Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) MACHI 2017

 SIMULIZI LA MAISHA

Nimefaidika kwa Kutembea na Watu Wenye Hekima

Nimefaidika kwa Kutembea na Watu Wenye Hekima

ILIKUWA asubuhi yenye hewa safi lakini yenye baridi huko Brookings, South Dakota, Marekani. Ilinikumbusha kwamba majira ya baridi kali yalikuwa karibu kuanza. Lakini unaweza kushangaa kujua kwamba siku hiyohiyo, baadhi yetu tulikuwa tukitetemeka kwa sababu ya baridi ndani ya jengo la kuhifadhia mazao. Tulikuwa tumesimama kando ya chombo cha kunyweshea wanyama ambacho kilikuwa na maji ya baridi! Acheni niwasimulie mambo fulani kuhusu maisha yangu yaliyofanya nijikute katika hali hiyo.

MAISHA YA MAPEMA YA FAMILIA

Baba mkubwa Alfred na Baba

Nilizaliwa Machi 7, 1936, nikiwa wa mwisho kati ya watoto wanne. Tuliishi kwenye shamba dogo mashariki mwa jimbo la South Dakota. Kazi ya ukulima ilikuwa muhimu katika familia yetu, lakini haikuwa kazi muhimu zaidi. Wazazi wangu walibatizwa na kuwa Mashahidi wa Yehova mwaka 1934. Walikuwa wamejiweka wakfu kwa Baba yetu wa mbinguni, Yehova, kwa hiyo walitanguliza mapenzi ya Mungu maishani. Baba yangu, Clarence, na baadaye baba mkubwa Alfred, walitumikia wakiwa watumishi wa kampuni (sasa ni mratibu wa baraza la wazee) katika kutaniko letu dogo lililokuwa jijini Conde, South Dakota.

Ilikuwa kawaida kwa familia yetu kuhudhuria mikutano ya Kikristo na kwenda nyumba kwa nyumba ili kuwaeleza wengine kuhusu tumaini zuri ajabu la wakati ujao katika Biblia. Mfano wa wazazi wetu na mazoezi tuliyopata kutoka kwao yaligusa moyo na kutuchochea kupenda mambo ya kiroho tangu utotoni. Mimi na dada yangu Dorothy, tulikuwa wahubiri wa Ufalme tukiwa na umri wa miaka sita. Katika 1943, nilijiandikisha katika Shule ya Huduma ya Kitheokrasi, ambayo ilikuwa imeanza tu kuwa sehemu ya mikutano yetu.

Nikiwa painia mwaka 1952

Makusanyiko yalikuwa sehemu muhimu maishani mwetu. Ndugu Grant Suiter ndiye aliyekuwa  msemaji anayezuru katika kusanyiko la mwaka 1949 jijini Sioux Falls, South Dakota. Bado ninakumbuka hotuba yake yenye kichwa, “Ni Kuchelewa Mno Kuliko Unavyofikiri!” Alikazia kwamba Wakristo wote waliojiweka wakfu wanapaswa kutumia maisha yao kikamili kutangaza habari njema ya Ufalme wa Mungu uliosimamishwa. Jambo hilo lilinichochea kujiweka wakfu kwa Yehova. Katika kusanyiko la mzunguko lililofuata ambalo lilifanywa Brookings, ndipo nilipokuwa ndani ya jengo la kuhifadhia mazao nikisubiri kubatizwa, kama nilivyosimulia mwanzoni. Chombo cha chuma cha kunyweshea wanyama ndicho kilichotumiwa kama “kidimbwi” ambacho sisi wanne tulibatiziwa katika Novemba 12, 1949.

Kisha nikaweka lengo la kuwa painia. Nilianza upainia Januari 1, 1952, nikiwa na umri wa miaka 15. Biblia inasema kwamba “anayetembea na watu wenye hekima atakuwa na hekima,” na kulikuwa na watu wengi wenye hekima katika familia yetu waliounga mkono uamuzi wangu wa kuwa painia. (Met. 13:20) Baba mkubwa Julius, aliyekuwa na umri wa miaka 60, alikuwa mwandamani wangu katika upainia. Licha ya umri wetu kupishana sana, tulikuwa na pindi zenye kufurahisha tukiwa pamoja katika huduma. Nilipata hekima nyingi kutokana na mambo aliyojionea maishani. Baada ya muda mfupi, Dorothy akawa painia pia.

