Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

MNARA WA MLINZI (TOLEO LA FUNZO) MACHI 2017

Mpe Heshima Yule Anayestahili

Mpe Heshima Yule Anayestahili

“Kwake Yule anayeketi juu ya kile kiti cha ufalme na kwa Mwana-Kondoo kuwe na baraka na heshima na utukufu na nguvu milele na milele.”—UFU. 5:13.

NYIMBO: 9, 108

1. Kwa nini watu fulani wanastahili kuheshimiwa, na tutachunguza nini sasa?

KUMHESHIMU mtu ni kumstahi na vilevile kumfikiria kwa njia ya pekee. Tunatarajia kwamba mtu anayestahili heshima na staha lazima awe amefanya jambo fulani au awe na cheo cha pekee kinachofanya aistahili. Kwa hiyo, tunaweza kujiuliza hivi: Tunapaswa kumheshimu nani, na kwa nini anastahili heshima hiyo?

2, 3. (a) Kwa nini Yehova hasa ndiye anayestahili kuheshimiwa? (Tazama picha mwanzoni mwa makala hii.) (b) Kulingana na Ufunuo 5:13, Mwana Kondoo ni nani, na kwa nini anastahili kuheshimiwa?

2 Kama andiko la Ufunuo 5:13 linavyoonyesha, bila shaka “Yule anayeketi juu ya kile kiti cha ufalme na . . . Mwana-Kondoo” wanastahili kuheshimiwa. Sura ya 4 ya kitabu cha Ufunuo inaonyesha sababu moja inayofanya Yehova astahili kuheshimiwa. Viumbe waliokwezwa wa mbinguni wanapaaza sauti zao wakimsifu Yehova, “Yule anayeishi milele na milele.” Wanatangaza hivi: “Unastahili, Ee Yehova, naam, Mungu wetu, kupokea utukufu na heshima na nguvu, kwa sababu uliumba vitu vyote, na kwa sababu ya mapenzi yako vilikuwako navyo vikaumbwa.”—Ufu. 4:9-11.

 3 Mwana Kondoo ni Yesu Kristo, “Mwana-Kondoo wa Mungu ambaye huondolea mbali dhambi ya ulimwengu.” (Yoh. 1:29) Biblia inasema kwamba yeye ni mkuu zaidi kuliko mwanadamu yeyote ambaye ni mfalme au amewahi kuwa mfalme. Inaeleza hivi: “Yeye Mfalme wa wale wanaotawala wakiwa wafalme na Bwana wa wale wanaotawala wakiwa mabwana, yeye peke yake asiyeweza kufa, anayekaa katika nuru isiyoweza kufikiwa, ambaye hakuna hata mmoja kati ya wanadamu amemwona au anaweza kumwona.” (1 Tim. 6:14-16) Kwa kweli, ni mfalme gani mwingine ambaye amewahi kujitolea kufa ili awe fidia kwa ajili ya dhambi zetu? Je, huchochewi kujiunga na maelfu ya viumbe wa roho kutangaza hivi: “Mwana-Kondoo aliyechinjwa anastahili kupokea uwezo na utajiri na hekima na nguvu na heshima na utukufu na baraka?”—Ufu. 5:12.

4. Kwa nini ni lazima tumheshimu Yehova na Kristo?

4 Ni lazima tumheshimu Yehova na Kristo. Hatuwezi kupata uzima wa milele bila kufanya hivyo. Maneno ya Yesu katika Yohana 5:22, 23 yanatusaidia kuona jambo hilo waziwazi: “Baba hamhukumu mtu yeyote hata kidogo, bali amemkabidhi Mwana kazi yote ya kuhukumu, ili wote wapate kumheshimu Mwana kama vile wanavyomheshimu Baba. Yule ambaye hamheshimu Mwana hamheshimu Baba aliyemtuma.”—Soma Zaburi 2:11, 12.

