ndugu zetu walio maskini unatutiaje moyo? (b) Tunapaswa kutamani kufanya nini?

14 Watu wengi wanaishi katika nchi maskini sana au zenye matatizo mengi. Tengenezo letu linajitahidi “kujazia” upungufu wa ndugu zetu wanaoishi katika nchi hizo. (2 Kor. 8:14) Hata hivyo, ndugu walio maskini wanathamini pia pendeleo la kutoa. Yehova hufurahi anapoona maskini wakitoa kwa uchangamfu.—2 Kor. 9:7.

15 Katika nchi moja maskini sana barani Afrika, baadhi ya ndugu hutenga sehemu ndogo ya shamba lao ili kutegemeza kazi ya Ufalme. Wanauza mazao wanayopanda katika sehemu hiyo na kutoa michango kwa ajili ya kazi ya Ufalme. Katika nchi hiyohiyo, mipango ilifanywa ya kujenga Jumba la Ufalme lililohitajiwa sana. Akina ndugu na dada walikuwa tayari kusaidia. Hata hivyo, kazi hiyo ingefanywa katika majira ya kupanda. Lakini ndugu na dada hao waliazimia kusaidia, kwa hiyo, walijenga Jumba la Ufalme wakati wa mchana na kufanya kazi katika mashamba yao jioni. Walionyesha roho ya kujidhabihu kwelikweli! Mfano huo unatukumbusha ndugu wa Makedonia katika karne ya kwanza. Walikuwa na “umaskini mkubwa,” hata hivyo waliomba pendeleo la kusaidia kwa kutoa michango. (2 Kor. 8:1-4) Kila mmoja wetu na afanye vivyo hivyo kwa ‘kutoa kulingana na baraka ambazo Yehova amempa.’—Soma Kumbukumbu la Torati 16:17.

16. Tutahakikishaje kwamba dhabihu zetu zinakubalika machoni pa Yehova?

16 Hata hivyo, kama Waisraeli wa kale, tunapaswa kuhakikisha kwamba dhabihu zetu za hiari zinakubalika kwa Mungu. Ni lazima tuwe na usawaziko ili tutimize madaraka yetu ya msingi katika familia na katika ibada ya Yehova. Hatupaswi kutumia wakati na mali zetu kuwasaidia wengine na kupuuza hali ya kiroho au ya kimwili ya familia yetu. Tukifanya hivyo, itakuwa ni kana kwamba tunatoa kile ambacho hatuna. (Soma 2 Wakorintho 8:12.) Isitoshe, ni lazima tudumishe hali yetu wenyewe ya kiroho. (1 Kor. 9:26, 27) Hata hivyo, tuwe na hakika kwamba tukiishi kulingana na viwango vya Biblia, dhabihu zetu zitatuletea shangwe na uradhi mwingi, na ‘kukubalika zaidi’ machoni pa Yehova.

DHABIHU ZETU ZINA THAMANI KUBWA

17, 18. Tunahisije kuhusu wote wanaojidhabihu kwa ajili ya Ufalme? Na sote tunapaswa kufikiria nini?

17 Ndugu na dada zetu wengi ‘hujimimina kama matoleo ya kinywaji’ kwa kujitahidi kuunga mkono kazi muhimu ya Ufalme. (Flp. 2:17) Tunawathamini sana wale ambao wameonyesha roho hiyo ya kujidhabihu. Wake na watoto wa ndugu wanaoongoza katika kazi ya Ufalme wanastahili kupongezwa kwa sababu ya roho yao ya ukarimu na ya kujidhabihu.

18 Jitihada nyingi sana zinahitajika ili kuunga mkono masilahi ya Ufalme. Acheni sote tusali na kufikiria jinsi tunavyoweza kufanya hivyo kwa ukamili zaidi iwezekanavyo. Uwe na hakika kwamba utapata thawabu kubwa sasa na thawabu kubwa hata zaidi “katika mfumo wa mambo unaokuja.”—Marko 10:28-30.

^ fu. 2 Tazama makala yenye kichwa “Kumtolea Yehova Dhabihu kwa Nafsi Yote” katika Mnara wa Mlinzi, Januari 15, 2012, ukurasa wa 21-25.