Vipimo vya ufikikaji

Chagua lugha

Hamia kwenye menyu ya pili

Hamia kwenye yaliyomo

Hamia kwenye habari

Mashahidi wa Yehova

Kiswahili

AMKENI! AGOSTI 2014

“Waangalieni kwa Makini Ndege”

“Waangalieni kwa Makini Ndege”

NDEGE wanapatikana duniani kote, na ni rahisi sana kuwaona. Zaidi ya hayo, inasisimua sana kutazama maumbo, rangi, nyimbo, tabia, na michezo mbalimbali ya ndege.

Kwera

Unaweza kuona shughuli za ndege hata kupitia dirisha la jikoni kwako: ndege aina ya blackbird wa Ulaya akifukua minyoo, shore akikamata wadudu, njiwa wakichumbiana, mbayuwayu akitengeneza kiota chake kwa bidii, au chiriku-dhahabu akilisha vifaranga wake.

Kanga mwenye kishungi

Ndege wengine watakuvutia sana—kama vile tai, kipanga, na mwewe—wanapozunguka-zunguka angani. Wengine watakuchekesha: shomoro wanapogombania chakula, njiwa dume akitunisha kifua ili kumvutia njiwa jike, au kikundi cha gala chenye kelele kinachoning’inia kwenye nyaya za umeme. Na wengine watakusisimua unapowaona wakisafiri angani, kama vile korongo, au bata-bukini. Kwa kweli, kwa maelfu ya miaka, watu wameshangazwa sana na uwezo mkubwa wa ndege hao wa kusafiri umbali mrefu bila kupotea njia. Muumba mwenyewe alisema:  “Hata korongo juu mbinguni—anajua vema nyakati zake zilizowekwa; na njiwa-tetere na barawai na teleka—huangalia vema wakati wa kila mmoja wao kuingia.”—Yeremia 8:7.

Kuwachunguza Ndege Nyakati za Biblia

Mara nyingi Biblia huwataja ndege ili kutufundisha masomo muhimu. Kwa mfano, kuhusu mwendo-kasi wa mbuni, Mungu alimwambia Ayubu hivi: “Wakati anapopiga-piga mabawa yake juu, yeye humcheka farasi na mpandaji wake.” * (Ayubu 39:13, 18) Pia, Mungu alimuuliza Ayubu: “Je, ni kwa sababu ya uelewaji wako kwamba kipanga hupaa juu, . . . au, je, ni kwa agizo lako kwamba tai huruka kuelekea juu?” (Ayubu 39:26, 27) Tunajifunza nini? Ndege wanafanya mambo makubwa bila msaada wetu. Uwezo wao unaonyesha hekima ya Mungu, bali si yetu.

Mfalme Sulemani aliandika kuhusu “sauti ya njiwa-tetere” inayoashiria majira ya kuchipua. (Wimbo wa Sulemani 2:12) Mtunga zaburi alimtaja mbayuwayu alipokuwa akiandika kuhusu tamaa yake ya kumtumikia Mungu hekaluni. Alisema hivi: “Hata ndege amepata nyumba, na mbayuwayu amepata kiota chake, ambapo ameweka vifaranga vyake [karibu na] madhabahu yako kuu, Ee Yehova.”—Zaburi 84:1-3.

“Baba yenu wa mbinguni huwalisha wao. Je, ninyi si bora kuliko wao?”—Mathayo 6:26

Yesu aliwazungumzia ndege kwa njia yenye kuvutia sana. Fikiria maneno yake kwenye Mathayo 6:26: “Waangalieni kwa makini ndege wa mbinguni, kwa sababu hawapandi mbegu au kuvuna au kukusanya ghalani; na bado Baba yenu wa mbinguni huwalisha wao. Je, ninyi si bora kuliko wao?” Mfano huo wenye kugusa moyo uliwahakikishia wafuasi wa Yesu kwamba ni wenye thamani sana kwa Mungu na hivyo hawahitaji kuhangaikia jinsi watakavyopata mahitaji ya msingi maishani.—Mathayo 6:31-33.

Leo, watu wengi hufurahia kuwatazama ndege—na hiyo ni kwa sababu tunashangazwa sana na michezo, uzuri, nyimbo, na jinsi wanavyochumbiana. Isitoshe, kuwachunguza ndege kunaweza kutufundisha masomo muhimu sana maishani. Je, ‘utawaangalia ndege kwa makini’?

^ fu. 6 Mbuni ndiye ndege mkubwa zaidi, na hukimbia kwa kasi sana, akiwa na uwezo wa kukimbia kilomita 72 hivi kwa saa.

Pata Kujua Mengi Zaidi

Mambo Tunayojifunza Kutokana na Ndege wa Mbinguni

Zaidi ya kutufundisha kuhusu uumbaji wa Mungu, ndege wanatukumbusha mambo ambayo ni muhimu zaidi.