WAANGALIZI WA MZUNGUKO WAPENDEZWA NAMI KIBINAFSI

Katika miaka yangu yote ya ujana, wazazi wangu waliwaalika waangalizi wengi wa mzunguko na wake zao wakae pamoja nasi. Wenzi wa ndoa, Jesse na Lynn Cantwell walinisaidia sana. Kwa kiwango fulani, kitia moyo chao kilifanya niamue kuwa painia. Nilipoona jinsi walivyopendezwa nami kibinafsi, nilichochewa kujiwekea malengo ya kiroho. Walipokuwa wakizuru makutaniko jirani, nyakati nyingine walinialika nihubiri pamoja nao. Nilifurahi na kuimarishwa sana!

Baada yao, Bud Miller alikuwa mwangalizi wetu wa mzunguko na alituzuru pamoja na mke wake, Joan. Kufikia wakati huo, nilikuwa na umri wa miaka 18, na nikakabili suala la kujiunga na utumishi wa kijeshi. Mwanzoni, baraza la kuwaandikisha watu jeshini la eneo letu lilitaka nifanye kazi ambayo nilihisi haikupatana na agizo la Yesu la kutounga mkono upande wowote katika mambo ya kisiasa. Pia, nilitaka kuhubiri habari njema ya Ufalme. (Yoh. 15:19) Nilikata rufaa kwa baraza hilo ili nitambuliwe kuwa mhudumu.

 Niliguswa moyo sana Ndugu Miller alipojitolea kuambatana nami nilipoenda mbele ya baraza hilo. Kiasili, alikuwa mchangamfu na jasiri. Nilipata ujasiri kwa kuandamana na mtu wa kiroho kama yeye! Baada ya kunisikiliza, baraza hilo lilinitambua rasmi kuwa mhudumu katika kipindi cha kiangazi cha mwaka 1954. Hilo liliniwezesha kufikia lengo lingine la kiroho.

Nikiwa Mwanabetheli mpya mbele ya gari lililotumiwa shambani

Katika kipindi hicho, nilipata mwaliko wa kutumikia Betheli, huko Staten Island, New York katika Shamba la Watchtower, kama lilivyojulikana wakati huo. Nilikuwa na pendeleo la kutumikia huko kwa miaka mitatu hivi. Nilijionea mambo mengi yenye kutia moyo sana kwa sababu nilikutana na watu wengi wenye hekima na kufanya kazi pamoja nao.

UTUMISHI WA BETHELI

Kwenye kituo cha WBBR pamoja na Ndugu Franz

Shamba lililokuwa katika Staten Island lilitia ndani kituo cha redio cha WBBR. Kituo hicho kiliendeshwa na Mashahidi wa Yehova kuanzia mwaka 1924 hadi 1957. Washiriki 15 hadi 20 pekee wa familia ya Betheli ndio waliopewa mgawo katika shamba hilo. Wengi wetu tulikuwa vijana na hatukuwa na uzoefu mwingi. Lakini tulikuwa na ndugu Eldon Woodworth, aliyekuwa mtiwa mafuta mwenye umri mkubwa. Alikuwa mwenye hekima. Alipendezwa nasi kama watoto wake, na hilo lilituimarisha kiroho. Ilipokuwa vigumu kushughulika na udhaifu wa wengine, Ndugu Woodworth angesema, “Kwa hakika, ni jambo la kupendeza kuona yale ambayo Bwana ametimiza ukifikiria aina ya watu anaotumia.”

Harry Peterson alikuwa mwenye bidii ya pekee katika huduma

Tulikuwa na pendeleo la pekee la kufanya kazi na Ndugu Frederick W. Franz. Hekima na ujuzi wake wenye kina wa Maandiko ulituchochea, na alipendezwa kibinafsi na kila mmoja wetu. Mpishi wetu aliitwa Harry Peterson; ilikuwa rahisi kutumia jina hilo badala ya jina lake halisi, Papargyropoulos. Yeye pia alikuwa mtiwa mafuta mwenye bidii ya pekee katika huduma. Ndugu Peterson alitimiza mgawo wake wa Betheli vizuri lakini hakupuuza kamwe huduma ya shambani. Aliwaachia mamia ya watu magazeti yetu kila mwezi. Alikuwa pia na ujuzi mwingi wa Maandiko, akijibu maswali yetu mengi.

