Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) JUNI 2013

Thamini Sifa za Yehova Kikamili

Thamini Sifa za Yehova Kikamili

“Iweni waigaji wa Mungu, kama watoto wapendwa.”—EFE. 5:1.

1. (a) Ni sifa gani za Yehova ambazo huenda Mkristo akafikiria? (b) Tutanufaikaje kwa kuchunguza sifa za Mungu?

UNAPOFIKIRIA utu wa Yehova, ni sifa gani unazokumbuka? Wengi wetu hukumbuka sifa ya upendo, haki, hekima, na nguvu. Hata hivyo, tunajua kwamba Yehova ana sifa nyingi zinazovutia. Kwa kweli, tunaweza kuorodhesha sifa zaidi ya 40 za Yehova, na kila sifa imezungumziwa katika machapisho yetu. Hebu wazia hazina ya kweli zenye kuvutia sana kuhusu utu wa Yehova tunazoweza kupata kupitia funzo letu la kibinafsi au ibada ya familia! Tunaweza kunufaika katika njia zipi kwa kujifunza sifa hizo? Kufanya hivyo kunaweza kutusaidia kumthamini zaidi Baba yetu wa mbinguni. Kadiri tunavyomthamini Yehova zaidi, ndivyo tamaa yetu ya kutaka kumkaribia na kumwiga inavyozidi kuongezeka.—Yos. 23:8; Zab. 73:28.

2. (a) Toa mfano unaoonyesha jinsi tunavyoweza kuthamini zaidi sifa za Yehova. (b) Tutachunguza nini?

2 Hata hivyo, “kuthamini” kitu fulani kunamaanisha nini? Tutatumia neno hilo katika makala hii kumaanisha kutambua thamani halisi ya kitu. Uthamini unaweza kuongezeka hatua kwa hatua. Kwa mfano: Huenda uthamini wetu kuelekea chakula ambacho hatujawahi kula ukaongezeka tunaposikia harufu yake nzuri, tunapokila, na mwishowe tunapokipika wenyewe. Vivyo hivyo, tunazidi kuithamini zaidi sifa fulani ya Yehova kwa kuijua, kuitafakari, na kuiga sifa hiyo maishani mwetu. (Efe. 5:1) Makala hii na makala mbili zinazofuata, zinakusudiwa kutusaidia kuthamini zaidi sifa za Mungu ambazo huenda hatuzikazii sana fikira kama tunavyokazia sifa zake kuu. Tutajibu maswali haya tunapochunguza kila moja ya sifa hizo: Sifa hiyo inamaanisha nini? Yehova anaionyeshaje? Na tunawezaje kumwiga Yehova katika kuonyesha sifa hiyo hususa?

 YEHOVA NI MWENYE URAFIKI

3, 4. (a) Ungesema mtu mwenye urafiki ni mtu wa aina gani? (b) Yehova anatuhakikishiaje kwamba ni mwenye urafiki au mwenye kufikika?

3 Acheni kwanza tuchunguze sifa ya kuwa mwenye urafiki au mwenye kufikika. Ungesema mtu mwenye urafiki ni mtu wa aina gani? Huenda ukasema, ‘Ni mwenye fadhili, anayepatikana kwa urahisi, na ambaye ni rahisi kuzungumza naye.’ Mara nyingi unaweza kutambua ikiwa mtu ni mwenye urafiki au la kwa kusikiliza anachosema na kutazama ishara zake za mwili kama vile ishara za mikono, uso, na nyinginezo.

4 Yehova anaonyeshaje kwamba ni mwenye urafiki? Ingawa yeye ni Muumba mweza-yote wa ulimwengu wote mzima, Yehova anatuhakikishia kwamba yuko tayari na anatamani sana kusikiliza na kujibu sala zetu. (Soma Zaburi 145:18; Isaya 30:18, 19.) Tunaweza kuongea na Mungu kwa muda mrefu pindi yoyote na mahali popote. Tunaweza kumfikia kwa uhuru tukijua kwamba hatatushutumu kamwe tukifanya hivyo. (Zab. 65:2; Yak. 1:5) Neno la Mungu linapoeleza kumhusu Yehova linatumia maneno ambayo wanadamu wanaelewa kuonyesha kwamba anataka wamkaribie. Kwa mfano, mtunga-zaburi Daudi aliandika kwamba ‘macho ya Yehova yanatuelekea’ na kwamba ‘mkono wake wa kuume unatushika sana.’ (Zab. 34:15; 63:8) Nabii Isaya alimfananisha Yehova na mchungaji kwa kusema hivi: “Atawakusanya pamoja wana-kondoo kwa mkono wake; naye atawabeba katika kifua chake.” (Isa. 40:11) Hebu wazia! Yehova anataka tuwe karibu naye kama mwana-kondoo aliyebebwa kwenye kifua cha mchungaji anayejali. Tuna Baba mwenye urafiki kama nini! Tunawezaje kumwiga Yehova katika kuonyesha sifa hiyo?

