Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Amkeni!  |  Mei 2015

“Mungu Anatusaidia Kukabiliana na Hali”

“Mungu Anatusaidia Kukabiliana na Hali”

NATALYA pamoja na Aslan, mwana wake mwenye umri wa miaka tisa, walikaa karibu na Zarina na binti yake Anzhelika, mwenye umri wa miaka kumi na mbili. Zaidi ya watoto 1,000 na watu wazima walikusanywa pamoja chini ya ulinzi wa washambuliaji wenye silaha kali.

Mapema katika siku hiyo ya Jumatano, Septemba 1, 2004, watoto na wazazi walikuwa nje wakijiandaa kusherehekea siku ya kwanza ya shule katika Beslan, mji mdogo wa Alania, nchini Urusi. Ghafla, watu wenye silaha na walipuaji mabomu waliojitolea kufa, waliwavamia na kuanza kufyatua risasi hewani na kupiga kelele. Washambuliaji hao zaidi ya 30 waliamuru umati huo kuingia ndani ya ukumbi wa shule na kisha kutega mabomu kuzunguka ukumbi huo wa michezo.

Utekaji Nyara na Mashambulizi

Mazungumzo kati ya washambuliaji na vikosi vya ulinzi yaliendelea kwa siku tatu bila kufikia makubaliano yoyote. “Sikuwahi kusali mara nyingi hivyo,” anasema Natalya, ambaye alikuwa akijifunza Biblia na Mashahidi wa Yehova.

Ukumbi ulianza kuwa na joto kali kwa kuwa yalikuwa majira ya kiangazi. Asubuhi ya siku ya pili, washambuliaji hawakuwapa mateka chakula wala maji, na kufikia Ijumaa, siku ya tatu, baadhi ya mateka walilazimika kunywa mkojo na kula maua waliyoleta watoto kama zawadi kwa walimu wao. Natalya anasema hivi: “Mvulana aliyekaa karibu nasi alinipa jani mkononi nami nikaligawa katikati na kumpa Anzhelika kipande kimoja na Aslan kipande kingine.”

Baadaye katika siku ya tatu, mashambulizi makubwa yalianza. “Niliangushwa na milipuko ya mabomu. Moshi mzito ulijaa hewani, na wakaanza kupiga risasi,” anasema Natalya. Wakati wanajeshi na magaidi walipokuwa wakifyatuliana risasi, Natalya na Aslan walitambaa  na kutoroka. Mwanaume mwenyeji wa Ossetia aliyeitwa Alan, aliwachukua na kuwahifadhi mahali salama. Wengi hawakuweza kutoroka.

Hali Baada ya Shambulizi

Anzhelika alikufa wakati wa mashambulizi

Mamia ya watoto na watu wazima walikufa kutia ndani Anzhelika. Kwa majuma kadhaa, maombolezo na vilio vilisikika Beslan. Nyumba ya Natalya inatazamana na shule hiyo, na hata shule nyingine ilipojengwa jirani, Aslan hakutaka kuingia ndani ya majengo hayo. Hakutaka hata kutoka nje ili kucheza. “Tulisali kwa Yehova ili amsaidie kushinda hofu yake,” anasema Natalya. Baada ya muda alipata ujasiri wa kurudi shuleni.

Ilikuwa vigumu kwa Natalya kuhudhuria mikutano ya Kikristo katika Jumba la Ufalme. Anasema hivi: “Kila mara nilipokuwa pamoja na watu wengi ndani ya jengo, nilihisi kana kwamba jengo hilo litashambuliwa. Ningesali ili jambo lolote lisitokee. Baada ya muda, niliacha kuhudhuria mikutano. Pia, nilipambana na mtazamo akilini wa kwamba watu wengi waliuawa, na ni sisi tu tuliokoka.”

Kuondoa Woga

Natalya anasema hivi: “Ninawashukuru washiriki wa kutaniko walionisaidia. Shahidi anayeitwa Tatyana alinitembelea kwa ukawaida kila baada ya siku tatu. Baada ya muda, alikuja na Shahidi mwingine anayeitwa Ulyana, aliyekuwa mwenye fadhili, busara, anayezungumza kwa upole, na aliyeijua Biblia vizuri. Alinisikiliza kwa makini nilipozungumza na kunipongeza kwa jitihada zangu.”

“Hatimaye sasa ninaweza kusimulia siku hiyo bila uchungu au woga”

“Ulyana alinisomea maneno ya mtume Paulo aliyekuwa Mkristo yanayopatikana katika 2 Wakorintho 1:9. Baada ya kukabili magumu huko Asia, Paulo alisema hivi: “Tuliona ndani yetu wenyewe kwamba tumepokea hukumu ya kifo.” Alisoma pia andiko la Isaya 40:31 linalosema hivi: “Wale wanaomtumaini Yehova watapata nguvu mpya. Wataruka juu kwa mabawa kama tai.” Maandiko hayo, pamoja na msaada wa kihisia niliopata kwa ukawaida kutoka kwa Ulyana na wengine, uliniimarisha na kunifanya nianze kuhudhuria tena mikutano ya Kikristo pamoja na watoto wangu wawili. Hata hivyo, bado sina amani ninapokuwa katika jumba.”

Baadaye Zarina akawa Shahidi wa Yehova na anasubiri kwa hamu kumpokea Anzhelika pindi atakapofufuliwa katika dunia maridadi na yenye amani, ambayo itatawaliwa na Ufalme wa Mungu. (Mathayo 6:9, 10; Matendo 24:15) Natalya na watoto wake walibatizwa mwaka wa 2009. Ingawa bado wanaishi karibu na ukumbi huo wa michezo ulioshambuliwa, wameacha kuogopa. Natalya anasema hivi: “Hatimaye sasa ninaweza kusimulia siku hiyo bila uchungu au woga. Mungu anatusaidia kukabiliana na hali.”

Pata Kujua Mengi Zaidi

MNARA WA MLINZI

Kwa Nini Watu Wazuri Hupatwa na Mambo Mabaya?

Biblia inafunua mambo matatu yanayowasababishia wanadamu mateso.