Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Mnara wa Mlinzi  |  Na. 6 2017

 WASOMAJI WETU WANAULIZA . . .

Je, Krismasi Ni ya Kikristo?

Je, Krismasi Ni ya Kikristo?

Mamilioni ya watu duniani wanaamini kwamba Krismasi ni sherehe ya kuzaliwa kwa Yesu Kristo. Hata hivyo, je, umewahi kujiuliza ikiwa Wakristo wa karne ya kwanza, ambao walikuwa na uhusiano wa karibu zaidi na Yesu, walisherehekea Krismasi? Na je, unajua Biblia inasema nini kuhusu sherehe za kuzaliwa? Kupata majibu ya maswali hayo kutakusaidia kujua ikiwa Krismasi ni ya Kikristo au la.

Kwanza, Biblia haitaji kuhusu sherehe yoyote ya kuzaliwa ya watumishi waaminifu wa Mungu, iwe ni ya Yesu au mtu mwingine yeyote. Maandiko yanawataja watu wawili pekee waliosherehekea siku yao ya kuzaliwa. Hakuna yeyote kati yao aliyekuwa mwabudu wa Yehova, Mungu ambaye ni Mtungaji wa Biblia, na katika sherehe zao mambo mabaya yalitokea. (Mwanzo 40:20; Marko 6:21) Kulingana na kitabu Encyclopædia Britannica, Wakristo wa mapema walipinga “zoea la kipagani la kusherehekea siku ya kuzaliwa.”

Yesu alizaliwa tarehe ngapi?

Biblia haitaji tarehe hususa ambayo Yesu alizaliwa. Kitabu cha McClintock and Strong’s Cyclopedia kinasema: “Tarehe ambayo Yesu alizaliwa haipatikani katika A[gano] J[ipya] au hata katika chanzo kingine chochote.” Kwa hakika, ikiwa Yesu alitaka wafuasi wake washerehekee siku yake ya kuzaliwa, angehakikisha wanajua alizaliwa tarehe ngapi.

Pili, Biblia haitaji popote kwamba Yesu au mwanafunzi wake yeyote yule alisherehekea Krismasi. Kulingana na kitabu New Catholic Encyclopedia, sherehe ya Krismasi inatajwa kwa mara ya kwanza “katika Chronograph of Philocalus, kalenda ya Kiroma ambayo vyanzo vyake vya habari ni vya miaka ya 336 [W.K.].” Hiyo ilikuwa muda mrefu baada ya Biblia kukamilika na karne kadhaa baada ya Yesu kuishi duniani. Hivyo, McClintock na Strong wanasema kwamba “sherehe ya Krismasi haikuanzishwa na Mungu, wala chanzo chake si A[gano] J[ipya].” *

Yesu aliwaagiza wanafunzi wake waadhimishe tukio gani?

Akiwa Mwalimu Mkuu, Yesu alitoa maagizo yaliyo wazi kuhusu kile alichotaka wafuasi wake wafanye, na yameandikwa kwenye Biblia. Hata hivyo, maagizo hayo hayahusishi kusherehekea Krismasi. Kama vile ambavyo mwalimu hangependa wanafunzi wake wafanye mambo yaliyo nje ya maagizo aliyowapa, Yesu hataki wafuasi wake ‘wapite mambo yaliyoandikwa’ katika Maandiko Matakatifu.—1 Wakorintho 4:6.

Kwa upande mwingine, kuna tukio moja muhimu ambalo Wakristo wa mapema walilifahamu vizuri sana. Tukio hilo ni mwadhimisho, au Ukumbusho, wa Kifo cha Yesu. Yesu mwenyewe aliwaambia wanafunzi wake tarehe ya tukio hilo, na kuwafundisha jinsi ya kuliadhimisha. Maagizo hayo hususa, pamoja na tarehe ya kifo chake, yameandikwa kwenye Biblia.—Luka 22:19; 1 Wakorintho 11:25.

Kama tulivyoona, Krismasi ni sherehe ya siku ya kuzaliwa, na Wakristo wa mapema hawakufuata zoea hilo la kipagani. Zaidi ya yote, Biblia haitaji popote pale kwamba Yesu au mtu mwingine yeyote alisherehekea Krismasi. Kwa msingi huo, mamilioni ya Wakristo duniani kote wamefikia mkataa wa kwamba Krismasi si ya Kikristo.

^ fu. 6 Ili kupata habari zaidi kuhusu vyanzo vya desturi mbalimbali za Krismasi, soma makala “Wasomaji Wetu Wanauliza . . . Ukweli wa Mambo Ni Nini Kuhusu Krismasi?” katika gazeti la Mnara wa Mlinzi la Desemba 1, 2014, linalopatikana kwenye www.jw.org/sw.