Hamia kwenye habari

Hamia kwenye menyu ya pili

Hamia kwenye yaliyomo

Mashahidi wa Yehova

Kiswahili

Amkeni!  |  Na. 1 2017

Tabasamu—Zawadi Unayoweza Kushiriki na Wengine

Tabasamu—Zawadi Unayoweza Kushiriki na Wengine

MTU anapokutazama akiwa ametabasamu, wewe huitikiaje? Inaelekea kwamba wewe pia utatabasamu. Huenda hilo likafanya ufurahi pia. Naam, tabasamu ya kweli, iwe inatoka kwa rafiki au mtu tusiyemfahamu, hufanya wengine pia watabasamu na kuhisi vizuri. Mwanamke anayeitwa Magdalena alieleza hivi: “Mume wangu, Georg, alikuwa mwenye tabasamu nzuri. Tulipotazamana, nilihisi utulivu na usalama.”

Tabasamu halisi hufunua hisia nzuri, kama vile uchangamfu, furaha, na shangwe. Kwa kweli, inaonekana kwamba “kutabasamu . . . ni asili yetu,” inaeleza makala ya jarida la mtandaoni la Observer, la Association for Psychological Science. Makala hiyo iliendelea kusema kwamba, hata watoto wachanga wanaweza “kutambua kwa usahihi uso wenye tabasamu.” Pia, ikaongeza hivi: “Zaidi ya kujua habari muhimu kuhusu mtu mwingine, tabasamu huwasaidia watu kuamua jinsi watakavyotenda.” *

Watafiti wa Chuo Kikuu cha Harvard nchini Marekani walifanya uchunguzi kuona jinsi ambavyo wagonjwa ambao ni wazee huitikia ishara za uso kutoka kwa wahudumu wa afya. Uso wa wahudumu “ulipoonyesha shauku, kujali, ufikirio, na huruma,” watafiti walisema kwamba, mgonjwa alihisi kuridhika na hali yake ya kiakili na kimwili iliboreka. Kinyume cha hilo, matokeo yalikuwa mabaya wahudumu walipokosa kutabasamu.

 Unapotabasamu unajitendea mwenyewe kwa fadhili. Utafiti unaonyesha kwamba kutabasamu kuna faida nyingi, kama vile kuongeza ujasiri, furaha, na kupunguza mkazo. Kinyume cha hilo, kununa kunaweza kuwa na matokeo mabaya.

TABASAMU “ILIFANYA NIJIAMINI”

Magdalena, aliyetajwa mapema, alikuwa kati ya Mashahidi wa Yehova walioishi wakati wa Vita vya Pili vya Dunia. Yeye pamoja na washiriki wengine wa familia walipelekwa katika kambi ya mateso ya Ravensbrück nchini Ujerumani kwa sababu ya kukataa kuwaunga mkono Wanazi. Magdalena anakumbuka hivi: “Nyakati fulani walinzi walituzuia kuongea na wafungwa wengine. Hata hivyo, hawakuweza kutuzuia kutabasamu. Kumwona mama na dada yangu wakitabasamu kulifanya nijiamini na kuliimarisha azimio langu la kuendelea kuvumilia.”

Huenda hekaheka za maisha zinafanya iwe vigumu kwako kutabasamu. Lakini, kumbuka kwamba kwa kawaida hisia hutegemea kile unachofikiria. (Methali 15:15; Wafilipi 4:8, 9) Hivyo, hata hali ziweje, ni muhimu kujitahidi kukazia fikira mambo mazuri kwa kadiri inavyowezekana!  * Kusoma Biblia na kusali kumewasaidia wengi kukazia fikira mambo mazuri. (Mathayo 5:3; Wafilipi 4:6, 7) Kwa kweli, maneno yanayorejelea “furaha” na “shangwe” yanapatikana mara nyingi sana katika Biblia! Kwa nini usipange kusoma kurasa moja au mbili za Biblia kila siku? Ukifanya hivyo, huenda wewe pia ukachochewa kutabasamu mara kwa mara.

Pia, usisubiri wengine waanze kutabasamu, kisha wewe ufuate. Chukua hatua ya kwanza kutabasamu na hivyo kuchangia furaha ya mtu mwingine. Naam, ione tabasamu kuwa zawadi tuliyopewa na Mungu ambayo ina faida kwako na kwa wengine pia.

^ fu. 3 Biblia inatumia lugha ya mfano, kumweleza Mungu akitabasamu. Andiko la Zaburi 119:135 linasema hivi: “Ufanye uso wako umwangazie [kwa kibali] mtumishi wako.”

^ fu. 8 Soma makala “Je, Wewe ‘Huwa na Karamu Sikuzote’?” katika Amkeni! la Novemba 2013

Pata Kujua Mengi Zaidi

MNARA WA MLINZI (TOLEO LA FUNZO)

Jinsi Tunavyoweza Kudumisha Maoni Yanayofaa

Kwa nini watu wengi hupambana na maoni yasiyofaa? Makala hii inatuonyesha jinsi tunavyoweza kutumia Biblia ili itusaidie kudumisha maoni yanayofaa kujihusu.