5. Kwa nini tunapaswa kuwaonyesha watu wote heshima na staha kwa kadiri fulani?

5 Wanadamu waliumbwa “kwa mfano wa Mungu.” (Mwa. 1:27) Hivyo, wengi wao huonyesha baadhi ya sifa za Mungu ingawa kwa viwango tofauti-tofauti. Wanadamu wana uwezo wa kuonyeshana upendo, fadhili, na huruma. Kwa kuwa wanadamu wameumbwa wakiwa na dhamiri, wao huzaliwa wakiwa na hisi inayowasaidia kutofautisha mema na mabaya, mambo manyoofu au ya uwongo, au mambo yanayofaa na yasiyofaa, ingawa nyakati fulani hisi hiyo inaweza kuwa imepotoka. (Rom. 2:14, 15) Watu wengi huvutiwa na mambo safi na yanayopendeza. Kwa kawaida, wao hutaka kuishi kwa amani pamoja na wengine. Iwe wanatambua hilo au la, wanaonyesha kwa kiwango fulani utukufu wa Yehova, na kwa sababu hiyo wanastahili heshima na staha kwa kadiri fulani.—Zab. 8:5.

UWE NA USAWAZIKO UNAPOWAHESHIMU WENGINE

6, 7. Mashahidi wa Yehova wanatofautianaje na watu wengi kuhusu kuwaheshimu wanadamu?

6 Tunahitaji kuwa na usawaziko ili tutambue aina ya heshima tutakayowaonyesha wanadamu wengine, na tutafanya hivyo kwa kadiri gani. Wanadamu wengi wasio wakamilifu wameathiriwa sana na roho ya ulimwengu wa Shetani. Hiyo ndiyo sababu watu wana mwelekeo wa kuwaabudu wanaume au wanawake fulani badala ya kuwaonyesha heshima au staha inayofaa. Wanawatukuza viongozi wa kidini au wa kisiasa, wanamichezo, waigizaji mashuhuri, na watu wengine maarufu, na mara nyingi wanawaona kuwa wanadamu wasio wa kawaida. Hivyo, vijana kwa wazee huwaona kuwa mifano ya kuigwa, labda hata kuiga tabia, mavazi, au mwenendo wao.

7 Wakristo wa kweli hujiepusha na maoni kama hayo yaliyopotoka kuhusu kuwaheshimu wanadamu. Kristo ndiye mwanadamu pekee aliyewahi kuishi tunayeweza kumwona kuwa mfano mkamilifu wa kuigwa. (1 Pet. 2:21) Mungu hatafurahi ikiwa tutawaonyesha wanadamu heshima kubwa kuliko wanayostahili. Tunahitaji kuzingatia ukweli huu wa msingi: “Wote wamefanya dhambi na kupungukiwa na utukufu  wa Mungu.” (Rom. 3:23) Kwa kweli, hakuna mwanadamu anayepaswa kuonyeshwa heshima inayoelekea kuhusisha ibada ya sanamu.

8, 9. (a) Mashahidi wa Yehova wana maoni gani kuelekea maofisa wa serikali? (b) Tunapaswa kuwaunga mkono maofisa wa serikali kwa kadiri gani?

8 Ulimwenguni, baadhi ya watu huwa na vyeo mbalimbali. Maofisa wa serikali wanatarajiwa kudumisha amani na utangamano na kutunza mahitaji ya raia. Kufanya hivyo huwafaidi watu wote. Kwa sababu hiyo, mtume Paulo aliwashauri Wakristo wawaone maofisa wa serikali kuwa “mamlaka zilizo kubwa” na wanapaswa kujitiisha kwao. Aliwaagiza hivi: “Wapeni wote haki zao, yeye anayetaka kodi, kodi; . . . yeye anayetaka heshima, heshima hiyo.”—Rom. 13:1, 7.

