Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

MNARA WA MLINZI (TOLEO LA FUNZO) FEBRUARI 2017

Ni Nani Anayewaongoza Watu wa Mungu Leo?

Ni Nani Anayewaongoza Watu wa Mungu Leo?

“Wakumbukeni wale ambao wanaongoza katikati yenu.”EBR. 13:7.

NYIMBO: 125, 43

1, 2. Baada ya Yesu kwenda mbinguni, huenda mitume wake walijiuliza nini?

MITUME wa Yesu walisimama kwenye Mlima wa Mizeituni wakitazama angani. Walikuwa wametoka tu kumwona bwana na rafiki yao, Yesu, akipaa na kufunikwa na wingu. (Mdo. 1:9, 10) Kwa miaka miwili hivi, Yesu alikuwa amewafundisha, amewatia moyo, na kuwaongoza. Sasa alikuwa ameondoka. Wangefanya nini?

2 Yesu alikuwa amewapa wafuasi wake mgawo huu: “Mtakuwa mashahidi wangu katika Yerusalemu na pia katika Yudea yote na Samaria na mpaka sehemu ya mbali zaidi ya dunia.” (Mdo. 1:8) Wangewezaje kutimiza mgawo huo? Ni kweli kwamba Yesu alikuwa amewahakikishia kuwa baada ya muda mfupi wangepokea roho takatifu. (Mdo. 1:5) Hata hivyo, kampeni ya kuhubiri katika mataifa yote ingehitaji kuelekezwa na kufanywa kwa utaratibu. Ili kuwaelekeza na kuwapanga watu wake katika nyakati za kale, Yehova alitumia wawakilishi wanaoonekana. Hivyo, huenda mitume walijiuliza hivi, ‘Je, sasa Yehova atachagua kiongozi mwingine?’

3. (a) Baada ya Yesu kwenda mbinguni, mitume waaminifu wa Yesu walifanya uamuzi gani muhimu? (b) Tutachunguza nini katika makala hii?

 3 Majuma mawili hivi baadaye, wanafunzi wa Yesu waliyachunguza Maandiko, wakasali ili kupata mwongozo wa Mungu, na kumchagua Mathia achukue mahali pa Yuda Iskariote akiwa mtume wa 12. (Mdo. 1:15-26) Kwa nini uamuzi huo ulikuwa muhimu sana kwao na kwa Yehova? Mathia alitimiza sehemu muhimu katika tengenezo. * Yesu hakuwachagua mitume wake waandamane naye tu katika huduma yake, bali ili watimize jukumu muhimu kati ya watu wa Mungu. Lilikuwa jukumu gani, na Yehova kupitia Yesu aliwasaidiaje kutimiza jukumu hilo? Kuna mpango gani unaofanana na huo ulio kati ya watu wa Mungu leo? Na tunawezaje ‘kuwakumbuka wale ambao wanaongoza’ katikati yetu, hasa wale ambao ni “mtumwa mwaminifu na mwenye busara”?Ebr. 13:7; Mt. 24:45.

BARAZA LINALOONEKANA CHINI YA KIONGOZI ASIYEONEKANA

4. Mitume na wazee wengine waliokuwa Yerusalemu walitimiza jukumu gani katika karne ya kwanza?

4 Katika Pentekoste 33 W.K., mitume walianza kuongoza mambo katika kutaniko la Kikristo. Katika pindi hiyo, “Petro [alisimama] pamoja na wale kumi na mmoja” na kuwatangazia umati mkubwa wa Wayahudi na wageuzwa-imani kweli zinazookoa uhai. (Mdo. 2:14, 15) Wengi kati yao wakawa waamini. Baada ya hapo, Wakristo hao wapya “wakaendelea kujitoa wenyewe kwa fundisho la mitume.” (Mdo. 2:42) Mitume walishughulikia masuala ya kifedha ya kutaniko. (Mdo. 4:34, 35) Walitunza mahitaji ya kiroho ya watu wa Mungu kama maneno yafuatayo yanavyoonyesha: “Tutajitoa kwa sala na kwa huduma ya neno.” (Mdo. 6:4) Na wakawapa Wakristo wazoefu migawo ya kuendeleza kazi ya kuhubiri katika maeneo mapya. (Mdo. 8:14, 15) Baada ya muda, wazee wengine watiwa mafuta wakajiunga na mitume kushughulikia mambo katika makutaniko. Wakiwa baraza linaloongoza, walitoa mwongozo katika makutaniko yote.Mdo. 15:2.

