Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Mnara wa Mlinzi—Toleo la Funzo  |  Julai 2017

Maswali Kutoka kwa Wasomaji

Maswali Kutoka kwa Wasomaji

Je, ingefaa Mkristo kuwa na silaha kama vile bastola au bunduki ili kujilinda na wanadamu wengine?

Ingawa Wakristo huchukua hatua zinazofaa ili kujilinda, wanafanya hivyo kulingana na kanuni za Biblia. Kanuni hizo huwashauri wasitumie silaha kama vile bastola, bunduki, au silaha nyingine ili kujilinda na wanadamu wengine. Chunguza mambo yafuatayo yanayoweza kutusaidia kufanya uamuzi unaofaa:

Machoni pa Yehova, uhai, hasa uhai wa mwanadamu ni mtakatifu. Mtunga zaburi Daudi alijua kwamba Yehova ndiye “chemchemi ya uzima.” (Zab. 36:9) Kwa hiyo, ikiwa Mkristo ataamua kuchukua hatua zinazofaa ili kujilinda au kulinda mali yake, atafanya yote awezayo ili kuepuka kuua mtu au kuwa na hatia ya damu.​​—Kum. 22:8; Zab. 51:14.

Ingawa kuna vitu vingi vinavyoweza kusababisha hatia ya damu, kuwa na bunduki kunafanya iwe rahisi zaidi kuua mtu, iwe ni kwa kukusudia au la. * Isitoshe, jambazi ambaye huenda tayari ana wasiwasi anapoona bunduki au silaha kama hiyo, ni rahisi zaidi kwa hali kuwa mbaya na kifo kutokea.

Yesu alipowaambia wafuasi wake wabebe panga katika usiku wake wa mwisho duniani, hakuwa akizungumzia kujilinda. (Luka 22:​36, 38) Badala yake, aliwaambia wabebe panga ili awafundishe kwamba hawapaswi kutenda kwa jeuri, hata wanapokabiliwa na umati wenye silaha. (Luka 22:52) Baada ya Petro kutumia upanga wake kumpiga mtumwa wa kuhani mkuu, Yesu alimwamuru hivi: “Rudisha upanga wako mahali pake.” Kisha Yesu akataja ukweli huu wa msingi, kanuni inayowaongoza wafuasi wake hadi leo: “Wale wote wanaouchukua upanga wataangamia kwa upanga.”​​—Mt. 26:​51, 52.

Kama andiko la Mika 4:3 linavyosema, watu wa Mungu “[wanafua] panga zao ziwe majembe na mikuki yao iwe miundu.” Sifa hiyo inayowatambulisha Wakristo wa kweli inapatana na himizo hili la mtume Paulo lililoongozwa na roho: “Msimlipe yeyote uovu kwa uovu. . . . Ikiwezekana, kwa kadiri inavyowategemea ninyi, iweni wenye kufanya amani na watu wote.” (Rom. 12:​17, 18) Licha ya hatari ambazo Paulo alikabili, ambazo zilitia ndani “hatari za kutokana na wanyang’anyi,” aliishi kulingana na maneno yake, na hakutanguliza usalama wake binafsi badala ya kanuni za Kimaandiko. (2 Kor. 11:26) Badala yake, alimtegemea Mungu na hekima inayopatikana katika Neno Lake, hekima ambayo “ni bora kuliko silaha za vita.”​​—Mhu. 9:​18.

Wakristo huona uhai kuwa wenye thamani kuliko vitu vya kimwili. “Uzima [wa mtu] hautokani na vitu alivyo navyo.” (Luka 12:15) Hivyo, ikiwa ulimi wenye upole unashindwa kumzuia jambazi mwenye silaha, Wakristo wenye hekima wanatii kanuni iliyo katika maneno haya ya Yesu: “Msimpinge yeye aliye mwovu.” Hilo linamaanisha kwamba huenda ikatulazimu kumpa mavazi yetu ya ndani na ya nje kwa njia ya mfano. (Mt. 5:​39, 40; Luka 6:​29) * Bila shaka, njia bora zaidi ya kujilinda ni kuepuka hali hiyo. Tukiepuka “kujionyesha mali [yetu] maishani” na tukijulikana na majirani wetu kuwa Mashahidi wa Yehova wanaopenda amani, tunaweza kuepuka kuwa shabaha ya majambazi wenye jeuri.​​—1 Yoh. 2:​16; Met. 18:10.

Wakristo huheshimu dhamiri za wengine. (Rom. 14:21) Ikiwa ingejulikana kwamba mshiriki wa kutaniko anamiliki bunduki ili kujilinda na wanadamu wengine, huenda baadhi ya waabudu wenzake wakashtuka au hata kukwazika. Upendo unatuchochea kutanguliza mapendezi ya wengine badala ya mapendezi yetu, hata ikiwa hilo linamaanisha kutofanya jambo ambalo tuna haki ya kisheria kufanya.​​—1 Kor. 10:​32, 33; 13:​4, 5.

Wakristo wanajitahidi kuwa mfano mzuri. (2 Kor. 4:2; 1 Pet. 5:​2, 3) Baada ya kupewa shauri la Kimaandiko, Mkristo anayeendelea kuwa na bunduki kwa kusudi la kujilinda na wanadamu wengine hataonwa kuwa mfano mzuri. Kwa hiyo, hangestahili kupata majukumu au mapendeleo ya pekee kutanikoni. Kanuni hiyohiyo inatumika kwa Mkristo anayeendelea kubeba silaha ikiwa sehemu ya kazi yake. Ni bora hata zaidi kutafuta kazi nyingine! *

Bila shaka, jinsi ambavyo Mkristo anachagua kujilinda, kulinda familia, au kulinda mali yake ni jambo la kibinafsi, kama ilivyo na kuchagua kazi atakayofanya. Hata hivyo, kanuni za Biblia zinaonyesha hekima na upendo wa Yehova kutuelekea. Kwa sababu ya kuheshimu kanuni hizo, Wakristo wakomavu kiroho watachagua kutokuwa na bunduki kwa kusudi la kujilinda na wanadamu wengine. Wanajua kwamba wale wanaomtegemea Mungu kwa kuishi kulingana na kanuni za Biblia wanapata usalama wa kweli na wa kudumu.​—Zab. 97:10; Met. 1:​33; 2:​6, 7.

Wakati wa dhiki kuu, Wakristo watamtegemea Yehova badala ya kujaribu kujilinda

^ fu. 3 Mkristo anaweza kuamua kumiliki bunduki kwa kusudi la kuwinda ili apate chakula au kujilinda dhidi ya wanyama wa mwituni. Hata hivyo, wakati ambapo silaha hizo hazitumiwi, inafaa zisiwe na risasi, au hata zitenganishwe sehemu-sehemu, na kufungiwa mahali salama. Katika nchi ambazo sheria haiwaruhusu watu kumiliki bunduki au bastola, au kuna vizuizi vya kumiliki silaha hizo, au serikali inadhibiti umiliki wake, Wakristo hutii sheria hizo.​​—Rom. 13:1.

^ fu. 2 Kuhusiana na kujilinda na ubakaji, tazama makala “Jinsi ya Kukinza Kunajisiwa” katika gazeti Amkeni! la Machi 8, 1993.

^ fu. 4 Habari zaidi kuhusu suala la kukubali ajira inayohusisha kubeba silaha inapatikana katika gazeti Mnara wa Mlinzi la Novemba 1, 2005, uku. 31; na Desemba 15, 1983, uku. 19-​20.