Februari 21, 2017, Wizara ya Haki ya Shirikisho la Urusi ilitoa agizo jipya kwa Kituo cha Usimamizi cha Mashahidi wa Yehova nchini Urusi. Wizara hiyo inaagiza kwamba Kituo cha Usimamizi kitoe habari zinazohusu makutaniko yote 2,277 ya Mashahidi wa Yehova kotekote nchini Urusi.

Wizara ya Haki ilitoa agizo hilo jipya ilipokuwa ikifanya ukaguzi wa Kituo cha Usimamizi, ulioagizwa na Ofisi ya Mwendesha-Mashtaka Mkuu. Wakati wa ukaguzi huo, wenye mamlaka walikazia uangalifu mashirika ya kisheria tu ambayo Mashahidi wanayatumia. Mashirika hayo yanatia ndani Kituo cha Usimamizi pamoja na Local Religious Organizations (Mashirika ya Kidini ya Mashahidi wa Yehova, LRO), ambayo makutaniko hutumia ili kupata hati-miliki ya majengo yao kwa ajili ya huduma za kidini. Februari 27, 2017, Wizara ya Haki ilikamilisha ukaguzi wake na kuripoti kwamba Kituo cha Usimamizi kilikuwa kimekiuka sheria na kuonyesha dalili za kujihusisha katika “utendaji wenye msimamo mkali.”

Mashahidi wa Yehova ulimwenguni pote wanahangaikia sana waamini wenzao nchini Urusi. Kwa kutoa agizo hili la pili, Wizara ya Haki imeelekeza fikira zake kwenye makutaniko ya Mashahidi wa Yehova. Kwa kutegemea matendo ya karibuni ya wenye mamlaka, Mashahidi wanaamini kwamba Mwendesha-Mashtaka Mkuu anataka kufunga mashirika yote ya kisheria ya Mashahidi wa Yehova na pia kuwapiga marufuku Mashahidi wa Yehova kotekote katika Shirikisho la Urusi.