5, 6. (a) Roho takatifu ililitia nguvu baraza linaloongoza jinsi gani? (Tazama picha mwanzoni mwa makala hii.) (b) Malaika walilisaidiaje baraza linaloongoza? (c) Neno la Mungu liliongozaje baraza linaloongoza?

5 Wakristo wa karne ya kwanza walitambua kwamba baraza linaloongoza liliongozwa na Yehova Mungu kupitia Kiongozi wao, Yesu. Wangewezaje kuwa na uhakika kuhusu jambo hilo? Kwanza, roho takatifu ililitia nguvu baraza linaloongoza. (Yoh. 16:13) Ingawa roho takatifu ilimiminwa juu ya Wakristo wote watiwa mafuta, iliwawezesha hasa mitume na wazee wengine huko Yerusalemu kutimiza jukumu lao wakiwa waangalizi. Kwa mfano, katika mwaka 49 W.K., roho takatifu iliongoza baraza linaloongoza kufanya uamuzi kuhusu tohara. Makutaniko yalifuata mwongozo wao na “yakaendelea kufanywa imara katika imani na kuongezeka hesabu siku baada ya siku.” (Mdo. 16:4, 5) Barua iliyokuwa na uamuzi huo ilifunua pia kwamba baraza linaloongoza lilionyesha sifa za tunda la roho, kutia ndani upendo na imani.Mdo. 15:11, 25-29; Gal. 5:22, 23.

6 Pili, malaika walilisaidia baraza linaloongoza. Kabla Kornelio, mtu wa kwanza wa Mataifa asiyetahiriwa hajabatizwa na kuwa Mkristo, malaika alimwongoza amwite mtume Petro. Baada ya Petro kumhubiria Kornelio na watu wa familia yake, roho takatifu ilimiminwa juu yao ijapokuwa wanaume hawakuwa  wametahiriwa. Hilo liliwachochea mitume na ndugu wengine wajitiishe kwa mapenzi ya Mungu na kuwakubali watu wa Mataifa wasiotahiriwa ndani ya kutaniko la Kikristo. (Mdo. 11:13-18) Isitoshe, malaika waliendeleza kwa bidii na kuharakisha kazi ya kuhubiri ambayo baraza linaloongoza ilikuwa ikisimamia. (Mdo. 5:19, 20) Tatu, Neno la Mungu liliongoza baraza linaloongoza. Iwe walikuwa wanatatua masuala kuhusu mafundisho au walikuwa wanatoa mwongozo wa kitengenezo, wazee hao waliotiwa mafuta kwa roho waliongozwa na Maandiko.Mdo. 1:20-22; 15:15-20.

