Hamia kwenye habari

URUSI

Wamefungwa kwa Sababu ya Imani Yao

Wamefungwa kwa Sababu ya Imani Yao

Wenye mamlaka nchini Urusi wanaendelea kuwashambulia vikali Mashahidi wa Yehova kwa kuendeleza kampeni kama walivyofanya enzi za Sovieti. Kufikia Juni 17, 2021, wenye mamlaka walikuwa wamewaweka mahabusu Mashahidi 53 na wamewahukumu kifungo cha nyumbani Mashahidi 36, na Mashahidi 224 hawaruhusiwi kutoka katika maeneo wanayoishi. Wote wameshtakiwa kwa kosa la kupanga, kushiriki, au kuchangia kifedha utendaji wa shirika lenye “msimamo mkali.” Mashahidi 418 hivi wanafanyiwa uchunguzi kwa sasa, kuanzia walio na umri wa miaka 20 hadi wenye miaka 90.

Maofisa wanajaribu kutetea matendo yao kwa kutaja kwamba mashirika ya kisheria ya Mashahidi yalipigwa marufuku Aprili 2017 na wanatumia vibaya Kifungu cha 282 cha Sheria ya Uhalifu inayohusiana na shughuli zenye msimamo mkali. Kihalisi wanawakamata Mashahidi wa Yehova kwa kuendesha ibada yao kwa amani. Ikiwa watapatikana na hatia, baadhi ya Mashahidi waliokamatwa wanaweza kuhukumiwa kifungo cha kufikia miaka kumi gerezani.

Mfuatano wa Shughuli za Urusi Kuwakamata, Kuwaweka Kuzuizini na Kuwafunga Gerezani Mashahidi wa Yehova

Tangu Februari 2018, maofisa wa sheria wamekuwa wakiwakamata Mashahidi wa Yehova na kuwaweka mahabusu. Maofisa wa polisi wenye silaha wanavamia nyumba za Mashahidi, mara nyingi wanawaelekezea wote bunduki, kutia ndani watoto na wazee na kuwalazimisha walale chini. Maofisa wanapopekua nyumba zao, wanapora vitu vya kibinafsi na kuwachukua Mashahidi kwa ajili ya mahojiano zaidi. Wachunguzi wanaanzisha uchunguzi wa uhalifu dhidi ya baadhi ya Mashahidi kwa madai ya kujihusisha na utendaji wenye msimamo mkali na kuiomba mahakama iwaweke mahabusu. Mashahidi wanapowekwa mahabusu, waendesha mashtaka huiomba mahakama iwaongezee Mashahidi hao muda wa kukaa mahabusu na mara nyingi mahakama inakubali maombi yao. Ufuatao ni muhtasari wa hali ambazo Mashahidi 11 wamekabili, walivyotendewa vibaya na kupelekwa gerezani kwa kosa la kushiriki katika shughuli zenye msimamo mkali. *

Valentina Baranovskaya alikamatwa Aprili 10, 2019, baada ya askari wenye silaha kuvamia nyumba nne za Mashahidi wa Yehova kutia ndani nyumba yake, katika eneo la Abakan. Mwana wake, Roman Baranovskiy, alikamatwa pia. Maofisa hao walichukua Biblia zao, vifaa vyao vya kielektroni, na rekodi zao za kibinafsi. Baadaye, walifunguliwa kesi ya uhalifu. Februari 24, 2021, Mahakama ya Jiji la Abakan katika Jamhuri ya Khakassia ilimhukumu Bi. Baranovskaya kifungo cha miaka miwili gerezani. Hii ni mara ya kwanza kwa Shahidi mwanamke kufungwa gerezani kwa sababu ya imani yake. Bi. Baranovskaya ana umri wa miaka 70 na Julai 2020, aliugua ugonjwa wa kiharusi. Mahakama ilimhukumu pia Bw. Baranovskiy kifungo cha miaka sita gerezani.

