Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) NOVEMBA 2013

“Nilikuwa Kama Kobe Katika Gamba Lake—Nilisafiri na Nyumba Yangu Popote Nilipoenda”

“Nilikuwa Kama Kobe Katika Gamba Lake—Nilisafiri na Nyumba Yangu Popote Nilipoenda”

WAHUBIRI zaidi ya 10,000 walishiriki katika kampeni kubwa ya siku tisa ya kuhubiri kotekote nchini Marekani mnamo Agosti na Septemba 1929. Walisambaza vitabu na vijitabu 250,000 hivi. Makolpota wapatao elfu moja walikuwa miongoni mwa watangazaji hao wa Ufalme. Idadi ya makolpota ilikuwa imeongezeka sana! Chapisho lililoitwa Bulletin * lilisema kwamba “hungeweza kuwazia” kwamba idadi ya mapainia ingeongezeka mara tatu kuanzia mwaka wa 1927 hadi 1929.

Mwishoni mwa mwaka wa 1929, kulikuwa na matatizo makubwa ya kiuchumi. Siku ya Jumanne, Oktoba 29, 1929, bei za hisa ziliporomoka katika Soko la Hisa la New York na kusababisha Mshuko Mkubwa wa Kiuchumi ulimwenguni pote. Benki nyingi sana zilifilisika. Wakulima waliacha kulima. Viwanda vikubwa vikafungwa na mamilioni ya watu wakapoteza kazi. Mwaka wa 1933, nyumba 1,000 zilichukuliwa kila siku kwa sababu ya madeni.

Wahubiri wa wakati wote wangekabilianaje na tatizo hilo? Njia moja ni kuwa na magari yanayoweza kutumiwa kama nyumba. Kwa kuwa hayakuhitaji kulipiwa kodi wala ushuru, magari hayo yaliwawezesha mapainia wengi kuendelea na utumishi wao bila gharama kubwa. * Wakati wa makusanyiko, walilala ndani ya magari hayo. Mwaka wa 1934, chapisho la Bulletin lilikuwa na maelezo na michoro kamili inayoonyesha jinsi ya kutengeneza nyumba thabiti na nzuri zaidi za aina hiyo. Nyumba hizo zilikuwa na vitu muhimu kama vile mabomba ya maji, jiko, kitanda kinachoweza kukunjwa, na mfumo wa kuzuia baridi.

Wahubiri wengine walianza kutengeneza nyumba za aina hiyo. Victor Blackwell anakumbuka hivi: “Noa hakuwa amejenga mashua awali, nami pia sikuwa nimejenga gari linalotumiwa kama nyumba.” Lakini alifaulu kutengeneza nyumba hiyo.

Gari lililotumiwa kama nyumba likivushwa mto katika majira ya mvua nchini India

Avery na Lovenia Bristow walikuwa na gari kama hilo. Avery alisema hivi: “Nilikuwa kama kobe katika gamba lake. Nilisafiri na nyumba yangu popote nilipoenda.” Ndugu na dada Bristow walifanya upainia pamoja na Harvey na Anne Conrow, waliokuwa na gari lenye kuta za karatasi zilizounganishwa kwa lami. Karatasi hizo zilitoka kila mara walipohama. Avery alisema hivi: “Lilikuwa gari la kwanza la aina hiyo kuwahi kuonekana, nalo halikuonekana tena kamwe!” Avery alisema kwamba familia ya Conrow ilikuwa “familia yenye furaha sana.” Harvey Conrow aliandika hivi: “Hatukukosa chochote, na tulijihisi salama kabisa katika utumishi wa Yehova. Alitutunza kwa upendo.” Baadaye, washiriki wanne wa familia ya Conrow walihudhuria Shule ya Gileadi na kutumwa huko Peru wakiwa wamishonari.

Familia ya Battaino walikuwa mapainia. Baada ya Giusto na Vincenza Battaino kujua kwamba wangepata mtoto, waligeuza gari lao kuwa nyumba. Lilikuwa “kama hoteli nzuri sana” ikilinganishwa na mahema walimoishi mwanzoni. Pamoja na msichana wao mdogo, waliendelea na mgawo  wao walioupenda wa kuwahubiria Waitaliano nchini Marekani.

Watu wengi walisikiliza habari njema, lakini maskini na wasiokuwa na kazi mara nyingi hawakuweza kutoa michango ya pesa kwa ajili ya machapisho ya Biblia. Badala yake, walichukua machapisho na kutoa bidhaa zozote walizokuwa nazo. Mapainia wawili waliorodhesha aina 64 ya bidhaa walizopewa na watu waliopendezwa. Orodha hiyo ilikuwa “kama orodha ya bidhaa zinazouzwa katika duka la mashambani.”

Fred Anderson alikutana na mkulima aliyemwomba vitabu vinne, na mkulima huyo alichangia miwani iliyotumiwa zamani na mama yake. Katika shamba lililofuata, mwanamume fulani alipendezwa na vitabu vyetu lakini akasema hivi: “Sina miwani ya kusomea.” Hata hivyo, mwanamume huyo aliweza kusoma vizuri vitabu hivyo kwa kutumia miwani ya jirani yake, naye akatoa mchango wa pesa ili apewe vitabu na miwani hiyo.

Herbert Abbott alikuwa na kikapu cha kubebea kuku katika gari lake. Alipopewa kuku watatu au wanne kama mchango, alienda sokoni kuwauza, kisha alitumia pesa hizo kununua petroli ya gari lake. Aliandika hivi: “Je, kuna pindi ambazo hatukuwa na pesa? Ndiyo, lakini hatukuruhusu hilo lituzuie kuhubiri. Gari letu lilipokuwa na petroli tuliendelea kuhubiri, huku tukimtegemea Yehova na kuamini kwamba angetusaidia.”

Watu wa Yehova walivumilia katika miaka hiyo migumu kwa sababu walimtegemea Yehova na kuazimia kabisa kuhubiri. Pindi fulani kulipokuwa na dhoruba, Maxwell na Emmy Lewis walikimbia kutoka katika nyumba yao, na muda mfupi baadaye nyumba hiyo iliangukiwa na mti na kuvunjika vipande viwili. Maxwell aliandika hivi: “Mambo hayo hayakutuzuia, ni matukio ya kawaida tu, na hatukufikiria kamwe kuacha mgawo wetu. Kulikuwa na kazi nyingi, na tulinuia kuifanya.” Bila woga na kwa msaada wa marafiki wapendwa, Maxwell na Emmy walirekebisha gari lao walilotumia kama nyumba.

Katika nyakati hizi ngumu, mamilioni ya Mashahidi wa Yehova wenye bidii wanaonyesha roho hiyo ya kujidhabihu. Sawa na mapainia hao wa zamani, tumeazimia kuendelea kuhubiri hadi Yehova aseme imetosha!

^ fu. 2 Chapisho hilo sasa linaitwa Huduma Yetu ya Ufalme.

^ fu. 4 Nyakati hizo, mapainia wengi hawakufanya kazi ya kimwili. Walipata machapisho ya Biblia kwa bei iliyopunguzwa na kutumia michango waliyopata kulipia gharama zao chache.