Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) FEBRUARI 2013

 Kutoka Katika Hifadhi Ya Vitu Vyetu Vya Kale

Sinema “Isiyosahaulika” Ilitolewa kwa Wakati Unaofaa Kabisa

Sinema “Isiyosahaulika” Ilitolewa kwa Wakati Unaofaa Kabisa

“ISIYOSAHAULIKA!” Hivyo ndivyo wengi walivyosema kuhusu sinema ya “Creation Drama.” Ilitolewa kwa wakati unaofaa na walioitazama hawakuisahau kamwe. Kwa kweli, muda mfupi tu kabla ya utawala wa Hitler kuanza kuwatesa vikali watu wa Yehova katika Bara la Ulaya, sinema ya “Creation Drama” ilitoa ushahidi mkubwa sana uliomtukuza Yehova. Lakini, sinema ya “Creation Drama” ilikuwa nini?

Jina la kitabu hiki, Schöpfung (Creation) ndilo lililotumiwa kama jina la drama hiyo mpya

Mwaka wa 1914, makao makuu ya watu wa Yehova katika Brooklyn, New York, Marekani yalitoa sinema ya “Photo-Drama of Creation.” Ilitia ndani picha za slaidi na sinema zenye rangi na sauti zinazoweza kuchezwa kwa muda wa saa nane. Sinema hiyo ya “Photo-Drama” ilitazamwa na mamilioni ya watu ulimwenguni pote. Sinema iliyofupishwa ya “Eureka Drama” ilitolewa pia mwaka wa 1914. Hata hivyo katika miaka ya 1920, slaidi, filamu na vifaa vya kuonyeshea sinema vilikuwa vimechakaa kabisa. Lakini wengi bado walitaka kuitazama sinema ya “Photo-Drama.” Kwa mfano, wakazi wa Ludwigsburg, Ujerumani, waliuliza hivi: “Sinema ya ‘Photo-Drama’ itaonyeshwa tena lini?” Ndugu wangefanya nini?

Ili kutosheleza uhitaji wa kuonyesha sinema hiyo, katika miaka ya 1920, wawakilishi wa familia ya Betheli ya Magdeburg, Ujerumani, walinunua filamu kutoka kwa shirika la habari la Paris, Ufaransa, na slaidi kutoka kwa kampuni zinazotengeneza michoro na slaidi kutoka Leipzig na Dresden. Filamu na slaidi hizo zilichanganywa na baadhi ya slaidi za zamani za “Photo-Drama” zilizokuwa zikitumika bado.

Ndugu Erich Frost, aliyekuwa na kipawa cha kutunga muziki, alitunga muziki uliotumiwa katika filamu na slaidi hizo. Masimulizi fulani katika sinema hiyo yalitolewa katika kitabu chetu cha Creation. Ndiyo sababu sinema hiyo mpya ya “Photo-Drama” ikapewa jina jipya la “Creation Drama.”

Drama hiyo mpya ilikuwa na urefu wa saa nane, sawa tu na ile sinema ya “Photo-Drama,” nayo ilionyeshwa sehemu-sehemu, kwa jioni kadhaa. Ilionyesha habari zenye kuvutia kuhusu siku za uumbaji, ilisimulia historia ya Biblia na ya ulimwengu, na kuonyesha kwamba dini ya uwongo imeshindwa kuwasaidia wanadamu. Sinema ya “Creation Drama” ilionyeshwa Austria, Luxemburg, Ujerumani, Uswisi, na popote kulikokuwa na watu wanaozungumza Kijerumani.

Erich Frost akiwa na noti zake za muziki wa sinema ya “Creation Drama”

Erich Frost alisema hivi: “Tulipokuwa tunaonyesha Drama hiyo, niliwatia moyo wenzangu, hasa wale waliokuwa katika Okestra, kutumia vipindi vya mapumziko kuwapa watazamaji wote vitabu na  vijitabu vyetu vizuri sana. Tuliwaachia watu machapisho mengi zaidi kwa njia hii kuliko nyumba kwa nyumba.” Johannes Rauthe, aliyepanga maonyesho nchini Poland na nchi inayoitwa sasa Jamhuri ya Cheki, anakumbuka kwamba watu wengi waliohudhuria waliacha anwani zao ili watembelewe. Anwani hizo zilitumiwa kufanya ziara nzuri za kurudia.

Katika miaka ya 1930, sinema ya “Creation Drama” ilikuwa imeonyeshwa katika majumba ya sinema yaliyojaa watazamaji, na watu wengi walizungumza kuhusu Mashahidi wa Yehova. Kufikia mwaka 1933, karibu watu milioni moja walikuwa wamehudhuria na kuiona sinema hiyo iliyopangwa na kuonyeshwa na ofisi yetu ya tawi ya Ujerumani. Käthe Krauss anakumbuka hivi: “Ili kuiona tu Drama hiyo, kila siku, kwa siku tano, tulitembea kilomita 10 kwenda na kurudi, huku tukipita katika misitu, milima na mabonde.” Else Billharz anasema hivi: “Sinema ya ‘Creation Drama’ iliniwekea msingi wa kuipenda kweli.”

Alfred Almendinger anasema kwamba wakati mama yake alipoiona Drama hiyo, “alifurahi sana hivi kwamba akanunua Biblia na kutafuta neno ‘toharani.’” Kwa kuwa hakulipata neno hilo katika Biblia, aliacha kuhudhuria ibada kanisani, naye akabatizwa. Erich Frost alikumbuka hivi: “Watu wengi walikubali kweli kwa sababu ya kutazama sinema ya ‘Creation Drama.’”3 Yoh. 1-3.

Punde tu baadaye wakati idadi ya watazamaji wa sinema ya ‘Creation Drama’ ilipokuwa inazidi kuongezeka, Wanazi walivamia bara la Ulaya. Kuanzia mwaka wa 1933, utendaji wa Mashahidi nchini Ujerumani ulipigwa marufuku. Kuanzia wakati huo mpaka mwishoni mwa vita vya pili vya ulimwengu mwaka wa 1945, watumishi wa Yehova huko Ulaya walinyanyaswa vikali sana. Erich Frost alikaa kifungoni kwa miaka minane hivi. Hata hivyo, baadaye alitoka kifungoni naye akatumikia Betheli huko Wiesbaden, Ujerumani. Lilikuwa jambo linalofaa kama nini kwamba sinema isiyosahaulika ya “Creation Drama” ilitolewa kwa wakati unaofaa kabisa ili kuwapa ujasiri zaidi Wakristo wengi waliokabili majaribu mengi ya imani wakati wa Vita vya Pili vya Ulimwengu!—Kutoka katika hifadhi ya vitu vyetu vya kale nchini Ujerumani.

 

Pata Kujua Mengi Zaidi

Sinema ya Pekee Iliyochochea Imani Miaka 100 Iliyopita

Huu ni mwaka wa 100 tangu sinema ya “Photo-Drama of Creation” ilipoonyeshwa kwa mara ya kwanza. Sinema hiyo ilikusudiwa kuwasaidia watu kujenga imani katika Neno la Mungu, Biblia.