7. Kwa nini tunaweza kusema kwamba Yesu aliwaongoza Wakristo wa karne ya kwanza?

7 Ijapokuwa walikuwa na mamlaka katika kutaniko la karne ya kwanza, washiriki wa baraza linaloongoza walikiri kwamba Yesu ndiye aliyekuwa Kiongozi wao. Mtume Paulo aliandika kwamba Kristo “alitoa wengine kuwa mitume.” Pia, aliandika hivi: “Na tukue kwa upendo katika mambo yote ndani yake yeye aliye kichwa, Kristo.” (Efe. 4:11, 15) Badala ya kujiita kwa jina la mtume fulani mashuhuri, “wanafunzi kwa uongozi wa kimungu waliitwa Wakristo.” (Mdo. 11:26) Ni kweli kwamba Paulo alikiri kuwa ni muhimu ‘kuyashika sana mapokeo,’ au mazoea yenye msingi wa Kimaandiko yaliyotolewa na mitume na wanaume wengine walioongoza. Hata hivyo, aliandika hivi pia: “Lakini nataka mjue kwamba kichwa cha kila mwanamume [kutia ndani kila mshiriki wa baraza linaloongoza] ni Kristo; . . . nacho kichwa cha Kristo ni Mungu.” (1 Kor. 11:2, 3) Naam, akiwa chini ya Kichwa chake, Yehova Mungu, Kristo Yesu asiyeonekana na aliyetukuzwa alikuwa akiongoza kutaniko.

“HII SI KAZI YA MWANADAMU”

8, 9. Kuanzia mwaka 1870, Ndugu Russell alitimiza jukumu gani muhimu?

8 Kuanzia mwaka 1870, Charles Taze Russell na baadhi ya washiriki wenzake waliazimia kurudisha upya ibada ya kweli ya Kikristo. Ili kuwasaidia kusambaza kweli za Biblia katika lugha mbalimbali, shirika la Zion’s Watch Tower Tract Society lilianzishwa kisheria mnamo 1884, Ndugu Russell akiwa msimamizi. * Alijifunza Biblia kwa bidii na aliifahamu vizuri, naye alifunua bila woga mafundisho ya uwongo kama vile Utatu na kutokufa kwa nafsi. Alitambua kwamba Kristo angerudi bila kuonekana na kuwa “nyakati zilizowekwa za mataifa” zingeisha mnamo 1914. (Luka 21:24) Ndugu Russell alitumia muda, nguvu, na pesa zake kwa ukarimu ili kushiriki kweli hizo na wengine. Ni wazi kwamba katika wakati huo muhimu, Ndugu Russell alitumiwa na Yehova na pia kichwa cha kutaniko.

9 Ndugu Russell hakutaka kutukuzwa na wanadamu. Katika mwaka 1896, aliandika hivi: “Hatujitafutii sifa wala heshima kwa sababu ya habari tunazoandika; wala hatutaki kuitwa Viongozi au Marabi. Wala hatutaki kwamba kikundi chochote cha kidini kiitwe kwa jina letu.” Baadaye alisema hivi: “Hii si kazi ya mwanadamu.”

10. (a) Yesu alimweka rasmi “mtumwa mwaminifu na mwenye busara” lini? (b) Eleza jinsi Baraza Linaloongoza limetofautishwa hatua kwa hatua na shirika la Watch Tower Society.

10 Miaka mitatu baada ya kifo cha Ndugu Russell katika 1919, Yesu alimweka rasmi “mtumwa mwaminifu na mwenye busara.” Kwa kusudi gani? Ili kuwapa watumishi wake wa nyumbani “chakula chao kwa wakati unaofaa.” (Mt. 24:45) Hata katika miaka hiyo ya mapema, kikundi kidogo cha watiwa wafuta waliotumikia katika makao makuu huko Brooklyn, New York, walitayarisha na kuwasambazia wafuasi wa Yesu chakula cha kiroho. Maneno “baraza linaloongoza”  yalianza kuonekana katika machapisho yetu katika miaka ya 1940, wakati ambapo ilieleweka kuwa yanahusiana kwa ukaribu na shirika la Watch Tower Bible and Tract Society. Hata hivyo, shirika la Watch Tower Society pamoja na wasimamizi wake lilitofautishwa na Baraza Linaloongoza katika 1971, kwa kuwa lilikuwa shirika la kisheria bali si la Kimaandiko. Kuanzia wakati huo, Baraza Linaloongoza lilihusisha ndugu watiwa mafuta ambao hawakuwa wasimamizi wa shirika hilo. Katika miaka ya karibuni, ndugu wenye madaraka wa “kondoo wengine” wametumika wakiwa wasimamizi wa shirika hilo la kisheria na mashirika mengine yanayotumiwa na watu wa Mungu, na hivyo kuwapa nafasi washiriki wa Baraza Linaloongoza kukazia fikira kuandaa mwongozo na mwelekezo wa kiroho. (Yoh. 10:16; Mdo. 6:4) Toleo la Julai 15, 2013 la Mnara wa Mlinzi, lilieleza kwamba “mtumwa mwaminifu na mwenye busara” ni kikundi kidogo cha watiwa mafuta ambao ndio Baraza Linaloongoza.

