Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Amkeni!  |  Juni 2015

 MSAADA KWA AJILI YA FAMILIA | NDOA

Jinsi ya Kuimarisha Uwajibikaji Katika Ndoa

Jinsi ya Kuimarisha Uwajibikaji Katika Ndoa

KIKWAZO

Siku ulipofunga ndoa, uliweka nadhiri. Nadhiri hiyo ni uwajibikaji wa kudumu, yaani, kiapo cha kuendelea kushikamana na mwezi wako na kutatua matatizo yoyote yanayojitokeza.

Hata hivyo, kwa miaka mingi, huenda mizozano imeharibu uhusiano wenu. Je, bado unahisi unahitaji kuwajibika kikamili kwa mwezi wako?

MAMBO UNAYOPASWA KUJUA

Uwajibikaji ni kama nanga inayoweza kuimarisha ndoa yako

Uwajibikaji ni suluhisho, na sio tatizo. Leo watu wengi hawapendi kuwajibika. Baadhi yao hufananisha uwajibikaji na mzigo mzito. Badala ya kuwa na maoni kama hayo, ona uwajibikaji kuwa nanga inayoweza kuimarisha ndoa yako. Megan, mwanamke aliyeolewa alisema hivi: “Wakati wa mzozano, jambo moja bora kuhusu uwajibikaji ni kujua kwamba wewe na mwenzi wako hamtaachana.” * Kuwa na uhakika kwamba ndoa yako ni salama licha ya kwamba mnakabili changamoto fulani, kunaweza kukupatia msingi wa kutatua matatizo yenu.—Ona sanduku “ Uwajibikaji na Ushikamanifu.”

Jambo la hakika: Ikiwa unakabili hali ngumu katika ndoa yako, sasa ndio wakati wa kuimarisha uwajibikaji, wala si kuutilia shaka. Unaweza kufanya hivyo jinsi gani?

 MAMBO UNAYOWEZA KUFANYA

Chunguza maoni yako. “Ndoa ya maisha.” Je, maneno hayo hukufanya uhisi umefungwa au uko salama? Matatizo yanapotokea, je, wewe huona kuachana kuwa suluhisho? Ili kuimarisha uwajibikaji, ni muhimu kuona kwamba ndoa ni muungano wa kudumu.—Kanuni ya Biblia: Mathayo 19:6.

Chunguza historia yako. Maoni yako kuhusu uwajibikaji huenda yameathiriwa na mambo uliyoona kwa wazazi wako. Lea, mwanamke aliyeolewa alisema hivi: “Wazazi wangu walitalikiana nilipokuwa mdogo. Nilikuwa na wasiwasi kwamba hali hiyo ingenifanya niwe na maoni yasiyofaa kuhusu uwajibikaji.” Uwe na uhakika kwamba unaweza kufanya mambo kwa njia tofauti kabisa katika ndoa yako. Si lazima urudie makosa ya wazazi wako!—Kanuni ya Biblia: Wagalatia 6:4, 5.

Chunguza usemi wako. Unapokuwa katika hali ya kutoelewana na mwenzi wako, jizuie kusema maneno ambayo baadaye utajutia, kama vile “Nitakuacha!” au, “Nitatafuta mwingine anayenithamini!” Maneno kama hayo huathiri uwajibikaji, na badala ya kutatua tatizo yanakuwa chanzo cha ugomvi wa maneno. Badala ya kutumia usemi wenye kuumiza, unaweza kusema hivi: “Kwa kweli, sote tumeudhika. Tunaweza kufanya nini ili kutatua tatizo hili?”—Kanuni ya Biblia: Methali 12:18.

Onyesha kwamba ‘unaheshimu uwajibikaji.’ Weka picha ya mwenzi wako katika meza ya ofisini mwako. Uwe na maoni yanayofaa kuhusu ndoa yenu unapozungumza na wengine. Weka lengo la kumpigia simu mwenzi wako kila siku unapokuwa mbali naye. Daima tumia usemi “sisi,” na utumie maneno kama “mimi na mke wangu” au “mimi na mume wangu.” Kwa kufanya hivyo, utakazia kwako na kwa wengine kwamba unawajibika kwa mwenzi wako.

Iga mifano mizuri. Iga mifano ya wenzi wa ndoa wenye umri mkubwa na ambao wametatua matatizo ya ndoa kwa mafanikio. Waulize hivi: “Uwajibikaji una umuhimu gani katika ndoa yenu, na umewasaidia jinsi gani katika ndoa?” Biblia inasema hivi: “Chuma hunolewa kwa chuma. Ndivyo mtu anavyounoa uso wa mwingine.” (Methali 27:17) Ukiwa na kanuni hiyo akilini, jitahidi ili unufaike kwa kufuata ushauri wa wale waliofanikiwa katika ndoa.

^ fu. 7 Biblia inaruhusu wenzi wa ndoa kuachana ikiwa mwenzi mmoja amefanya uasherati. Ona makala “Maoni ya Biblia—Uzinzi” katika gazeti hili la Amkeni!

Pata Kujua Mengi Zaidi

UNAWEZA KUWA NA FAMILIA YENYE FURAHA

Uwe Mshikamanifu kwa Mwenzi Wako

Je, kuwa mwaminifu katika ndoa kunamaanisha tu kuepuka uzinzi?

MNARA WA MLINZI

Wajibika Sikuzote Katika Ndoa Yako

Ni nini kinachoimarisha ndoa? Ni nini kinachodhoofisha ndoa? Unawezaje kuimarisha ndoa yako?

MAJIBU YA MASWALI YA BIBLIA

Je, Biblia Inaweza Kunisaidia Kuwa na Familia Yenye Furaha?

Shauri lenye hekima kutoka kwenye Biblia tayari limewasaidia mamilioni ya wanaume na wanawake kuwa na familia zenye furaha.

HABARI NJEMA KUTOKA KWA MUNGU!

Kanuni za Biblia Zinatunufaishaje?

Yesu alieleza kwa nini tunahitaji mwongozo na ni kanuni gani mbili za Biblia zina umuhimu mkubwa.