Aleksandr Ivshin ana umri wa miaka 63 na Aprili 23, 2020, alifunguliwa kesi ya uhalifu. Miongoni mwa “makosa” yake ni kupanga utendaji wa kidini kupitia video mtandaoni na kuimba nyimbo za kidini. Wenye mamlaka walipokuwa wakipekua nyumba ya Bw. Ivshin, hali hiyo ilimsababishia kupata matatizo ya shinikizo la damu. Miezi kadhaa baada ya upekuzi, gari lake lilichukuliwa na wenye mamlaka. Februari 10, 2021, Mahakama ya Wilaya ya Abinskiy iliyo katika Eneo la Krasnodar ilimhukumu Bw. Ivshin. Alihukumiwa kifungo cha miaka saba na nusu gerezani, na kifungo hicho ni kirefu na kigumu zaidi kupewa Shahidi wa Yehova tangu kutolewa kwa marufuku ya Mahakama Kuu mwaka wa 2017.

Dennis Christensen ambaye ni raia wa Denmark mwenye umri wa miaka 46, ambaye alikamatwa katika mkoa wa Oryol. Ilikuwa Juni 23, 2017, ambapo polisi wenye silaha walivamia mkutano wa Mashahidi wa Yehova ambao Bw. Christensen alikuwa akihudhuria unaofanywa kila juma kwa amani. Baada ya kesi yake kusikilizwa mahakamani kwa zaidi ya mara 50 katika mwaka mmoja, mahakama ikamhukumu miaka sita gerezani kwa kosa la kukutana tu na Mashahidi wenzake wa Yehova. Februari 6, 2019, Hakimu Aleksey Rudnev wa Mahakama ya Wilaya ya Zheleznodorozhniy katika mkoa wa Oryol alisoma hukumu ya Bw. Christensen kwa madai ya uwongo kwamba ‘alipanga utendaji wa shirika lenye msimamo mkali,’ chini ya Kifungu 282.2(1) cha Sheria ya Uhalifu ya Serikali ya Urusi. Mei 23, 2019, jopo la mahakimu watatu la Mahakama ya Mkoa wa Oryol lilikataa rufaa ya Dennis Christensen na kuunga mkono hukumu ya kifungo cha gerezani cha miaka sita.Kwa sasa yuko katika Gereza Na. 3 lililo katika jiji la Kursk, kipindi cha kifungo hicho kitafika kikomo mwezi Mei 2022

Sergey Klimov alikamatwa tarehe 3 Juni, 2018, baada ya maofisa wa polisi na kikosi maalumu kuvamia nyumba mbili za Mashahidi wa Yehova. Ndugu na dada 30 hivi walikamatwa na kwenda kuhojiwa, kutia ndani dada mwenye umri wa miaka 83. Wote waliachiliwa isipokuwa Ndugu Klimov. Alifunguliwa mashtaka ya kihalifu na mahakama ikaamuru awekwe kizuizini miezi miwili akisubiri kesi ianze. Muda wake wa kukaa kizuizini uliongezwa mara saba, ikimaanisha kwamba hata kabla ya kuanza kifungo chake cha miaka sita, tayari alikuwa amefungwa na kutenganishwa na mke na familia yake kwa mwaka mmoja na miezi mitano.Mwishowe, kesi yake ilisikilizwa na akahukumiwa. Novemba 5, 2019, Mahakama ya Wilaya ya Oktyabrsky ya Tomsk ilimhukumu Bw. Klimov kifungo cha miaka sita gerezani kwa madai ya ‘kupanga shughuli za watu wenye msimamo mkali.’ Bw. Klimov ataachiliwa huru Julai 2023.

Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, na Aleksey Miretskiy walifunguliwa mashtaka ya kihalifu baada ya wenye mamlaka nchini Urusi kuvamia nyumba za Mashahidi saba huko Saratov Juni  12, 2018. Siku hiyo, polisi walivunja milango ya nyumba na kupora vitu vyao vya kibinafsi, na nyakati nyingine, kuwapandikizia machapisho ya kidini ya Mashahidi wa Yehova yaliyopigwa marufuku. Polisi hao waliwakamata Mashahidi zaidi ya kumi kwa ajili ya kuhojiwa na waliwashikilia mpaka usiku sana. Na baada ya hapo waliweka watatu kati yao kizuizini, nao wamekuwa kizuizini kwa karibu mwaka mmoja hivi,

Septemba 19, 2019, Hakimu Dmitry Larin wa Mahakama ya Wilaya ya Leninskiy iliyo katika mkoa wa Saratov akawahukumu wanaume hao sita vifungo vya vipindi virefu kwa kuwasingizia kosa la ‘kupanga shughuli zenye msimamo mkali.’ Wawili kati yao walihukumiwa kifungo cha miaka mitatu na nusu, mmoja alihukumiwa kifungo cha miaka mitatu na wengine watatu walihukumiwa kifungo cha miaka miwili. Kwa kuongezea, hukumu inasema kwamba baada ya kifungo hicho, wote hawataruhusiwa kuwa na vyeo vyovyote katika mashirika ya serikali kwa muda wa miaka mitano. Wanaume hawa wamekuwa wakitendewa kikatili pia wakiwa gerezani. Februari 6, 2020, walinzi wa gereza la Penal Colony No.1walitumia rungu kuwapiga vibaya Aleksey Budenchuk, Gennadiy German, Roman Gridasov, Feliks Makhammadiyev, na Aleksey Miretskiy. Bw. Makhammadiyev alipigwa vibaya sana kiasi kwamba ilibidi apelekwe hospitali kwa sababu walinzi hao walimvunja ubavu, wakatoboa pafu lake, na kuharibu figo yake.

Upekuzi na Uvamizi Mkubwa Wafanyika Julai 2020

Julai1 2, 2020, maofisa wa Idara ya Usalama wa Taifa (FSB) walivamia nyumba tatu hivi za Mashahidi wanaoishi Prokopievsk, Eneo la Kemerovo. Mashahidi kadhaa walikamatwa na kupelekwa katika makao makuu ya FSB ili kuhojiwa na kisha wakaachiliwa huru. Hata hivyo, Andrey Vlasov, Shahidi mlemavu anayetumia bakora ili kutembea, aliwekwa kizuizini kwa siku mbili. Alifunguliwa mashtaka ya uhalifu na Julai14 alihukumiwa kifungo cha nyumbani kwa muda wa miezi miwili

Julai 13, zaidi ya nyumba 100 za Mashahidi zilifanyiwa upekuzi katika vijiji kadhaa kwenye Eneo la Voronezh na katika jiji la Stariy Oskol, Eneo la Belgorod. Mashtaka ya uhalifu yalifunguliwa na Mashahidi kumi wanaume walihukumiwa kuwekwa kizuizini kabla ya kesi yao Septemba 3. Mashahidi wawili hivi walipigwa vibaya na maofisa wa Kikosi Maalumu waliovamia nyumba ya Alexander Bokov. BwanaBokov alipigwa katika tumbo, kichwa, na kisha akalazimishwa kuchuchumaa huku akihojiwa na maofisa. Dmitry Katirov alisukumwa na kuangua sakafuni, akapigwa mateke mpaka alipolia kwa uchungu

Jitihada Zinazoendelea za Kukomesha Vifungo Visivyo vya Haki

Mawakili wa Mashahidi walituma malalamiko yao kwenye Kamati ya Umoja wa Mataifa ya Haki za Kibinadamu na kwenye Kikundi cha Umoja wa Mataifa Kinachoshughulikia Vifungo Vilivyo Kinyume cha Sheria (WGAD). Wametuma malalamiko mara 57 kwenye Mahakama ya Ulaya ya Haki za Kibinadamu (ECHR). Hivyo, juhudi zao zote za kusimamisha vifungo hivyo visivyo vya haki hazikufanikiwa kabisa.