9 Hivyo basi, Mashahidi wa Yehova huwaheshimu kwa hiari maofisa wa serikali kulingana na desturi ya nchi yao kama inavyotarajiwa. Tunashirikiana nao wanapotimiza majukumu yao. Bila shaka, tunawaheshimu na kuwaunga mkono kwa kuzingatia mipaka iliyowekwa na Maandiko. Hata hivyo, hatuwezi kufikia hatua ya kutomtii Mungu au kuvunja msimamo wetu wa Kikristo wa kutounga mkono upande wowote wa kisiasa.—Soma 1 Petro 2:13-17.

10. Watumishi wa zamani wa Yehova walituwekeaje mfano kwa jinsi walivyoshughulika na maofisa wa serikali?

10 Watumishi wa zamani wa Yehova walituwekea mfano mzuri kwa jinsi walivyoshughulika na maofisa wa serikali. Milki ya Roma ilipowaagiza watu wajiandikishe, Yosefu na Maria walitii. Walisafiri hadi Bethlehemu, licha ya kuwa Maria alikuwa karibu kupata mtoto wake wa kwanza. (Luka 2:1-5) Baadaye, Paulo aliposhtakiwa kuwa amevunja sheria, alijitetea kwa heshima na kumwonyesha staha inayofaa Mfalme Herode Agripa na Festo, aliyekuwa gavana wa wilaya ya Yudea chini ya utawala wa Roma.—Mdo. 25:1-12; 26:1-3.

11, 12. (a) Kuna tofauti gani kati ya heshima tunayowaonyesha maofisa wa serikali na tunayowaonyesha viongozi wa kidini? (b) Kulikuwa na matokeo gani mazuri Shahidi kutoka Austria alipomwonyesha mwanasiasa fulani heshima?

11 Hata hivyo, Mashahidi wa Yehova huepuka kuwaonyesha viongozi wa kidini heshima ya pekee, ingawa huenda viongozi hao wakatarajia kutendewa hivyo. Dini za uwongo hazimwakilishi Mungu kwa njia inayofaa, nazo hupotosha mafundisho ya Neno lake. Kwa hiyo, tunawaonyesha viongozi wa kidini heshima kama wanadamu wengine, lakini hatuwaonyeshi heshima ya pekee. Tunakumbuka kwamba Yesu aliwaita viongozi wa kidini wa siku zake wanafiki na viongozi vipofu. (Mt. 23:23, 24) Lakini tunapowaonyesha maofisa wa serikali heshima na staha inayofaa, nyakati nyingine tunaweza kupata matokeo mazuri ambayo hatukutarajia.

12 Leopold Engleitner alikuwa Shahidi mwenye bidii kutoka Austria ambaye alikamatwa na Wanazi na kusafirishwa kwa gari-moshi hadi kambi ya mateso ya Buchenwald. Mwanasheria Heinrich Gleissner alikuwa mfungwa aliyesafirishwa kwa gari-moshi hilohilo. Mwanzoni alikuwa mwanasiasa nchini Austria. Hata hivyo, alikuwa amekosana na Wanazi. Walipokuwa wakisafirishwa kwenda kambini, kwa heshima Ndugu Engleitner alimweleza Gleissner imani yake, ambaye alisikiliza kwa makini. Baada ya Vita vya Pili vya Ulimwengu, mara nyingi Gleissner alitumia mamlaka yake kuwasaidia Mashahidi nchini Austria. Huenda ukakumbuka mifano mingine ya matokeo mazuri ambayo Mashahidi wamepata kwa kuwaonyesha maofisa wa serikali heshima inayofaa, na kuwapa staha ambayo Biblia inasema Wakristo wanapaswa kuwapa.

