Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Amkeni!  |  Na. 1 2018

 NJIA YA MAISHA INAYOLETA FURAHA

Kuwa na Kusudi la Maisha

Kuwa na Kusudi la Maisha

WANADAMU NI WA PEKEE KATIKA NJIA NYINGI—WANAWEZA KUANDIKA, KUCHORA, KUUNDA VITU, NA KUJIULIZA MASWALI MUHIMU MAISHANI: Kwa nini ulimwengu uliumbwa? Sisi tulitoka wapi? Maisha yana kusudi gani? Hali zitakuwaje wakati ujao?

Baadhi ya watu huepuka maswali hayo wakifikiri kwamba hatuna uwezo wa kupata majibu yake. Wengine wanasema kwamba maswali hayo hayana maana yoyote kwa sababu uhai ulijitokeza wenyewe kwa njia ya mageuzi. Profesa wa historia na biolojia William Provine alidai kwamba, “hakuna miungu wala kusudi lolote.” Aliongezea kusema: “Hakuna msingi thabiti wa maadili wala kusudi halisi la maisha.”

Hata hivyo, baadhi ya watu hawakubaliani na mtazamo huo. Wanaona ulimwengu unaoongozwa na sheria hususa za kisayansi, zilizo katika utaratibu unaofaa kabisa. Wanashangazwa na miundo mbalimbali ya asili ambayo wanadamu wamejaribu kuiga wanapotengeza baadhi ya vifaa. Na vitu tata, vinavyofanya kazi kwa ubora wa hali ya juu wanavyoviona kila siku, vinawathibitishia kwamba kuna Muumba mwenye akili aliyevibuni na havikujitokeza vyenyewe tu.

Kufikiri kwa njia hiyo kumewachochea baadhi ya wanamageuzi wachunguze upya maoni yao. Fikiria maelezo ya wawili kati ya hao.

DAKT. ALEXEI MARNOV, MPASUAJI WA MFUMO WA NEVA. Alisema: “Shule nilizosoma zilifundisha kwamba hakuna Mungu, na uhai ulijitokeza wenyewe. Mtu yeyote aliyeamini kuna Mungu alionekana hana ujuzi.” Hata hivyo, katika mwaka wa 1990, maoni yake yalianza kubadilika.

Anaeleza hivi: “Nimekuwa nikijitahidi kuelewa kusudi la uwepo wa vitu mbalimbali kutia ndani ubongo wa mwanadamu. Kiungo hiki cha kustaajabisha, kwa kufaa kimeitwa kitu tata zaidi ulimwenguni. Lakini je, ubongo ulibuniwa ili tu upate ujuzi na ustadi, kisha ufe? Niliona jambo hilo haliingii akilini. Hivyo nikaanza kujiuliza: ‘Kwa nini tuko hai? Maisha yana kusudi gani?’ Baada ya kutafakari kwa kina, nikafikia mkataa kwamba lazima kuna Muumba.”

Kiu ya kutaka kujua kusudi la maisha ilimfanya Alexei aichunguze Biblia. Baadaye, mke wake ambaye ni daktari wa tiba na hakuamini kuna Mungu, alianza kujifunza Biblia pia, akiwa na lengo la kuthibitisha imani mpya ya mume wake kuwa ya uwongo! Hata hivyo, sasa wote wawili wanamwamini Mungu na wanaelewa kwa nini aliwaumba wanadamu kama Maandiko yanavyoeleza.

DAKT. HUABI YIN, MWANASAYANSI. Huabi Yin alisomea fizikia, na kwa miaka mingi alifanya utafiti kuhusu jua.

Huabi anasema: “Kila mara tunapochunguza vitu vya asili, tunatambua kwamba vina utaratibu wa hali ya juu unaotegemea sheria sahihi kabisa. Nilijiuliza, ‘Sheria hizo zilitoka wapi? Ikiwa hata moto mdogo wa kupikia unapaswa kudhibitiwa kwa makini, ni nani aliyeweka sheria zinazodhibiti kiwango cha joto cha jua?’ Hatimaye, nilifikia mkataa kwamba sentensi ya kwanza katika Biblia, ndiyo inayotoa jibu linaloridhisha: ‘Hapo mwanzo Mungu aliumba mbingu na dunia.’”—Mwanzo 1:1.

Ni wazi kwamba, sayansi imetusaidia kuelewa jinsi ambavyo vitu mbalimbali hufanya kazi, kama vile jinsi jua linavyotokeza joto na mwanga au jinsi chembe za ubongo zinavyofanya kazi. Lakini kama Alexei na Huabi walivyogundua, Biblia hutusaidia kuelewa kusudi la uwepo wa vitu hivyo kwa kujibu maswali muhimu zaidi kama: Kwa nini ulimwengu uliumbwa? Kwa nini ulimwengu unaongozwa na sheria? Na kwa nini tupo hai?

Biblia inasema hivi kuhusu dunia: “[Mungu] hakuiumba tu bila sababu, lakini aliiumba ili ikaliwe.” (Isaya 45:18) Naam, Mungu aliiumba dunia kwa kusudi hususa, na kama makala inayofuata itakavyoonyesha, kusudi hilo lina uhusiano wa karibu sana na tumaini letu la wakati ujao.