SIFA YENYE THAMANI SANA

5. Kwa nini ni muhimu wazee wawe wenye urafiki?

5 Hivi karibuni, Mashahidi wenye bidii wanaoishi katika nchi mbalimbali waliulizwa hivi: “Ni sifa gani unayothamini sana mzee akiwa nayo?” Wengi walijibu, “Mwenye  urafiki.” Ni kweli kwamba kila Mkristo anahitaji kusitawisha sifa hiyo kikamili, hata hivyo ni muhimu hata zaidi kwa wazee kuwa wenye urafiki. (Isa. 32:1, 2) Akieleza kwa nini anahisi kwamba sifa hiyo ni muhimu sana, dada mmoja alisema hivi: “Ikiwa mzee ni mwenye urafiki, ndipo tu tunapoweza kunufaika na sifa nyingine nzuri ambazo huenda anazo.” Je, unaona umuhimu wa maoni hayo? Lakini ni nini kinachomfanya mtu kuwa mwenye urafiki?

6. Ni nini siri ya kuwa mwenye urafiki?

6 Siri ya kuwa mwenye urafiki ni kupendezwa kikweli na wengine. Ikiwa mzee anawajali wengine naye anajitolea kwa hiari kuwatumikia, inaelekea kwamba ndugu na dada zake, kutia ndani watoto, wataona mtazamo huo. (Marko 10:13-16) Carlos mwenye umri wa miaka 12 anasema hivi: “Mimi huwatazama wazee wa kutaniko katika Jumba la Ufalme wakitabasamu na wakiwa wenye fadhili, na jambo hilo linanivutia sana.” Bila shaka, haitoshi kwa mzee wa kutaniko kusema tu kwamba yeye ni mwenye urafiki; anapaswa kuonyesha sifa hiyo. (1 Yoh. 3:18) Anawezaje kufanya hivyo?

7. Kwa nini mara nyingi kuvaa beji ya kusanyiko huanzisha mazungumzo, na tunajifunza somo gani?

7 Fikiria mfano huu. Hivi karibuni, ndugu mmoja alikuwa bado amevaa beji yake ya kusanyiko ndani ya ndege alipokuwa akisafiri kurudi nyumbani baada ya kuhudhuria kusanyiko katika nchi fulani. Mhudumu wa ndege alipoiona beji hiyo iliyokuwa na maneno “Ufalme wa Mungu na Uje!” alimwambia hivi ndugu huyo, “Ndiyo, na uje, tunahitaji kuzungumza zaidi kuhusu hilo.” Baadaye, walizungumza, na mhudumu huyo akakubali papo hapo magazeti yetu. Wengi wetu tumewahi kupata hali kama hiyo. Lakini, kwa nini mara nyingi beji ya kusanyiko huanzisha mazungumzo? Kwa sababu kwa njia fulani inawaambia watu: “Jihisi huru kunifikia. Niulize ninaenda wapi.” Beji ni ishara inayoonekana inayowaambia watu kwamba tuko tayari kuzungumza nao kuhusu imani yetu. Vivyo hivyo, wazee Wakristo wanapaswa kuonyesha ishara zinazowaambia hivi waamini wenzao: “Jihisi huru kunifikia.” Ni zipi baadhi ya ishara hizo?

8. Wazee huonyeshaje kwamba wanapendezwa kikweli na wengine, na hilo lina matokeo gani kwa kutaniko?

8 Huenda desturi zikatofautiana katika nchi mbalimbali, hata hivyo, kwa kawaida tunapotabasamu kwa uchangamfu, tunapowasalimu kwa shauku na utulivu ndugu na dada zetu, tunatoa ishara zinazoonyesha kwamba tunapendezwa nao kikweli. Ni nani anayepaswa kuchukua hatua ya kwanza? Fikiria mfano wa Yesu. Mathayo anasema kwamba katika mkutano ambao Yesu alifanya pamoja na wanafunzi wake, “Yesu akakaribia na kuwaambia.” (Mt. 28:18) Leo pia wazee huchukua hatua ya kwanza kuwafikia na kuongea na waamini wenzao. Hilo linaweza kuwa na matokeo gani kwa kutaniko? Dada painia mwenye umri wa miaka 88 anasema hivi: “Mimi huguswa moyo sana na tabasamu changamfu na maneno yenye kutia moyo ninayoambiwa na wazee ninapoingia katika Jumba la Ufalme.” Dada mwingine mwaminifu aliongeza hivi: “Linaweza kuonekana kuwa jambo dogo, lakini mzee anaponikaribisha katika mkutano akitabasamu, ninathamini sana jambo hilo.”

