Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

AMKENI! AGOSTI 2014

 TUNAYOJIFUNZA KUTOKANA NA HISTORIA

William Whiston

William Whiston

William Whiston alikuwa mwanasayansi, mwanahisabati, kasisi, mwandishi hodari, na alishirikiana na mwanafizikia na mwanahisabati Mwingereza Sir Isaac Newton. Katika mwaka wa 1702, Whiston alikuwa Profesa wa Hisabati katika Chuo Kikuu cha Cambridge, Uingereza baada ya Newton. Kwa miaka mingi, cheo hicho kimepewa watu wenye ujuzi mwingi wa kisayansi na teknolojia.

WHISTON anajulikana pia na wasomi wa Biblia, kwa sababu alitafsiri katika Kiingereza maandishi ya mwanahistoria Myahudi wa karne ya kwanza Flavius Josephus. Maandishi ya Josephus (The Works of Josephus) yanafunua mengi kuhusu historia ya Wayahudi na ulimwengu wa Wakristo wa karne ya kwanza.

ITIKADI ZA WHISTON

Whiston alitumia ujuzi wake mwingi kuchunguza mambo mengi hasa ya kisayansi na kidini. Aliamini simulizi la Biblia kuhusu uumbaji ni sahihi na kwamba ubuni, ubora, na mpangilio ulio katika vitu vya asili unathibitisha kuna Muumba.

Zaidi ya hayo, Whiston aliamini kwamba makanisa ya Kikristo yaligawanyika na kuwa mengi kwa sababu makasisi hawakufuata Biblia, badala yake walifundisha mambo yasiyo katika Biblia na itikadi za mabaraza ya kanisa na wale wanaoitwa Mababa wa Kanisa.

Kwa kuwa Whiston aliamini Biblia ni kitabu chenye ujuzi wa kiroho, alikataa fundisho la moto wa mateso. Aliliona kuwa tendo la kipumbavu na kikatili, linalomvunjia Mungu heshima. Jambo ambalo hasa lilifanya akosane na viongozi wa kanisa ni wakati alipopinga Utatu, fundisho linalomfafanua Mungu kuwa watu watatu walio sawa na wanaoishi pamoja milele—Baba, Mwana, na Roho Takatifu.  Hata hivyo, inasemekana kwamba wao si miungu mitatu, bali ni mungu mmoja.

“MSOMI MAARUFU ALIYELAANIWA”

Baada ya kufanya utafiti kwa makini, Whiston alifikia mkataa kwamba Wakristo wa mapema hawakufundisha Utatu bali fundisho hilo lilianza mafundisho ya kipagani yalipoingizwa ndani ya Ukristo. * Rafiki zake walimwonya kuhusu matokeo ya kuchapisha utafiti wake, lakini Whiston hakupuuza kile alichoamini kuwa ukweli kumhusu Yesu, yaani, ni Mwana wa Mungu na aliumbwa.

Chuo Kikuu cha Cambridge kilimfuta kazi mtu aliyepinga mafundisho ya Kanisa Anglikana, jambo lililomaanisha kwamba Whiston angepoteza cheo chake. Ingawa hivyo, Whiston hakunyamaza kama Newton, ambaye aliamini kwamba Utatu ni fundisho la uwongo lakini akaogopa kusema waziwazi. Whiston aliandika: “Hakuna chochote . . . kitakachonizuia.”

Kwa sababu alikataa kukana imani yake, Whiston akawa “msomi maarufu aliyelaaniwa”

Mwaka wa 1710, Whiston alifutwa kazi huko Cambridge. Kwa sababu alikataa kukana imani yake, Whiston akawa “msomi maarufu aliyelaaniwa.” Licha ya hayo, hakuvunjika moyo. Hata alipokuwa akituhumiwa kwa kupotoka, aliandika maandishi yaliyoitwa Ukristo wa Kwanza Warudishwa (Primitive Christianity Revived), yaani, Ukristo wa wafuasi wa mapema wa Yesu. Baadaye, Whiston alianzisha Kikundi cha Kutetea Ukristo wa Kwanza, kilichokutana katika nyumba yake huko London.

Ingawa alipoteza cheo cha profesa na akawa na matatizo ya kifedha kwa muda, Whiston aliendelea kuandika na kutoa hotuba katika mikahawa huko London. Mwaka wa 1737, alichapisha tafsiri ya maandishi ya Josephus, yaliyosaidia watu kuelewa Ukristo wa karne ya kwanza. Maandishi hayo yamekuwa yakichapishwa tangu wakati huo.

Kwa sababu ya ujasiri na msimamo wake, leo Whiston anajulikana na wengi kuwa “mtu mwenye msimamo wa ajabu,” anasema mwandishi James E. Force. Hata hivyo, wengine wanamheshimu akiwa msomi wa Biblia, mtafutaji mnyoofu wa ukweli wa kidini, na mwanamume aliyeazimia kuishi kulingana na itikadi zake.

^ fu. 10 Biblia inafunua wazi cheo cha Mungu. Kwa habari zaidi, tembelea jw.org/sw. Tafuta kwenye MAFUNDISHO YA BIBLIA > MAJIBU YA MASWALI YA BIBLIA.

 

Pata Kujua Mengi Zaidi

Je, Uamini Utatu?

Je, kanisa lako linafundisha Utatu? Je, Imani ya Nisea inakuathiri leo?