Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Mnara wa Mlinzi  |  Na. 4 2016

Je, Inawezekana Kuishi Katika Ulimwengu Usio na Jeuri?

Je, Inawezekana Kuishi Katika Ulimwengu Usio na Jeuri?

Je, kuna yeyote katika familia yenu amewahi kutendewa kwa jeuri? Je, unahofia kwamba huenda utatendewa kwa jeuri? Jeuri inaitwa “tatizo kubwa la kijamii linaloenea duniani kote.” Fikiria mifano kadhaa.

KUTENDEWA VIBAYA KINGONO NA JEURI NYUMBANI: Ripoti ya Umoja wa Mataifa inasema hivi: “Mwanamke mmoja kati ya wanawake watatu amewahi kupigwa au kutendewa vibaya kingono na mwenzi wake.” Kwa kusikitisha “inakadiriwa kwamba ulimwenguni pote, mwanamke mmoja kati ya watano huenda atanusurika kubakwa au atabakwa.”

UHALIFU WA MTAANI: Inaripotiwa kwamba kuna vikundi vya wahalifu zaidi ya 30,000 nchini Marekani. Katika Amerika ya Latini, mtu 1 kati ya 3 ameripotiwa kutendewa vibaya kikatili.

MAUAJI: Inakadiriwa kwamba katika kipindi cha mwaka mmoja, karibu watu laki tano waliuawa na wahalifu; idadi hiyo ni kubwa kuliko ya watu waliouawa vitani. Nchi za Kusini mwa Afrika na Amerika ya Kati zilikuwa na wastani mkubwa wa mauaji. Kiwango cha mauaji katika nchi hizo ni mara nne ya wastani wa mauaji yanayotokea duniani kote. Katika kipindi cha mwaka mmoja, watu zaidi ya 100,000 waliuawa na wahalifu huko Amerika ya Latini, na nchini Brazili pekee watu wapatao 50,000 waliuawa. Je, tunaweza kupata suluhisho la kudumu dhidi ya jeuri?

JE, JEURI ITAKWISHA?

Kwa nini jeuri imeenea sana? Sababu nyingi zimetolewa kuhusiana na chanzo cha jeuri zikiwemo: tofauti za kiuchumi na kijamii kati ya maskini na matajiri, kukosa kuthamini uhai wa wengine, matumizi ya vileo na madawa ya kulevya, watoto kutazama matendo ya jeuri kutoka kwa watu wazima, na wahalifu kuendelea kufanya uhalifu bila kuadhibiwa.

Kwa kupendeza, nchi fulani zinajitahidi kukabiliana na jeuri. Katika jiji lenye watu wengi la São Paulo, nchini Brazili, idadi ya mauaji ilishuka kwa asilimia 80 katika kipindi cha miaka kumi iliyopita. Hata hivyo, bado vitendo vya uhalifu vya kila aina vimeenea katika jiji hilo, na wastani wa mauaji unakaribia watu 10 kwa 100,000. Hivyo basi, ni nini kitakachokomesha jeuri?

Suluhisho kamili la kumaliza jeuri linategemea watu, yaani, mtazamo na mwenendo wao. Ili watu wenye jeuri wabadilike wanapaswa kuondolea mbali kiburi, pupa na ubinafsi na badala yake wawe na upendo, heshima na kuwahangaikia wengine.

Ni nini kinachoweza kumchochea mtu afanye mabadiliko hayo makubwa? Fikiria mambo ambayo Biblia inafundisha:

  • “Kwa maana kumpenda Mungu humaanisha hivi, kwamba tuzishike amri zake.”—1 Yohana 5:3.

  • “Kumwogopa Yehova humaanisha kuchukia yaliyo mabaya.” *Methali 8:13.

 Kumpenda Mungu na kuogopa kumkasirisha kunaweza kuwachochea hata watu wenye jeuri wabadili maisha yao, yaani, si mwonekano wao tu bali utu wao. Je, hilo linawezekana?

