Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Mnara wa Mlinzi—Toleo la Funzo  |  Juni 2017

Usiangalie Sura ya Nje Tu!

Usiangalie Sura ya Nje Tu!

DON, ambaye ni Shahidi wa Yehova nchini Kanada, hufanya jitihada za pekee kuzungumza na watu wanaoishi mitaani. Akizungumzia mmoja wa watu hao, Don anasema hivi: “Mwanamume fulani ambaye hakuwa na makao aliyeitwa Peter, alikuwa ndiye mtu mchafu zaidi niliyewahi kuona. Alichukiza na alijua jinsi ya kuwaudhi watu. Alikataa tena na tena kutendewa kwa fadhili.” Hata hivyo, kwa zaidi ya miaka 14, Don alijitahidi mara kwa mara kumwonyesha fadhili mwanamume huyo.

Siku moja, Peter alimwuliza Don: “Kwa nini unanihangaikia? Kila mtu huchoka kushughulika nami. Kwa nini unanijali?” Don alitumia kwa busara maandiko matatu ili kuufikia moyo wa Peter. Kwanza, alimwuliza Peter ikiwa alijua kwamba Mungu ana jina na akamwomba asome moja kwa moja kwenye Biblia katika Zaburi 83:18. Kisha, akitaka kumwonyesha sababu iliyofanya amjali, Don alimwomba Peter asome Waroma 10:13, 14, inayosema kwamba “kila mtu anayeliitia jina la Yehova ataokolewa.” Mwishowe, Don alisoma Mathayo 9:36 na kisha akamwomba Peter ajisomee. Mstari huo unasema: “Alipouona umati [Yesu] akawasikitikia, kwa sababu walikuwa wamechunwa ngozi na kutupwa huku na huku kama kondoo wasio na mchungaji.” Aliposoma, Peter aliuliza hivi huku akilengwa na machozi: “Mimi ni mmoja wa kondoo hao?”

Peter akaanza kufanya mabadiliko. Alioga, akanyoa ndevu, na kuvaa mavazi mazuri ambayo Don alikuwa amempa. Peter aliendelea kuwa nadhifu.

Peter alikuwa na kitabu cha kumbukumbu. Sehemu za kwanza za kitabu chake zilikuwa na habari zenye kuhuzunisha, lakini mambo aliyoandika baadaye yalikuwa tofauti. Ukurasa mmoja ulisema hivi: “Leo nimejifunza jina la Mungu. Sasa ninaposali, ninasali kwa Yehova. Nimefurahi sana kujua jina lake. Don ameniambia kwamba Yehova anaweza kuwa Rafiki yangu wa karibu ambaye sikuzote yuko tayari kunisikiliza, iwe ni saa ngapi au katika hali gani.”

 Peter aliwaandikia ndugu zake maneno haya ya mwisho:

“Leo, sijihisi vizuri. Nafikiri nimezeeka sasa. Lakini hata ikiwa leo ni siku yangu ya mwisho kuwa hai, najua kwamba nitamwona tena rafiki yangu [Don] katika Paradiso. Ikiwa mnasoma maneno haya, inamaanisha kwamba sipo. Lakini ikiwa mtaona mwanamume fulani katika mazishi yangu ambaye anaonekana kama hafai kuwa kati ya umati uliokusanyika, zungumzeni naye, na tafadhali someni kitabu hiki kidogo cha rangi ya bluu [akirejelea kitabu Kweli Iongozayo Kwenye Uzima wa Milele kilichotumiwa kujifunza Biblia, ambacho alikuwa amepokea miaka mingi iliyopita]. * Kinasema kwamba nitamwona tena rafiki yangu katika Paradiso. Ninaamini maneno hayo kwa moyo wangu wote. Ndugu yenu mpendwa, Peter.”

Baada ya mazishi, dada ya Peter anayeitwa Ummi, alisema hivi: “Miaka miwili hivi iliyopita, Peter aliwasiliana nami. Kwa mara ya kwanza baada ya miaka mingi, alionekana kuwa mwenye furaha. Hata alitabasamu.” Alimwambia Don hivi: “Nitasoma kitabu hicho kwa kuwa ikiwa kiligusa moyo wa ndugu yangu lazima kiwe cha pekee.” Pia, Ummi alikubali kujifunza na Shahidi wa Yehova kitabu Biblia Inafundisha Nini Hasa? ambacho ni cha karibuni zaidi.

Sisi pia hatupaswi kuangalia sura ya nje tu, bali tunapaswa kuonyesha upendo wa kweli na kuwa na subira kuelekea watu wa namna zote. (1 Tim. 2:3, 4) Tukifanya hivyo, huenda tukagusa mioyo ya watu ambao hawapendezi machoni pa wanadamu lakini wana moyo mzuri, kama Peter. Tunaweza kuwa na uhakika kwamba Mungu ambaye “huona jinsi moyo ulivyo,” atafanya kweli ikue katika mioyo ya wale walio na mwelekeo unaofaa.—1 Sam. 16:7; Yoh. 6:44.

^ fu. 7 Kilichochapishwa na Mashahidi wa Yehova lakini sasa hakichapishwi tena.