Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Amkeni!  |  Julai 2014

 HABARI KUU | KUKABILIANA NA MAJANGA

Kupoteza Mali

Kupoteza Mali

Mnamo Ijumaa, Machi 11, 2011, tetemeko la ardhi lenye kipimo cha 9.0 lilitokea nchini Japani, na kusababisha vifo vya watu zaidi ya 15,000 na hasara ya zaidi ya dola bilioni 200 za Marekani. Baada ya kusikia maonyo yaliyotolewa kuhusu tsunami, mwanamume mwenye umri wa miaka 32 anayeitwa Kei alikimbilia sehemu iliyoinuka. Anasema: “Asubuhi iliyofuata, nilienda nyumbani ili nione kama ningeweza kuchukua chochote, lakini kila kitu kilikuwa kimesombwa na maji na kutupwa baharini kutia ndani nyumba yangu. Msingi wa nyumba tu ndio uliokuwa umebaki.

“Ilinichukua muda kuamini kwamba nilikuwa nimepoteza si vitu vyangu tu bali pia mazingira niliyozoea. Kila kitu kilikuwa kimeenda—gari langu, kompyuta niliyofanyia kazi, meza, viti, sofa ambayo wageni walikalia waliponitembelea, piano, gitaa, ala inayoitwa ukulele, na filimbi; vifaa vyangu vya kazi ya kuchora, na michoro yangu yote.”

KUKABILIANA NA MAJANGA

Kazia fikira vitu ambavyo bado unavyo badala ya vitu ulivyopoteza. Biblia inasema hivi: “Hata wakati mtu ana vitu vingi uzima wake hautokani na vitu alivyo navyo.” (Luka 12:15) Kei anasema hivi: “Mwanzoni, niliandika orodha ya vitu nilivyotaka, lakini hilo lilinikumbusha vitu vyote nilivyopoteza. Niliamua kuandika orodha ya vitu nilivyohitaji zaidi, na nilirekebisha orodha hiyo baada ya kupata kitu nilichohitaji. Orodha hiyo ilinisaidia kupanga upya maisha yangu.”

Badala ya kuendelea kujisikitikia, tumia uzoefu wako kuwafariji wengine. “Nilipokuwa nikipokea msaada kutoka serikalini na kutoka kwa rafiki zangu, niliacha kujiamini,” anasema Kei. “Kisha nikakumbuka maneno ya Biblia kwenye Matendo 20:35 kwamba ‘kutoa kuna furaha zaidi kuliko kupokea.’ Kwa vile singeweza kutoa msaada wa kimwili, niliamua kuwatia moyo watu wengine walioathiriwa na msiba huo. Kuonyesha ukarimu kwa njia hiyo kulinisaidia sana.”

Sali kwa Mungu ili akupe hekima ya kukabiliana na hali zako. Kei alisadiki ahadi ya Biblia kwamba Mungu “ataielekea sala ya wale waliovuliwa kila kitu.” (Zaburi 102:17) Wewe pia unaweza kufanya hivyo.

Je, wajua? Biblia inatabiri kuhusu wakati ambapo hakuna mtu atakayeogopa kupoteza mali zake kwa sababu ya misiba ya asili. *Isaya 65:21-23.

^ fu. 9 Ili ujifunze kuhusu kusudi la Mungu kwa dunia, ona sura ya 3 ya kitabu Biblia Inafundisha Nini Hasa? kilichochapishwa na Mashahidi wa Yehova. Kinapatikana katika Intaneti kwenye www.jw.org/sw.

Pata Kujua Mengi Zaidi

MAJIBU YA MASWALI YA BIBLIA

Je, Misiba ya Asili ni Adhabu Kutoka kwa Mungu?

Fikiria mambo matatu yaliyoandikwa katika Biblia ambayo hutambulisha kazi za Mungu.