Baadhi ya mabaraza ya kimataifa yameshutumu nchi ya Urusi waziwazi kwa sababu ya jinsi inavyotendea Mashahidi wa Yehova. Kwa mfano, katika uamuzi uliofikiwa Aprili 26, 2019, WGAD ilipinga vikali mateso yote ya Mashahidi wa Yehova kwa ujumla katika kesi iliyomhusu Bwana Dmitriy Mikhailov aliyetokea jiji la Shuya. WGAD ilimalizia kwa kutaja kuwa kukamatwa na kuwekwa mahabusu kwa Bwana Mikhailov kulitegemea ubaguzi wa kidini na ilitaja wazi kwamba kesi yake ni ‘moja tu kati kesi nyingi zinazozidi kuongzeka dhidi ya Mashahidi wa Yehova ambao wamekamatwa, kuwekwa mahabusu na kushtakiwa kwa makosa ya kufanya shughuli za kihalifu kwa sababu tu ya kutumia haki yao ya uhuru wa kidini’.

Machi 12, 2020, Baraza la Kudumu la Shirika la Usalama na Ushirikiano wa Ulaya (OSCE) limeshutumu vikali na kusema hivi: “Muungano wa Ulaya unaendelea kusikitishwa na hali ya Mashahidi wa Yehova nchini Urusi ambao wanateswa kimakusudi, . . . tunahangaishwa sana na ripoti za karibuni za kwamba walinzi wa magereza na polisi wamewatesa na kuwatendea vibaya baadhi ya Mashahidi wa Yehova walio kizuizini au kabla ya kuwapeleka kizuizini. .  . Mateso huvunja sheria za kimataifa za haki ya kibinadamu, hasa Mkataba wa Kimataifa wa Haki za Kiraia na Kisiasa, Mkataba wa Ulaya wa Haki za Kibinadamu, na Kongamano la Umoja wa Mataifa dhidi ya Mateso na Matendo au Adhabu Nyingine ya Kikatili, ya Kinyama, na Yenye Kushushia Hadhi, ambazo Shirikisho la Urusi lilikubali kutii.”

Mfuatano wa Matukio

  1. Juni 17, 2021

    Jumla ya Mashahidi 53 wako gerezani.

  2. Februari 24, 2021

    Mahakama ya Jiji la Abakan ya Jamhuri ya Khakassia yamhukumu Valentina Baranovskaya kifungo cha miaka miwili gerezani. Na mwana wake pia, Roman Baranovskiy, alihukumiwa kifungo cha miaka sita gerezani.

  3. Februari 10, 2021

    Mahakama ya Wilaya ya Abinskiy District Court iliyo katika Eneo la Krasnodar ilimhukumu Aleksandr Ivshin kifungo cha miaka saba gerezani.

  4. Septemba 2, 2020

    Mahakama ya mji wa Berezovsky eneo la Kemerovovo yamhukumu Sergey Britvin na Vadim Levchuk kifungo cha miaka minne gerezani.

  5. Agosti 3, 2020

    Mahakama ya Eneo la Pskov ilifanya uamuzi wa kumwachilia Gennady Shpakovskiy kutoka gerezani. Ilidumisha hukumu yake lakini ikabadili kifungo chake cha miaka sita na nusu gerezani kuwa kifungo cha nje kwa muda uliokuwa umeamuliwa awali.

  6. Julai 13, 2020

    Nyumba 100 hivi za Mashahidi zapekuliwa katika maeneo ya Voronezh na Belgorod.

  7. Juni 9, 2020

    Mahakama ya Jiji la Pskov yamhukumu Ndugu Gennady Shpakovskiy mwenye umri wa miaka 61 kifungo cha miaka saba na nusu gerezani.

  8. Februari 6, 2020

    Mashahidi watano kati ya wale sita waliohukumiwa Septemba 19, 2019, wamehamishiwa kwenye gereza la Penal Colony Na. 1 lililo Orenburg. Walipowasili walinzi wa gereza waliwapiga sana kwa mateke na rungu. Bw. Makhammadiyev alivunjwa ubavu, kisha mapafu yakaumia na pia ini lake lilipata madhara.

