Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

AMKENI! OKTOBA 2015

 MSAADA KWA AJILI YA FAMILIA | VIJANA

Unapolazimika Kurudi Nyumbani

Unapolazimika Kurudi Nyumbani

CHANGAMOTO

Vijana wengi huondoka nyumbani na kujaribu kuishi peke yao lakini wanapata hali ngumu na kulazimika kurudi nyumbani. Je, umewahi kujikuta katika hali hiyo?

Hata ikiwa unawapenda wazazi wako, huenda kisiwe rahisi kurudi nyumbani. Kwa mfano, Sarah * msichana mwenye umri wa miaka 29 anasema hivi: “Kuishi mwenyewe kulinifanya nijiamini sana kwa sababu sikuwa namtegemea mtu. Lakini kurudi nyumbani kulinifanya nijihisi mtoto tena.” Kijana anayeitwa Richard alihisi hivyo pia. Anasema, “Sikutaka kurudi nyumbani, lakini nisingeweza kujiruzuku. Nilijihisi mjinga.”

Ikiwa uko katika hali hiyo, makala hii itakusaidia uweze kujitegemea tena.

KWA NINI HILO HUTUKIA?

Matatizo ya kifedha. Vijana wengi hushtuka sana wanapoanza kujitegemea na kutambua kuwa gharama za maisha ziko juu sana. “Nilimaliza pesa zangu zote ili kutosheleza mahitaji yangu,” anasema Richard, aliyenukuliwa mwanzoni. Shaina, msichana aliyeondoka nyumbani akiwa na umri wa miaka 24 na kurudi mwaka mmoja na nusu baadaye alipitia hali hiyo. Anakiri: “Laiti ningeshughulikia mapema gharama zangu. Nilitoka nyumbani bila pesa, na kurudi na madeni.” *

Matatizo ya ajira. Kupoteza kazi kunaweza kuvuruga mipango ya kujitegemea iliyofanywa kwa uangalifu sana—jambo ambalo Shaina aligundua. Anasema: “Nilihitimu mafunzo ya tiba, na kujiunga na shirika lililonisaidia kupata kazi. Lakini nilipopoteza kazi, sikuwa na la kufanya. Niliishi eneo la mashambani ambako sikuweza kupata kazi niliyosomea!”

Matarajio yasiyo halisi. Baadhi ya vijana huanza kazi wakiwa na matarajio yasiyo halisi. Kitabu Ready or Not, Here Life Comes kinasema, “Mara nyingi kazi zao huwa ngumu kuliko walivyofikiri. Wanatambua kwamba uhuru waliotarajia haufurahishi tena. Hawakufikiri kabisa kwamba utu uzima una changamoto nyingi sana.”

 MAMBO UNAYOWEZA KUFANYA

Zungumza na wazazi wako kuhusu uamuzi wako wa kurudi nyumbani. Zungumzieni mambo kama haya: Utakaa nyumbani kwa muda gani? Ukiwa hapo, utachangiaje gharama za nyumbani? Utafanya kazi gani za nyumbani? Utachukua hatua gani ili uanze kujitegemea tena? Bila kujali umri wako, kumbuka kwamba umerudi kuishi chini ya usimamizi wa wazazi wako na unapaswa kutii sheria zao.—Kanuni ya Biblia: Kutoka 20:12.

Jifunze kutunza pesa zako. Kitabu The Complete Guide to Personal Finance: For Teenagers and College Students kinasema: “Jinsi unavyotumia pesa zako kunaonyesha kwa kiasi kikubwa ikiwa utafanikiwa au hutafanikiwa kutunza pesa zako. . . . Ni muhimu sana kutotumia pesa kwenye mambo yasiyo ya lazima.”—Kanuni ya Biblia: Luka 14:28.

Tafuta ushauri mzuri. Wazazi au watu wazima wengine wanaweza kukusaidia ujifunze kuhifadhi pesa benki, kupanga matumizi, na kulipa bili. Msichana anayeitwa Marie anasema hivi: “Nilihitaji kujifunza tena mambo ya msingi. Rafiki yangu alinisaidia kuorodhesha matumizi ya lazima na yasiyo ya lazima. Sikuamini macho yangu—matumizi yangu ya mengi yalikuwa ya mambo yasiyo ya lazima! Pia nilijifunza kukuza sifa muhimu sana katika kujitegemea—kujidhibiti.”—Kanuni ya Biblia: Methali 13:10.

Jambo muhimu si kazi unayofanya bali ni kuwa stadi katika kazi yako

Tafuta kazi. Tumia muda ambao ungekuwa kazini kutafuta kazi. Tahadhari: Baadhi ya watu wanaweza kukuambia “ufuatilie ndoto zako” unapotafuta kazi. Lakini kutafuta kazi itakayotimiza ndoto zako kutaathiri maamuzi yako na kufanya ushindwe kuona nafasi za kazi zinazojitokeza. Badala ya kupoteza wakati kutafuta kazi ya aina moja tu, jitahidi kutochagua kazi. Kumbuka, jambo muhimu si kazi unayofanya bali ni kuwa stadi katika kazi yako. Imeonekana kwamba kadiri mfanyakazi anavyozoea na kuwa stadi katika kazi yake, ndivyo anavyofurahia zaidi kazi hiyo. Si lazima ufanye kitu unachopenda ili uweze kupenda kitu unachofanya!

^ fu. 5 Majina katika makala hii yamebadilishwa.

^ fu. 8 Mara nyingi wanafunzi wa chuo nchini Marekani hupatwa na hali hiyo. Kulingana na ripoti ya The Wall Street Journal, mwanafunzi aliyepata mkopo huhitimu akiwa na deni la wastani wa dola 33,000 za Marekani.

Pata Kujua Mengi Zaidi

Maoni ya Biblia Kuhusu Kazi

Ni kazi inayofaa?