 WENGINE WANAOSTAHILI HESHIMA

13. Ni nani hasa wanaostahili kuheshimiwa na kustahiwa, na kwa nini?

13 Kwa hakika, wale ambao katika imani ni jamaa zetu wanastahili kuonyeshwa heshima na staha. Wazee makutanikoni hasa wanastahili heshima hiyo. (Soma 1 Timotheo 5:17.) Tunawaheshimu ndugu hao haidhuru elimu waliyo nayo, cheo chao katika jamii, hali yao ya kiuchumi, au nchi wanayotoka. Biblia inawaita “zawadi katika wanadamu,” na wanatimiza sehemu muhimu katika mpango wa Mungu wa kutunza mahitaji ya watu wake. (Efe. 4:8) Fikiria pia kuhusu wazee wa kutaniko, waangalizi wa mzunguko, washiriki wa Halmashauri za Tawi, na washiriki wa Baraza Linaloongoza. Ndugu na dada zetu wa karne ya kwanza waliwaheshimu sana wale waliowekwa rasmi kuongoza mambo, nasi tunafanya vivyo hivyo pia. Hatuwatukuzi wawakilishi wa kutaniko la Kikristo wanaojulikana sana au kujiendesha kana kwamba wao ni malaika tunapokuwa pamoja nao. Hata hivyo, tunawaheshimu na kuwastahi ndugu hao kwa kazi ngumu wanayofanya na unyenyekevu wao.—Soma 2 Wakorintho 1:24; Ufunuo 19:10.

14, 15. Kuna tofauti gani kati ya wachungaji wa kweli wa Kikristo na wale wanaodai kuwa wachungaji?

14 Wazee hao hujulikana kuwa wachungaji wa kiroho wenye sifa ya unyenyekevu. Kwa kuwa ni wanyenyekevu, wao hukataa kutendewa kama watu maarufu. Wanapofanya hivyo, wanatofautiana na viongozi wengi wa kidini wa sasa na wale wa karne ya kwanza ambao Yesu alisema hivi kuwahusu: “Wao hupenda mahali penye kuonekana zaidi kwenye milo ya jioni na viti vya mbele katika masinagogi, na salamu katika masoko.”—Mt. 23:6, 7.

15 Wachungaji wa kweli wa Kikristo hutii kwa unyenyekevu maneno haya ya Yesu: “Msiitwe Rabi, kwa maana mwalimu wenu ni mmoja, lakini ninyi nyote ni ndugu. Zaidi ya hayo, msimwite mtu yeyote baba yenu duniani, kwa maana Baba yenu ni mmoja, Yule wa mbinguni. Wala msiitwe ‘viongozi,’ kwa maana Kiongozi wenu ni mmoja, Kristo. Lakini aliye mkubwa zaidi katikati yenu lazima awe mhudumu wenu. Yeyote yule anayejiinua atanyenyekezwa, na yeyote yule anayejinyenyekeza atainuliwa.” (Mt. 23:8-12) Kwa hiyo, unaweza kuelewa kwa nini wazee wa kutaniko ulimwenguni pote wanapendwa, wanaheshimiwa, na kustahiwa na Mashahidi wenzao.

Wazee wanapendwa, wanaheshimiwa, na kustahiwa wanapotumikia kwa unyenyekevu (Tazama fungu la 13 hadi 15)

16. Kwa nini unapaswa kuendelea kujitahidi kuelewa na kutumia kanuni za Biblia kuhusu kuonyesha heshima?

16 Ni kweli kwamba huenda ikachukua muda ili tusitawishe usawaziko kuhusu jinsi tutakavyoonyesha heshima na watu  tutakaowaonyesha heshima hiyo. Hali ilikuwa hivyo kwa Wakristo wa mapema. (Mdo. 10:22-26; 3 Yoh. 9, 10) Lakini tutapata matokeo mazuri tukitumia kanuni za Biblia kuhusu kuonyesha heshima. Kusitawisha usawaziko unaofaa huleta faida nyingi.