MWENYE URAFIKI NA ANAYEPATIKANA

9, 10. (a) Yehova anatuwekea mfano gani bora? (b) Wazee wanawezaje kufanya iwe rahisi kwa wengine kuwafikia?

 9 Ni wazi kwamba hatuwezi kuwa wenye urafiki ikiwa hatupatikani. Yehova anatuwekea mfano bora sana kuhusiana na jambo hilo. “Hayuko mbali sana na kila mmoja wetu.” (Mdo. 17:27) Njia moja ambayo wazee wanafanya iwe rahisi kwa wengine kuwafikia ni kutenga wakati kabla na  baada ya mikutano ya Kikristo ili kuongea na ndugu na dada zao, vijana kwa wazee. Ndugu mmoja painia alisema hivi: “Mzee anaponiuliza hali yangu na kisha kunisikiliza kwa subira, ninahisi kwamba ninathaminiwa.” Dada ambaye amekuwa akimtumikia Yehova kwa miaka karibu 50 alisema hivi: “Wazee wanaotumia muda fulani kuzungumza nami baada ya mkutano hunifanya nihisi ninathaminiwa.”

10 Ni kweli kwamba wachungaji Wakristo wanahitaji pia kutimiza majukumu mengine. Hata hivyo, lengo lao katika mikutano linapaswa kuwa kukazia kwanza fikira kondoo.

YEHOVA HANA UBAGUZI

11, 12. (a) Kutokuwa na ubaguzi kunatia ndani nini? (b) Yehova anatuwekea mfano gani katika kutokuwa na ubaguzi?

11 Kutokuwa na ubaguzi ni sifa nyingine ya Yehova inayovutia sana. Kutokuwa na ubaguzi kunamaanisha nini? Kunatia ndani kutenda kwa haki, kutokuwa au kutoonyesha ubaguzi au upendeleo. Mtu anaweza kuonyesha kikweli kwamba hana ubaguzi kwa njia mbili: kupitia mtazamo na matendo yake. Kwa nini yote mawili yanahitajika? Kwa sababu ikiwa mtu hana ubaguzi katika mtazamo wake atachochewa kuwatendea wote bila ubaguzi. Katika Maandiko ya Kigiriki ya Kikristo, neno “kutobagua,” kihalisi linamaanisha “kutoangalia nyuso,” yaani, kutopendelea uso wa mtu mmoja kuliko wa mwingine. (Mdo. 10:34; Kingdom Interlinear) Hivyo, mtu asiye na ubaguzi hakazii fikira tu sura ya nje ya mtu au hali zake, bali sifa za mtu huyo.

12 Yehova ndiye mfano bora zaidi katika kutokuwa na ubaguzi. Neno lake linasema kwamba “hana ubaguzi” naye ‘hamtendei yeyote kwa upendeleo.’ (Soma Matendo 10:34, 35; Kumbukumbu la Torati 10:17.) Kisa fulani kilichotokea katika siku za Musa kinaonyesha jambo hilo.

Binti za Selofehadi walithamini sifa ya Mungu ya kutokuwa na ubaguzi (Tazama fungu la 13 na 14)

13, 14. (a) Binti watano wa Selofehadi walikabili hali gani? (b) Yehova alionyeshaje kwamba hana ubaguzi?

 13 Muda mfupi kabla ya Waisraeli kuingia katika Nchi ya Ahadi, dada watano waseja hawakujua la kufanya. Kwa nini? Walijua kwamba kama familia nyingine za Waisraeli, familia yao pia ingepewa ardhi aliyogawiwa baba yao. (Hes. 26:52-55) Hata hivyo, baba yao, Selofehadi wa kabila la Manase, alikuwa amekufa. Kulingana na desturi, wana wa Selofehadi ndio waliopaswa kurithi ardhi, hata hivyo, alikuwa na mabinti tu. (Hes. 26:33) Kwa sababu familia yao haikuwa na mwana wa kurithi ardhi hiyo, je, watu wa ukoo ndio waliopaswa kupewa ardhi hiyo na mabinti kuachwa bila urithi wowote wa familia?

14 Dada hao watano walimfikia Musa na kumuuliza hivi: “Kwa nini jina la baba yetu liondolewe kutoka katikati ya familia yake kwa sababu hakuwa na mwana?” Nao wakamsihi hivi: “Tupe miliki katikati ya ndugu za baba yetu.” Je, Musa aliwajibu kwa  kusema ‘Sheria hiyo haiwezi kamwe kubadilika’? Hapana, badala yake ‘aliiweka kesi yao mbele za Yehova.’ (Hes. 27:2-5) Matokeo yakawa nini? Yehova alimwambia Musa hivi: “Binti za Selofehadi wanasema jambo lililo sawa. Wape miliki ya urithi katikati ya ndugu za baba yao, nawe utaupitisha urithi wa baba yao kwao.” Yehova alifanya mengi zaidi. Aliongeza jambo hilo katika sheria kwa kumwambia Musa hivi: “Ikiwa mtu yeyote atakufa bila kuwa na mwana, mtaupitisha urithi wake kwa binti yake.” (Hes. 27:6-8; Yos. 17:1-6) Tangu wakati huo na kuendelea, sheria hiyo ingewalinda wanawake wote Waisraeli waliokabili tatizo hilo.