Mfikirie Alex, * ambaye ametumikia gerezani kwa miaka 19 kwa sababu ya uhalifu. Baada ya kujifunza Biblia na Mashahidi wa Yehova, alibatizwa na kuwa Shahidi mwaka wa 2000. Je, amebadilika kabisa na kuacha jeuri? Naam, Alex anajuta sana kuhusiana na mambo aliyofanya zamani. Anasema: “Nilianza kumpenda Mungu nilipotambua kwamba amenisamehe kabisa. Upendo na uthamini wangu kwa Yehova umenisaidia nibadili maisha yangu.”

César, ambaye pia anaishi nchini Brazili, alikuwa mwizi wa kutumia silaha. Aliishi maisha hayo kwa miaka 15 hivi. Ni nini kilichofanya abadilike? César alitembelewa na Mashahidi wa Yehova akiwa gerezani na akajifunza Biblia. Anaeleza hivi: “Kwa mara ya kwanza nilitambua kusudi la maisha. Nimejifunza kumpenda Mungu. Pia, nimejifunza kumwogopa Mungu, yaani, kutorudia kufanya mambo yanayomhuzunisha Yehova. Ninataka kuonyesha shukrani zangu kwa fadhili zake. Kumpenda na kumwogopa Mungu kumenichochea kubadilika kabisa.”

Jifunze jinsi unavyoweza kuishi katika ulimwengu usio na jeuri

Mifano hiyo inatufundisha nini? Inatufundisha kwamba Biblia ina nguvu za kubadili maisha ya watu, yaani, kubadili njia yao ya kufikiri. (Waefeso 4:23) Alex aliyetajwa mwanzoni anaongezea hivi: “Mambo niliyojifunza katika Biblia yalikuwa kama maji safi ambayo yalisafisha mawazo yangu mabaya hatua kwa hatua. Sikuwazia kwamba ningefaulu kuacha mwenendo usiofaa.” Naam, tukijaza akili zetu ujumbe safi wa Biblia, utaondoa mawazo yasiyofaa. Neno la Mungu lina nguvu za kusafisha. (Waefeso 5:26) Hivyo, watu wenye jeuri na wabinafsi wanaweza kubadili maisha yao na kuwa wenye amani na fadhili. (Waroma 12:18) Kwa sababu ya kutumia kanuni za Biblia, wanapata amani maishani.—Isaya 48:18.

Mashahidi wa Yehova zaidi ya milioni nane katika nchi 240 wamejifunza siri ya kukomesha jeuri. Watu kutoka jamii zote na tabaka mbalimbali wamejifunza kupendana na kumwogopa Mungu, na hivyo kuishi kwa amani wakiwa familia ya ulimwenguni pote. (1 Petro 4:8) Wanathibitisha wazi kwamba wanadamu wanaweza kuishi bila jeuri.

ULIMWENGU USIO NA JEURI UKO KARIBU!

Biblia inaahidi kwamba hivi karibuni Mungu ataondoa uovu duniani. Dunia ya sasa yenye jeuri imewekwa akiba kwa ajili ya “siku ya hukumu na ya kuangamizwa kwa watu wasiomwogopa Mungu.” (2 Petro 3:5-7) Watu wenye jeuri hawatakuwepo tena. Tunawezaje kuwa na uhakika kwamba Mungu atakomesha jeuri kabisa?

Biblia inasema hivi: ‘Mtu yeyote anayependa jeuri nafsi Yake [Mungu] hakika inamchukia.’ (Zaburi 11:5) Muumba wetu anapenda haki na amani. (Zaburi 33:5; 37:28) Ndiyo sababu hatawavumilia watu wenye jeuri milele.

Naam, ulimwengu mpya wenye amani uko karibu. (Zaburi 37:11; 72:14) Jifunze jinsi unavyoweza kustahili kuishi katika ulimwengu usio na jeuri.

^ fu. 12 Yehova ni jina la Mungu kama linavyopatikana katika Biblia.

^ fu. 14 Majina yamebadilishwa.

Pata Kujua Mengi Zaidi

MAJIBU YA MASWALI YA BIBLIA

Amani Duniani—Itapatikanaje?

Jifunze jinsi ambavyo Mungu ameahidi kuleta amani duniani kupitia Ufalme wake.

AMKENI!

Inachosema Biblia Kuhusu Jeuri

Mungu ana maoni gani kuhusu jeuri? Je, watu wenye jeuri wanaweza kubadilika?