NILIFAIDIKA KUTOKA KWA DADA WENYE HEKIMA

Mazao ya shamba yalitayarishwa katika kiwanda kilichokuwa hapohapo shambani cha kuhifadhi chakula kwenye mikebe. Lita 42,600 hivi za matunda na mboga zilihifadhiwa kwenye mikebe kila mwaka kwa ajili ya matumizi ya familia yote ya Betheli. Nilipokuwa nikifanya kazi huko, nilipata pendeleo la kutumikia pamoja na Etta Huth, ambaye alikuwa dada mwenye hekima sana. Alikuwa na jukumu la kubuni maagizo yaliyotumiwa kuhifadhi  chakula hicho. Katika kipindi cha kuhifadhi mazao kwenye mikebe, dada wa eneo la karibu walikuja kusaidia, na Etta alipanga kazi ambazo wangefanya. Ingawa Etta alikuwa na jukumu muhimu katika kazi hiyo, aliweka mfano mzuri wa kuwaheshimu ndugu waliosimamia mambo katika shamba hilo. Nilimwona kuwa mfano mzuri wa ujitiisho chini ya uongozi wa kitheokrasi.

Nikiwa na Angela na Etta Huth

Angela Romano alikuwa mmoja kati ya dada vijana waliokuja kusaidia kuhifadhi chakula kwenye mikebe. Etta ndiye aliyemzoeza kiroho alipobatizwa. Kwa hiyo, nilipokuwa nikitumikia Betheli, nikakutana na dada huyo mwenye hekima, ambaye amekuwa mwenzi wangu kwa miaka 58. Mimi na Angie tulifunga ndoa Aprili 1958, na tumefurahia mapendeleo mengi ya utumishi pamoja. Kwa miaka hiyo yote, ushikamanifu usioyumba-yumba wa Angie kumwelekea Yehova umefanya ndoa yetu iwe imara. Ninaweza kumtegemea kabisa, licha ya changamoto zozote tunazoweza kukabili.

MGAWO WA UMISHONARI NA KUWA MWANGALIZI WA MZUNGUKO

Majengo ya WBBR yaliyoko Staten Island yalipouzwa mwaka 1957, nilitumikia katika Betheli ya Brooklyn kwa muda mfupi. Kisha, mimi na Angie tukafunga ndoa, hivyo nikatoka Betheli, na kwa miaka mitatu hivi tukatumikia tukiwa mapainia huko Staten Island. Kwa kipindi fulani, niliwafanyia kazi wamiliki wapya wa kituo hicho cha redio waliojiita kwa herufi WPOW.

Mimi na Angie tulikuwa tumeazimia kuishi maisha rahisi ili tuwe tayari kutumikia popote tulipohitajika. Kwa hiyo, mwanzoni mwa 1961, ilikuwa rahisi kwetu kukubali mgawo wa kutumikia tukiwa mapainia wa pekee katika jiji la Falls City, Nebraska. Baada tu ya kufika kwenye mgawo wetu mpya, tulialikwa kuhudhuria Shule ya Huduma ya Ufalme, ambayo wakati huo ilifanywa kwa mwezi mmoja katika jiji la South Lansing, New York. Tulifurahia shule hiyo na tulitazamia kutumia mazoezi tuliyopata tutakaporudi Nebraska. Kwa hiyo, tulishangaa tulipopata mgawo mpya wa kuwa wamishonari nchini Kambodia! Tulijionea mambo mengi yenye kupendeza, tulijifunza lugha mpya, na kula vyakula ambavyo hatukuwahi kula, tukiwa katika nchi hiyo maridadi iliyoko kusini mashariki mwa Asia. Tulikuwa na hamu kubwa ya kueneza habari njema huko.