15. (a) Yehova anawatendeaje watu wake, hasa wenye uhitaji? (b) Ni masimulizi gani mengine ya Biblia yanayoonyesha kwamba Yehova hana ubaguzi?

15 Kwa kweli, huo ulikuwa uamuzi wenye fadhili na usio na ubaguzi kama nini! Yehova aliwatendea kwa heshima wanawake hao waliokuwa na uhitaji kama tu alivyowatendea Waisraeli wengine waliokuwa na hali nzuri zaidi. (Zab. 68:5) Hilo ni simulizi moja tu kati ya masimulizi mengi katika Biblia yanayoonyesha ukweli huu wenye kuchangamsha moyo: Yehova anawatendea bila ubaguzi watumishi wake wote.1 Sam. 16:1-13; Mdo. 10:30-35, 44-48.

TUNAWEZA KUMWIGA YEHOVA

16. Tunawezaje kusitawisha na kuimarisha sifa ya kutokuwa na ubaguzi?

16 Tunawezaje kuiga sifa ya Yehova ya kutokuwa na ubaguzi? Kumbuka kwamba kutokuwa na ubaguzi kunatia ndani mambo mawili. Tunaweza tu kuwatendea wengine bila ubaguzi ikiwa hatuna ubaguzi. Ni kweli kwamba sote hufikiri kuwa tunakubali maoni ya wengine na hatuna ubaguzi. Hata hivyo, inaelekea utakubali kwamba si rahisi sikuzote kuchanganua hisia zetu kwa unyoofu. Basi, tunaweza kufanya nini ili kujua ikiwa wengine wanatuona kuwa watu wasio na ubaguzi? Yesu alipotaka kujua maoni ya watu kumhusu, aliwauliza hivi rafiki zake aliowaamini: “Watu wanasema Mwana wa binadamu ni nani?” (Mt. 16:13, 14) Kwa nini usifuate mfano wa Yesu? Unaweza kumuuliza rafiki unayemwamini akueleze kwa unyoofu ikiwa una mwelekeo wa kutokuwa na ubaguzi. Ufanye nini akikuambia kwamba una dalili fulani za ubaguzi wa rangi, jamii, au kiuchumi? Sali kwa Yehova kwa bidii kuhusu hisia zako, ukimwomba akusaidie kurekebisha mtazamo wako ili uige kikamili zaidi sifa yake ya kutokuwa na ubaguzi.Mt. 7:7; Kol. 3:10, 11.

17. Tunaweza kuwatendea wengine bila ubaguzi katika njia zipi?

 17 Katika kutaniko la Kikristo, tunaonyesha kwamba tunatamani kuiga sifa ya Yehova ya kutokuwa na ubaguzi kwa kuwatendea kwa heshima na fadhili zenye upendo ndugu na dada zetu wote. Kwa mfano, inapohusu kuonyesha ukarimu, tunapaswa kuwaalika waabudu wenzetu wa aina zote, kutia ndani wale wenye malezi tofauti na yetu, maskini, mayatima, au wajane. (Soma Wagalatia 2:10; Yakobo 1:27.) Zaidi ya hilo, katika kazi yetu ya kuhubiri kuhusu Ufalme, tunawatangazia habari njema bila ubaguzi watu wenye malezi mbalimbali, kutia ndani wale wanaotoka nchi nyingine. Tunafurahi sana kwamba tunaweza kupata machapisho ya Biblia katika lugha 600 hivi. Huo ni ushahidi ulio wazi wa sifa ya kutokuwa na ubaguzi!

18. Wewe binafsi utaonyeshaje kwamba unathamini sifa ya Yehova ya kuwa mwenye urafiki na kutokuwa na ubaguzi?

18 Kwa kweli, kadiri tunavyotumia wakati kutafakari sifa ya Yehova ya kuwa mwenye urafiki na kutokuwa na ubaguzi, ndivyo tunavyozidi kumthamini. Uthamini huo wenye kina unapaswa kutuchochea kuiga kikamili sifa za Yehova, na kuonyesha sifa hizo tunaposhughulika na waamini wenzetu na wale tunaowahubiria.

“Yehova yuko karibu na wote wanaomwitia.”—Zab. 145:18 (Tazama fungu la 9)

‘Yehova Mungu wenu hamtendei yeyote kwa upendeleo.’—Kum. 10:17 (Tazama fungu la 17)