Baraza Linaloongoza katika miaka ya 1950

11. Baraza Linaloongoza hufanya kazi jinsi gani?

11 Washiriki wa Baraza Linaloongoza hufanya maamuzi muhimu wakiwa pamoja. Jinsi gani? Washiriki hao hukutana kila juma, na kwa kufanya hivyo wao huwasiliana kwa ukaribu na kudumisha umoja. (Met. 20:18) Kila mwaka, washiriki wa Baraza Linaloongoza hupokezana daraka la kuwa mwenyekiti katika mikutano hiyo, kwa kuwa hakuna mshiriki anayeonwa kuwa muhimu kuliko wengine. (1 Pet. 5:1) Katika halmashauri zote sita za Baraza Linaloongoza, daraka la kuwa mwenyekiti hupokezanwa kwa njia hiyohiyo. Na kila mshiriki wa baraza hilo hujiona kuwa mmoja wa “watumishi . . . wa nyumbani,” anayelishwa na mtumwa mwaminifu na aliye chini ya uangalizi wake, bali si kama kiongozi wa ndugu zake.

Tangu alipowekwa rasmi mwaka 1919, mtumwa mwaminifu amewaandalia watu wa Mungu chakula cha kiroho (Tazama fungu la 10 na 11)

“NI NANI KWA KWELI MTUMWA MWAMINIFU NA MWENYE BUSARA?”

12. Kwa kuwa Baraza Linaloongoza halijavuviwa na roho ya Mungu wala washiriki wake si wakamilifu, ni maswali gani yanayozuka?

12 Baraza Linaloongoza halijavuviwa na roho ya Mungu wala washiriki wake si wakamilifu. Kwa hiyo, linaweza kukosea inapohusu mafundisho au miongozo fulani ya kitengenezo. Kwa kweli, Fahirisi inatia ndani kichwa “Ufafanuzi wa Mafundisho,” chenye orodha ya mabadiliko yanayohusu uelewaji wetu wa Maandiko tangu mwaka 1870. Bila shaka, Yesu hakutuambia kwamba mtumwa wake mwaminifu angeandaa chakula kikamilifu cha kiroho. Kwa hiyo, tunaweza kujibuje swali hili la Yesu: “Ni nani kwa kweli mtumwa mwaminifu na mwenye busara?” (Mt. 24:45) Kuna uthibitisho gani unaoonyesha kwamba Baraza Linaloongoza linatimiza jukumu hilo? Ili kujibu swali hilo, acheni tuchunguze mambo matatu yaliyoongoza baraza linaloongoza la karne ya kwanza.

13. Roho takatifu imesaidiaje Baraza Linaloongoza?

13 Uthibitisho wa roho takatifu. Roho takatifu imelisaidia Baraza Linaloongoza kufahamu kweli za Maandiko ambazo hazikueleweka mwanzoni. Kwa mfano, fikiria orodha ya ufafanuzi wa mafundisho iliyotajwa katika fungu lililotangulia. Kwa kweli, hakuna mwanadamu anayepaswa kusifiwa kwa kuvumbua na kueleza “mambo [hayo] mazito ya Mungu”! (Soma 1 Wakorintho 2:10.) Baraza Linaloongoza linaunga mkono maneno ya mtume Paulo, aliyeandika hivi: “Mambo hayo tunayasema pia, si kwa maneno yanayofundishwa kwa hekima ya binadamu, bali kwa yale yanayofundishwa kwa roho.” (1 Kor. 2:13) Baada ya karne nyingi za uasi imani na giza la kiroho, ni wazi kwamba roho takatifu pekee ndiyo imechangia ongezeko la haraka la uelewaji wa kiroho tangu 1919.