Hata hivyo, hali ya kisiasa ilibadilika na tukalazimika kuhamia kusini mwa Vietnam. Kwa kuhuzunisha, ndani ya miaka miwili nilipatwa na matatizo makubwa ya kiafya, hivyo tukaombwa kurudi nyumbani. Nilihitaji muda fulani ili nipate nguvu, na mara tu nilipokuwa na nguvu za kutosha, tulirudia utumishi wa wakati wote.

Nikiwa na Angela mwaka 1975, kabla ya mahojiano ya televisheni

Katika Machi 1965, nilipata pendeleo la kutumikia makutaniko nikiwa mwangalizi wa mzunguko. Kwa miaka 33, mimi na Angie tulifurahia kushirikiana nilipokuwa mwangalizi wa mzunguko na wa wilaya, kutia ndani kazi nyingi kabla ya makusanyiko na migawo makusanyikoni. Sikuzote nimekuwa nikitazamia kwa hamu makusanyiko, kwa hiyo nilifurahia kushiriki katika kupanga matukio hayo. Kwa miaka kadhaa tulifanya makusanyiko katika eneo la New York City, na makusanyiko kadhaa yalifanywa katika uwanja wa Yankee.

KURUDI BETHELI NA SHULE ZA KITHEOKRASI

Kama ilivyo kawaida kwa watumishi wengi wa pekee wa wakati wote, mimi na Angie tulipata migawo yenye kusisimua na yenye changamoto mbalimbali.  Kwa mfano, mwaka 1995, niliombwa kufundisha Shule ya Mazoezi ya Kihuduma. Miaka mitatu baadaye, tulialikwa Betheli. Nilifurahi sana kurudi mahali nilipoanza utumishi wa wakati wote wa pekee miaka zaidi ya 40 mapema. Kwa muda fulani, nilifanya kazi katika Idara ya Utumishi na nikiwa mwalimu kwenye shule mbalimbali. Katika mwaka 2007 Baraza Linaloongoza liliweka shule zinazofanyiwa Betheli chini ya Idara ya Shule za Kitheokrasi, na kwa miaka kadhaa nilikuwa na pendeleo la kutumikia nikiwa mwangalizi wa idara hiyo.

Hivi karibuni, tumeona mabadiliko kadhaa makubwa katika shule za kitheokrasi. Shule ya Wazee wa Kutaniko ilianzishwa mwaka 2008. Kwa miaka miwili iliyofuata, wazee zaidi ya 12,000 walipokea elimu katika majengo ya Patterson na Betheli ya Brooklyn. Shule hiyo inaendelea katika sehemu mbalimbali, ikifundishwa na walimu waliozoezwa ambao wanatumikia shambani. Katika 2010 Shule ya Mazoezi ya Kihuduma ilibadilishwa na kuwa Shule ya Biblia ya Ndugu Waseja, na shule mpya ikaanzishwa inayoitwa Shule ya Biblia ya Wenzi wa Ndoa Wakristo.

Kuanzia mwaka wa utumishi wa 2015, shule hizo mbili ziliunganishwa na kuwa Shule ya Waeneza-Injili wa Ufalme. Wale wanaozoezwa wanaweza kuwa wenzi wa ndoa, ndugu au dada waseja. Ndugu na dada ulimwenguni pote walifurahi sana kusikia kwamba shule hiyo itafanywa katika ofisi nyingi za tawi. Inasisimua kuona fursa za kupata elimu ya kitheokrasi zikiongezeka, na ninafurahi sana kwamba nimekutana na wengi ambao wamejitoa ili kupokea mazoezi hayo.

Ninapofikiria maisha yangu kabla ya kubatizwa katika chombo cha kunyweshea wanyama hadi sasa, ninamshukuru Yehova kwa sababu ya watu wenye hekima walionisaidia katika njia ya kweli. Baadhi yao hawakuwa na umri sawa na wangu na walitoka katika utamaduni tofauti. Lakini walikuwa watu wa kiroho. Upendo wao wa kina kwa Yehova ulikuwa wazi kupitia matendo na mtazamo wao. Katika tengenezo lake, kuna ndugu na dada wengi wenye hekima tunaoweza kuwaiga. Nimefanya hivyo na nimefaidika kwelikweli.

Ninafurahia kukutana na wanafunzi kutoka ulimwenguni pote