FAIDA ZA KUONYESHA HESHIMA INAYOFAA

17. Ni zipi baadhi ya faida za kuwaheshimu wale walio na mamlaka?

17 Tunapowaonyesha heshima na staha wale walio na mamlaka, kuna uwezekano mkubwa kwamba watatetea haki yetu ya kuendelea kuhubiri bila usumbufu. Mara nyingi, matokeo huwa kwamba watu wanakuwa na maoni yanayofaa kuhusu kazi yetu. Miaka kadhaa iliyopita, Birgit, painia mmoja kutoka Ujerumani, alihudhuria sherehe ya kuhitimu shule ya binti yake. Walimu walimwambia Birgit kwamba kwa miaka mingi wamefurahia kuwafundisha watoto wa Mashahidi. Walisema kuwa wangesikitika ikiwa hawangekuwa na watoto wa Mashahidi katika shule yao. Birgit alieleza hivi: “Watoto wetu wamefundishwa kufuata viwango vya Mungu kuhusu mwenendo, na hilo linatia ndani kuwaheshimu na kuwastahi walimu.” Mwalimu mmoja alisema hivi: “Ikiwa watoto wote wangekuwa kama watoto wa Mashahidi, tungefurahia sana kazi ya kufundisha.” Majuma kadhaa baadaye, mwalimu mmoja alihudhuria kusanyiko lililofanywa huko Leipzig.

18, 19. Kwa nini kuwaonyesha wazee heshima inayofaa ni jambo zito?

18 Bila shaka, kuwaonyesha wazee wa kutaniko heshima inayofaa kunapaswa kuongozwa na kanuni ya Mungu iliyo kamilifu na ya hekima inayopatikana katika Neno lake. (Soma Waebrania 13:7, 17.) Tunaweza na tunapaswa kuwapongeza kwa kazi yao ngumu na kujitahidi kuunga mkono miongozo wanayotoa. Tunapofanya hivyo, tunawachochea kuendelea kutimiza majukumu yao kwa shangwe. Lakini hilo halimaanishi kwamba tuige jinsi mzee fulani “maarufu” anavyovaa na kujipamba, anavyotoa hotuba, au njia yake ya kuzungumza. Tukifanya hivyo, tunaweza kuwafanya wengine wawe na maoni yasiyofaa kumhusu. Tunapaswa kukumbuka kwamba yeye pia ni mwanadamu asiye mkamilifu. Mfano tunaopaswa kufuata na kuiga ni wa Kristo.

19 Tunawasaidia wazee tunapowapa heshima na staha inayofaa badala ya kuwatendea kama watu mashuhuri. Tukifanya hivyo, itakuwa rahisi kwao kuepuka kiburi, kujiona kuwa bora, au waadilifu kupita kiasi.

20. Tunafaidikaje tunapowaonyesha wengine heshima?

20 Kuwaonyesha heshima wale wanaostahili hutusaidia tukiwa mtu mmoja-mmoja kutojifikiria kupita kiasi. Kufanya hivyo kutatusaidia kuepuka kujiona kuwa bora kuliko wengine tunapopata pendeleo fulani. Pia, kunatusaidia kwenda sambamba na tengenezo la Yehova, ambalo haliwapi wanadamu heshima kupita kiasi, iwe ni waamini au wasio waamini. Zaidi ya hilo, ni jambo la hekima kufanya hivyo, kwa kuwa tutaepuka kukwazika ikiwa mwanadamu fulani ambaye tulimheshimu anatuvunja moyo.

21. Eleza faida kubwa zaidi ya kuwaonyesha heshima inayofaa wale wanaostahili.

21 Faida kubwa zaidi ya kuwapa heshima inayofaa wale wanaostahili ni kwamba kwa kufanya hivyo tunamfurahisha Mungu. Tunatenda kulingana na mapenzi yake, na hivyo kudumisha utimilifu wetu kwake. Hilo huchangia katika kumjibu yeyote anayemdhihaki. (Met 27:11) Ulimwengu umejaa watu walio na maoni yalipotoka kuhusu kuonyesha heshima. Tunathamini sana kujua jinsi tunavyoweza kuwaonyesha wengine heshima katika njia inayomfurahisha Yehova.