14. Kulingana na Ufunuo 14:6, 7, malaika wanawasaidiaje watu wa Mungu leo?

 14 Uthibitisho wa msaada wa malaika. Baraza Linaloongoza lina jukumu kubwa la kusimamia kazi inayofanywa katika mataifa yote ya kuhubiri ambayo inahusisha wahubiri zaidi ya milioni nane. Kwa nini kazi hiyo imefanikiwa sana? Sababu moja ni kwamba malaika wanahusika. (Soma Ufunuo 14:6, 7.) Katika visa vingi, wahubiri wamewatembelea watu ambao walikuwa wametoka tu kusali wapate msaada! * Vilevile kumekuwa na ukuzi wa kazi ya kuhubiri na kufanya wanafunzi licha ya upinzani katika nchi fulani kwa sababu ya msaada unaopita uwezo wa kibinadamu.

15. Kuna tofauti gani kati ya Baraza Linaloongoza na viongozi wa dini zinazodai kuwa za Kikristo? Toa mfano.

15 Kutegemea Neno la Mungu. (Soma Yohana 17:17.) Fikiria kilichotukia mnamo 1973. Toleo la Mnara wa Mlinzi la Juni 1 liliuliza swali hili: “Je! watu ambao hawajaacha mazoea yao ya kutumia tumbako wanastahili kubatizwa?” Jibu lilikuwa: “Ushuhuda wa Maandiko unasaidia kujua kwamba hawastahili.” Baada ya kunukuu maandiko kadhaa yanayohusu jambo hilo, gazeti hilo lilieleza kwa nini mvutaji sigara asiyetubu anapaswa kutengwa na ushirika. (1 Kor. 5:7; 2 Kor. 7:1) Gazeti hilo lilisema hivi: “Hii haionyeshi kwamba tunajaribu kutenda kwa namna ya kuhukumu. Kwa kweli ukali unatoka kwa Mungu, anayejisemea mwenyewe katika Neno lake lililoandikwa.” Je, kuna  tengenezo lingine lolote la kidini ambalo liko tayari kutegemea kikamili Neno la Mungu, hata wakati ambapo ni vigumu sana kwa baadhi ya washiriki wake kufanya hivyo? Kitabu cha karibuni cha kidini nchini Marekani kilisema hivi: “Viongozi wa Kikristo wamekuwa wakirekebisha mafundisho yao ili yapatane na imani na maoni yanayopendwa zaidi na washiriki wake na yanayokubalika na idadi kubwa ya watu katika jamii.” Kwa kuwa washiriki wa Baraza Linaloongoza wanaruhusu Neno la Mungu liongoze maamuzi yao bali si maoni yanayopendwa na watu wengi, basi ni wazi kwamba Mungu ndiye anayewaongoza watu wake leo.

“WAKUMBUKENI WALE AMBAO WANAONGOZA”

16. Taja njia moja tunayoweza kuwakumbuka washiriki wa Baraza Linaloongoza.

16 Soma Waebrania 13:7. Neno linalotafsiriwa ‘kukumbuka’ linaweza pia kutafsiriwa ‘kutaja.’ Hivyo, njia moja unayoweza “[kuwakumbuka] wale ambao wanaongoza” ni kwa kuwataja washiriki wa Baraza Linaloongoza katika sala. (Efe. 6:18) Fikiria kuhusu jukumu lao la kusambaza chakula cha kiroho, kusimamia kazi ya kuhubiri ulimwenguni pote, na kupanga matumizi ya michango. Ni wazi kwamba tunahitaji kutoa dua sikuzote kwa ajili yao!

