Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Amkeni!  |  Desemba 2013

 MAONI YA BIBLIA

Yesu

Yesu

Je, Yesu ni Mungu?

“Hakuna mwanadamu ambaye amemwona Mungu wakati wowote.”—Yohana 1:18.

WATU HUSEMA NINI?

Watu wengi huamini kwamba Yesu si Mungu. Hata hivyo, wengine hutaja maandiko ya Biblia ambayo kwa maoni yao, yanaonyesha eti Yesu ni sawa na Mungu.

BIBLIA INASEMA NINI?

Biblia haimwonyeshi Yesu kuwa Mungu Mweza-Yote au kwamba yeye ni sawa na Mungu. Badala yake, Biblia inafundisha waziwazi kwamba Yesu ana cheo cha chini kuliko Mungu. Kwa mfano, Biblia inanukuu maneno haya ya Yesu: “Baba ni mkuu kuliko mimi.” (Yohana 14:28) Biblia inasema hivi pia: “Hakuna mwanadamu ambaye amemwona Mungu wakati wowote.” (Yohana 1:18) Yesu hawezi kuwa Mungu kwa sababu watu wengi walimwona Yesu.

Wafuasi wa Yesu wa karne ya kwanza hawakudai kwamba yeye alikuwa Mungu. Kwa mfano, mwandikaji wa Injili, Yohana alisema hivi kuhusu mambo aliyoandika: “Haya yameandikwa ili mpate kuamini kwamba Yesu ndiye Kristo Mwana wa Mungu.”Yohana 20:31. *

 Yesu alizaliwa lini?

“Kulikuwako . . . wachungaji wakiishi nje, wakichunga makundi yao usiku.” —Luka 2:8.

WATU HUSEMA NINI?

Watu fulani husherehekea Krismasi Desemba 25—kwa kuwa wengine wanadhani Yesu alizaliwa tarehe hiyo. Wengine huadhimisha sikukuu hiyo mwanzoni mwa mwezi wa Januari.

BIBLIA INASEMA NINI?

Biblia haitaji tarehe ambayo Yesu alizaliwa. Hata hivyo, inasema kwamba wakati Yesu alipozaliwa, “kulikuwako . . . wachungaji wakiishi nje, wakichunga makundi yao usiku.” (Luka 2:8) Haiwezekani kwamba wachungaji hao wangekuwa nje usiku pamoja na kondoo wao katika miezi ya Desemba na Januari. Kwa nini?

Katika eneo ambalo Yesu alizaliwa, kuna baridi kali sana miezi ya Desemba na Januari. Kuhusu miezi hiyo, Biblia inasema kwamba watu walikuwa “wakitetemeka . . . kwa sababu ya manyunyu ya mvua.” (Ezra 10:9, 13; Yeremia 36:22) Haingewezekana kwa wachungaji hao ‘kuishi nje’ pamoja na kondoo wao wakati wa majira hayo.

Je, kweli Yesu alifufuliwa?

“Mungu alimfufua [Yesu] kutoka kwa wafu.” —Matendo 3:15.

WATU HUSEMA NINI?

Watu fulani huamini kwamba haiwezekani kwa mtu yeyote, kutia ndani Yesu, kufufuliwa.

BIBLIA INASEMA NINI?

Yesu aliwafundisha wafuasi wake kwamba ‘angepatwa na mambo mengi na kuuawa, na siku ya tatu angefufuliwa.’ (Mathayo 16:21) Biblia inaripoti kwamba baada ya Yesu kuuawa na kufufuliwa, aliwatokea watu zaidi ya 500. (1 Wakorintho 15:6) Watu hao waliomwona walisadiki kabisa kwamba alikuwa amefufuliwa kutoka kwa wafu. Hata walikuwa tayari kufa kwa sababu ya imani hiyo!—Matendo 7:51-60; 12:1, 2.

KWA NINI SWALI HILO NI MUHIMU?

Biblia inafundisha kwamba kifo na ufufuo wa Yesu uliwafungulia njia wanadamu wote ili wafaidike na ahadi ya Biblia ya kwamba dunia itakuwa Paradiso. (Zaburi 37:11, 29; Ufunuo 21:3, 4) Tuna tarajio la kufurahia maisha yasiyo na mwisho katika dunia itakayokuwa paradiso kwa sababu ya upendo ambao Yesu na Baba yake, Mungu Mweza-Yote, Yehova wametuonyesha.—Yohana 3:16; Waroma 6:23.

^ fu. 7 Biblia haifundishi kwamba Mungu ana mke halisi ambaye amepata watoto naye. Badala yake, inamwita Yesu “Mwana wa Mungu” kwa sababu Yesu aliumbwa moja kwa moja na Mungu, akiwa na sifa kama za Baba yake.