  9. Septemba 19, 2019

    Hakimu Dmitry Larin wa Mahakama ya Wilaya ya Leninskiy iliyo Saratov amewahukumu wanaume sita ambao ni Mashahidi wafungwe gerezani. Majina yao ni—Konstantin Bazhenov, Aleksey Budenchuk, Feliks Makhammadiyev, Roman Gridasov, Gennadiy German, na Aleksey Miretskiy—kwa kuwasingizia kwamba ‘wamepanga shughuli zenye msimamo mkali.’

  10. Mei 23, 2019

    Mahakama ya Mkoa wa Oryol yakataa rufaa ya Dennis Christensen na kuunga mkono hukumu ya kifungo cha gerezani cha miaka sita.

  11. Aprili 26, 2019

    Kamati ya Umoja wa Mataifa ya vifungo visivyo vya Haki iliona kwamba Dimtriy Mikhailov alitendewa isivyo haki na kutangaza wazi kwamba nchi ya Urusi inawatendea Mashahidi wa Yehova kikatili.

    Kikosi cha polisi kilivamia nyumba katika eneo la Smolensk. Wanaume wanne Mashahidi walikamatwa na kuwekwa mahabusu.

  12. Februari 6, 2019

    Mahakama ya Wilaya ya Zheleznodorozhniy yamtangaza Dennis Christensen kuwa na hatia na kumhukumu kifungo cha miaka sita.

  13. Oktoba 9, 2018

    Polisi na kikosi maalumu walivamia nyumba jijini Kirov. Wanaume kadhaa Mashahidi kutia ndani Andrzej Oniszczuk, ambaye ni raia wa Polandi, walikamatwa na kuwekwa mahabusu

  14. July 15, 2018

    Polisi wafanya msako katika nyumba kadhaa za Mashahidi jijini Penza. Vladimir Alushkin amekamatwa na kuwekwa mahabusu.

  15. Julai 4, 2018

    Polisi wavamia nyumba katika eneo la Omsk. Sergey na Anastasia Polyakov wakamatwa na kuwekwa mahabusu. Bi. Polyakova ni Shahidi wa kwanza mwanamke nchini Urusi kufungwa kwa mashitaka ya kuwa na msimamo mkali.

  16. Juni 12, 2018

    Polisi wavamia nyumba katika eneo la Saratov. Wanaume kadhaa Mashahidi wakamatwa na kuwekwa mahabusu.

  17. Juni 3, 2018

    Polisi wavamia nyumba katika eneo la Tomsk na Pskov. Sergey Klimov akamatwa na kuwekwa mahabusu.

  18. Februari 19, 2018

    Kesi ya uhalifu ya Dennis Christensen yaanza kusikilizwa katika Mahakama ya Wilaya ya Zheleznodorozhniy. Hakimu Aleksey Rudnev ndiye anayeshughulikia kesi hiyo.

  19. Julai 20, 2017–Novemba 2018

    Dennis Christensen aongezewa mara kadhaa muda wa kubaki mahabusu, mara ya kwanza na Mahakama ya Wilaya ya Sovietskiy na kisha Mahakama ya Wilaya ya Zheleznodorozhniy. Kwa sasa amefungwa mpaka Februari 1, 2019.

  20. Mei 26, 2017

    Mahakama ya Wilaya Sovietskiy ya Oryol yamhukumu Dennis Christensen kubaki mahabusu kwa miezi miwili kabla ya kesi yake kusikilizwa.

  21. Mei 25, 2017

    Polisi wavamia ibada jijini Oryol na kumkamata Dennis Christensen.

  22. Aprili 20, 2017

    Mahakama Kuu za Shirikisho la Urusi inaamua kufunga ofisi ya Mashahidi wa Yehova na kufuta mashirika 395 ya kidini (LRO) la Mashahidi wa Yehova.

^ fu. 5 Tembelea tovuti ya jw.org ili kupata habari zaidi kuwahusu Mashahidi wengine wanaoteswa kwa sababu ya imani yao nchini Urusi.