17, 18. (a) Tunaweza kuonyeshaje kwamba tunaunga mkono Baraza Linaloongoza? (b) Tunapohubiri, tunaonyeshaje kwamba tunaunga mkono mtumwa mwaminifu na Yesu?

17 Bila shaka, kuwakumbuka washiriki wa Baraza Linaloongoza hakuhusishi tu kusali kwa ajili yao, bali pia kuunga mkono mwelekezo wao. Mwelekezo unaotolewa katika machapisho, mikutano, na makusanyiko yetu hutoka kwa Baraza Linaloongoza. Kwa kuongezea, baraza hilo huwaweka rasmi waangalizi wa mzunguko ambao huwaweka rasmi wazee wa kutaniko. Waangalizi wa mzunguko na wazee hukumbuka Baraza Linaloongoza kwa kushikamana kwa ukaribu na miongozo wanayopewa. Sisi sote tunaonyesha kwamba tunamheshimu Kiongozi wetu, Yesu, kwa kutii na kujitiisha kwa wanaume anaowatumia kutuongoza.Ebr. 13:17.

18 Njia nyingine tunayoonyesha kwamba tunakumbuka Baraza Linaloongoza ni kwa kujitoa kwa bidii katika kazi ya kuhubiri. Kwa kweli, Paulo aliwahimiza Wakristo waige imani ya wale wanaoongoza kati yao. Mtumwa mwaminifu ameonyesha imani yenye nguvu kwa kueneza habari njema ya Ufalme kwa bidii na kuwachochea na kuwategemeza wengine katika kazi hiyo. Je, wewe ni mmoja wa kondoo wengine anayewaunga mkono watiwa mafuta kufanya kazi hiyo muhimu? Wazia jinsi utakavyofurahi kumsikia Kiongozi wako, Yesu, akisema: “Kwa kadiri ambayo mlimtendea hilo mmoja wa walio wadogo zaidi wa ndugu zangu hawa, mlinitendea mimi.”Mt. 25:34-40.

19. Kwa nini umeazimia kumfuata Kiongozi wetu, Yesu?

19 Yesu aliporudi mbinguni, hakuwatelekeza wafuasi wake. (Mt. 28:20) Alikuwa amejionea mwenyewe jinsi roho takatifu, malaika, na Neno la Mungu lilivyomsaidia kuongoza mambo alipokuwa duniani. Kwa hiyo, leo anamwandalia mtumwa mwaminifu msaada huohuo. Wakiwa Wakristo watiwa mafuta, washiriki wa mtumwa mwaminifu “[wanaendelea] kumfuata Mwana-Kondoo popote anapoenda.” (Ufu. 14:4) Hivyo, tunapofuata mwongozo wao, tunamfuata Kiongozi wetu, Yesu. Hivi karibuni, atatuongoza kupata uzima wa milele. (Ufu. 7:14-17) Na hakuna kiongozi wa kibinadamu anayeweza kuahidi jambo hilo!

^ fu. 3 Uthibitisho unaonyesha kwamba Yehova alikusudia mitume 12 wawe “mawe ya msingi kumi na mawili” ya Yerusalemu Jipya la wakati ujao. (Ufu. 21:14) Kwa hiyo, hakukuwa na uhitaji wa kuchagua mtume mwingine achukue mahali pa mtume yeyote mwaminifu ambaye baadaye angemaliza mwendo wake wa kidunia.

^ fu. 8 Tangu 1955, shirika hilo linajulikana kama Watch Tower Bible and Tract Society of Pennsylvania.

^ fu. 14 Tazama kitabu “Kutoa Ushahidi Kamili” Kuhusu Ufalme wa Mungu, uku. 58-59.